Jeremías 6:13 - Chuj San Sebastian Bible

¹³ Smasnil eb' niwc yel'chi, yet' eb' may yel'chi, cojxn̈ej tas tzyac' ganar eb' 'a maysch'olnil, axn̈ej chi tzna eb'. An̈jtona eb' in checab', yet' eb' ya'mal 'och sti eb' 'anma 'ayin, cojxn̈ej 'elc'l tzb'o eb' smasnil.

Chuj San Mateo Bible

¹³ Masanil eb' nivac yelc'ochi yed' eb' malaj yelc'ochi, an̈ej tas syutej eb' yac'an ganar d'a spatic chucal sna'a. An̈eja' eb' syaloch sb'a in checab'oc yed' eb' sacerdote, axon̈ej elc'al syac' eb'.

Jeremías 6:13 Referans Kwoze

Jeremías 23:11

A Jehová tzaln 'ixtic: A wal eb' tzyalch sb'a in checb'oc, yet' eb' tz'a'n 'och sti eb' 'anma 'ayin, caw may wel'ch 'a sat eb'. An̈jtona 'a watut, tzwil wal sb'on eb' maysch'olnil ta'.

Jeremías 8:10

Yuj wal cha, 'oj wa'cn 'och yistl eb' 'a yol sc'ab' jun tzo'n̈ocx winac, yet' pax slum eb', chucx mach 'oj 'ica'anoc. Smasnil eb' niwc yel'chi, yet' eb' may yel'chi, axn̈ej tas tzyac' ganar eb' 'a spatc maysch'olnil, a chi tzna eb'. 'Ixta pax eb' tzyalch sb'a in checb'oc, yet' eb' tz'a'n 'och e ti 'ayin, cojxn̈ej 'elc'l tzb'o eb'.

Miqueas 3:11

A eb' juez yaj 'a yol chon̈ab', man̈ wach'c tzyutj eb' sb'onyaj junc 'anma', tzchaj eb' q'uen c'ultac tumin. An̈jtona eb' tz'a'n 'och qui ti 'a Dios, yujn̈ej schan eb' tumin, yuj cha, tzcuywj eb'. 'Ixta pax eb' tzyalch sb'a schecb'oc Dios, yujn̈ej schan eb' tumin, yuj cha, tzyaln eb' tas tz'aj 'el'ch junc mach. Tzyaln pax eb' to 'aych Dios yet' eb', yuj cha, tzyaln eb' 'ixtic: A Jehová 'aych quet'ec, yuj cha, may yailal 'oj 'ec' 'a quib'n̈ec, xchi cob' eb'.

Jeremías 22:17

Palta ach xo tic, cojn ricoal tza nib'j ac' ganar 'a spatc maysch'olnil. Tza mil cham eb' may smul, caw wal tzextj eb' a chon̈b' yet' a tu nab'enal, xchi Dios.

Miqueas 3:5

Ax Jehová 'ix yaln 'ayn 'ixtic: A eb' in chon̈b' tic, caw 'aych eb' 'a yol jun b'e man̈ tojloc. Smulyujoc eb' tzyalch sb'a in checb'oc, tz'ixtx paxti eb' in chon̈ab'. Tzcob' yal eb' 'a eb' in chon̈b' tic, to 'ay junc'ojlal 'a eb' tz'a'n tas wach' tzc'ux eb'. Ax eb' matz 'a'n tas tzc'ux eb' cha, tzyac' eb' owl yet' eb'. Yuj cha, tzwaln yuj jun tzo'n̈ checb' chi 'ixtic:

Jeremías 14:18

A yic tzin 'el wil lum lum 'aj tz'och munljel 'a b'esan, ax tzwilni, to 'ay sniwnal eb' 'anma t'occtac yaj ta yuj owal. Ax yic tzin 'och paxt 'a yol chon̈ab', ax tzwilni wan laj scham eb' 'anma yuj wejel. Ax eb' tzyalch sb'a schecb'oc Dios, yet' eb' ya'mal 'och sti eb' 'anma', tox 'ix 'ijx 'at eb' 'a chuc chon̈b'al, jun to mant yojcoc eb', xa chi 'a eb', xchi Dios 'ayin.

