Gn 34:30 - Chuj San Sebastian Bible

³⁰ Yuj cha, xyaln win Jacob 'a Simeón yet' 'a Leví 'ixtic: —Caw wal tzeyac' in chac in b'a yet' smasnil eb' 'anma cajn 'a sla'nil jun lugar tic, atn eb' cananeo yet' eb' ferezeo. 'Oj syam sb'a am eb', ax ya'n eb' owl quet'ec, tecn 'oj on̈ smilc eb' qui masnil yet' cunnalec tic, yujto jaywn̈n̈ej wal qui b'islec, xchi winac.

Chuj San Mateo Bible

³⁰ Palta ix yalan vin̈aj Jacob d'a vin̈aj Simeón yed' d'a vin̈aj Leví chi' icha tic: —Tic val a ex tzeyac' somchajel in c'ool. A ticnaic, masanil eb' vin̈ cajan d'a juntzan̈ lugar tic, aton masanil eb' vin̈ cananeo yed' eb' vin̈ ferezeo, ol te och chian sc'ool eb' vin̈ d'ayon̈. Tecan ol smolb'ej sb'a eb' vin̈, ol yac'an oval eb' vin̈ qued'oc. Jayvan̈n̈ej co vinac ayec' qued'oc, tecan ol on̈ smilcham eb' vin̈ co masanil, xchi vin̈aj Jacob chi'.

Gn 34:30 Referans Kwoze

Salmos 105:12

Jaywn̈ej wal nant sb'isl eb' qui mam quichmec, yic yaln can cha, ton̈j nant 'e'lb'a yec' eb' 'a sat lum lum tic.

A Ch'an̈ B'ab'el Libro Samuel 13:4

Smasnil eb' israel 'ix yab' eb', chajtlto 'ix satx 'el jun c'aj eb' soldado filisteo yuj win Saúl. Yuj cha caw 'ix cot yowl eb' filisteo 'a eb' israel. Ax eb' israel cha, 'ix syamn sb'a eb' yet' win Saúl 'a Gilgal.

Josué 7:25

'Ix yaln Josué 'a 'ixtic: —¿Tas wal yuj 'ix 'ej cot jun cusc'ojlal tic 'a quib'n̈ec?. Ax ticnec, a cab' Jehová tza'n cot yailal 'a eb'an̈, xchi. Xlajw yaln jun tzo'n̈ paxti tic, ax smasnil eb' 'anma cha, 'ix syamn 'och eb' sjul q'uenan win Acán yet' eb' yunnal. Xlajw scham eb', 'ix 'ajx tz'a eb' yet' smasnil tas 'ay 'a 'a.

Ex 5:21

'Ix yaln eb' 'a eb' 'ixtic: —'Ojxam yil Jehová tas 'oj ex yutoc, yujto ax ab' 'ay e mul, yuj cha, a win rey yet' eb' 'aych yajlil yet'oc, caw wal tzon̈ yixtj eb' ticnec on̈; 'icha to ax xeyac' q'uen espada 'a eb', yic tzon̈ smiln cham eb' on̈, xchi eb'.

1 Cr 19:6

'Ix snan 'el eb' amonita cha chajtlto caw tzcot yowl David 'a eb' yujto caw tu tas 'ix sb'o eb' 'a eb' schecab', yuj cha, ax Hanún sreyl eb', 'ix ya't 660 quintal q'uen plata 'a eb' syajlil Mesopotamia, yet' 'a eb' sirio 'aj Maaca yet' 'a Soba, yic tz'och stojloc caruaje yic owal yet' eb' soldado 'aych 'a yib'n̈ chej yuj scolwj eb' 'a eb'.

1 Cr 16:19

Jaywn̈ej wal nant sb'isl eb' qui mam quichmec, yic yaln can cha, ton̈j nant 'e'lb'a yec' eb' 'a sat lum lum tic.

A Ch'an̈ B'ab'el Libro Samuel 27:12

'Ix ya'ch win Aquis David yipc sc'ojol, 'ix snan win 'ixtic: A eb' yit israelal, tox x'och eb' 'ajc'ojlal 'a 'a, yuj cha, caw 'oj cann̈j in yac' servil, xchi winac.

Gn 13:7

Yujto a eb' yilmal scajb'en noc' Abram, to tzyac' eb' owl yet' eb' yilmal yic Lot. An̈jtona', a yic jun tiempoal cha, cajnto to 'ec' eb' cananeo yet' eb' ferezeo 'a jun lugar cha.

Pr 15:27

A mach til wal tas tznib'j 'ochi, caw tzjuw 'el yol yatut yu'uj; ax toto matz chaj q'uen c'ultac tumin, 'oj najtxb'oc sq'uinal.

Pr 11:29

A eb' tu tzyutj sb'a 'a smam snun, mto 'a eb' yu'tac, man̈x 'a tas 'oj can 'a eb'. A eb' may snab'en, 'oj 'och eb' schecb'oc eb' jeln snab'en.

Pr 11:17

Toto tz'o'ch qui c'ojlec 'a eb' quit 'anma'il, 'oj qui chac wach'il; ax toto may yel'ch junc 'anma chi 'a qui satec, 'oj cot 'a quib'n̈ec yuj qui tu nab'enal cha.

1 Cr 16:12

An̈ yin̈tl on̈ can Israel win schecb' Dios yaji, atn Jacob, an̈ sic'b'iln̈ec 'el yuj Dios. Qui nac cot tas satjub'tac yilx b'ob'il yu'uj, yet' schecnb'il 'ac'b'il can 'ayn̈ec yu'uj.

