Ex 3:18 - Chuj San Sebastian Bible

¹⁸ 'Oj scha eb' yab' 'ayach. Tzlajw cha, tzach 'at yet' eb' yichm wincal chon̈b' Israel 'a yojltac win sreyl Egipto cha, tzeyaln 'a win 'ixtic: A Jehová qui Diosal an̈ hebreo on̈ tic on̈, a 'ix sch'ox sb'a 'ayn̈ on̈. Yuj cha, to tzon̈ a chaj 'at 'a lum cusltac lu'um, to tz'at cac' qui xajmb'al 'a qui Diosal on̈, 'aym 'oxe'oc c'u ste'nb'il jun lugar cha, xe chi 'a winac.

Chuj San Mateo Bible

¹⁸ Ol scha yab' eb' yichamtac vinaquil chon̈ab' chi' tas ol ala', ol b'at och eb' ed'oc b'aj ay vin̈ sreyal Egipto chi'. Ol alani: A Jehová co Diosal a on̈ hebreo on̈ tic, a' ix sch'ox sb'a d'ayon̈. Yuj chi' tzon̈ a chab'at d'a tz'inan luum yic scac' co silab' d'a co Diosal a on̈ tic.

Ex 3:18 Referans Kwoze

Ex 9:1

Xlajw cha, xyaln Jehová 'ixtc 'a Moisés: —'Ixc 'at 'ilt pax win rey cha, tzaln 'a 'ixtic: A Jehová qui Diosal an̈ israel on̈ tic on̈, a tzaln 'ixtc 'ayach: Chaj 'at eb' in chon̈b' tic, yic tz'at ya'nc eb' 'emmquilal 'ayin.

Ex 7:16

Ata tzal 'ixtc 'a winac: A Jehová qui Diosal an̈ israel on̈ tic on̈, a tzin checn cot 'ayach; to tza'l eb' wit chon̈b' tic 'a libre yic tz'at ca'nc 'emmquilal 'a qui Diosal 'a lum cusltac lum chi 'on̈; palta 'in an̈ja matz a chaj ab'i'.

Ex 10:3

Xlajw cha, 'ix 'atx Moisés yet' Aarón 'at yil win rey chi jun 'ejm xo, 'ix yaln pax eb' 'a win 'ixtic: —A Jehová qui Diosal an̈ israel on̈ tic on̈, a tzaln 'ixtc 'ayach: ¿Jantcto wal tiempo 'oj ac' pitb'oc a b'a, yic matz ej 'ejm a b'a 'ayin? 'A'l eb' in chon̈b' tic 'a libre, yic tz'at ya'nc eb' 'emmquilal 'ayin.

Ex 9:13

Xlajw cha, 'ix yaln pax Jehová 'ixtc 'a Moisés: —Tzach seb' q'ue wan q'uic'an, tzach 'at paxtinc yet' win rey cha, tzaln 'a 'ixtic: A Jehová qui Diosal an̈ israel on̈ tic, a tzaln 'ixtc 'ayach: Chaj 'at eb' in chon̈b' tic, yic tz'at ya'nc eb' 'emmquilal 'ayin.

Salmos 110:3

A yic 'oj a'nc owal, mun xoj 'oj wul ya'ch sb'a eb' a chon̈b' et'oc. 'Icha wal tz'aj 'ejm chicb'chan̈ 'a yic sq'uin̈b'ial, 'ixta wal 'oj 'aj sjaw ewin quelmtac 'a a tz'ey 'a lum tzaln yic emmquilal.

2 Cr 30:12

A eb' 'anma 'aj Judá, a Dios 'ix 'a'n sna eb' to tojl tzyutj eb' snab'en, sec tzyiclj eb' checnb'il xyal win rey yet' eb' yajl yaj yet'oc, a tzyal tas 'ix yutj Jehová yalni.

Josué 1:17

'Icha wal xcutj qui yiclni tas xyal Moisés 'ayn̈ on̈, 'ixtnta 'oj qui yiclc pax tas tzal 'ayn̈ on̈. Cojn b'i'an, 'och cab' Jehová qui Diosalec et'oc, 'icha 'ix yac' yet' Moisés.

Nm 17:4

Tzlajw cha, tza'n can 'och eb' te 'a yojl Mantiado 'aj tzin chaj in b'a eyet'oc, 'a yojltac 'elt te scaxail in trato, 'a 'aj tzin ch'ox in b'a 'ayex.

