Is 46:10 - Chuj San Sebastian Bible

¹⁰ A 'a yictax pecti', waln cani tas 'oj ujc 'a slajb' c'ual. Waln cani to 'oj ujc tas nab'il wu'uj, 'oj in b'o smasnil tas tzin nib'ej.

Chuj San Mateo Bible

¹⁰ A in valnaccan d'a yictax yichb'anil tas ol ujoc d'a slajvub'. Ayocto valannaccani tastac toto ol ujoc. Masanil tas nab'il vuuj ol in c'ulejn̈ej.

Is 46:10 Referans Kwoze

Pr 19:21

Til wal tas tz'el snan 'anma', palta cojn tas tzchaj sc'ojl Jehová, a chi tzb'o'i.

Salmos 33:11

A tas tzna Jehová to tzb'o', jun 'ejmn̈ej to wach' tz'ajcni.

Is 43:13

A 'a yictax pecti', Dios in xoni. May junc mach tztac' scoln 'el sb'a 'a yol in c'ab', may junc mach tztac' sjun 'el tas tzin b'o'o, xchi Dios.

Is 45:21

Paxtinan̈ec, alec tas chi eyojc cha, c'anb'jlajec 'ayex, jun lajn tzeyutj eyalni. ¿Mach aljnac 'el jun tzo'n̈ tic 'a yictax yel yich sb'o smasnil tas? ¿Mach aljnac 'el 'a yictax pecti'? ¿Tom man̈ oquin an Jehová in 'ix wal-l jun tzo'n̈ tic? May junc xo Dios, To Cojxn In Toni. Cojn in tzwac' 'el'choc tas tzwala yic tzex in coln 'eli.

Pr 21:30

Wach'xam 'ay mach jelan, 'ay snab'en, toxn̈ej niwn tas yojtac, palta matz tac' stenn 'och wan snib'b'en Jehová.

Salmos 135:6

Smasnil tas tznib'j sb'o 'a satcha'an̈, 'a sat lum tic, 'a yol a mar yet' 'a xab'l yich a', tzb'on̈j yu'uj.

A Tas Sc'ulejnac Eb' Schecab' Jesús Hechos 5:39

Palta toto yic Dios, ma'oj stac' ca'nec lajwoc. 'Ay smay, toq'ue a Dios tzca'c owl yet'oc, xchi winac.

Is 44:7

¿Mach wal junc lajn wet'oc? Paxtin cab'i', yal cab' 'ayin tas yaji. ¿Toc 'ay junc mach 'ix alni tas ujnc 'a yictax pecti', yet' tas 'oj ujc 'a yic b'aq'uin̈? Toto 'ay, yal cab' tas jab'xoj 'oj ujoc.

Is 46:11

'Ay jun mach tox 'ix wawtj cot 'a stojlal 'aj tzq'uel c'u, caw najt 'oj cot 'icha junc no c'uc'um. A jun cha 'oj wac' sb'o smasnil tas nab'ilx wu'uj. A tas 'ix wala, mto a tas nab'il wu'uj, 'oj wac' 'el'choc.

A Ch'an̈ Carta D'a Eb' Hebreo 6:17

An̈jtona', 'ixta yutjnac Dios ya'n sti', yujto mun slocjnac sb'i. Yujto tznib'j tzch'ox 'ayn̈ec, to caw yel 'oj quico'oquec tas 'aj ya'jnac sti yu'uj, to may jac tas 'oj sjela'.

Dn 4:35

Qui masnil an̈ cajn on̈c 'a sat lum lum tic, caw may jac quel'chec 'a sat. Tzb'o tas tznib'j sb'o 'a scal eb' 'ayc' 'a satcha'an̈, yet' 'a qui cal an̈ cajn on̈c 'a sat lum tic. May junc mach tztac' stenn 'och wa'an, yic tzyaln 'a 'ixtic: ¿Tas yuj 'ixta tza b'o'o? man̈ xchic 'a 'a.

Gn 49:10

May junc mach tztac' yi'n 'ec' a jelnal Judá; may mach tztac' yi'n 'ec' a c'occh yic opiso 'a yol a c'ab', masnto 'oj jawc yajl te c'occh cha, atn jun mach to smasnil eb' chon̈b' 'oj yiclnoc 'a 'a.

A Tas Sc'ulejnac Eb' Schecab' Jesús Hechos 15:18

'Ixta yutjnac Cajlil yalni, atn 'a'jnac cojcoc 'el jun tzo'n̈ tic, yictax pecti', xchi 'a Ch'an̈.

