Jeremías 48:7 - Chuj San Sebastian Bible

⁷ A Moab, a wal smunljel yet' sricoal 'aych yipc sc'ojol, palta an̈jtona 'oj 'ijxoc 'ati. A jun sdiosal tzcuch Quemos, 'oj 'ijxoc 'at 'icha presoal, yet' eb' 'aych ya'malc 'och sti eb' 'a 'a, yet' pax eb' 'anma caw niwc cob' yel'chi.

Chuj San Mateo Bible

⁷ A eb' aj Moab, a smunlajel eb' yed' sb'eyumal ayoch yipoc sc'ool, palta ol ic'jocb'at eb' d'a ch'oc nacional. A jun sdiosal eb' scuchan Quemos ol ic'jocb'atoc yed' eb' ayoch sacerdoteal d'ay yed' eb' nivac yelc'ochi.

Jeremías 48:7 Referans Kwoze

Nm 21:29

'Oltacx wal ax tic 'aj Moab, ex lajw 'eli, schon̈b' ex cob' dios Quemos. A jun e diosal cha, ma'ix stac' scolwji, 'ix 'at eb' e soldado 'eloc, ax smasnil eb' 'ix 'ix, 'ix can eb' 'ix 'a yol sc'ab' rey Sehón.

Jeremías 49:3

'Ochn̈ec 'a cusc'ojlal ex 'aj chon̈b' Hesbón, yujto a chon̈b' Hai, tox 'ix lajw 'ejmi. Ex 'ix 'aj chon̈b' Rabá, 'ochn̈ec wal 'a cusc'ojlal. 'A'c 'och e pichl n̈achtac sat, 'o'n̈ec. 'Oyb'xan̈c 'ec' 'a yol e chon̈b' yuj e somc'ojlal. Ma'c lajwc e niwnal, yujto a jun e diosal tzcuch Milcom, 'oj 'ijxoc 'at 'icha presoal, yet' eb' ya'mal 'och e ti 'a 'a, yet' pax eb' 'anma to niwc yel'ch yopiso.

Jeremías 9:23

'Ix yaln pax Jehová 'ixtic: A eb' jelan, man̈ cab' yac' eb' tzaljoc sc'ojl yet' sjelnal. An̈jtona eb' 'ay yip, man̈ cab' yac' eb' tzaljoc sc'ojl yet' yip, an̈jtona eb' rico, man̈ cab' yac' eb' tzaljoc sc'ojl yet' sricoal cha.

Salmos 52:7

'Iltec wal jun 'anma to man̈oc Dios tzya'ch yipc sc'ojol; cojn wal sricoal tzya'ch yipc sc'ojol, cojxn maysch'olnil tzb'o'o, 'oj schic eb'.

1 Ti 6:17

Ax eb' creyente rico yuj tastc 'ay 'a yolyib'n̈q'uinl tic, tzal jun tzo'n̈ checnb'il tic 'a eb'. Tzcham wal aln 'a eb', to matz tac' sb'an̈n sb'a eb'. Matz tac' ya'n 'och eb' sricoal yipc sc'ojol, yujto may jac syal tz'aj slajw pax 'eq'ui. Tzaln pax 'a eb', to cojxn Dios pitzan, a tzya'ch eb' yipc sc'ojol. Yujto a tz'a'n smasnil tas 'ayon̈, sec tzon̈ tzalj yet' jun tzo'n̈ cha.

Os 10:13

Palta ax eb' cojn maysch'olnilal xlaj sb'o'. Tox 'ix schaj eb' spac yujto man̈ tojloc xyutj sb'a eb'. Wan schan eb' spac yuj ya'm 'esal. Yujto xcob' ya'ch eb' yipc sc'ojl jun tzo'n̈ scaruaje yic owal yet' pax eb' soldado eb' caw niwn sb'isul,

Jeremías 48:46

'Oltacx wal ex 'aj Moab, schon̈b' ex Quemos, caw ex sat 'ejmi. A wal eb' eyunnal, yet' eb' 'ix eyisil, tox 'ix 'ijx 'at eb' 'icha presoal.

