Jeremías 35:17 - Chuj San Sebastian Bible

¹⁷ Yuj cha, an Jehová in, tztac' wuj smasnil, e Diosal in, an tzwala: Caw 'oj wac' jawc jun tzo'n̈ yailal alb'ilx 'el wuj 'a eyib'n̈ e masnil ax cajn ex 'a Judá yet' 'a Jerusalén. Yujto xcob' ex in tench wa'an, palta ma'ix eyiclej. In 'awj cob' 'ayex, palta ma'ex ta'w pax 'ayin, xchi Dios, xa chi 'a eb', xchi 'ayn an Jeremías in tic.

Chuj San Mateo Bible

¹⁷ Yuj chi' a in val Jehová Yajal in d'a Smasanil, e Diosal in, a in sval icha tic: Ol vac'b'at juntzan̈ yaelal alb'ilxo vuj d'a eyib'an̈ e masanil ex cajan ex d'a Judá yed' d'a Jerusalén tic. Yujto ix ex in cacha', palta maj e c'anab'ajej. Ix in avaj d'ayex, palta maj ex tac'voc d'ayin, xchi Jehová, xa chi, xchi d'ayin.

Jeremías 35:17 Referans Kwoze

Is 66:4

Yuj cha, tox xin na'a tas yailal 'oj wac' jawc 'a yib'n̈ eb', a tas c'un xiw eb' yu'uj, a chi 'oj wac' jawc 'a yib'n̈ eb'. Yujto xcob' wawtc eb', palta ma'ix ta'w eb' 'ayin. In cob' 'awjoc 'a eb', palta ma'ix stz'ac eb' yab'i'; a tas matz in nib'ej, a chi sb'o eb', xchi Dios.

Ro 10:21

A Isaías cha, yaljnac can paxi tas yaljnac can Dios yuj eb' yit israelal. Yaljnac 'ixtic: An xo tic, smasnil tiempo cob' b'achn 'at in c'ab' 'a jun chon̈b'al eb' 'anma caw pit tic, yic tzcob' wi'nc cot eb' 'ayin, xchi.

Jeremías 7:13

An Jehová in, an xwal 'ayx 'a b'ab'el, yet' 'a schalal yuj e b'eyb'al cha, palta ax tic, ma'ix e chaj eyab' tas xwala.

Is 65:12

Palta an pax wojtac tas yowlal tzjaw 'a eyib'n̈ cha, a tas wach' cob' tan̈b'il eyu'uj. Caw maysch'olnil 'oj 'aj 'el'ch 'a eyib'an̈: 'Oj wac' tzu'xoc 'el e jolm yet' q'uen espada, yujto xcob' ex wawtej, palta ma'ex ta'w 'ayin. In cob' 'awj 'ayex, palta ma'ix e tz'ac eyab'i'; a tas matz in nib'ej, a chi xe b'o'o.

Pr 16:2

Toto tzcalec to wach'n̈j tas tzqui b'o'ec, palta a Jehová a tzb'eyc'ojlan smasnil tas nab'il cujec cha.

Miqueas 3:12

Smulyujoc eb', ax slajw 'ejm Jerusalén, atn jun chon̈b' yic tzaln Sión, 'icha wal t'ocb'il lum 'oj 'ajcni. Jun b'uln̈ 'oj 'ajcn 'ejmi, ax lum tzaln 'aj 'ay yatut Dios, waymtac 'oj 'ajcni.

Jeremías 32:33

Ma'ix cot q'ueln eb' 'ayin, palta to a yichspatc eb' xya' cot 'ayin. Wach'xam caw ma'ix 'och wan in cuyn eb', palta ma'ix schaj xon eb' yab'i', a tas 'aj xin tench wan eb', caw may yel'ch 'a sat eb'.

Jeremías 26:5

Ma'ix e chaj eyab' pax tas xwac' yal eb' in checab', caw niwn 'ejm yaljnac eb' 'ayex, atn jun tzo'n̈ an̈ja matz e chaj eyab' ticnec.

Jeremías 11:8

Palta ma'ix schaj eb' yab'i', ma'ix syiclj eb'. A yic eb', to 'ix yac' eb' pitb'oc 'el snab'en. 'Ix ya'n 'at sb'a eb' 'a scal maysch'olnil. Man̈x 'ic yal sc'ojl eb' syiclj tas waljnac 'a 'a. Yuj cha, 'ix wa'n cot yailal 'a yib'n̈ eb', 'icha wal yaln can 'a jun trato cha, xchi Dios 'ayin.

Is 50:2

¿Tas yuj a yic in jawi, may mach x'ilchj wu'uj? ¿Tas yuj a yic in 'awji, may mach xta'w 'ayin? ¿Tom matz tztechj ex in coln 'el tze na'a? ¿Tom matz tac' ex wa'n 'el 'a libre tze na'a? Cojn junc paxti'al tzwala tztup chan̈ a mar, cusltac tz'ajcn sb'e a niwn a 'aj tzb'eyi, tzlaj cham no chay yuj tacn̈ti'al, tzc'a pax no', yujto man̈x 'a a a cha.

Pr 13:13

Toto may yel'ch jun tzo'n̈ checnb'il 'a qui satec, tzjaw yailal 'a quib'n̈ec; ax toto 'ay yel'ch 'ayn̈ec, caw wach' 'oj cajc 'el'chi.

Gn 6:17

Wal yel 'oj wa' cot jun niwquil owl yaxn̈ab' 'oj 'a'n b'ut'joc 'el sat lum lum tic, ax satl smasnil tas pitzn 'a sat lu'um.

Jeremías 19:3

Tzal 'a eb' 'ixtic: Ex sreyl Judá, yet' ex 'aj Jerusalén, 'ab'c tas tzyal Jehová, jun tztac' yuj smasnil, atn qui Diosalec an̈ israel on̈c tic, a tzaln 'ixtic: 'Oj wa' cot wal jun niwquil yailal 'a yib'n̈ jun e chon̈b' tic, a smasnil eb' 'oj 'ab'noc, caw 'oj sat sc'ojl eb' yab'ni.

Jeremías 19:15

A Jehová tztac' yuj smasnil, atn jun qui Diosalec an̈ israel on̈c tic, a 'ix aln 'ixtic: 'Oj wa' cot yailal 'a yib'n̈ Jerusalén tic, yet' 'a yib'n̈ jun tzo'n̈ xo chon̈b' 'ay 'a stz'ey. A smasnil yailal 'ix walcn tic, 'oj jawc 'a eyib'an̈ yujto xeyac' pitb'oc 'el e b'a, man̈xtzac eyiclj tas tzwala, xchi Dios, xchi Jeremías.

Jeremías 36:31

Ach tic yet' eb' en̈til, yet' pax eb' 'aych yopiso et'oc, caw 'oj wa'ch yailal 'a eyib'n̈ yuj e mul. 'Oj jawc 'a yib'n̈ eb' 'aj Jerusalén, yet' 'a yib'n̈ eb' 'aj Judá, atn jun tzo'n̈ yailal 'ix walcn 'el tic, atn jun tzo'n̈ paxti ma'ix e chaj eyab'i', xchi Dios, xa chi 'a eb', xin chi 'a Baruc cha.

Jeremías 11:11

Yuj cha, an Jehová in, an tzwala, to 'oj wa' cot yailal 'a yib'n̈ eb', man̈x 'oj stac' s'at eb' 'elc 'a 'a. Wach'xam 'oj 'el yaw eb', ax sc'ann eb' in colwal, palta man̈x 'oj in ta'w 'a eb'.