Is 41:10 - Chuj San Sebastian Bible

¹⁰ Man̈ ex xiwoc, 'ayn 'ec' eyet'oc. Man̈ ex 'och 'il, yujto an ton e Diosal in. An tzwac' eyip, an tzex in colo, an tzex in yamch wan yet' wip tzin c'anlb'ej 'a stojlal.

Chuj San Mateo Bible

¹⁰ Man̈ ex xivoc, ayinec' eyed'oc. Man̈ ex och ilc'olal, yujto a in ton tic e Diosal in. A in svac' eyip, a in tzex in colo'. A in tzex in yamoch vaan yed' vip svac'lab'ej d'a tojolal.

Is 41:10 Referans Kwoze

Josué 1:9

An tzwala, te'wtzej a b'a, man̈ ach xiwoc, may cab' a chab'c'ojlal, yujto Jehová in, a Diosal in, 'aynn̈ej 'och et' 'aj tzach 'eq'ui, xchi Dios 'a Josué.

Ro 8:31

Yuj jun tzo'n̈ tzwal tic, caw man̈x 'a tas tzqui nac ticnec. Caw 'aych Dios quet'ec. Yuj cha, ¿tom 'ay junc mach tztac' ya'n ganar ya'n owl quet'ec?

A Scarta San Pablo D'a Eb' Aj Filipos 4:13

Tzann̈j tas tzta'n̈j wu'uj, yujto a Cristo tzyac' spoder 'ayin.

2 Co 12:9

Palta 'ixtc yutj yaln Cajlilec chi 'ayin: A in wach'c'ojlal, colb'iln̈ej 'ayach. Yujto a mach may spoder 'a yol yico', ata tzwach' checlj 'el in poder an tic, xchi 'ayin. Yuj cha, wach'xam may wel'ch an tic, palta caw tzin tzalji, sec tzwach' 'a'j Cristo spoder 'ayin.

Salmos 27:1

A Jehová tz'a'n sacq'uinl 'ayin, in Colmal paxi. A 'a tzin col in b'a, yuj cha, man̈x 'a in xiwc'ojlal. Man̈x 'a mach 'aj tzin xiwi.

Salmos 63:8

Caw wal junn̈j waj et'oc, quetzb'iln oj yet' a wach' c'ab'.

2 Cr 20:17

Man̈oc ex 'oj eyac' owal. Ton̈j 'oj eyaj ta', may tas 'oj e b'o', ax eyilni tas 'oj wutc ex in coln 'el an Jehová in, xchi. Ex 'aj Jerusalén yet' ex 'aj Judá, man̈ ex xiwoc, man̈ eyac' chab'c'ojlal. Q'ui'nto tz'ex 'at eyac' owl yet' eb', yujto a Jehová 'aych quet'ec, xchi Jahaziel.

Salmos 145:14

Mamin Jehová, ach yamjnac eb' 'ijn tztelw 'ejmi, ach tza quetz chan̈ eb' man̈x 'a yip.

Is 12:2

Ach qui Diosal qui Colmal aji; tzach ca'ch yipc qui c'ojol, yuj cha, matz on̈ xiw on̈. A ticnec tzon̈ b'itn 'aych Mamin Jehová, yujto achn̈ej 'aych 'och quipc on̈, tzon̈ a coln paxi, 'oj e chioc.

Is 60:19

Ata', man̈x 'a tz'och yoc c'u eyuj 'a c'ual, man̈x 'a tz'och yoc 'uj eyuj 'a 'ac'wal, yujto an Jehová in, an 'oj wac' in sacq'uinlal 'ayx 'a jun 'ejmn̈ej; an e Diosal in tic, an 'oj ex wac' b'inaxoc.

Dt 20:1

A yic tzex 'el eyac' owl yet' junc chon̈b' 'ajc'ojl yajch 'ayex, toto 'ec'b'al sb'isl soldado eb' chi 'a yib'n̈ eb' eyic ax tic, til wal schej eb', til wal scaruaje eb' yic owal, palta man̈ ex xiw xon yuj eb', yujto a Jehová qui Diosalec a 'aych eyet'oc, atn jun on̈ 'i'nec 'elt 'a Egipto.

