Is 42:5 - Chuj San Sebastian Bible

⁵ A Jehová Dios 'ix b'on satcha'an̈, xlajw cha, 'ix sjen̈n 'ati. A 'ix b'on lum lu'um, yet' smasnil tas tzpac' 'a sat lu'um, a tz'a'n qui q'uinl an̈ 'anman̈ec tic, tzya'n pax qui'c quic', tzyaln 'a jun schecb' chi 'ixtic:

Chuj San Mateo Bible

⁵ A Jehová Dios b'oannac satchaan̈, yac'annacb'at jen̈an. A' ix b'oan lum luum yed' masanil tastac sq'uib' d'a sat luum. A tz'ac'an co q'uinal, syac'anpax quic'. Syalan d'a jun schecab' chi' icha tic:

Is 42:5 Referans Kwoze

Is 40:22

A Dios 'ayc' sdespacho 'a yib'n̈ q'ue satcha'an̈. A satchan̈ cha, jen̈n 'ec' 'a yib'n̈ lum lum tic. A yic tzon̈ yiln 'emt Dios an̈ 'anman̈ tic, lajn on̈ 'icha no b'ojch'in. A lich'jnac 'at satchan̈ 'icha junc nip, sb'on chan̈ 'icha junc mantiado tz'och cajnub'al.

Is 45:12

An in b'ojnac lum lum tic yet' smasnil mach cajn 'a 'a, an in jen̈jnac 'at satchan̈ tic yet' in poder, 'ix walni to tzpitzw smasnil c'anal.

Zacarías 12:1

A Jehová a b'ojnac satcha'an̈, sb'on 'ejm yipnub'al yich lum lum tic, a tz'a'n sq'uinl eb' 'anma', a tzaln 'ixtc yuj chon̈b' Israel:

Jeremías 10:12

A Jehová, a 'ix b'on lum lum tic yet' spoder. A yet' sjelnal, 'ix sb'on can yolyib'n̈q'uinl tic. An̈jtona yet' sjelnal cha, 'ix sb'on satcha'an̈.

Is 48:13

An in b'ojnac sb'achnub'al yich lum lum tic yet' in poder, an in jen̈jnac 'at pax satcha'an̈. Ton̈j xwal sb'i jun tzo'n̈ tic, 'ix pitzw chan̈ eb'.

Is 44:24

A Jehová atn b'ojnacn̈ec, a on̈ 'a'nec 'el pax 'a libre. A tzaln 'ixtic: An Jehová in, an b'ojnac ex yic mantzac ex 'alji, an b'ojnac smasnil tas, an in jen̈jnac 'ec' satcha'an̈, in b'on can pax lum lum tic 'a yet'ul, may junc mach colwjnac wet'oc.

Jeremías 32:17

Mamin Jehová, yet' wal a niwn poder yet' pax a jelnal 'ix a b'on satcha'an̈, yet' lum lum tic. Caw may tas 'ajltac sb'o 'ayach.

Is 45:18

Mamin Jehová, ach b'ojnac satcha'an̈ yet' lum lum tic, wach' otjnac can 'a yet'ul, caw ach b'ojnac. Man̈toc sictac 'ajnc cani, palta to xcajxi. Ach aljnac can 'ixtic: Cojn in ton Jehová in, may junc xo.

Salmos 33:6

Yujn̈ej spaxti', 'ix b'o satcha'an̈ yet' smasnil tas 'ay 'a 'a, cojn to 'ix yala, 'ix b'o smasnil.

Job 33:4

A Dios tztac' yuj smasnil, a b'ojnac in, a 'a'jnac 'och wic', yuj cha pitzn in.

A Tas Sc'ulejnac Eb' Schecab' Jesús Hechos 17:25

Man̈ yowlalc 'ay tas tz'ajx yuj eb' 'anma 'a 'a. Yujto atn tz'a'n qui q'uinlec qui masnil. A tz'a'n qui'c quic', tzya'n pax jantcn̈ej tas 'ay 'ayn̈ec.

Job 12:10

yujto yol sc'ab'n̈ej 'ay sq'uinl smasnil tas pitzan. A tz'a'n sq'uinl smasnil 'anma'.

Is 40:12

¿Tom 'ay junc ex tox xe yechtej a mar 'a yol e c'ab', mto tox xe yechtej satchan̈ yet' yune e c'ab'? ¿Tom 'ay junc ex tox xe yechtej smasnil spoccal lum lum tic 'a yol junc 'echtab', mto tox xe yechtej jantc yal-l smasnil eb' lum witz yet' eb' lum tzalctac?

Salmos 136:6

A xlich'n 'at lum lum 'a yib'n̈ a a'. A schamc'ojlal Dios 'ayn̈j 'a smasnil tiempo.

Am 9:6

A Jehová xb'on satcha'an̈, a x'a'n 'ec' jen̈n 'a yib'n̈ lum lum tic. A tz'awtn cot eb' a cotc a 'a a mar, tzya'n 'ejm secnjoc a 'a yib'n̈ lum lum tic. Jehová ton wal sb'i.

