Jeremías 2:15 - Chuj San Sebastian Bible

¹⁵ ¿Tas yuj x'och eb' 'anma 'ajc'ojlal 'ayex? 'Icha yel yaw no león, 'ixta ya'n 'el eb' yaw 'ayex. Caw x'ixtx 'el e chon̈b' eyu'uj; xn̈usx tz'a'oc, man̈x 'a junc mach xcan cajn 'a 'a.

Chuj San Mateo Bible

¹⁵ ¿Tas yuj ix och eb' anima ajc'olal d'ayex? Icha yel yav noc' choj icha chi' yel yav eb' d'ayex. Ix can tz'inan e luum, ix tz'ab'at e chon̈ab'. Man̈xa mach syal scajnaj d'ay.

Jeremías 2:15 Referans Kwoze

Jeremías 4:7

'Icha tz'aj yelt no león 'a 'aj 'ay swaynub', 'ixta tz'aj scot eb' 'oj wul satnc 'el jun tzo'n̈ nacion̈ tic. Tox 'ix 'elt eb' 'a yol schon̈ab', yic tzwul satxoc 'el e chon̈b' yuj eb'. Caw 'oj sma'cn 'ejm lan̈chjoc eb', man̈x 'a xon junc mach 'oj can cajn 'a 'a, xchi Dios.

Jeremías 50:17

'Ix yaln pax Jehová 'ixtic: 'Icha no calnelu satnc can 'ati, pechb'il no yuj no león, 'ixta yaj eb' israel. B'ab'el 'emnc eb' yuj win sreyl Asiria. Xlajw cha, ax Nabucodonosor sreyl Babilonia, a 'ix wach' satn 'el eb'.

Jeremías 9:11

'Ix wab' spacn Jehová 'ixtic: A yic 'oj lajwc in b'on jun tzo'n̈ tic, a Jerusalén yet' Judá, jun b'uln̈ 'oj wutc in ma'n 'ejm lan̈chjoc cani. Axn̈ej no 'ocs 'oj 'ec' ta', xchi Dios.

Is 5:29

A yol sjaj eb', lajn wal sn̈il-li 'icha yic no león, yic tzyamn no schib'ej, tzyi'n 'at no a 'aj 'ay yet'ul, toc 'ay mach tztac' yi'n 'ec' 'a no'.

Is 1:7

A qui nacion̈ec tic, tox xcan 'a cusltaquil, 'ayx 'och sc'a'l qui chon̈b'ec. Ax smasnil sat cawb'enec, q'ueln on̈ wal 'ochi sc'uxn eb' chuc chon̈b'al. Xlajw can 'ejm smasnil yuj eb', cusltac xoj yilx x'ajcni.

Sofonías 3:6

Yuj cha, tzyaln Jehová 'ixtic: Tox xin satl jun tzo'n̈ nacion̈, tox xin mac' 'ejm lan̈chjoc storreal schon̈b' eb' 'a yib'n̈ smuroal. Cusltac xoj xwutj can yol scayeal, man̈x 'a xon 'anma tzb'eyc' ta'. A 'a jun tzo'n̈ chon̈b' cha, man̈x 'a junc 'anma xcan cajn 'a eb'.

Sofonías 2:5

'Oltacx wal ex cotnc 'a Creta, ex to cajn ex 'a sti a mar. A Jehová tox 'ix yala tas 'oj jawc 'a eyib'an̈, 'ix yal 'ixtic: 'Oj in satl Canaán atn schon̈b' eb' filisteo, man̈x xon junc 'anma 'oj can cajn ta'.

Sofonías 1:18

A wal 'a jun c'u yic 'oj ya'nc Jehová yowl sc'ojl cha, caw ma'oj colchjoc 'el eb' 'anma yuj q'uen oro, mto yuj q'uen plata, yujto yuj yowl sc'ojl cha, 'oj satl smasnil nacion̈. Wal 'a yajn̈ej ax slajw 'el smasnil 'anma 'a yolyib'n̈q'uinl tic, 'icha tz'aj junc tas satl yuj c'ac'.

Nahúm 2:11

¿Tas 'ix 'i'n chon̈b' Nínive tic? 'Icha wal sn̈aq'uen no león 'aj 'ayc' yet' yune', 'ixta yaj 'a yic yaln̈taxi. A e no león chi yet' yune', caw wach' yaj no ta tzyab'i, may mach tzxib'tn no ta'.

Am 3:12

A Jehová a tzaln 'ixtic: A jaywn̈ocx eb' 'aj Samaria 'oj colchjoc, cojxn jac sc'axpil xila, mto sc'axpil sch'at eb' 'oj yic' ax s'at eb' 'eloc. Lajn 'oj 'aj eb' 'icha tzyutj junc 'ilm calnelu scoln 'el chab'oc yoc mto jac sti schicn no calnelu 'a sti no león, xchi.