Gn 3:15

A ticnec, tzwa'cn 'och chacjb'al 'a a cal yet' 'ix 'ix, yet' smasnil en̈til, yet' yin̈tl 'ix. A yin̈tl 'ix tic, a 'oj ma'nc poj a jolom, ach xo 'oj a chi yich sq'uenl yoc yin̈tl 'ix cha, xchi Dios.

A Tas Sc'ulejnac Eb' Schecab' Jesús Hechos 3:23

Yujto tzann̈j mach matz yiclni tas 'oj yal jun schecb' Dios cha, 'oj satx can 'el 'a scal eb' quit chon̈b'ec, xchi Moisés 'a Ch'an̈ U'un̈.

Is 14:24

A Jehová tztac' yuj smasnil, a 'ix aln pax 'ixtic: A smasnil tas tox xin na'a to 'oj in b'o', yowlal 'oj wac' 'el'choc.

Is 25:1

Mamin Jehová in Diosal ach; 'oj ach in b'itnoc yet' in wach' paxti', yujto caw xac' 'el'choc tas nab'il o'oj, caw satjub'tac yilxi, to wach' yajcn xon oj 'a yictax pecti'.

Is 40:8

A te c'ultac tztacj 'ejm te', tzlaj pucl snich te', palta ax spaxti qui Diosal, caw 'ayc'n̈ej 'a jun 'ejmn̈ej, xchi 'ayin.

Is 41:4

¿Mach 'ix 'a'n sb'o jun tzo'n̈ tic? ¿Mach 'ix nalb'an smasnil tas 'ix uj 'a yictax pecti'? An ton Jehová in, an b'ojnac, cojn in ton Dios in, b'ab'l waj 'a smasnil, slajb' in paxi.

Is 48:3

'A yictax pecti', waln can 'ayx yuj tas wan yuj tic; an xwac' eyojcoc 'eli. Wal 'a yajn̈ej xwa'n 'el'choc, tas waljnac cha.

Is 48:14

Molb'tzejc e b'a e masnil, tze maclni eyab' tas 'oj wala': ¿Mach wal junc 'ayx ax tic tztac' yalni tas jab'xoj 'oj ujoc? A jun mach sic'b'il 'el wu'uj, a 'oj b'onc smasnil tas xin nalb'ej in b'on an Jehová in 'a yib'n̈ Babilonia, ax yip jun cha, a 'oj 'a'nc 'ejmc eb' caldeo cha.

Is 53:10

A Jehová a 'ix 'a'n yab' syail, 'icha wal yaj snani. 'Ix ya'n sb'a xajmb'al-l 'a yol sc'ab' chamel, sec tz'ajx lajwc smul smasnil 'anma yu'uj. Yuj cha, pitzn 'a jun 'ejmn̈ej. A jun cha, til wal 'oj 'aj yin̈til, ax ya'n 'el'choc Jehová tas nab'il yuj 'a yib'an̈.

Jeremías 44:28

Caw jaywn̈ xoj ex 'oj e colchj 'el 'a scal owal, 'oj eyel 'a Egipto tic, ax e c'ochx can 'a Judá. 'Ixta to b'i'an, e masnil ex 'aj Judá ex to cajn ex 'a Egipto tic, atta 'oj eyila', mach 'oj 'el'choc tas tzyala, tom a tas xwala, mto a tas xeyala.

Os 5:9

An tzwal-l 'a scal smasnil eb' yin̈tl Israel, yuj tas yowlal 'oj jawc 'a yib'n̈ eb', atn eb' 'aj Efraín. 'Oj lajwc 'ejm eb' yuj yailal 'oj jawc 'a yib'n̈ eb' 'a jun c'ul cha.

Job 23:13

Toto 'ay tas tznib'j Dios tzb'o'o, toc 'ay mach tztac' stenn 'och wa'an, tzb'on̈j 'icha tas tzna cha.

Is 10:12

A yic tox xlajw 'el'ch 'icha tas nab'il yuj Dios 'a yib'n̈ tzaln Sión yet' Jerusalén, 'ixta to b'i'an, ax ya'n 'och syailal win sreyl Asiria cha. Yujto cob' xyij chan̈ sb'a, sb'an̈n sb'a yuj tas xlaj sb'o cha.

Is 41:21

A Jehová sReyl eb' yin̈tl Jacob, a tzaln 'ixtic: Cotn̈ec ex yechel, wul ch'oxc e jelnal, cotn̈ec, wul ch'oxc e colwal.

Ez 39:8

A tas waljnac 'a pecti', wan xo sjawi, an Jehová in, an tzwala to yowlal 'oj 'el'choc, xchi Dios, xa chi.