1 Cr 2:7

A jun win yunnal Carmi, atn Acán, a win 'ix 'i'n cot yailal 'a yib'n̈ chon̈b' Israel, yujto 'ix yij cot jun tzo'n̈ tas 'a scal tas 'ix yal Dios to tzsatl 'a jun 'ejmn̈ej.

A Ch'an̈ B'ab'el Libro Yic Yab'ixal Eb' Rey 18:18

—Man̈oc in tzwixtj 'el jun chon̈b' tic, palta ach tzextj 'el eb' yet' smasnil eb' ecan, yujto xeyactj can schecnb'il Jehová. 'Ix laj eya'nc 'ejm e b'a 'a jun tzo'n̈ yechl Baal.

A Ch'an̈ Schab'l Libro Samuel 10:6

Ax eb' amonita, 'ix nachj 'el yuj eb' to tu tas sb'o eb' 'a sat David, yuj cha, 'ix 'at stojnc eb' junc'l mil eb' soldado sirio xcot 'a chon̈b' Bet-rehob, yet' 'a chon̈b' Soba, yet' jun mil eb' soldado xyac' win sreyl Maaca, yet' lajchwe mil pax eb' xcot 'a chon̈b' Is-tob.

A Ch'an̈ B'ab'el Libro Samuel 27:1

Palta a David 'ix sna 'ixtic: 'Ay am wal b'a'n̈ 'oj in smil cham Saúl, yuj cha, a tas 'oj wutc ticnec, to 'oj in 'atcn 'a scal eb' filisteo, sec wach' man̈xtzac in sayx 'ec' yu'uj, 'ixta 'oj waj in colchj 'a yol sc'ab', xchi.

A Ch'an̈ B'ab'el Libro Samuel 16:2

—¿Tas wal tzin 'aj in 'ati? Toto tzyab' Saúl jun tic, caw tzin smil chamoc, xchi Samuel cha. 'Ix ta'w Jehová 'ixtc 'a 'a: —'Ij 'at junc no cob's wacx et'oc, tzaln 'a eb' 'aj Belén 'ixtic: To tzin jaw wul wac' in xajmb'al 'a Jehová, xa chi 'a eb'.

Dt 7:7

'Ix 'el 'a sc'ojl Jehová on̈ si'nec 'och yico'oc, man̈ yujoc to niwn qui b'islec 'a yib'n̈ jun tzo'n̈ xo nacion̈, palta wal yel 'in to jaywn̈ej wal qui b'eyi, man̈ 'ichaoc jun tzo'n̈ xo nacion̈ cha.

Dt 4:17

Man̈ e b'o yechl junc no noc', mto junc no ch'ic.

Gn 46:27

Chuc pax yaj José yet' chawn̈ eb' yunnal 'aljnac 'a Egipto cha, yuj cha, 70 sb'isl win Jacob yet' eb' yunnal yet' eb' yixchiquin yic 'ayx 'ec' win 'a Egipto cha.

Gn 12:12

A yic 'oj ach yilnc ewin 'aj Egipto tic, 'oj yal ewin 'ixtic: A jun 'ix tic yistzil jun winc tic, 'oj schic e winac. Yuj cha, ax in smiln cham ewin o'oj, al ach may tas 'oj ach yutc ewinac, cojnto 'oj a can yet' ewinac.

Gn 12:2

A en̈til, a 'oj 'och niwc chon̈b'al wu'uj. 'Oj in ch'ox in wach'c'ojlal 'ayach. Yel xo wal 'oj a b'inaxi, o'oj ax schan eb' 'anma yaxilal.

Gn 34:2

Ax win Hamor win heveo syajlil chon̈b' cha, 'ay jun yunnal tzcuch Siquem. Xyiln 'och win Siquem chi 'ix cob's cha, 'ix ya'n pural win yixtn 'ix.

Gn 34:29

Xyelc'n cot ewin smasnil tas 'ay 'a yol yatut eb', xyi'n 'at ewin eb' cotc 'unin, yet' eb' 'ix 'ix smasnil.

Gn 34:31

Palta xta'w ewin 'ixtic: —¿Tom 'ay sleyl tzyixtj win 'unx canb' tic on̈, tzya'n can 'och jun winc chi 'unx 'icha junc 'ix 'ajmul 'ix? xchi ewinac.

Gn 46:26

'Ay 66 eb' yin̈tl win Jacob 'a smasnil, atn eb' tic ajun yet'oc yic xc'och win 'a Egipto; atn wal jun tzo'n̈ yin̈tl win tic, chuc pax yaj eb' 'ix yalb' winac.

Dt 4:27

A Jehová 'oj e sactzicn can 'at 'a scal jun tzo'n̈ xo nacion̈, jaywn̈xoj ex 'oj e can ta'.

Gn 12:6

'Ix sc'axptej 'e't jun tzo'n̈ lugar masnto 'ix jaw 'a Siquem, 'a 'aj 'ay te mach' 'a yol yic More; atn 'aj cajn eb' cananeo 'a yic jun tiempoal cha.

A Ch'an̈ Schab'l Libro Samuel 16:21

'Ix yaln win Ahitofel chi 'ixtc 'a 'a: —A tas 'oj a b'o', to tzach way yet' eb' 'ix schab'l 'istzil a mam 'aycn tan̈j n̈a, sec 'oj nachjoc 'el yuj smasnil eb' chon̈b' tic, to caw tzach schacl a mam cha, ax smasnil eb' tz'och tza'n oj tic, 'oj ach ya'ch eb' yipc sc'ojol, xchi winac.

A Ch'an̈ B'ab'el Libro Yic Yab'ixal Eb' Rey 11:25

Caw wal x'och 'ajc'ojlal 'a chon̈b' Israel, yic pitzn to Salomón: Ax Rezón cha, 'ix 'och reyl 'a Siria.