Jeremías 9:23 - Chuj San Sebastian Bible

²³ 'Ix yaln pax Jehová 'ixtic: A eb' jelan, man̈ cab' yac' eb' tzaljoc sc'ojl yet' sjelnal. An̈jtona eb' 'ay yip, man̈ cab' yac' eb' tzaljoc sc'ojl yet' yip, an̈jtona eb' rico, man̈ cab' yac' eb' tzaljoc sc'ojl yet' sricoal cha.

Chuj San Mateo Bible

²³ Ix yalanpax Jehová icha tic: A eb' jelan, mocab' yac'och sjelanil eb' chi' yipoc sc'ool, eb' ay yip, mocab' yac'och yip eb' chi' yipoc sc'ool, an̈ejtona' eb' b'eyum, mocab' yac'och sb'eyumal eb' chi' yipoc sc'ool.

Jeremías 9:23 Referans Kwoze

Is 5:21

'Oltac wal eb' cob' tzyal jelnal sb'a, caw wach' cob' snab'en eb' chi 'a tzyutj snani.

Ec 9:11

'Ay junx tas xwil 'a yolyib'n̈q'uinl tic: Man̈ smasnilc tiempo an̈j eb' jeln sb'ey tz'a'n ganar, man̈ smasnilc pax eb' jeln ya'n owl tz'a'n ganar; man̈ smasnilc eb' jelan, wach' yec' tiempo yu'uj. Man̈ smasnilc eb' 'ay snab'en tz'och ricoal, man̈ smasnilc eb' cuywnac tz'och 'a niwc 'opiso; palta a tzyala tas tzchachj yuj junjn mach.

Ro 1:22

Wach'xam tzyalch sb'a eb' 'anma jelnal, palta caw man̈ nab'enal yaj eb'.

Ez 7:19

'Oj sjul-l eb' q'uen plata mto q'uen oro 'a yol caye, man̈x 'a yel'ch 'oj yutc eb'. A q'uen plata cha, mto q'uen oro, ma'oj stac' scoln 'el q'uen junc mach 'a yol sc'ab' yowl in c'ojl an Jehová in. Ma'oj 'ec' swejl eb', ma'oj b'ut'joc pax sc'ojl eb' yuj q'ue'en, yujto a q'uen x'a'n 'ejm eb' 'anma chi 'a maysch'olnil.

Pr 11:4

A wal yic 'oj jawc jun c'u yic 'oj 'och b'eyc'ojlal 'ayn̈ec, caw wal man̈x 'a yel'ch qui ricoalec cha, cojxn qui tojl b'eyb'alec, a 'oj qui colnec 'el 'a yol sc'ab' chamel.

Dn 4:37

A ticnec jun, an Nabucodonosor in tic, tzwij chan̈ sb'i jun sReyl satcha'an̈, tzwaln pax wach' paxti 'a 'a. Yujto caw wach'n̈j tas tzb'o'o, caw tojln̈ej smasnil, a tz'i'n 'ejm eb' cob' tzyij chan̈ sb'a 'a yol yico', xchi win rey cha.

Salmos 62:10

A mach tzyac' ganar tumn 'a spatc maysch'olnil mto yuj 'elc'al, caw matz tac' ya'n 'och jun chi yipc sc'ojol. Toto tzq'ue'ch yet' tas 'ay 'a 'a, matz tac' ya'n 'och sricoal chi yipc sc'ojol.

Dt 8:17

'Ayt ex xe na 'ixtic: A jun tzo'n̈ qui ricoal tic, 'ix ca'c ganar yet' quip, xe chi ta.

1 Ti 6:10

Toto cojn tumn 'aj tzca'ch qui nab'en, 'oj pitzwc chan̈ smasnil jun tzo'n̈ maysch'olnil 'ayon̈. 'Ay eb' cojn tumn tznib'j 'ochi. Yuj cha, xyactn can eb' jun tzo'n̈ cuynb'il 'aj xcob' ya'ch eb' sc'ojol. Til wal scusc'ojlal eb' xyij cot 'a yib'an̈.

