Nm 4:15 - Chuj San Sebastian Bible

¹⁵ A yic tzlajw e pichn smasnil jun tzo'n̈ tas caw niwn yel'ch tic, yic wach'x yaji, tztac' xo sjaw eb' yin̈tl Coat, yic tzyi'n 'at eb' smasnil. Palta a smasnil jun tzo'n̈ wic yaj tic, matz tac' syamn eb' yet' sc'ab', sec wach' matz cham eb' yu'uj. Smasnil jun tzo'n̈ syamc'ab'il Mantiado cha, a eb' yin̈tl Coat yowlal a eb' tz'i'n 'ati.

Chuj San Mateo Bible

¹⁵ Ayic slajvi e pichan masanil juntzan̈ tastac nivan yelc'och chi', vach'xo yaji yic tz'ic'jib'ati, scot eb' yin̈tilalcan vin̈aj Coat yic syic'anb'at eb'. Masanil juntzan̈ tastac to vic yaj chi', max yal-laj syaman eb' yic max cham eb' yuuj. Masanil jantac syamc'ab'il yic in cajnub' b'aj tzin ch'ox in b'a, a eb' yin̈tilalcan vin̈aj Coat yovalil tz'ic'anb'ati.

Nm 4:15 Referans Kwoze

Nm 7:9

Ax pax 'a eb' yin̈tl Coat, ma'ix 'ajx scareta eb' yet' no wacax, yujto a eb' tz'i'n 'at smasnil syamc'ab'il scajnub' Dios 'a squelab'.

Dt 31:9

'Ix stz'ib'n can Moisés smasnil jun tzo'n̈ ley tic, xya'n can 'a eb' ya'mal 'och sti eb' 'anma 'a Dios, atn eb' yin̈tl can Leví; eb' yi'mal b'ey scaxail strato Jehová. Xya'n pax 'a eb' yichmtac wincal chon̈ab'.

Nm 10:21

Tza'n pax scot eb' yin̈tl Coat, a eb' 'et'jnac syamc'ab'il scajnub' Dios. Ax yic xjaw eb', tox 'ix b'o chan̈ scajnub' Dios chi yuj jun tzo'n̈ xo eb' yit levitail cha.

1 Cr 15:2

Xlajw cha, 'ix yaln David chi 'ixtic: A eb' man̈ levitaoc, matz tac' yi'n cot eb' te scaxa Dios, palta cojn eb' levita smoj yi'n cot te', yujto a eb' sic'b'il 'el yuj Jehová, yic tzyi'n cot eb' te caxa cha, cojn eb' tztac' ya'n servil Jehová 'a smasnil tiempo, xchi.

A Ch'an̈ B'ab'el Libro Samuel 6:19

Palta ax Dios, 'ix smil cham jun tzo'n̈ eb' 'aj Bet-semes cha, yujto say eb' yil tas 'ay 'a yojl te caxa cha. 'Ix cham 70 eb' winc chi yu'uj, a eb' 'anma 'a jun chon̈b' cha, caw wal tz'oc' eb' si'mb'il, yujto niwquil jun chaml chi x'och 'a scal eb' yuj Jehová.

1 Cr 15:15

A yet' b'achte 'ix yij cot eb' te 'a sjolm squelab', 'icha yutjnac Moisés yaln yuj Jehová.

A Ch'an̈ Schab'l Libro Samuel 6:13

A yic jab'nant scot eb' 'et'jnac te cha, 'ix ya'n David jun no quelm wacax yet' jun no mam calnelu caw b'a'ch xajmb'alil.

Josué 4:10

Ax eb' 'et'jnac te caxa cha, 'ix 'ochcn wan lin̈n eb' 'a spacl a Jordán, ya sb'a ax eb' yit chon̈b' eb' cha, xlaj sb'o eb' tas xyal Jehová 'a Josué, caw ji'lti x'e't eb' 'a yojl a'.

Nm 3:38

Ax 'a stojlal 'aj tzq'uel c'u 'a yojltac scajnub' Dios, 'a yojltac Mantiado 'aj tzchaj sb'a eb' 'anma yet'oc, ata 'ay smantiado Moisés yet' Aarón, yet' pax eb' yunnal Aarón cha, atn eb' tz'a'w servil 'a yojl scajnub' Dios sjelc eb' yit israelal. Toto 'ay mach tzcomn 'och 'a jun 'opiso cha, to man̈ yopisooc yaji, yowlal tzchami.

Nm 1:51

Toto 'ay 'aj 'oj 'ijxoc 'ati, a eb' 'ajcuenta xuyn cha'an̈, tzb'on pax 'ejm eb' 'a 'aj tzc'och cha. Tzann̈j 'anmal tzjaw 'a stz'ey in cajnub' cha, toto man̈ levitaoc, tojln̈ej schami.

