Is 51:11 - Chuj San Sebastian Bible

¹¹ 'Ixta pax 'oj 'aj smeltzj eb' colb'ilx 'el 'oj Mamin Jehová, caw 'ip sb'itn eb' yuj tzaljc'ojlal ax sjapx eb' 'a Sión. Caw wal tzetzetzn sat eb' yuj tzaljc'ojlal, yujto 'oj 'ilchjoc pax wach'l yuj eb', ax yailal yet' 'oq'uel, 'oj sat 'ejm 'a scal eb'.

Chuj San Mateo Bible

¹¹ Ichaton chi' ol aj smeltzaj eb' colb'ilxo el uj Mamin Jehová. Ol javoc eb' d'a Sion tic yed' b'it yic tzalajc'olal. Ol tzetzon sat eb' stzalaji, ol satel oq'uel yed' cusc'olal.

Is 51:11 Referans Kwoze

Is 25:8

'Oj satl Jehová chaml 'a jun 'ejmn̈ej, ax sucn 'el yal sat smasnil eb' 'anma'. 'Oj satl pax sq'uixwel eb' schon̈b' 'a smasnil yolyib'n̈q'uinl tic, yujto 'ixta yaj yaln cani.

Apoc 21:4

Man̈x 'oj scha 'oc' eb'. A wal ta', man̈x 'a chamel, man̈x 'a 'oq'uel, man̈x 'a cusc'ojlal, man̈x 'a pax yailal. Yujto jantcn̈ej tas 'ay 'a yic yalan̈, 'e'nc xo, xchi.

Apoc 7:17

Yujto a jun tzcuch Calnelu, atn jun 'ayc' 'a spacl snan̈l jun despacho, a tz'iln eb' 'icha junc 'ilm calnelu. A tz'i'n 'at eb' 'a jun a a yic q'uinl 'ayc' 'a jun 'ejmn̈ej. Ax Dios, man̈x 'oj chanc 'oc' eb', xchi 'ayin.

Is 35:10

A eb' colb'ilx 'el yu'uj, caw 'oj b'itn eb' 'a stzaljc'ojlal yic 'oj c'och eb' 'a Sión. 'Oj 'aj cajn eb' ta 'a tzaljc'ojlal yet' 'a jun 'ejmn̈ej. 'Oj 'ilchjoc wach'il yet' tzaljc'ojlal yuj eb', ax yailal yet' 'oq'uel, 'oj satcn 'eli.

2 Ts 2:16

A Cajlil Jesucristo yet' qui Mam Dios, caw 'ay schamc'ojlal 'ayn̈ec. Yuj wal swach'c'ojlal, tzya'n sniwnal qui c'ojlec 'a smasnil tiempo. Tzya'n pax ca'c 'och swach'l chi yipc qui c'ojol.

Is 61:7

Ax tic 'ec'b'al xo xeyutj eyab'n syail, 'ec'b'al ex 'aj e b'uchxi, ex laj b'ajxi, yuj cha, ax ticnec, 'ec'b'al xo sricoal 'oj eyaj 'a yol e chon̈ab', man̈x 'a b'a'n̈ 'ay slajb' e tzaljc'ojlal.

Jeremías 33:11

Palta ax 'oj 'ajoc, a 'a tic 'oj 'ab'xoc pax yoch b'it yic q'uin̈ yet' yic tzaljc'ojlal jun 'ejm xo, yet' b'it yic eb' quelem yet' eb' 'ix cob'es yic tznupn eb'. 'Oj 'ijxoc cot ofrenda yic alj yuj diosal 'a watut, ax laj yalnc eb' 'ixtic: Alc yuj diosal 'a Jehová tztac' yuj smasnil, yujto caw wach' snab'en, 'ay schamc'ojlal 'a smasnil tiempo, 'oj schic eb'. An Jehová in, an tzwala: Caw 'oj wi'xq'ue'ch jun chon̈b' tic 'icha xon yaj 'a yic yaln̈taxi.

Apoc 22:3

May junc tas, may junc mach catb'tzab'il yuj Dios 'oj c'och ta'. A 'a jun chon̈b' cha, ata 'ayc' sdespacho Dios yet' yic jun tzcuch Calnelu. Ax eb' ya'mal servil, 'oj yal sb'a eb' 'a 'a.

San Judas 1:24

Yuj Cajlil Jesucristo tzcalnec wach' paxti 'a Dios qui Colmalec. Cojn Dios tztac' on̈ stan̈wniec yic wach' matz on̈ telwec, sec may jac qui paltailec, ax ya'n qui tzaljc'ojlalec 'a yojltac 'a 'aj 'ay swach'il. A Dios smoj yalx yu'uj to caw niwn swach'il, niwn yel'chi, caw 'ay spoder, cojn Yajl yaj 'a smasnil tas. Smoj yalx 'ixta 'a 'a, yujto 'ixta xon yaji yic mantzac b'o yolyib'n̈q'uinl tic, 'ixta yaj ticnec yet' pax 'a smasnil tiempo. B'o cab' 'ixta'.

