Jeremías 44:10 - Chuj San Sebastian Bible

¹⁰ Masnto ticnec, mantzac e jel e b'eyb'al ax tic, caw matz ex xiw jab'oc. Matz eyiclj in checnb'il yet' in ley wa'jnac can 'ayex yet' pax 'a eb' e mam eyicham.

Chuj San Mateo Bible

¹⁰ An̈ejtona' ticnaic, max e q'uex e b'eyb'al, max ex xivpax jab'oc. Max e c'anab'ajej in checnab'il yed' in c'ayb'ub'al vac'nac d'ayex yed' d'a eb' e mam eyicham.

Jeremías 44:10 Referans Kwoze

Pr 28:14

Caw tzaljc'ojlal yic junc mach to 'ay yel'ch Jehová 'a sat, ax toto pit tzyutj snab'en, 'oj cotcn yailal 'a yib'an̈.

Apoc 15:4

Toc 'ay junc mach ma'oj xiw 'aych Mamin. Toc 'ay junc ma'oj alnoc wach' paxti 'ayach. Yujto cojxn ach caw wach'chn̈ej. 'Oj cot eb' 'anma 'a junjn nacion̈, 'oj wul yal sb'a eb' 'ayach. Yujto xlaj yil eb', chajtlto caw tojl tzotj a b'eyc'ojlwi, xchi eb'.

A Sb'ab'el Carta San Pedro 5:6

Yuj cha, 'emmquilal tzcutjec qui b'a 'a yol sc'ab' Dios, yujto caw niwn spoder. Toto 'ixta', niwn xo 'oj cajc 'el'ch yu'uj, yic 'oj jawc stiempoal.

Jeremías 8:12

¿Tom tzq'uixw jac eb' yuj jun tzo'n̈ tas matz tzchaj in c'ojl tzb'o cha? Wal yel tzwala, caw matz q'uixw xon eb', caw matz chacb' 'el sat eb' sq'uixw xon jab'oc. Yuj cha, an Jehová in, an tzwala, to a yic 'oj wa'n jawc yailal 'a yib'n̈ eb', 'oj telwc 'ejm eb', 'icha jun tzo'n̈ eb' 'emnc xo, xa chi 'a eb', xchi Dios 'ayin.

Ro 11:20

Yel toni, 'icha to tzuc'b'il 'el eb' israel cha, yujto ma'ix ya'ch eb' sc'ojl 'a Dios. Ax xo, yujn̈ej to tzeya'ch e c'ojl 'a 'a, ex 'ochcn sjelc eb'. Yuj cha, xe b'an̈t e b'a, tzeyil wal e b'a.

Lc 23:40

Ax jun win yitb'eym win chi 'ix tenn 'och wa'an. 'Ix yaln win 'ixtic: —¿Tom matz ach xiw jac 'a Dios? 'In lajn cajch 'a yol sc'ab' jun yailal tic yet'oc.

Mt 27:54

Ax ewin soldado tztan̈wni cha, yet' win syajlil ewinac, 'ix yab' ewin yec' jun quixcab' cha. 'Ix yiln pax ewin jun tzo'n̈ xo tas 'ix uji, yuj cha, caw xiw ewinac, 'ix yaln ewin 'ixtic: A jun win xcham tic, caw yel yunnal Dios, xchi ewinac.

Malaquías 4:2

Palta ax xo pax to 'ay wel'ch 'a e sat, 'icha wal sq'uel c'u 'a sq'uin̈b'ial, 'ixta 'oj wutj in ch'oxn in colwal 'ayex. Yuj cha, 'oj e tzalj jun 'ejm xo. Caw 'oj e b'atj chan̈ yuj tzaljc'ojlal, 'icha tzyac' junc no quelm wacx tzat 'elt 'a yet'l 'aj macan.

Ez 9:4

'ix yaln 'ixtc 'a winac: 'Ixc 'a yol chon̈b' Jerusalén tic, tza'n can 'och yechl eb' 'anma 'a snan̈l sat, eb' to tzcus yuj smul x'och 'a scal eb' 'anma cha, xchi 'a winac.

Jeremías 36:24

Wach'xam xyab' win rey chi yet' smasnil eb' 'aych 'a yopiso yet'oc, yuj tas xyal ch'an̈ un̈ cha, palta caw ma'ix xiw xon jac eb', ma'ix sch'oxl eb' toto ya yalx tzyab' eb'.

Jeremías 10:7

Ach sReyl smasnil nacion̈, ¿tom 'ay junc mach man̈ smojc tzxiw 'ayach? Smoj wal to 'ay el'ch 'a smasnil sat 'anma'. A 'a scal smasnil eb' jelan, yet' 'a scal eb' rey 'a yolyib'n̈q'uinl tic, caw may junc mach lajn et'oc.