Ex 19:12

Tza'n 'ejm junc yechl 'a yich jun witz tic, sec man̈xtzac stac' yec' eb' 'anma ta'. Tzaln pax 'a eb', to niwn cab' yel'ch jun witz tic 'a sat eb', matz tac' sq'uet eb' 'a sjolm lu'um, matz tac' pax yochl eb' 'a yich lu'um. Toto 'ay junc eb' tz'ochl 'a yich lu'um, tojln̈ej cab' schami.

Ex 27:7

A te can̈nub' cha, yowlal tz'ec' eb' te 'a yojl eb' q'uen argoya 'a schicn jun yet'l xajmb'al cha, sec wach' sb'achx b'eyoc.

Lv 16:13

Tzlajw cha, tzya'n q'ue jun incienso chi 'a yib'n̈ stzac'ac' cha, tzya'n 'och 'a wojltac, ax jun tab' chi tz'a'n macchjoc 'el yib'n̈ smacl sti scaxail in trato. 'Ixta tz'aji, sec ma'oj cham Aarón cha.

Nm 1:50

Yujto a eb' levita chi 'oj a'ch ya'malc servil in cajnub' 'aj 'ayc' scaxail in trato, yet' smasnil yamc'ab' tzc'anlb'ax 'a 'a. An̈jtona', a eb' 'oj 'i'nc b'ey jun in cajnub' chi yet' smasnil syamc'ab'il. Yowlal tzcann̈j cajn eb' 'a spatquil 'el in cajnub'.

Nm 4:14

Ax 'a yib'an̈, ata tzeyac' q'ue smasnil tas tzc'anx 'a jun yet'l xajmb'al cha: atn jun tzo'n̈ yet'l stzac'ac', jun tzo'n̈ syamnub'al, jun tzo'n̈ sluchlab'il, jun tzo'n̈ niwc 'uc'ab', yet' smasnil syamc'ab'il jun yet'l xajmb'al cha. Ax 'a yib'n̈ smasnil jun tzo'n̈ tic, ata tzeyac' q'ue junc no tz'um caw tzlab'b'i, tzeya'n pax 'och sb'achnub'al.

Nm 4:19

sec wach' ma'oj comn cham eb', yic tzyamn eb' jun tzo'n̈ tas to wic yaji. Yowlal tze b'eylb'ej jun tzo'n̈ 'oj wal tic: Ach Aarón ach tic yet' eb' onnal, yowlal ax 'oj eyal 'a eb' tastc 'oj sb'o junjn eb', yet' pax tastc 'oj yic' eb'.

Nm 4:20

Yuj cha, matz tac' yoch eb' junc rato 'at yil jun tzo'n̈ tas to wicn̈ej yaji, sec wach' matz cham eb' yu'uj, xchi Dios.

Nm 18:3

Atn eb' 'oj munljoc et' 'a in cajnub' cha, palta checln̈ej 'aj wach' scolwj eb'. Matz tac' yochch eb' 'aj 'ay syamc'ab'il in cajnub', mto 'a yet'l xajmb'al. Toto ma'ay 'oj cham eb', ax e cham pax jun xo.

A Ch'an̈ Schab'l Libro Samuel 15:24

An̈jtona', tza'n 'och win Sadoc yet' Abiatar yuj eb', yet' eb' yin̈tl Leví 'ayc' yet'oc, eb' 'et'jnac te scaxail strato Dios. 'Ix ya'n 'ejm eb' scaxail trato chi 'a sat lu'um masnto xlajw 'elt eb' 'anma 'a yol chon̈b' cha, x'och tza'n eb' yuj David.

1 Cr 23:26

Yuj cha, man̈xtoc 'oj 'ijxc b'eyc'oc smantiado Jehová yuj eb' levita, yet' jantcn̈ej syamc'ab'il yic tz'och 'emmquilal, xchi.

Ex 19:21

'Ix yaln Jehová 'ixtc 'a 'a: —A ticnec, 'ixic, 'at al 'a eb' et chon̈b' cha, to matz tac' sc'axw 'e't eb' 'a 'aj 'aycn 'ejm yechl o'oj, matz tac' ya'n pural eb' in yilni; to ma'ay, 'ay smay niwn eb' 'oj chamoc.

A Ch'an̈ B'ab'el Libro Yic Yab'ixal Eb' Rey 8:3

Ax yic xjaw smasnil eb' yichmtac wincal chon̈ab', yet' eb' ya'mal 'och sti eb' 'anma 'a Dios, xyi'n cot eb' te scaxail strato Jehová,