Nehemías 10:29 - Chuj San Sebastian Bible

²⁹ 'Ix syam sb'a eb' yet' eb' syajlil eb' to yicanto sb'a yet'oc. 'Ix yac' eb' sti', to 'oj sb'eylb'oc eb' sley Dios alb'il can yuj Moisés, win schecb' Dios, ax syiclni pax eb' smasnil schecnb'il, scuynb'il Jehová Dios, ax eb' ma'oj yiclnoc jun trato cha, 'oj jawc catb' 'a yib'n̈ eb'.

Chuj San Mateo Bible

²⁹ A eb' tic ix smolb'ej sb'a eb' yed' eb' sc'ab'yoc yed' pax eb' yajal, ix yac'an sti' eb' to ol sb'eyb'alej schecnab'il Dios eb', aton alb'ilcan yuj vin̈aj Moisés schecab' Dios chi'. Ix yalan eb' to ol sc'anab'ajej val schecnab'il yed' sc'ayb'ub'al Jehová Cajalil eb'.

Nehemías 10:29 Referans Kwoze

Ez 36:27

'Oj wa'ch Wespíritu 'ayex, ax eyiclni in ley, yic tze b'eylb'ani.

Salmos 119:106

'Ix wac' in ti', to yowlal 'oj in yiclc tas xwala', yuj cha, 'oj in b'eylb'oc jun tzo'n̈ a ley tic, yujto tojl eb'.

Jn 15:14

Ax tic, toto tzeyiclj jun tzo'n̈ in checnb'il, to 'ixta', in wach'c'ojl ex.

Ro 12:9

Caw yelc'ojlal tzlaj qui chamc'ojloquec qui b'a. Tzann̈j tas maysch'olnil, qui yajc can 'eli. Ax tastc wach', ca'c 'och qui nab'en 'a 'a.

2 Cr 34:31

'Ix 'och lin̈n win rey 'a stz'ey jun niwquil 'oy. 'Ix sb'on pax strato yet' Jehová, chajtlto 'oj syiclc sb'eylb'an schecnb'il Jehová, scuynb'il, yet' sley. 'Oj syiclc 'a smasnil sc'ojol, 'a smasnil snab'en, ax ya'n 'och 'a yopiso 'icha yaj stz'ib'x can jun trato chi 'a ch'an̈ libro cha.

A Ch'an̈ Schab'il Libro Yic Yab'ixal Eb' Rey 23:3

'Ix 'och lin̈n win rey 'a stz'ey jun 'oy, 'ix ya'n sti 'a yojltac Jehová, to 'oj 'och tza'n eb' yu'uj, ax syiclni eb' smasnil schecnb'il yic trato tz'ib'b'il can 'a ch'an̈ libro cha. An̈jtona eb' chon̈b' chi smasnil 'ix yac' eb' sti', to 'oj syiclc pax eb'.

A Tas Sc'ulejnac Eb' Schecab' Jesús Hechos 23:21

Palta man̈ a cha ab'i', yujto 'ec'b'al chawinc eb' 'oj sc'ub'c 'el sb'a, ax sma'n cham eb' 'a yol b'e. Tolab' xyac' eb' sti', chajtlto ma'oj wa eb', masnto ab' 'oj cham Pablo chi yuj eb'. 'Ix sc'ann eb' syailal 'a Dios, toto ma'oj yac' 'el'choc eb' jun tzyal cha. A ticnec, lista xo yaj eb', wan stan̈wni eb' yab'i', toto 'oj a't Pablo cha, xchi win quelm cha.

A Tas Sc'ulejnac Eb' Schecab' Jesús Hechos 17:34

Palta 'ay jaywn̈ eb' xya'ch sc'ojl 'a Cristo. 'Ix 'och eb' yitb'eymoc Pablo cha. 'Ay jun win Dionisio sb'i, yit yajlil sb'a yet' eb' tzyam sb'a 'a Areópago. 'Ay pax jun 'ix Dámaris sb'i, yet' jun tzo'n̈ xo eb'.