Jeremías 5:31

Cojn 'es tzyal-l eb' tzcob' yalch sb'a in checb'oc. Ax eb' ya'mal 'och sti eb' 'anma 'ayin, tzyac' eb' yajlil 'icha tas tznib'ej. Ax jun in chon̈b' tic, wach' tzyab' 'ixta'. Palta ¿tas wal 'oj yutc sb'a eb', yic 'oj jawc jun slajb' tiempoal? xchi Dios.

Is 57:17

Yuj smul eb' israel 'ix ya'chi, yuj cha, in owx 'och 'a eb', xwi'n 'el in b'a 'a stz'ey eb'. Palta 'ix yac' pitb'oc 'el sb'a eb', sb'on eb' tas 'icha tznib'ej.

A Schab'il Carta San Pedro 2:3

A eb' 'a'm 'es cha, cojxn wal tumn tznib'j 'och eb'. Yuj cha, jeln 'oj yutc eb' yaln jun tzo'n̈ 'es 'ayex, yujto tznib'j eb' tzyac' ganar stumn 'a e patquil. Palta pectix b'eyc'ojlb'ilx eb' yuj Dios. Yuj cha, yowlal 'oj satcn 'el eb' 'a jun 'ejmn̈ej. Toxn ma'oj stac' scoln 'elt sb'a eb' 'a jun yailal cha.

1 Ti 3:3

Caw matz tac' yu'n eb' 'an̈. Matz tac' sma'wj pax eb'. [Matz tac' snib'n eb' yac' ganar stumn 'a spatc maysch'olnil.] Yowlal niwn tzyutj eb' sc'ojol. Matz tac' ya'n eb' owl yet' junc xo mach. Man̈ pec' tumnoc eb'.

Lc 16:14

Ax ewin fariseo cha, c'uxn xyab' ewinac tastc 'ix yal Jesús. Palta cojxn wal tumn 'aj 'aych snab'en ewinac. Yuj cha, ton̈j xb'uchwj ewin 'a 'a.

Ez 33:31

'Ixta tzyutj eb' in chon̈b' chi yi'n cot sb'a, tzlaj 'em wocn eb' yab'xni 'a tas tzala. Palta matz b'eylb'ej eb' tas tzal cha, ton̈j tzlaj stz'ac eb' laj yala', ax snab'en eb', a wal maysch'olnil tznib'j 'och eb'.

Ez 22:12

'Ay eb' eyajlil tzchan tumin yic tzya'n 'och eb' chaml 'a yib'n̈ junc xo mach. 'Ay eb' tz'a'n q'uen tumn majnil 'a junc xo yit 'anma'il, palta niwn yune q'uen tumn chi tzc'an eb', tzya'n eb' sat sc'ojl 'ayin.

Lm 4:13

'Ixta 'ix uji, yuj wal smul eb' schecb' Dios yet' yuj smul eb' ya'mal 'och sti eb' 'anma 'a Dios, yujto til wal 'anma may smul 'ix smil eb' 'a yol chon̈ab'.

Jeremías 32:32

A eb' israel yet' eb' et chon̈b' 'aj Judá cha, caw stzuntzj cot eb' yowl in c'ojl yuj jun tzo'n̈ smaysch'olnilal xlaj sb'o'. Lajn xoj tas tz'el sb'on eb' yet' sreyal, eb' yajal, eb' ya'mal 'och sti eb' 'ayin, eb' in checab', yet' pax smasnil eb' 'anma cajn 'a Jerusalén yet' 'a Judá.

Jeremías 2:26

'Icha wal tz'aj sq'uixw 'el junc 'elc'm 'a yic tz'ilchji, 'ixta 'oj eyaj e q'uixw 'el ex israel yet' eb' e reyal, eb' sat yajal, eb' ya'mal 'och e ti 'ayin, yet' pax ex in checab'.