Is 65:19

An̈jtona 'in, 'oj in tzalj pax yuj chon̈b' Jerusalén, 'oj in tzalj pax wiln 'och eb' in chon̈ab'. Man̈x 'a b'a'n̈ 'oj 'ab'xoc yel yaw 'anma yoc' 'a jun chon̈b' cha.

Is 44:23

A satcha'an̈, 'el cab' yaw sb'itn 'a tzaljc'ojlal yuj smasnil tas sb'ojnac Jehová. A xab'l yich lum lu'um, q'ue cab' yaw, ax eb' lum niwc witz, eb' lum tzalctac, yet' eb' te niwc te smasnil, ya'l cab' eb' yaw yuj tzaljc'ojlal. Yujto a Jehová tox 'ix sch'oxl stzictznial yic 'ix 'ajx 'el eb' israel 'a libre, atn eb' yin̈tl can Jacob.

Is 49:13

Ach satcha'an̈, 'el cab' aw 'a tzaljc'ojlal. Ach lu'um, tzaljan̈. Yet' ex witz, 'el cab' eyaw yuj tzaljc'ojlal, yujto a Jehová, wan ya'n sniwnal sc'ojl eb' schon̈ab'. Wan yo'ch sc'ojl 'a eb' yuj syailal.

Is 48:20

A Jehová a tzaln 'ixtic: 'Eln̈ect 'a Babilonia, 'eln̈ect 'a scal eb' caldeo cha. Alc 'el yab'xil jun tic yet' 'aw yic tzaljc'ojlal, 'a'c 'ojcaxc 'eli, masnto 'a 'aj tzlajw c'och lum lu'um. Alc 'ixtic: A Jehová a 'on̈ 'a'nec 'el 'a libre an̈ yin̈tl on̈c Jacob tic, atn jun schecab', xe chi.

Apoc 21:1

Xlajw cha, xwiln jun 'ac' satcha'an̈, yet' jun 'ac' yolyib'n̈q'uinal. Yujto a jun b'ab'l satcha'an̈, yet' jun b'ab'l yolyib'n̈q'uinal, satnc 'eli. An̈jtona a mar, man̈x 'a a'.

Salmos 126:5

A eb' tz'aw yet' scusc'ojlal, ax yic 'oj smolnoc chan̈ eb' sat yawb'en cha, caw 'oj tzaljoc eb'.

Is 11:15

'Oj yac' Jehová tup chan̈ jun sc'ab' a Chac mar. Ax ya'n cot jun niwquil 'ic' caw c'ac' 'a yib'n̈ 'a niwn a Éufrates. 'Oj tupcn chan̈ a', uque 'oj 'elcn a 'a yet'l cha. Wach' 'oj 'ec' 'anma 'a yojl a', man̈x yowlalc tzyij 'el eb' xan̈ab'.

Is 55:12

'Oj eyelt yet' e tzaljc'ojlal 'a 'aj 'ayx 'ec' 'icha presoal cha, junc'ojlal 'oj e paxt 'a e chon̈ab'. A yic 'oj ex yilnc 'och eb' lum niwc witz, eb' lum tzalctac, te niwc te', 'icha to 'oj spoc' eb' sc'ab' sb'itn chan̈ yuj stzaljc'ojlal yic 'oj ex yiln 'och eb'.

Is 65:14

A eb' in checb' tic, 'oj b'itnoc eb' yuj tzaljc'ojlal, palta ax xo tic, to 'oj 'el eyaw eyoq'ui. Caw wal 'oj e cus yuj yailal 'oj jawc 'a eyib'an̈.

Jeremías 31:13

Caw 'oj b'atjoc chan̈ eb' 'ix cob'stac yuj tzaljc'ojlal. 'Oj tzaljoc pax chan̈ eb' quelmtac, yet' pax eb' 'ichmtac winac. An 'oj wac' sniwnal sc'ojl eb', 'oj meltzjoc 'och scusc'ojlal eb' 'a tzaljc'ojlal, yel xo niwn stzaljc'ojlal eb' 'oj wac' 'a yib'n̈ jun tzo'n̈ yailal 'ix laj yil eb'.

Salmos 126:2

Xlajw cha, 'ix ca'nec wal qui gana qui tzewji, 'ix 'el wal cawc qui b'itnec yuj tzaljc'ojlal; ax eb' chuc chon̈b'al, xlaj yal eb' 'ixtic: A Jehová, caw niwn swach'c'ojlal xyac' 'a eb', xchi eb'.