A Tas Sc'ulejnac Eb' Schecab' Jesús Hechos 11:23

Ax yic xc'och Bernabé, 'ix yilni, to til wal swach'c'ojlal Dios 'ix ch'ox 'a eb'. Yuj cha, caw 'ix tzalj yuj eb', 'ix ya'n snab'enoc eb' smasnil. 'Ix yaln 'a eb' chajtlto caw te'n tzyutj sb'a eb', caw tzya'ch eb' snab'en 'a Cajlilec 'a smasnil tiempo.

Jn 7:19

A Moisés, a 'a'jnac can sley Dios 'ayex. Palta 'in may junc ex tzeyiclj tas tzyal jun ley cha. ¿Tas yuj tze nib'j tzin e mila? xchi Jesús 'a eb'.

Jn 1:17

A Moisés ya'jnac can sley Dios 'ayn̈ec. Palta a Jesucristo tzch'oxn swach'c'ojlal Dios 'ayn̈ec. Tzya'n pax jun cuynb'il caw yel.

Malaquías 4:4

Nac cot in checnb'il wa'jnac can 'a in checb' Moisés yic 'ayc' 'a sjolm lum witz Sinaí. A jun tzo'n̈ ley yet' jun tzo'n̈ checnb'il cha, smoj wal to tzeyiclj e masnil ax israel ex tic.

Jeremías 26:4

Tzal 'a eb', chajtlto an Jehová in, an tzwal 'a eb' 'ixtic: Ax tic ma'ix e chaj eyab' in paxti', ma'ix eyiclj smasnil cuynb'il 'ix wal 'ayex.

Is 14:1

A Jehová 'oj sch'oxx schamc'ojlal 'a eb' israel jun 'ejm xo. 'Oj scha si'c pax 'och eb' yico'oc, ax scha cajn pax eb' slum chi jun 'ejm xo. Ax eb' chuc chon̈b'al, 'oj jawc pax cajn eb' 'a scal eb', ax ya'n 'och sb'a eb' 'aj chon̈b'al yet' eb' yin̈tl can Jacob.

Salmos 105:45

'Ixta xyutj Dios yi'n 'elt schon̈ab' sec wach' tzb'eylb'ej eb' schecnb'il, tzyiclni eb' tas tzyal sley. ¡Alx cab' wach' paxti 'a Jehová!

Salmos 8:9

Mamin Jehová Cajlil ach on̈, caw niwn yel'ch a b'i 'a smasnil yolyib'n̈q'uinl tic.

Salmos 8:1

Mamin Jehová Cajlil ach on̈, cojxn̈ej ton a b'i niwn yel'ch 'a smasnil yolyib'n̈q'uinal tic. Niwn pax yel'ch a b'i 'a satcha'an̈.

Nehemías 13:25

A yuj jun cha, xin tej in b'a yet' eb', xin catb'tzej can eb'. 'Ay eb' xin mac'a, xin to'n 'el xil sjolm eb', xwa'n pax pural eb' ya'n sti 'a Dios, to man̈xtzac yij sb'a yunnal eb', yisl eb' yet' eb' chuc chon̈b'al. An̈jtona', matz tac' pax yoch eb' 'ix chuc chon̈b'al chi yistloc eb'. 'Ix waln pax 'ixtic:

2 Cr 6:16

Yuj cha Mamin Jehová, ach qui Diosal on̈, 'el'ch cab' pax tas a ta'wjnac 'a jun a checb' David, yic alni to 'ayn̈j eb' yin̈tl 'oj 'och 'a sdespacho yic tzya'n yajlil 'a yib'n̈ chon̈b' Israel, cojn toto yiclum 'oj yutc sb'a eb' 'ayach, 'icha wal yutjnac sb'a in mam.

A Ch'an̈ Schab'il Libro Yic Yab'ixal Eb' Rey 10:31

Wach'xam to 'ixta', palta ma'ix ya'ch wal Jehú chi 'a sc'ojl syiclni sley Jehová sDiosal yet' eb' yit israelal, 'a smasnil sc'ojol, yujto ma'ix yij 'el sb'a 'a sb'eyb'al Jeroboam, win xjucb'tzan eb' yit israelal 'a maysch'olnil.

Dt 33:4

A jun ley 'ix wa'cn tic, 'icha to smacl eb' yin̈tl Jacob yaji.

Dt 5:32

Yuj cha, yowlal tze b'eylb'ej smasnil schecnb'il Jehová qui Diosalec. Man̈ eyi'l e nab'en 'a 'a.