Zacarías 13:9

A eb' 'oj can cha, 'oj wac' yab' eb' syail yic tz'elcn smaysch'olnilal eb', 'icha tz'aj yel slumal q'uen plata 'a scal c'ac', 'icha pax tz'aj sb'o q'uen oro. 'Oj lajwc cha, ax yaln sb'a eb' 'ayin, ax in ta'w 'a eb'. 'Oj walch eb' in chon̈b'oc, ax yaln eb' 'ixtic: A Jehová, atn qui Diosalec, 'oj xchic eb', xchi Dios.

Salmos 37:24

Wach'xam tztelw 'ejm eb', palta man̈ ye'n̈joc stelw 'ejm eb' cha, yujto a Jehová a yamjnac eb'.

Salmos 29:11

Tzyac' yip eb' schon̈ab', tzya'n syaxil yet' sjunc'ojlal 'a yib'n̈ eb'.

Ef 3:16

Man̈ jantcoc swach'l qui Mam Dios. Yuj cha, tzin c'an 'a 'a, sec 'oj swach' 'a'c ste'nal e nab'en, ax swach' 'a'n spoder 'ayx yuj Yespíritu.

2 Cr 32:8

A win cha, a eb' soldado 'aych yipc sc'ojol, palta an̈ec xo tic, a Jehová qui Diosalec, a 'aych quet'ec. A 'oj colwjc quet'ec yic 'oj ca'nec owl cha, xchi 'a eb'. Ax eb' chon̈b' cha, caw x'och ste'nal eb' yic xyab'n eb' tas xyal rey Ezequías cha.

Zacarías 10:12

An 'oj wac' ste'nal eb' in chon̈ab'. Wu'uj, ax sta'n yuj eb'. An Jehová in, an tzwal jun tzo'n̈ paxti tic, xchi Dios.

Is 43:5

Man̈ex xiwoc, 'ayn 'ec' eyet'oc. 'Oj in molb'tzoc cot eb' eyit chon̈b' 'ay 'a stojlal 'aj tzq'uel c'u, yet' eb' 'ay 'a stojlal 'aj tz'ejm c'u, sec junxn̈ej 'oj eyaji.

Salmos 46:11

A Jehová tztac' yuj smasnil, a 'ayc'n̈ej quet'ec. A qui Diosalec an̈ yin̈tl on̈c Jacob tic, ata tzqui colc qui b'a.

Is 49:8

A Jehová a tzaln 'ixtic: 'Ix c'och stiempoal in ch'oxn in wach'c'ojlal, yic tzin pacn tas tza c'an 'ayin. Xc'och stiempoal wa'n a colnb'il, yuj a'n 'el'choc in trato yet' eb' in chon̈ab'. Tza b'on pax in chon̈b' 'a 'icha xon yaji, sec wach' tzyij pax eb' israel chi smacl 'a lum lum sictac 'ajnc can sat.

Salmos 37:17

Yujto 'oj satxoc 'el eb' maysch'olnil yuj Jehová, palta ax eb' wach' sb'eyb'al, 'oj 'ajxoc ste'nal eb' yu'uj.

Is 44:2

An Jehová in an ex in b'o'o yic mantzac ex 'alji, an tzin colwj eyet'oc. Man̈ex xiw ex 'aj Jesurún, ex yin̈tl can Jacob, in checb' ex, sic'b'ilx 'el wu'uj.

Salmos 41:12

An xo pax tic, wach'n̈j xwutj in b'a 'a ojltac. Quetzn chan̈ Mamin, 'aynn̈ej cab' 'ec' et'oc.

Salmos 46:7

A Jehová tztac' yuj smasnil, a 'ayc'n̈ej quet'ec. A qui Diosalec an̈ yin̈tl on̈c Jacob tic, ata tzqui colc qui b'a.

Is 52:7

Til wal sja'l yilxi yic tzjaw junc win alm 'ab'x 'a eb' lum tzalctac, junc 'et'jnac wach' 'ab'ix, atn yab'xil junc'ojlal, tzyaln 'el yab'xil colnb'il yic tz'el eb' 'anma 'a libre, tzyaln 'ixtc 'a yib'n̈ eb' 'aj Sión: A 'e Diosal x'och reyal, xchi.

