Jeremías 30:19 - Chuj San Sebastian Bible

¹⁹ Ata 'oj q'ue eyaw e b'itni, 'oj e tzewj 'a tzaljc'ojlal. Man̈x 'oj 'emtoc e b'isul, an 'oj wac' niwtjoc e b'isl cha. Man̈x 'oj e patquilx 'eli, palta to caw niwn 'oj eyaj 'el'ch wu'uj.

Chuj San Mateo Bible

¹⁹ Ata' ol q'ue e jaj e b'itan yuj eyac'an yuj diosal, ol ex tzevaj d'a tzalajc'olal. Ol vac' q'uib' e b'isul, man̈ jayvan̈ocn̈ej ol ex ajoc. Man̈ ol ex paticajeloc, a in ol vac' snivanil eyelc'ochi.

Jeremías 30:19 Referans Kwoze

Jeremías 33:22

A eb' yin̈tl in checb' David, yet' jun tzo'n̈ eb' yin̈tl Leví 'aych ya'malc 'och sti eb' 'anma 'ayin, caw 'oj wac' niwtjoc sb'isl eb' 'icha wal c'anal 'ay 'a satcha'an̈, mto 'icha wal yarenail sti a mar, may junc mach tztac' sb'isni, xchi.

Is 51:11

'Ixta pax 'oj 'aj smeltzj eb' colb'ilx 'el 'oj Mamin Jehová, caw 'ip sb'itn eb' yuj tzaljc'ojlal ax sjapx eb' 'a Sión. Caw wal tzetzetzn sat eb' yuj tzaljc'ojlal, yujto 'oj 'ilchjoc pax wach'l yuj eb', ax yailal yet' 'oq'uel, 'oj sat 'ejm 'a scal eb'.

Is 60:22

A jun c'aj eb' 'anma tic, caw jaywn̈ej wal sb'isl eb', palta 'oj wac' q'uib' sb'isl eb', smil-l xo 'oj 'aj eb'. Jaywn̈ej wal eb', palta 'oj 'ochx eb' niwquil nacion̈al, caw wal te'n 'oj yutc sb'a eb'. An Jehová in, an tzwala to a yic 'oj c'och stiempoal, an 'oj wac' 'el'choc jun tzo'n̈ tic muc'uc, xchi Dios.

Is 35:10

A eb' colb'ilx 'el yu'uj, caw 'oj b'itn eb' 'a stzaljc'ojlal yic 'oj c'och eb' 'a Sión. 'Oj 'aj cajn eb' ta 'a tzaljc'ojlal yet' 'a jun 'ejmn̈ej. 'Oj 'ilchjoc wach'il yet' tzaljc'ojlal yuj eb', ax yailal yet' 'oq'uel, 'oj satcn 'eli.

Ez 36:37

An Jehová Yajl in, an tzwal 'ixtic: A tas 'oj e c'an 'ayin, 'oj wa'x 'ayex, ax wa'n niwtjoc e b'isl 'icha no calnelu.

Zacarías 10:8

'Oj wawtc cot eb', ax wa'n syam sb'a eb', yujto colchjnacx eb' wu'uj. Caw 'oj niwtjoc pax chan̈ sb'isl eb' jun 'ejm xo, 'icha 'ajnc eb' 'a yic pecti'.

Jeremías 31:4

'Oj ex wi' chan̈ jun 'ejm xo. 'Oj e b'atj chan̈ pax yuj tzaljc'ojlal jun 'ejm xo yet' e pandereta.

Zacarías 12:8

An Jehová in, 'oj in tan̈wc eb' cajn 'a Jerusalén cha. A eb' may wal sjelnal ya'n owl 'a scal eb' cha, caw wal 'oj jelnb'oc eb' 'icha rey David. Ax eb' yin̈tl David cha, a eb' 'oj jucb'tzan eb' 'a jelnal, 'icha to a jun wángel b'ab'l s'at 'a yojltac eb' mto 'icha to a 'in.

Zacarías 8:19

A c'ajb'c'ojlal tzeyac' 'a yic schan̈l 'uj, 'a yic yol 'uj, 'a yic yucl 'uj yet' 'a yic slajn̈il 'uj, 'oj meltzjoc can 'och jun tzo'n̈ chi 'a q'uin̈al, yet' 'a tzaljc'ojlalil 'a eb' yin̈tl Judá. Yuj cha, 'a'c 'och e b'a 'a stojlal yet' 'a junc'ojlal.