Jeremías 48:13

Yuj cha, a eb' 'aj Moab cha, caw 'oj jawc schab'c'ojlal eb' 'a Quemos, atn sdiosal eb', 'icha wal 'ajnc sjaw schab'c'ojlal eb' israel yuj sdiosal 'a Bet-el, atn jun 'aych cob' yipc sc'ojl eb'.

A Ch'an̈ B'ab'el Libro Yic Yab'ixal Eb' Rey 11:33

Yujto in yactj can Salomón, ax 'a jun tzo'n̈ comn dios, ata xyac' 'emmquilal, atn 'a Astarté 'ix sdiosal eb' sidonio, yet' 'a Quemós sdiosal eb' moabita, yet' pax 'a Milcom sdiosal eb' amonita. Caw man̈x wach'c tas tzb'o 'a in sat, man̈xtzac syiclj in ley yet' in checnb'il, 'icha yutjnac syiclni David, atn smam.

Apoc 18:7

Caw xyij chan̈ sb'a 'ix si'mb'il. An̈j ricoal 'aj xya'ch snab'en. Yuj cha, 'ixta tzeyutj eya'n 'och syailal yet' scusc'ojlal. Yujto 'ix sna 'ix yet' snab'en 'ixtic: An tic, caw 'ay wopiso reinail. Man̈ in lajnoc 'icha junc 'ix chamnc yichmil. May wal b'a'n̈ 'oj wab' syal jab'oc, xchi cob' 'ix.

Jeremías 43:12

'Oj n̈usxoc yatutal sdiosal eb' 'aj Egipto tic, ax sn̈usx can pax sdiosal eb' cha, mto 'oj 'ijxoc 'at 'icha presoal. 'Icha tzyutj junc 'ilm calnelu yi'n 'el no sip 'a spichul, 'ixta 'oj yutc Nabucodonosor yi'n 'at sricoal Egipto tic, caw tzaljc'ojlal 'oj 'aj smeltzji.

Jeremías 13:25

Atn wal chi 'aych xon 'a eyib'n̈ ex 'aj Israel, a chi smoj wa'n 'ayex. Yujto in 'atcn satc'ojlal eyu'uj, ax jun tzo'n̈ yechl to may jac yel'chi, axn̈ej eb' xeya'ch yipc e c'ojol.

Salmos 40:4

Caw wach' yic eb' to a Jehová tzya'ch yipc sc'ojol: Matz ya'ch sb'a eb' 'a scal eb' tzb'on maysch'olnil, matz ya'ch pax sb'a eb' yet' eb' tzyac' 'ejm sb'a 'a jun tzo'n̈ comn dios.

A Ch'an̈ B'ab'el Libro Yic Yab'ixal Eb' Rey 11:7

A 'a sjolm jun witz 'a stojlal 'aj tzq'uel c'u 'a Jerusalén, ata 'ix sb'o Salomón jun scajnub' jun comn dios tzcuch Quemós, atn wal jun yechl scomn diosal eb' moabita, yet' jun scajnub' junx comn dios tzcuch Moloc, atn yechl scomn diosal eb' amonita. A jun tzo'n̈ dios tic, caw yajb'il 'el eb' yuj Dios.

Jueces 11:24

Q'uinloc a Quemós e diosal ax tic, a tz'a'n junc tas eyico'oc, ¿tom matz eyalch junc chi eyico'oc? 'Ixta pax caj an̈ tic on̈. A tas tzyac' Jehová qui Diosal quico'oc, atn tzcalch pax quico'oc on̈.

A Ch'an̈ Schab'l Libro Samuel 5:21

A yic x'at eb' filisteo 'eloc, 'ix yactn can eb' jun tzo'n̈ yechl sdiosal, ax David yet' eb' soldado ajun yet'oc, ax eb' x'ec' 'i'noc jun tzo'n̈ cha.

Jeremías 49:4

Ex chon̈b' to caw wal pit, ¿tas yuj tze b'an̈ e b'a yet' eyip? A jun eyip cha, tox 'ix lajw 'ejmi. A wal e ricoal xe molb'tzej, a 'aych yipc e c'ojol, yuj cha, tzeyaln 'ixtic: ¿Mach wal 'oj stac' ya'n owl quet'ec? xe chi.