Josué 1:4 - Chuj San Sebastian Bible

⁴ Tzcot lum e lum chi 'a lum cusltac lu'um 'a stojlal sur, masnto 'a lum Líbano 'a stojlal norte. Tzc'och lum 'a sti a niwn a Eufrates 'a stojlal 'aj tzq'uel c'u, yet' pax smasnil lum yic eb' hitita, masnto tzc'och lum 'a sti a niwquil Mar Mediterráneo, 'a stojlal 'aj tz'em c'u.

Chuj San Mateo Bible

⁴ Masanil lum sb'atn̈ej d'a taquin̈ luum masanto d'a lum Líbano, sb'atn̈ej lum d'a a' nivan Éufrates, masanil lum yic eb' hitita masanto sc'och d'a a' mar Mediterráneo d'a stojolal b'aj tz'em c'u, ol vac'n̈ej lum d'ayex.

Josué 1:4 Referans Kwoze

Ex 23:31

Tox 'ix wac' 'ejm smon̈jonal 'ajtil 'oj 'ec' lum e lum cha: tz'el yich lum 'a a Chac Mar, masnto tzc'och lum 'a a Éufrates, tz'ec' pax lum 'a a Mar Mediterráneo 'a 'aj 'ayc' eb' filisteo, masnto tzc'och lum 'a cusltac lu'um. 'Oj wa'ch eb' cajn 'a jun lugar chi 'a yol e c'ab', ax xo 'oj e pechl eb' 'a sat lum lum cha.

Dt 11:24

Smasnil lum lum 'aj 'oj eyec' cha, eyic 'oj 'ajcn lu'um. A e mon̈jon, tz'el yich 'a lum cusltac lu'um, masnto tzc'och 'a Líbano, tzcotx 'a a niwquil a Éufrates masnto tzc'och 'a Mar Mediterráneo.

Dt 3:25

Tzin tew wal 'ayach, comnoc tzin a chaj 'ec' 'a sc'axpil 'ec' a Jordán tic. Tzin nib'j tzin c'och 'a sat jun lum caw wach' cha. Tzin nib'j wal tz'at wil lum lum 'ay 'a jolmctac witz cha, yet' pax lum Líbano, xin chi 'a 'a.

Dt 1:7

A ticnec, meltzjan̈c can 'at 'a lum slum eb' amorreo 'ay 'a lum jolmctac witz, yet' 'a jun tzo'n̈ xo lugar 'ay 'a sla'nil eb' cha. Tzex 'ec' 'a lum span̈nil sti a Jordán, 'a lum jolmctac witz, 'a lum pan̈ctac, 'a lum Négueb, yet' lum 'ay 'a sti a mar 'a yol yic eb' cananeo, yet' pax lum Líbano, masnto tzc'och lum 'a sti a niwquil a Éufrates.

1 Cr 18:3

An̈jtona', 'ix 'ajx pax ganar Hadad-ezer sreyl chon̈b' Soba, ata 'ay 'a stojlal Hamat. A jun rey cha, wan smacn 'ec' yico'oc lum lu'um, masnto 'a a Éufrates.

1 Cr 5:9

An̈jtona', 'ix 'ec' cajn win 'a sti cot lum cusltac lum 'a stojlal 'aj tzq'uel c'u, yujto 'ix niwtj scajb'en noc' win 'a yol yic Galaad. A jun cusltac lum cha, tzc'och lum 'a sti a niwn a Éufrates.

Apoc 9:14

'Ix yaln 'ixtc 'a jun swacl ángel 'ix yutz'j strompeta cha: —'At jiyl chan̈wn̈ ángel jalb'il 'a sti a niwn a Éufrates, xchi 'a 'a.

A Ch'an̈ B'ab'el Libro Yic Yab'ixal Eb' Rey 4:21

A Salomón yajl yaj 'a yib'n̈ smasnil jun tzo'n̈ chon̈b' cha, tzchaj cot 'a a Eufrates, masnto tzc'och 'a schon̈b' eb' filisteo, yet' 'a 'aj tzlajw c'och sti smacb'en yic Egipto. A smasnil jun tzo'n̈ eb' cha, 'ix ya'n̈j eb' stojlb'al 'a Salomón, 'ayn̈j 'och eb' 'a yaln̈ schecnb'il winac.

Esdras 4:20

A yic cha, 'ay eb' sreyl Jerusalén caw 'ay yip. A eb' tz'a'n ganar 'a yib'n̈ smasnil tas 'ay 'a sc'axpil 'ec' a Éufrates cha. Xya'n eb' yac' eb' 'anma chi stojlb'al, yet' q'uen tumn x'ajx yac' eb'.

A Ch'an̈ B'ab'el Libro Yic Yab'ixal Eb' Rey 10:29

A junc caruaje tzmanx cot 'a Egipto, 600 tumn plata tz'ajx stojloc, ax no chej 150 tumn plata tz'ajx stojloc no'. A eb' sreyl eb' hitita yet' eb' sreyl eb' sirio a eb' tzcha mann pax e no 'a eb' schon̈wjum win rey Salomón.