Am 3:8

Smasnil 'anma tzxiwi, toto tz'el yaw no león. An xo, ¿tom ma'oj wal-l spaxti Jehová Cajlil, toto a tzaln 'ayin?

Am 3:4

Toto tz'el yaw no león 'a scal te', tzyal 'el'chi tox 'ix yamchj schib'j no tzyal cha. Toto tz'el yaw no cotc león 'a yet'l 'a yoltc n̈aq'ue'en, tzyal 'el'chi, 'ay junc tas xyamchj yuj no'.

Os 11:10

'Oj 'ochx tza'n eb' in chon̈b' wu'uj, ax yel waw 'icha no león. Yuj tz'el waw cha, ax scot eb' wunnal 'a 'aj tz'em c'u, caw wal tz'ib'x eb' yuj xiwlal ax sjaw eb' 'ayin.

Os 5:14

'Icha wal smacwj junc no león, 'ixta 'oj wutc in macwj 'a eb' yin̈tl Efraín yet' 'a eb' 'aj Judá. 'Oj in ch'iychtoc can eb', 'oj lajwc cha, ax in 'ati. An 'oj 'ec' in lem chan̈ eb', toc 'ayt mach 'oj stac' scoln eb' 'a yol in c'ab'.

Ez 5:14

Sictac 'oj 'ajcn e chon̈b' tic, ax yic 'oj laj 'ec' eb' 'anma cajn 'a stz'ey, 'oj laj stzetzc eb'.

Jeremías 44:22

Palta a Jehová caw man̈x 'ic techj yiln 'och jun tzo'n̈ maysch'olnil xe b'o cha, caw ma'ix chaj sc'ojol. Yuj wal cha, a qui chon̈b'ec, caw 'ix lan̈chj 'ejm ticnec, man̈x 'a mach cajn 'a 'a. Tox 'ix 'atcn catb' 'a yib'an̈, caw tzxiw eb' 'anma yiln 'ochi.

Jeremías 34:22

An Jehová in, an tzwala: 'Oj wac' jawc pax eb' 'a jun chon̈b' tic jun 'ejm xo, ax ya'n pax eb' owl yet'oc. 'Oj 'ejmc yuj eb', ax sn̈usn can eb'. Ax jun tzo'n̈ xo chon̈b' 'a yol yic Judá, 'oj wa'cn 'och eb' 'a cusltac lumal, man̈x 'a junc 'anma 'oj can cajn 'a 'a, xchi Dios.

Jeremías 33:10

'Ix yaln pax Jehová 'ixtic: Ax tic tzeyala, to a jun lugar tic caw cusltac yajcni, man̈x 'a 'anma', man̈x 'a pax no noc' tz'ilx yec' 'a 'a; wach'xam a 'a yoltc scayeal Jerusalén, yet' 'a yoltc jun tzo'n̈ chon̈b' 'a Judá, caw wal sictac yajcni, man̈x 'a junc 'anma', man̈x 'a pax junc no noc' 'ayc' 'a 'a.

Jeremías 26:9

¿tas wal yuj xa te'wtzej a b'a aln 'a sb'i Jehová, chajtlto a jun yatut Dios tic, lajn 'oj 'ajcn 'icha 'ajnc jun scajnub' 'ay 'a Silo? 'Ix aln paxi to 'oj lajwc 'ejm jun chon̈b' tic, man̈x 'a junc 'anma 'oj can cajn 'a 'a, xchi eb'. Smasnil eb' chon̈b' cha, 'ix jaw eb' 'a yatut Dios cha, 'ix 'och oyn̈joc eb' yac' owl wet'oc.

Jeremías 25:30

Ach Jeremías, al smasnil jun tzo'n̈ paxti tic 'ixtc 'a eb': A Jehová 'icha wal sc'an̈ c'u, 'ixta 'oj 'awjoc 'emt 'a scajnub' 'ay 'a satcha'an̈, atn jun yet'l to cojn 'ay yico'. 'Icha wal yel yaw eb' te'm 'el yalil sat uva, 'ixta wal 'oj 'el yaw 'a smasnil eb' cajn 'a sat lum lum tic.

Jeremías 5:6

Yuj ton wal cha, 'oj 'eltoc no león 'a scal niwc te', ax smiln cham no eb'. Ax no 'ocs 'a lum cusltac lu'um, a no 'oj ch'iychtanc eb'. 'Oj c'och no leopardo 'a sti schon̈b' eb'. Toto 'ay eb' 'oj 'eltoc, caw choc' 'oj yutc no sch'iychtan can 'at eb', yujto caw niwn smul eb' x'ochi. Caw niwn 'ejm xyactj can eb' Dios, xin chi 'a in nab'en.