Gn 15:1

Yic xlajw 'ec' jun tzo'n̈ tic, 'ix paxtin Jehová yet' Abram 'a 'icha waychil, 'ix yaln 'a 'ixtic: —Man̈ ach xiw Abram, an 'oj ach in colo', caw wal niwn spac 'oj a cha', xchi Dios.

Salmos 65:5

Ach qui Diosal on̈, qui Colmal aji, ach tzon̈ a ta'wej, tzon̈ a b'onyaj yet' tas satjub'tac yilxi. Smasnil eb' 'anma cajn 'a sat lum lum tic, yet' eb' cajn 'a sc'axpil 'ec' a mar, 'oj ach ya'ch eb' yipc sc'ojol.

Lc 1:30

Xlajw cha, xyaln pax 'a 'ix 'ixtic: —María, man̈ ach xiwoc, yujto til wal swach'c'ojlal Dios tzyac' 'ayach.

Salmos 147:12

Ex 'aj Jerusalén, b'itn coyc 'a Jehová. Ex 'aj Sión calc wach' paxti 'a qui Diosalec.

1 Cr 12:18

'Ix 'och Yespíritu Dios 'a Amasai syajlil eb' 30 cha, 'ix yaln 'ixtc: ¡Ach David yunnal Isaí, ec caj on̈, 'oj qui can et'oc! ¡Junc'ojlal cab' aji! ¡Junc'ojlal cab' aj yet' eb' xcolwj et'oc, yujto a qui Diosalec a xcolwjn̈ej pax et'oc! xchi. 'Ix schaj David eb', 'ix ya'n 'och eb' capitan̈il 'a scal eb' syajlil eb' soldado cha.

Lc 1:13

Palta xyaln jun ángel chi 'ixtc 'a winac: —Zacarías, man̈ ach xiwoc yujto xyab' Dios a lesal. Yuj cha, a 'ix estzil Elisabet, 'oj 'aljoc jun swinc 'une', ach xo 'oj ac' sb'ic Juan.

Salmos 99:4

Ach tic Mamin, Rey ach, tztac' oj smasnil, 'ay a chamc'ojlal 'a tas wach'. A tas wach' yet' tojlal, a chi xac' 'ayn̈ an̈ yin̈tl on̈ Jacob tic.

Salmos 144:8

eb' tzaln tas man̈ yeloc, eb' tzyac' sti' yic tzya'n eb' 'es.

Os 1:9

'Ix yaln pax Jehová 'ixtc 'ayin: Man̈ in Chon̈b'oc, 'ixta tzac' sb'ic win 'unn tic, yujto a eb' israel tic, man̈x in chon̈b'oc yaj eb', man̈x in sDiosalc eb'.

Gn 31:5

Ax yic xc'och eb' 'ix, xyaln win 'a eb' 'ix 'ixtic: —A ticnec, tox xwila to a 'e mam ow xoj tzyutj snab'en 'ayin, man̈x 'ichaoc 'a yic yalan̈, palta a sDiosal in mam, caw wal 'aych wet'oc.

Gn 49:24

Palta ach tic, caw wal 'ay ep, te'nn̈ej yaj a jul-lab' yuj yip in Diosal an Jacob in tic, atn Wilmal, in Tan̈mal an Israel in tic.

Ex 14:13

'Ix ta'w Moisés 'ixtc 'a eb' 'anma cha: —Man̈ ex xiwoc, te'wtzejc e b'a, 'oj eyila' tas 'oj yutc colwjoc sb'a Jehová quet'ec, yujto man̈x 'a xon b'a'n̈ 'oj eyilch jun tzo'n̈ 'aj Egipto tic, cojxn̈ej ticnec tzeyilcn 'och eb'.

Ex 20:20

'Ix ta'w Moisés 'ixtc 'a eb': —Man̈ ex xiwoc, ton̈j tzwul ex yac' prowal Dios, yic wach' 'ay e xiwc'ojlal 'a 'a, sec ma'oj laj 'och e mul, xchi.

Is 50:9

A Jehová Wajlil a tzcolwj wet'oc. ¿Mach 'oj stac' ya'n 'och junc tas 'a wib'an̈? Smasnil eb' 'ajc'ojl yajch 'ayin, c'uxn 'oj lajwc 'el eb' 'icha junc 'ichm pichl 'ayx 'och 'ij 'a 'a.