Ez 37:26

'Oj in b'o in trato eyet' 'a jun 'ejmn̈ej, ax e can 'a tzaljc'ojlal 'a jun lugar cha. 'Oj wac' q'uib' e b'isl 'a smasnil tiempo, ax wa'n b'ox watut 'aj 'oj waj cajn 'a e cal.

Is 12:1

A 'a jun tiempoal cha, ata 'oj eyal 'ixtic: Mamin Jehová, tzcal yuj diosal 'aych on̈; wach'xam xcot wal yowl 'a c'ojl 'a quib'n̈ on̈, ax ticnec tox x'ec' jun cha, to wan a'n pax sniwnal qui c'ojl on̈.

Nehemías 8:12

Xlajw cha, x'at smasnil eb' chon̈b' wa'oc, xyu'n eb' tas xyuq'uej, ax eb' may yico', xya'n eb' yic eb'. 'Ix wa eb' 'a tzaljc'ojlal, yujto 'ix nachj 'el yuj eb' tas 'ix 'ajx scuy eb' cha.

Esdras 6:22

Uque c'u sna eb' sq'uin̈l 'ixm pan may yich 'a tzaljc'ojlal, yujto a Jehová a x'a'n 'och tzaljc'ojlal 'a snab'en eb', yujto xyac' jelmjoc snab'en win sreyl Persia, sec tzcolwj sb'on yatut Dios, atn sDiosal chon̈b' Israel.

A Sb'ab'el Carta San Pedro 1:7

'Iltec q'uen oro, yowlal tz'ajx prowal q'uen yet' c'ac', sec chequel toto wach', mto ma'ay. An̈jtona', an̈ec tic yowlal tzon̈ 'ajxec prowal, sec chequel toto yel tzca'c 'och Dios 'a qui c'ojol, mto ma'ay. Toto tzca'c techjoc jun tzo'n̈ prowal cha, yel xo niwn quel'chec 'a yib'n̈ q'uen oro cha, yujto a q'uen cha, 'e'lb'a yec' q'ue'en. Toto tzca'c techjoc, ax 'a yic 'oj jawc Jesucristo, 'oj on̈ yalc wach'il, ax ya'n qui wach'l 'icha yico'. Caw niwn quel'chec ta'.

Is 60:19

Ata', man̈x 'a tz'och yoc c'u eyuj 'a c'ual, man̈x 'a tz'och yoc 'uj eyuj 'a 'ac'wal, yujto an Jehová in, an 'oj wac' in sacq'uinlal 'ayx 'a jun 'ejmn̈ej; an e Diosal in tic, an 'oj ex wac' b'inaxoc.

Is 52:9

Ex 'aj Jerusalén to lan̈chjnac can 'ejm e chon̈ab', 'el cab' eyaw e b'itn yuj tzaljc'ojlal, yujto a Jehová 'ix 'o'ch sc'ojl 'a schon̈b' tic, yuj cha, ex colx 'elt yu'uj.

Zacarías 2:4

'Ixc muc'uc, 'at al 'a jun quelm 'et'jnac jun ch'an̈ 'echtab' lum cha: To a Jerusalén 'oj b'ox cha'an̈, ax scajn eb' 'anma jun 'ejm xo. Caw 'oj niwtjoc sb'isl eb' 'anma cha, yel xo 'oj niwtjoc scajb'en noc' eb', man̈x 'oj stac' yoch smuroal chon̈b' cha.

Jeremías 31:27

A Jehová, a tzaln 'ixtic: 'Ay jun c'ul 'oj jawoc, 'oj wac' niwtjoc sb'isl eb' 'anma', yet' no noc' 'a yol yic Israel yet' 'a yol yic Judá.

Is 51:3

'Ixta 'oj wutc wa'n in wach'c'ojlal an Jehová in 'a yib'n̈ eb' 'aj Sión, atn jun chon̈b' mac'b'il 'ejm lan̈chjoc. A eb' lum tacn̈ lu'um, 'oj 'och eb' lum yaxlumal, 'icha lum 'aj 'ay te 'awb'ente 'a Edén. Cojxn tzaljc'ojlal, b'it yet' alj yuj diosal 'ay 'ayn ta'.