Is 24:1

A Jehová a 'ix aln 'ixtic: 'Iltec, an 'oj in mes sat lum lum tic, caw 'oj cancn jitn lum wu'uj, ax in chuln b'e'n lu'um, 'oj sactzic can 'at eb' cajn 'a sat lum wu'uj.

Is 6:11

Yuj cha, xin c'anb'n 'a 'a: ¿Jantc to wal tiempo 'oj wal-l jun tzo'n̈ tic Mamin? xin chi. 'Ix ta'w 'ayn 'ixtic: Masnto 'oj lajwc can 'ejm jun tzo'n̈ chon̈b' tic, yic man̈x 'a mach cajn 'ec' 'a 'a; yic man̈x 'a junc 'anma tzcan 'a yol yatut, yic 'oj can lum lum tic 'a sictaquil.

Is 5:9

A Jehová tztac' yuj smasnil, a 'ix 'a'n alxc 'ayn 'ixtic: A jun tzo'n̈ n̈a cha, toxn̈ej to niwac, mto caw wach' yilxi, palta 'oj can 'a sictaquil. Man̈x 'a mach 'oj cajnc eb' te'.

Salmos 57:4

Oyn 'och eb' 'ajc'ojl 'ayn 'icha no león tzchin eb' 'anma'. Lajn wal ye eb' 'icha q'uen lanza, lajn pax yet' jun tzo'n̈ jul-lab'; a spaxti eb', lajn yet' q'uen espada caw jay ye.

Job 4:10

Lajn yaj eb' 'icha no león. Wach'xam tz'el yaw no', palta a yic tzma'n 'el Dios ye no', tz'och wan no yel yaw.

Jueces 14:5

Xlajw cha, 'ix 'at Sansón yet' smam snun 'a chon̈b' Timnat. Ax yic x'emch 'a 'aj 'ay nan̈l te snun uva 'awb'il yuj eb' 'aj chon̈b' cha, 'ix 'elt jucnjoc jun no quelm león 'a winac, caw tz'el yaw no scot 'a 'a.

Jeremías 51:38

'Oj 'el yaw eb' 'aj Babilonia 'icha no león, 'oj 'el yaw pax eb' 'icha no cotc león.

Ez 36:3

A yic 'ix smacn 'ec' eb' nacion̈ chi yico'oc lum jolmctac witz 'a yol e macb'en, 'ix laj satnc 'el eb' tas 'ay 'a jun tzo'n̈ lugar cha, 'ix laj b'uchwj eb' 'ayx ax cajn ex chi ta'.

Zacarías 11:3

Ax xo ex 'ilm calnelu, 'el cab' wec'c'oc eyaw eyoq'ui, yujto tox 'ix lajw 'ejm te c'ultac. Checl yel yaw no león 'a sti a Jordán, yujto tox 'ix lajw 'ejm lum waymtac.

Jeremías 6:8

B'oc e b'eyb'al ex 'aj Jerusalén, sec wach' ma'oj wi'l in nab'en 'ayex, to ma'ay, 'oj wa'cn 'och e lum 'a cusltaquil. Man̈x 'a junc mach 'oj cajnoc, xchi Dios.

Jeremías 9:10

'Ix waln an Jeremías in tic 'ixtic: Caw tzin 'oc' yuj eb' lum jolmctac witz, tzin cus yuj eb' lum 'a'lic 'aj wach' swa e cajb'en noc', yujto 'ix tz'a smasnil, man̈x 'a mach tztac' sb'eyc' ta'. Man̈x 'a junc wacx tz'el yaw; an̈jtona e no ch'ic yet' e no calte'al noc', 'ix 'at e no 'elc smasnil, xin chi.

Jeremías 10:22

Macljec eyab' wal jun 'ab'x tzjawi. A jun chon̈b' 'ay 'a stojlal norte, caw tzn̈il-li sc'an̈ scoti. A jun chi 'oj jelmtanc 'och chon̈b' Judá 'a cusltac lumal, cojxn̈ej no 'ocs 'oj 'aj cajn ta'.

Jeremías 25:9

yuj cha, 'oj wawtc cot smasnil eb' chon̈b' 'ay 'a stojlal norte, yet' pax in checb' Nabucodonosor sreyl chon̈b' Babilonia, yic wach' tzjaw eb' yac' owl 'a jun chon̈b' tic, yet' 'a smasnil jun tzo'n̈ xo nacion̈ 'ay 'a stz'ey, yet' smasnil eb' cajn 'a 'a. 'Oj in satl eb' smasnil. Jun 'ejmn̈ej 'oj wac' lajwc 'ejm eb'. Ax eb' 'oj 'ilnc eb', 'oj xiw eb' yuj eb', 'oj b'uchxoc eb' yuj eb'.