Nm 13:28 - Chuj San Sebastian Bible

²⁸ Palta ax eb' 'anma cajn 'a sat lu'um, caw wal 'ay yip eb'. A schon̈b' eb', caw wal niwac, 'aych pax smuroal. An̈jtona', xquil pax eb' yin̈tl win Anac on̈, caw wal niwc stel eb'.

Chuj San Mateo Bible

²⁸ Palta a eb' anima cajan ta' te tec'an eb', yelxo val nivac chon̈ab' yilji schon̈ab' eb'. Ayoch smuroal spatictac schon̈ab' eb' chi'. An̈ejtona' ix quilpax eb' vin̈ vinac te chaan̈ steel, aton eb' yin̈tilalcan vin̈aj Anac.

Nm 13:28 Referans Kwoze

Dt 1:28

Ax ticnec, ¿'aj wach' tzon̈ c'ochec? A eb' quit chon̈b'ec tic, 'ix yal eb' to a 'a jun lugar cha, 'ay eb' 'anma caw jeln to 'a quib'n̈ec. Caw niwc stel eb', caw niwc pax ab' schon̈b' eb', chan̈ pax ab' ya'jt smuroal schon̈b' eb' cha. Xyiln pax ab' eb' ewin yin̈tl win Anac, atn eb' niwc ste'il, caw 'ay smay eb', atn wal yuj jun tzo'n̈ eb' cha, caw tzon̈ xiwec, xe chi.

Josué 11:22

Yuj cha, man̈x 'a junc eb' yin̈tl win Anac xcan 'a sat slum eb' israel. Cojxn 'a Gaza, 'a Gat yet' 'a Asdod, ata xcan jaywn̈ xo eb' yin̈tl win cha.

Nm 13:33

'Ix quil eb' niwc stel ta 'on̈, atn eb' yin̈tl can win Anac. An̈ec xo tic, yo'lab' wal tzon̈ 'ajc 'och wetzn 'a stz'ey eb' 'icha no cotc c'ulub', an̈jtona', 'ixta pax on̈ yiln 'och eb', xchi eb'.

Josué 15:14

A 'oxwn̈ eb' yin̈tl win Anac chi spechl Caleb chi 'a lum Hebrón cha, atn Sesai, Ahimán yet' win Talmai.

Dt 3:5

Smasnil jun tzo'n̈ chon̈b' cha, macb'il yuj smuroal, caw chan̈ yaj sb'o'i, q'uen pax smac 'aychi, 'aych pax jun tzo'n̈ q'uen hierro syamnub'loc. 'Ayt pax jun tzo'n̈ chon̈b' may smuroal, man̈ 'ayc 'och sb'isloc, palta 'ix qui satc 'el eb'.

Dt 2:21

A eb' 'anma cha, caw niwn sb'isl eb' 'a yol schon̈ab', caw niwc pax stel eb'. Lajn eb' 'icha eb' yin̈tl Anac. Palta a Jehová, a satn 'el eb' yuj eb' amonita. A yic xlajw 'el eb' 'a sat lu'um, ax eb' amonita chi xcajn lu'um.

Jueces 1:20

'Ix ya'n eb' lum Hebrón 'a Caleb, 'icha yaj yaln can Moisés. Ax Caleb chi 'ix pechn 'el eb' 'oxwn̈ yin̈tl can yunnal win Anac.

A Ch'an̈ Schab'l Libro Samuel 21:16

'Ay jun winc caw niwquil ste'il, tzcuch Isbi-benob, yin̈tl eb' niwc ste'il, atn jun chi xnib'n milnc cham David. A slanza cha, 'aym uque'oc libra yalil, ax 'a sincho 'a snan̈al, ata locn 'och jun 'ac' espada.

Josué 14:12

Yuj cha, tzin c'an 'aych ticnec, to tzac' lum jolmctac witz tic 'ayin, 'icha yutjnac yaln can Jehová. Ab'jnac ach tic 'a yic jun tiempoal cha, chajtlto ata cajn eb' niwc winac, eb' yin̈tl can win Anac; caw niwc yaj schon̈b' eb' sb'oni, wach' pax yajch smuroal schon̈b' eb' cha. Palta an tic, caw tzwa'ch Jehová yipc in c'ojol, to 'oj colwjoc wet'oc yic 'oj wi'nc 'el eb' ta', 'icha yaj yaln cani, xchi Caleb.