Is 27:6

'Ay jun c'ual 'oj yi'x eb' yin̈tl Jacob yip jun 'ejm xo. Yuj eb' ax ya'n cot Dios syaxilal 'a yolyib'n̈q'uinl tic jun 'ejm xo. Lajn eb' 'icha junc snun uva to tz'ejm schan̈l yib', tzwolni, tznichni, caw niwn sat tzyac'a.

Salmos 53:6

A cab' wal 'a tzaln Sión tzcot qui colnb'il an̈ israel on̈c tic. A yic 'oj ya'nc pax Jehová swach'c'ojlal 'a quib'n̈ec jun 'ejm xo, caw 'oj qui tzaljec an̈ yin̈tl on̈c can Jacob tic.

Nehemías 8:17

Smasnil eb' 'anma paxn̈cta, eb' to xit'nc 'a 'icha presoal, 'ix sb'o eb' schinama, 'ix 'och eb' 'a yojol. A 'a yictax stiempoal Josué, win yunnal Nun, may 'aj b'onc jun 'ejmoc 'icha jun tic. Yuj cha, caw 'ix tzalj eb' chon̈ab'.

Jn 17:22

A jun a wach'l a'jnac can 'ayin, a 'ix wac' pax 'a eb', sec junxn̈ej tz'aj snab'en eb', 'icha waj et'oc.

Is 60:9

A jun tzo'n̈ 'oj eyil cha, atn te barco tzcot 'a jun tzo'n̈ xo chon̈b' 'ay 'a sti a mar, b'ab'l eb' te yic Tarsis yuj eb' te'. Ata ajun eb' eyit chon̈b' yet' eb' 'anma cha, yet' eb' oro, yet' eb' plata, yuj yi'nb'ilc chan̈ in b'i an Jehová in. An e Diosal in, to Cojxn In Ton Dios In, an 'ixta 'oj wutc ex wa'n b'inaxc paxi.

Is 55:5

Ax 'a yic b'aq'uin̈, 'oj eyawtc cot eb' 'anma man̈ eyojcoc. A eb' 'anma man̈ ex 'ojtnacc cha, caw yajn̈ej ax sjaw eb' 'ayx muc'uc, yujto an Jehová in, Cojxn In Ton e Diosal In, an tzex wac' 'ijxoc chan̈ yet' e chon̈ab', xchi Dios.

Jeremías 17:26

'Oj cot eb' 'anma cajn 'a jun tzo'n̈ chon̈b' 'ay 'a yol yic Judá, atn eb' 'ay 'a spatquil 'el chon̈b' Jerusalén tic, yet' eb' cajn 'a lum slum Benjamín, eb' 'ay 'a lum pan̈n 'a'lic, eb' 'ay 'a lum jolmctac witz, yet' eb' 'ay 'a lum Négueb. 'Oj yi' cot eb' no noc' tz'ajx tz'a xajmb'alil, yet' jun tzo'n̈ xo xajmb'al, 'oj yi' cot eb' 'ixm trigo tz'ajx ofrendail, incienso, yet' ofrenda yuj yalx yuj diosal 'ayin.

Ez 37:10

A yic xwaln 'a 'ic' 'icha xyutj Dios yaln 'ayn cha, 'ix 'och yic' eb' tacn̈ b'ac cha, 'ix pitzw pax eb', cojn cha, 'ix q'ue lin̈n eb' smasnil. Caw wal man̈x b'ischjb'enoc eb'.

Is 26:15

Mamin Jehová, ach 'ix ac' q'uib' jun qui chon̈b' tic on̈, sec tz'ijx chan̈ a b'i, ach 'ix ac' nitzmjoc smon̈jonal qui lum on̈.

Jeremías 3:16

An Jehová in, an tzwala to a yic 'oj niwtjoc e b'isl 'a jun chon̈b' cha, man̈x 'a 'aj 'oj eyac' b'inaxc te scaxail in trato. Man̈x 'oj e na cot te', man̈x 'oj jawc te 'a e nab'en, man̈x 'a tas 'oj e na 'a te', man̈x 'oj eyac' b'o junc xo te 'a'to.