Mr 10:24

Ax eb' scuywum cha, caw 'ix sat sc'ojl eb' yab'n jun tzo'n̈ cha. Palta xyaln pax 'a eb' jun 'ejm xo 'ixtic: —Ex in cuywum, [a eb' tzya'ch sricoal yipc sc'ojol,] toto 'oj 'och eb' 'a yol sc'ab' Dios, caw teb'il 'oj 'och eb'.

Sofonías 1:18

A wal 'a jun c'u yic 'oj ya'nc Jehová yowl sc'ojl cha, caw ma'oj colchjoc 'el eb' 'anma yuj q'uen oro, mto yuj q'uen plata, yujto yuj yowl sc'ojl cha, 'oj satl smasnil nacion̈. Wal 'a yajn̈ej ax slajw 'el smasnil 'anma 'a yolyib'n̈q'uinl tic, 'icha tz'aj junc tas satl yuj c'ac'.

Ez 29:9

'Oj can a chon̈b' chi 'a cusltaquil, ax yojcan 'el eb' 'anma', to an Jehová in, an 'ixta tzach wutej, yujto 'ix ala to ec a Nilo, ach xa b'o a alni.

Is 10:8

Yuj cha, xyaln yuj eb' yajl chi 'ixtic: A eb' tic reyn̈j eb' smasnil, an tzwac' mandar eb'.

Ec 2:19

Yujto may yalnb'il, tom jelan mto may snab'en win 'oj macn 'ec' yico'oc in munljel xlaj wab' syal in b'on yet' in jelnal. A jun tzo'n̈ tic, caw wal nab'an̈ej.

A Ch'an̈ B'ab'el Libro Samuel 17:42

A yic xyiln win filisteo chi David, to chacchin yilxi, caw wach' pax yilx 'ochi, palta caw may jac yel'ch 'a winac yujto quelm 'unnto.

Dn 3:15

A ticnec jun, toto 'oj scha e c'ojol, to a yic 'oj 'oc' jun tzo'n̈ yamc'ab' tzc'anlb'ax sonal, a yic cha, tzex 'em cuman, tzeya'n 'ejm e b'a 'a jun yechl nab'a oro 'ix wac' 'ajxoc b'o cha, to 'ixta', may tas 'oj eyi'ni. Toto ma'oj eyiclc eya'n 'ejm e b'a 'a 'a, wal 'a yajn̈ej 'oj e julx 'emt 'a yojl jun jorna caw ow sn̈ilchj sc'aq'uil. ¡'Oj wila', toto 'ay junc xo dios 'oj e coln 'el 'a yol in c'ab'! xchi winac.

1 Co 1:31

Tz'ib'b'il can 'ixtc 'a Ch'an̈ U'un̈: Toto 'ay mach tznib'j tzyij chan̈ sb'a, caw matz tac'a. Cojxn Cajlil tztac' qui'nec cha'an̈, xchi.

A Scarta San Pablo D'a Eb' Aj Filipos 3:8

Jantcn̈ej jun tzo'n̈ tas wa'jnac 'och yipc in c'ojol, may jac yel'ch 'a in sat ticnec. Yujto 'ay junx yel xo wach' tzin b'o'o, to tzwojquej 'el Cristo Jesús, atn Cajlilec. Yuj Cristo tic, c'uxn satnc 'el smasnil jun tzo'n̈ wa'jnac 'och yipc in c'ojl cha. Ax ticnec, 'icha c'alem xoj yaj 'a in sat, yujto tzin nib'j tzwique'ej Cristo 'a jun 'ejmn̈ej.

A Scarta San Pablo D'a Eb' Aj Filipos 3:10

Tzin nib'ej, tzin wach' 'ojquej 'el Cristo, sec a spoder yic xpitzw paxi, a tzyac' 'ayin. Tzin nib'j lajnn̈ej tzwutj wab'n syal yet'oc. Tzin nib'j 'icha x'aj schami, 'ixta tzin 'aj in cham jun xo.