Jeremías 2:8

A eb' ya'mal 'och e ti 'ayin, man̈x 'ic jaw eb' 'a wojltac. Ax eb' e cuywmal, man̈x 'ic in yojquej 'el eb'. A eb' yajl yaj 'a e chon̈ab', 'ix meltzj 'och eb' 'ajc'ojlal 'ayin, ax eb' in checb' cob'i', a 'a sb'i Baal, ata xpaxtin 'el eb'. 'Ix 'och tza'n eb' yuj jun tzo'n̈ comn dios to may jac yopiso, xchi Dios.

Is 28:7

An̈jtona', 'ay jun tzo'n̈ xo eb' 'anma tztectn 'ec' yuj te 'an̈ cha, tzlaj sicb' 'el eb' yuj yowl te'; atn eb' ya'mal 'och sti eb' 'anma', yet' eb' tzyalch sb'a schecb'oc Dios. A yic 'u'm 'an̈ eb' cha, caw wal tzsomchj snab'en eb', yuj cha man̈xtzac tznachj 'el yuj eb' tas tzyal Dios, man̈ wach'c tzyutj eb' sb'on yaj eb' 'anma'.

A Schab'il Carta San Pedro 2:1

A eb' wit israelal 'a pecti', 'ay eb' cob' yaljnac 'och sb'a schecb'oc Dios, palta yes eb'. An̈jtona 'ay eb' 'oj pitzwc chan̈ 'a qui calec, ax ya'n eb' cuyxoc jun tzo'n̈ 'es. 'Oj yi'ch eb' jun tzo'n̈ chuc cuynb'ilal 'a qui calec, sec 'ayn̈ec 'oj qui juwc 'el yuj eb'. Caw may jac yel'ch Cajlilec 'a sat eb', wach'xam a xcham stojloc smul eb'. Yuj cha, mun tzyij cot eb' 'a yib'an̈. Yajn̈ej, ax satcn 'el eb' 'a jun 'ejmn̈ej.

Jeremías 2:29

An Jehová in, an tzwala: ¿Tas yuj tzeyala, chajtlto matz ex in colo? Palta tic pax ax tzex 'och tenmtacl 'ayin.

Jeremías 17:11

A eb' tz'och ricoal yuj 'ixtj 'anma'il, lajn eb' 'icha junc no ch'ic tzman̈n 'elt no n̈olb' to man̈ yico'oc. Caw wal yol ste'nal eb' 'ay, ax yactn can eb' sricoal cha. Ax 'a slajub', ata 'oj checljoc 'eli, to may xon snab'en eb'.

Jeremías 27:15

A Jehová 'ix alni, to man̈oc tz'a'n yal eb' jun tzo'n̈ cha, caw 'esn̈j tas tzyal-l eb' 'a sb'i Jehová. Toto tza yiclj tas tzyal eb', 'oj ejx 'el 'a tic yet' eb' tzyalch sb'a checb'al cha, eb' tz'a'n 'es 'aych cha, ax a cham yet' eb', xin chi 'a win rey cha.

Jeremías 42:1

Smasnil eb' syajlil eb' soldado ajun yet' Johanán, win yunnal Carea, yet' Azarías yunnal Osías, yet' pax smasnil eb' 'anma', eb' niwc yel'chi, yet' eb' may yel'chi, 'ix jaw eb' 'ayn an schecb' in Dios tic.

Jeremías 23:10

A wal jun nacion̈ tic, caw b'ut'n yuj eb' tzb'on 'ajmulal, yuj eb' 'anma caw tz'a'n 'ip sb'on maysch'olnil. Tzc'anlb'ej eb' yip smasnil yic tzyixtn eb' yit 'anma'il. Yuj wal cha, 'ix scatb'an can Jehová lum lum tic. Yuj cha, 'ix tacj chan̈ lu'um, 'ix tacj pax 'el te c'ultc tzlo e no noc'.