Dn 6:16

Xlajw cha, 'ix 'at ya'nc win rey chi 'ijxoc cot Daniel, 'ix julx 'ejm 'a yol yet'l e no león 'aj 'ayq'ui. A yic mantzac julx 'ejm cha, 'ix yaln can win rey chi 'a Daniel 'ixtic: —A cab' jun a Diosal 'aj tzac' 'emmquilal 'a junjn c'u, a 'oj a colni, xchi winac.

Dn 10:12

Xlajw cha, xyaln pax 'ayn 'ixtic: Daniel, man̈ ach xiwoc. A Dios 'ix 'ab'n a lesl 'a yic b'ab'l c'u yic a'n 'och a b'a 'emmquilal 'a 'a. Yujn̈ej jun tzo'n̈ a paxti cha, yuj cha, in checx coti.

Hageo 1:13

'Ix waln 'ixtc 'a eb': A Jehová, a tzaln 'ixtic: 'Aynn̈ej 'ec' eyet'oc, xchi Dios, xin chi 'a eb'.

Hageo 2:5

Man̈ ex xiwoc, yujto 'aychn̈ej Wespíritu eyet'oc, 'icha wutjnac wa'n can in ti', yic xwi'n 'elt eb' e mam eyichm 'a Egipto.

Gn 26:24

A 'a yic jun 'ac'wl cha, ata sch'ox sb'a Jehová 'a 'a, 'ix yaln 'a 'ixtic: An ton tic sDiosal in a mam, atn Abraham, man̈ ach xiwoc, 'ayn 'och et'oc. Yujn̈ej to in checb' Abraham, yuj cha, 'oj wac' yaxilal 'a eb'an̈, til wal 'oj wutc sb'isl en̈til, xchi Dios.

Jueces 6:16

Palta xyaln pax Jehová 'ixtc 'a 'a: —'Oj stac' o'oj, yujto an 'ayn 'och et'oc. 'Icha tz'aj yem junc winc to may mach tzcolni, 'ixta 'oj 'aj eb' madianita chi yem o'oj, xchi.

A Ch'an̈ Schab'l Libro Samuel 22:19

'Ix 'och oyn eb' 'ayin, yic 'ayn 'och 'a 'ilc'ojlal, palta ax Jehová, a 'ix 'och wet'oc.

Salmos 18:36

Caw wach' jun b'e 'aj tzin ej b'eyoc, sec wach' matz in tench woc.

Salmos 33:12

Caw wach' yic junc nacion̈ to a Jehová 'aych sDiosaloc, a si'jnac can 'och yico'oc.

Is 35:4

Alc 'ixtc 'a eb' chab'c'ojlal yaji: Te'wtzejc e b'a, man̈ ex xiwoc, yaj qui Diosalec 'a tic, a 'oj qui colnec 'eli, ax eb' 'ajc'ojl yajch 'ayn̈ec, 'oj 'ajxoc 'och syailal eb' 'a 'icha wal smoj schani, xe chi.

Is 37:6

'ix schecn 'at win eb' 'at yal 'a win rey cha, to a Jehová a 'ix aln 'ixtic: Man̈ ach xiw yuj jun tzo'n̈ paxti 'ix ab' cha. Caw tu 'ix yal win schecb' sreyl chon̈b' Asiria chi 'ayin, to matz tac' wuj yalni.

Lm 3:57

A 'a yic ach wawtn 'a jun c'u cha, ach jaw 'a in tz'ey, 'ix aln 'ayn 'ixtic: Man̈ ach xiwoc, xa chi.

Zacarías 10:6

An 'oj wac' ste'nal eb' yin̈tl Judá, ax wa'n colchjoc 'el eb' yin̈tl José. 'Oj wi'x meltzjc eb' 'a schon̈b' jun 'ejm xo, yujto caw tz'o'ch in c'ojl 'a eb', ax scanxcan eb' 'icha xon yaji, 'icha to may 'aj xwijl eb' 'a in c'ojol. An ton Jehová sDiosal in eb', tzwab'n̈j slesl eb'.