Job 32:13

Xeyalt wal jelnal e b'a, palta ma'ix stac' eyu'uj. Yuj cha, a Dios 'oj 'a'nc spac spaxti Job.

Pr 3:5

Yet' wal smasnil a c'ojol, tza'n 'och a nab'en 'a Jehová, man̈ a'ch a jelnal yipc a c'ojol.

Pr 21:30

Wach'xam 'ay mach jelan, 'ay snab'en, toxn̈ej niwn tas yojtac, palta matz tac' stenn 'och wan snib'b'en Jehová.

Is 20:5

Ax eb' 'anma cob' yipc'ojlal yaj Etiopía yu'uj, yet' eb' cob' tzb'an̈ sb'a yuj jun nacion̈ cha, 'oj xiw chan̈ eb', ax sq'uixw can 'el eb'.

Is 47:10

A tza na'a to wach'n̈j aj yet' a maysch'olnilal cha, tza nan pax 'ixtic: May mach tz'iln tas tzin b'o'o, xa chi. A tas ojc yet' a jelnal, a tzach 'ixtni; tza nan 'ixtc 'a a nab'en: Cojn in toni, may junc xo mach lajn in yet'oc, xa chi.

Jeremías 48:7

A Moab, a wal smunljel yet' sricoal 'aych yipc sc'ojol, palta an̈jtona 'oj 'ijxoc 'ati. A jun sdiosal tzcuch Quemos, 'oj 'ijxoc 'at 'icha presoal, yet' eb' 'aych ya'malc 'och sti eb' 'a 'a, yet' pax eb' 'anma caw niwc cob' yel'chi.

Jeremías 49:4

Ex chon̈b' to caw wal pit, ¿tas yuj tze b'an̈ e b'a yet' eyip? A jun eyip cha, tox 'ix lajw 'ejmi. A wal e ricoal xe molb'tzej, a 'aych yipc e c'ojol, yuj cha, tzeyaln 'ixtic: ¿Mach wal 'oj stac' ya'n owl quet'ec? xe chi.

Job 41:15

A solc'al no 'a yib'an̈, latztz'i yajch 'a yich spatc no', caw wal tzatz 'icha q'ue'en, lajn 'icha jun tzo'n̈ smacl sat jul-lab' cha.

Salmos 33:5

A Dios tzchamc'ojlej tas wach' yet' tas tojol, tzch'oxn 'el schamc'ojlal 'a smasnil yolyib'n̈q'uinl tic.

Salmos 34:3

Qui mol 'i'c chan̈ sb'i yuj calnec wach' paxti 'a 'a.

Salmos 44:9

On̈ a patquilj can 'eli, on̈ 'a'cn 'at 'a scal q'uixwc'ojlal. Man̈x 'ic ach colwj yet' eb' qui soldado on̈.

Jeremías 31:34

Man̈x yowlalc 'ayt junc mach 'oj alnc 'a junc xo yit chon̈b' 'ixtic: 'Ojquej 'el Jehová, man̈ xchioc. Yujto an Jehová in, an tzwala, to smasnil eb' 'oj in yojcoc 'eli, wach'xam 'unin, wach'xam 'ichm 'anma'. 'Oj wac' lajwc smul eb', man̈x 'a b'a'n̈ 'oj in na cot smul eb' cha, xchi Dios.

Jeremías 48:14

Man̈ yal cab' eb' 'aj Moab 'ixtic: An̈ tic, caw jeln on̈, b'inab'il on̈, to caw 'a'm on̈ owal, man̈ xchic cab' eb'.

Miqueas 6:8

Xin pacn 'ixtc 'a eb': Ex wit chon̈ab', tox 'ix yal Jehová tas wach' 'a sat yet' tas tznib'j 'ayn̈ec, atn jun tzo'n̈ tic: Yowlal tojl tzcutjec qui b'a, 'ay cab' qui chamc'ojlalec 'a eb' quit 'anma'il. 'Emmquilal pax tzcutjec qui yiclni 'a qui Diosal.