Is 66:2

An Jehová in, an tzwala. An b'ojnac smasnil tas, 'ixta 'ajnc spitzw chan̈ smasnil. Palta an tic tz'o'ch in c'ojl 'a eb' 'anma 'emmquilal yeq'ui, eb' tzlaj yab' syal yuj smul, eb' to 'ay yel'ch in paxti 'a sat.

Is 57:15

Yujto a jun mach caw niwn yel'chi, atn jun Dios To Cojxni, pitznn̈ej 'a jun 'ejmn̈ej, a tzaln 'ixtic: An tic, ata cajn in 'a jun wet'l to yel xo chan̈ yaj'ti, jun to wicn̈ej yaj in ch'ocoj. Palta 'ayn pax 'ec' yet' eb' 'emmquilal tzyutj sb'a, yet' eb' tzna sb'a sc'ojol, an tzwac' pax sniwnal sc'ojl eb'.

Pr 16:6

Toto tzqui chamc'ojlejec eb' quit 'anma'il, toto yiclum tzcutjec qui b'a, to 'ixta', tz'ajx niwnc'ojlal qui mulec; toto 'ay yel'ch Jehová 'a qui satec, yajn̈ej tzon̈ 'elc 'a scal maysch'olnil.

Pr 14:16

Toto 'ay qui nab'enec, tzon̈ xiwc 'a tas 'ay smay, tzqui'nec 'el qui b'a 'a scal maysch'olnil, ax toto tu qui nab'enec, caw tzqui b'an̈c qui b'a, may yel'ch junc tas 'a qui satec.

Pr 8:13

Toto 'ay yel'ch Jehová 'a qui satec, yowlal tzquijec 'el qui b'a 'a scal maysch'olnil. Toto jeln on̈ec, man̈ qui b'an̈c qui b'a, man̈ qui'c chan̈ qui b'a, man̈ qui b'oc tas tu', man̈ ca'c pax 'es.

Salmos 51:17

A jun xajmb'al tza nib'j ach in Diosal, atn yic tzqui nan qui b'a yuj qui mul. Caw matz on̈ a patquilj can 'el an̈ tzquij 'ejm qui b'a 'a yic tzqui nan qui b'a cha.

Salmos 34:18

La'n yaj 'a stz'ey eb' to man̈x 'anmac yaj spixn tzyab'i, tzcoln 'el eb' tzsomchj 'el snab'en yuj scusc'ojlal cha.

2 Cr 34:27

'ix a'ch wal 'a a c'ojol, xe'n 'ejm a b'a 'a wojltac an Dios in, yic 'ix ab'ni to 'ay yowl in c'ojl 'a yib'n̈ jun lugar tic, yet' 'a yib'n̈ eb' cajn 'a 'a. Yujto ach 'och 'emmquilal 'a wojltac, xa tzilnjat a pichul, caw ach 'oq'ui, an̈jtona 'in, 'ix wab' tas 'ix ala. An Jehová in, an tzwala.

2 Cr 33:19

Tz'ib'b'il pax slesal, yet' tas x'aj yo'ch sc'ojl Dios 'a yuj slesl cha. An̈jtona', tz'ib'b'il smasnil smul yet' stenmtaquil, yet' jun tzo'n̈ macsej sb'o chan̈ 'a jolmctac witz yet' 'a 'aj sb'o 'ejm yechl comn dios tzcuch Aserá yet' jun tzo'n̈ xo yechl comn dios, yic mantzac yij 'ejm sb'a 'a Dios. A jun tzo'n̈ cha, ata tz'ib'b'il can 'a ch'an̈ libro yic yab'xil eb' schecb' Dios.

2 Cr 33:12

Palta ax yic xyab'n wal syal cha, 'ix leslwi 'a Jehová sDiosal, xyi'n 'ejm sb'a si'mb'il 'a yojltac sDiosal yet' eb' smam yicham.

2 Cr 32:26

A yic xyi'n chan̈ sb'a Ezequías yet' snab'en cha, ax 'a spatquil xo xyi'n 'ejm sb'a 'a yojltac Dios yet' eb' cajn 'a Jerusalén. Yuj cha, man̈toc 'ix ya' cot Jehová yowl sc'ojl 'a yib'n̈ eb', ya' sb'a pitznto Ezequías cha.

A Ch'an̈ Schab'il Libro Yic Yab'ixal Eb' Rey 22:19

'ix a'n 'och 'a a c'ojol, xe'n 'ejm a b'a 'a wojltac an Jehová in, 'ix 'a tzilnjat a pichul, ach 'oc' 'a wojltac, 'ix ab' tas xwala, to 'oj satl jun lugar tic, ax scatb'tzax eb' 'anma cajn 'a 'a. An̈jtona 'in, 'ix wab' tas 'ix ala, an Jehová in, an tzwal 'ayach.