Dt 5:1

'Ix ya'n Moisés syam sb'a eb' yit chon̈b' smasnil. 'Ix yaln 'a eb' 'ixtic: Ex wit chon̈ab', 'ab'tec wal jun tzo'n̈ checnb'il yet' jun tzo'n̈ cuynb'il tzwalcn eyab'i'. Yowlal to 'oj e cuyu', ax e b'eylb'ani.

Nm 5:21

a Jehová, a 'oj a'n 'och ch'oxnb'ilal 'a scal eb' et chon̈ab', yic tzach sb'inan eb' a maysch'olnilal, 'oj malchan̈ a c'ojol, ax stz'onb' pax 'el a niwnal.

Nehemías 9:38

A yuj smasnil jun tzo'n̈ tic, tzca'n can qui ti an̈ tic, to tz'ib'xcani, chajtlto 'oj qui yiclc 'a caw yel. Yuj cha, a ch'an̈ un̈ 'aj tz'ib'x cha, to tz'och seyo yet' sb'i eb' qui yajlil a ch'an̈, eb' levita yet' eb' ya'mal 'och qui ti', xchi eb' 'a slesal.

Jeremías 34:15

'Ixta pax xeyutj e b'a ax tic, palta 'ix e jel e b'eyb'al, yujto wan e b'on tas caw tzchaj in c'ojol, atn yujto xeya'l eb' eyit chon̈b' 'aych mosoal 'ayx 'a libre, 'ix eya'n can e ti 'a jun e trato 'ix e b'o 'a wojltac, atn 'a watut to wicn̈ej yaji.

Lv 20:26

Ax tic, wach' cab' tzeyutj e b'a 'ayin, yujto an Jehová in tic, caw wach'nn̈ej. An ex in pojcn 'elt 'a scal jun tzo'n̈ xo chon̈ab', sec tzex 'och wico'oc.

1 Cr 9:2

A eb' israel b'ab'l meltzjnac cot pax 'a slu'um yet' 'a schon̈ab', atn eb' ya'mal 'och sti eb' 'anma', eb' ya'mal servil yatut Dios, yet' jun c'aj xo eb' levita.

Nehemías 7:46

A eb' ya'mal servil yatut Dios, atn eb' yin̈tl Ziha, eb' yic Hasufá, eb' yic Tabaot, eb' yic Queros, eb' yic Siaha, eb' yic Padón, eb' yic Lebana, eb' yic Hagaba, eb' yic Salmai, eb' yic Hanán, eb' yic Gidel, eb' yic Gahar, eb' yic Reaías, eb' yic Rezin, eb' yic Necoda, eb' yic Gazam, eb' yic Uza, eb' yic Paseah, eb' yic Besai, eb' yic Mehunim, eb' yic Nefusim, eb' yic Bacbuc, eb' yic Hacufa, eb' yic Harhur, eb' yic Bazlut, eb' yic Mehida, eb' yic Harsa, eb' yic Barcos, eb' yic Sísara, eb' yic Tema, eb' yic Nesíah, eb' yic Hatifa.

Nehemías 8:2

A win Esdras cha, ya'mal 'och sti eb' 'anma yaj win 'a Dios. 'Ix yi'n cot win ch'an̈ ley 'a sat eb' 'anma yamn yaj cha, 'a b'ab'l c'u yic yucl 'uj. Ata syam sb'a smasnil eb' winac, smasnil eb' 'ix 'ix, yet' smasnil eb' 'unn tzax nachj 'el yu'uj.

Nehemías 8:3

'Ix chaj 'el yich yawtn ch'an̈ ley chi 'a sat eb' chon̈ab', 'a sq'uin̈b'ial masnto x'och chimc'ual, atn 'a plas 'a sti puerta 'aj tz'elt eb' 'ix 'ix cuchj a cha. Smasnil eb' chon̈ab', smaclj eb' yab' yawtx ch'an̈ un̈ cha, eb' winac, eb' 'ix 'ix yet' smasnil eb' 'unn tzax nachj 'el yu'uj.

Nehemías 9:2

Tzpojn 'el sb'a eb' israel chi 'a scal eb' chuc chon̈b'al. Xq'ue lin̈n eb' yaln smul yet' smul eb' smam yichm eb'.