Gn 2:7

'Ix sb'on Dios jun 'anma'. A yet' spoccal lum lum 'ix b'o'i. 'Ix yutz'n 'och Dios yic' 'a sn̈i', 'ixta wal x'aj yel yich spitzw 'el 'anma'.

A Ch'an̈ Carta D'a Eb' Hebreo 1:2

Ax 'a jun slajb' tiempoal tic, atn wal Yunnal sc'anlb'ej yic yaln 'ayn̈ec. A yet' Yunnal tic sb'ojnac yolyib'n̈q'uinal, yet' smasnil tas 'ay 'a 'a. Ax 'a Yunnal tic, ata ya'jnac smasnil tas yico'oc.

Is 40:28

¿Tom mant eyojcoc? ¿Tom mant 'a 'aj eyab'jnac to a Jehová Dios 'ayc' 'a jun 'ejmn̈ej? A b'ojnac smasnil yolyib'n̈q'uinl tic. May b'a'n̈ tz'el yip, may tz'aj sc'unb'i, may mach tza'wni snab'en 'a 'icha snab'en.

Job 34:14

Q'uinloc tzyal sc'ojl Dios, tzyij pax 'ec' yic' 'ac'b'il yuj 'a 'ayn̈ qui masnil an̈ 'anman̈ec tic,

Job 27:3

ya' sb'a tzat yac' Dios wip yic tzwi'n jac wic',

Dn 5:23

A eco', to 'ix a b'an̈ a b'a 'a sat jun sYajlil satcha'an̈. 'Ix a'n 'ijxoc cot 'a ojltac jun tzo'n̈ svaso 'ayc' 'a yol yatut. Ach xo tic yet' smasnil eb' 'awtb'il cot o'oj, 'ix o'j 'an̈ yet' eb' 'a yojl jun tzo'n̈ vaso cha. 'Ix aln wach' paxti 'a jun tzo'n̈ comn dios nab'a plata, oro, bronce, hierro, te', yet' q'uen q'ue'en, atn jun tzo'n̈ matz tac' xon yilni, matz yab'i, may jac yojtac. Man̈oc 'a Dios 'aj 'ix al wach' paxti', palta ticni a 'a yol sc'ab' 'ayc' a q'uinal, a tzach 'i'n b'eyc'oc.

A Tas Sc'ulejnac Eb' Schecab' Jesús Hechos 17:24

A jun Dios cha, a b'ojnac yolyib'n̈q'uinl tic, yet' smasnil tas 'ay 'a 'a. Atn yajl yaj 'a satcha'an̈, yajl pax yaj 'a sat lum tic. A Dios cha, matz 'aj 'a junc n̈a tzb'o eb' 'anma'.

Gn 1:1

A 'a yic x'el yich sb'o smasnil, 'ix sb'o Dios satcha'an̈ yet' lum lu'um.

Is 37:16

Mamin Jehová, qui Diosal ach an̈ israel on̈ tic, b'achn 'ec' a despacho 'a scal eb' querubín, cojxn̈ej ach Dios ach 'a yib'n̈ smasnil nacion̈ 'a yolyib'n̈q'uinl tic. Ach 'ix a b'o satcha'an̈ yet' lum lu'um.

Is 40:26

Q'uen̈ec q'ueln 'a satcha'an̈, ¿tom man̈oc Dios xb'on smasnil jun tzo'n̈ cha? A xb'on 'och junjn eb' c'anal 'a yet'ul. Tzb'isn smasnil junjn c'aj eb', tz'awtx sb'i junjn eb' yu'uj. May junc eb' tzsati, yujto caw niwn yel'ch Dios chi yet' spoder.

Is 57:16

Man̈x 'oj wowx 'och 'a eb' in chon̈b' tic, man̈x 'oj cot wowl 'a eb' 'a smasnil tiempo, toq'ue laj 'oj schab'c'ojloc pax sb'a eb', atn eb' 'anma b'ob'il wu'uj.

Jeremías 27:5

Yet' wal in niwquil poder xin b'on yolyib'n̈q'uinal, yet' smasnil tas 'ay 'a 'a. In b'ojnac eb' 'anma', yet' no noc'. Yuj cha, tztac' wa'nn̈ej 'a mach 'aj tzyal in c'ojl tzwac'a.

Jeremías 38:16

Palta caw c'ultacl xyac' win rey Sedequías sti 'ayn 'ixtic: —Wal 'a sat Jehová jun tz'a'n qui q'uinal, tzwa'n in ti 'ayach, chajtlto ma'oj ach wac' milxoc chamoc, an̈jtona ma'oj ach wa'ch pax 'a yol sc'ab' eb' tzach nib'n milnc chamoc, xchi win 'ayin.

Ez 18:4

A eb' 'anma', wic eb' smasnil, wic win mamb'il yet' win 'unnab'il, a mach tz'och smul, tojln̈ej schami.

Salmos 96:5

A smasnil scomn diosal eb' chon̈ab', caw may jac yel'ch eb', al pax Jehová caw niwn yel'chi, yujto a b'ojnac satcha'an̈.