A Ch'an̈ B'ab'el Libro Yic Yab'ixal Eb' Rey 21:29

—¿Tzam ela tas tzyutj win Acab yi'n 'ejm sb'a 'ayin? Yujto xyij 'ejm sb'a win 'ayin, ma'oj wa' cot yailal 'a yib'n̈ winac yic pitzn to. At 'a yic 'aych junc yunnal chi reyl sjeloc, ata 'oj jawc cusc'ojlal wuj 'a yib'n̈ smasnil eb' yin̈til, xchi Jehová 'a Elías.

Ex 10:3

Xlajw cha, 'ix 'atx Moisés yet' Aarón 'at yil win rey chi jun 'ejm xo, 'ix yaln pax eb' 'a win 'ixtic: —A Jehová qui Diosal an̈ israel on̈ tic on̈, a tzaln 'ixtc 'ayach: ¿Jantcto wal tiempo 'oj ac' pitb'oc a b'a, yic matz ej 'ejm a b'a 'ayin? 'A'l eb' in chon̈b' tic 'a libre, yic tz'at ya'nc eb' 'emmquilal 'ayin.

Ex 9:30

Palta wojc wal si'mb'il, chajtlto ach tic yet' eb' 'aych yajlil et'oc, mant 'a jac e xiwc'ojlal 'a Jehová Dios, xchi Moisés 'a win rey cha.

Ex 9:17

Wach'xam til wal jun tzo'n̈ yailal tzin ch'ox ela', palta an̈j 'ijnoc tza pitb'tzej a b'a, matz a chaj 'at eb' in chon̈b' tic.

Salmos 78:10

Ma'ix syiclj eb' strato yet' Dios, ma'ix snib'j xon eb' syiclj scuynb'il.

Jeremías 6:15

¿Tom 'ix q'uixw eb' sb'on jun tzo'n̈ maysch'olnil cha? Wal yel, caw ma'ix q'uixw xon wal eb' jab'oc, ¡toxn man̈ yojcoc eb' sq'uixwi! Yuj cha, an Jehová in, an tzwala to a wal yic 'oj wa'nc 'och yailal 'a yib'n̈ eb', 'oj satcn 'el eb', xchi Dios.

Jeremías 26:4

Tzal 'a eb', chajtlto an Jehová in, an tzwal 'a eb' 'ixtic: Ax tic ma'ix e chaj eyab' in paxti', ma'ix eyiclj smasnil cuynb'il 'ix wal 'ayex.

Jeremías 32:23

Palta a yic x'och eb' scaj jun lum tic, yic 'ix schan eb' smacl lu'um, caw man̈x 'ic schaj eb' yab' tas 'ix ala, man̈x 'ic syiclj eb' a checnb'il, ma'ix sb'o eb' tas 'ix ac' sb'o'. Yuj cha, 'ix a'n cot jun niwquil yailal tic 'a quib'n̈ on̈.

Jeremías 44:23

A jun yailal 'aych 'a quib'n̈ec tic, 'ix jaw 'ayn̈ec, yujto an̈ja eya'n incienso e xajmb'alc 'a jun tzo'n̈ chuc diosal. An̈ja eya'n 'och e mul 'a Jehová, yujto caw matz eyiclj scuynb'il yet' pax sley, an̈jtona ma'ix eyiclj schecnb'il, xin chi.

Is 42:24

¿Mach 'ix chan 'ajxc ganar eb' israel yin̈tl can Jacob yic 'ix 'el'x 'at smasnil tas 'ay 'a eb'? Atn Jehová, yujto 'ix 'och smul eb' 'a 'a. Ma'ix schaj sc'ojl eb' sb'eylb'ej sb'eyb'al, ma'ix syiclj pax eb' scuynb'il, atn jun tzo'n̈ 'ac'b'il can 'a eb' yu'uj.

Jeremías 5:3

'Ix waln 'a 'ixtic: Mamin, a wal mach tza sayq'ui, atn wal eb' 'anma caw yeln̈j tas tzyala. 'Ix a'ch wal yailal 'a yib'n̈ eb' a chon̈ab', palta may jac yel'ch 'a sat eb'. Xlaj a'ch syailal eb', palta ma'ix nachj 'el yuj eb'. Yel xo wal pit snab'en eb', 'ec'b'al stzatzl snab'en eb' 'a yib'n̈ q'uen q'ue'en. Ma'ix snib'j xon eb' xyactjcan stu b'eyb'al, xin chi.