Jueces 11:35 - Chuj San Sebastian Bible

³⁵ A yic 'ix yiln sb'a win 'a jun c'otn yisl cha, 'ix stzilnjat win spichul yic tzch'oxn 'el win scusc'ojlal. 'Ix yaln win 'ixtc 'a 'ix: —¡'Ay wisil! Caw wal tza'ch in cusc'ojlal tzwab'i. Ach wal tza loc cot yailal 'a wib'an̈, yujto 'ay jun in ti 'ix wac' 'a Jehová, to yowlal tzwac' 'el'choc tas xwal cha, xchi winac.

Chuj San Mateo Bible

³⁵ A val yic ix elta ix chi', ix sn̈ic'chitanb'at spichul vin̈ yuj scusc'olal, ix yalan vin̈: —Ay... ach visil. Svab' val syail uuj. Ix ic' val cot jun yaelal tic d'a vib'an̈, yujto ix vac' in ti' d'a Jehová, yuj chi' a ticnaic, yovalil ol in c'anab'ajej tas ix val chi', xchi vin̈.

Jueces 11:35 Referans Kwoze

Salmos 15:4

Eb' tzpatquiln can 'el eb' patcab'il can 'el o'oj, palta yiclum tzyutj sb'a eb' 'a eb' 'ay xiwc'ojlal 'ayach. Matz jel eb' tas tzyala, palta tzyac' 'el'choc eb' sti', wach'xam tzcan eb' 'a yaln̈ yu'uj.

Job 1:20

Yajn̈ej 'ix q'ue wan win Job, caw xcus win si'mb'il, stzilnjat win spichl yuj scusc'ojlal cha, sjoxn 'el win xil sjolom, 'ix 'em cumn win 'a sat lu'um yic tzyaln sb'a win 'a Dios.

A Ch'an̈ Schab'l Libro Samuel 18:33

Yuj cha, caw x'och pitz'njoc cusc'ojlal 'a rey David. 'Ix q'ue 'a yojl jun cuarto 'a cha'an̈, jun 'ay 'a yib'n̈ q'ue spuertail chon̈b' cha, syamn 'och yoc' ta'. Ya' sb'a yic wan sb'ey q'ue cha, xyaln 'ixtic: ¡'Ay... ach wunnal Absalón! ¡'Ay... ach wunnal Absalón! ¡Comnoc wal an in cham a jeloc! ¡'Ay... ach wunnal Absalón! xchi rey David.

A Tas Sc'ulejnac Eb' Schecab' Jesús Hechos 23:14

Yuj cha, x'at eb' 'a ewin sat ya'mal 'och sti eb' 'a Dios, yet' 'a eb' 'ichmtac winc 'ay yopiso 'a yib'n̈ eb' israel, 'ix yaln eb' 'ixtic: —'Ix cac' qui ti 'on̈, chajtlto matz on̈ wa 'on̈, masnto tzcham Pablo cuj on̈. Xqui c'ann qui yailal 'a Dios on̈, toto matz cac' 'el'choc tas chi tzcal on̈.

A Ch'an̈ Schab'l Libro Samuel 3:31

Xlajw cha, xyaln David 'ixtc 'a Joab yet' 'a smasnil eb' ajun yet'oc: Tzilcjat e pichul, tzeya'n pax 'och jun tzo'n̈ pichl n̈achtac sat, 'ochn̈ec 'a cusc'ojlal yuj schamlil Abner, xchi. Ax rey David 'ix 'och tza'n yuj eb' b'achjnac scaxail Abner.

Nm 14:6

Ax Josué yet' Caleb, locn eb' xit' 'ilnoc lum lum cha, 'ix stzilnjat eb' spichul, yic tzch'oxn 'el eb' to tzcus eb' yab'n jun tzo'n̈ paxti cha.

Josué 7:6

Yuj cha, 'ix stziln 'el Josué spichl yet' eb' yichm wincal chon̈ab', xlaj sjopn q'ue eb' pococ 'a sjolom yic tzch'oxn 'el eb' scusc'ojlal cha. Xlajw cha, 'ix 'em cumn eb' 'a yojltac 'elt scaxail strato Jehová masnto x'emch quiln sat eb' 'a lu'um, 'ixtan̈ej yaj eb' masnto 'ix 'em c'u.

Salmos 66:13

'Oj in c'och 'a atut, ax wa'n tz'a in xajmb'al 'a ojltac; 'ixta 'oj wutc wa'n 'el'choc tas 'aj 'ix wac' in ti 'ayach,

Salmos 66:14

atn jun tzo'n̈ in ti wa'jnac 'ayach, yic 'ayn 'och 'a somc'ojlal.