Ex 30:6

Tzlajw cha, tza'n 'och jun yet'l xajmb'al chi 'a yojltac 'elt te cortina 'aych yen̈loc scaxail in trato, 'a 'aj 'ay smacl te caxa 'a 'ajtil tzin chaj in b'a eyet'oc.

Ex 25:22

A 'a yib'n̈ smac te caxa cha, ata 'oj in ch'ox in b'a 'ayach, 'a snan̈l yechl chawn̈ querubín 'aych 'a yib'n̈ sti smac te scaxail trato, ata 'oj wac' ojcoc 'el smasnil in checnb'il 'a eyib'n̈ ax israel ex tic, xchi Dios.

Ex 19:1

A wal stz'acw 'oxe 'uj yelt eb' israel 'a Egipto, 'ix jaw eb' 'a lum cusltac lum yic Sinaí.

Ex 4:31

A yic xyab'n eb' chon̈b' chi tas xyal eb' chawn̈ cha, 'ix ya'n 'och eb' 'anma chi 'a sc'ojol, chajtlto 'ix 'ilx cot eb' yuj Dios, yujto caw 'oltac tz'aj eb' 'a 'aj 'ayc' cha. Yuj cha, 'ix 'em n̈ojn eb', xya'n 'ejm sb'a eb' 'a Dios.

Ex 4:24

Xlajw xoj cha, 'ix 'at Moisés 'a Egipto, ax 'a yol b'e 'a 'aj wan sway Moisés yet' eb' yunnal, ata 'ix sch'ox sb'a Jehová 'a 'a, snib'j to xcham Moisés chi yu'uj.

Ex 3:16

'Ixic, 'at yamb'tzej eb' yichm wincal chon̈b' Israel, tzaln 'a eb' 'ixtic: A Jehová qui Diosalec yet' eb' qui mam quicham, atn Abraham, Isaac yet' Jacob, a 'ix sch'ox sb'a 'ayin, 'ix yaln 'ixtic: Wal yel tzwil tas tz'aj eyixtx 'a Egipto.

Ex 3:12

'Ix ta'w pax Jehová, 'ix yaln 'ixtic: —Wal yel an 'oj woch et'oc, 'ay jun ch'oxnb'il 'oj wac' 'ayach, chajtlto an tzach in checb'ti. Ax yic tox 'ix 'elt eb' in chon̈b' chi oj 'a Egipto cha, ax wul eya'nc 'ejm e b'a 'ayn 'a jun witz tic, xchi Dios.

Gn 48:3

Xlajw cha, xyaln Jacob 'ixtc 'a José: —A jun Dios tztac' yuj smasnil, a xch'ox sb'a 'ayn 'a chon̈b' Luz, 'a yol yic Canaán, xyaln wach' paxti 'a wib'an̈.

Gn 17:1

A Abram 99 ab'il sq'uinal, yic sch'oxn sb'a Jehová 'a 'a, xyaln 'a 'ixtic: —An ton Dios in, tztac' wuj smasnil, wach' tzotj a b'a 'a in sat.

Gn 15:1

Yic xlajw 'ec' jun tzo'n̈ tic, 'ix paxtin Jehová yet' Abram 'a 'icha waychil, 'ix yaln 'a 'ixtic: —Man̈ ach xiw Abram, an 'oj ach in colo', caw wal niwn spac 'oj a cha', xchi Dios.

Gn 12:1

'Ay jun c'ual 'ix yalx Jehová 'a win Abram 'ixtic: 'Actj can a lum tic yet' smasnil eb' ecan, yet' eb' cajn 'a yatut a mam. Tzlajw cha, tzach 'at 'a jun lum lum 'oj in ch'ox 'ayach.

Jeremías 26:5

Ma'ix e chaj eyab' pax tas xwac' yal eb' in checab', caw niwn 'ejm yaljnac eb' 'ayex, atn jun tzo'n̈ an̈ja matz e chaj eyab' ticnec.

Jeremías 2:6

Ma'ix snalb'ej meltzjoc cot sb'a eb' 'ayin, wach'xam an wijnac 'elt eb' 'a Egipto. 'Ix wi'n b'ey eb' 'a lum cusltac lu'um, lum tacn̈ sat, lum pa'ctac, lum 'ajtil caw 'ay smay, lum may junc mach cajn 'a sat, may pax junc mach tz'ec' 'a sat.

Jeremías 2:2

'Ixic, 'at al yab' eb' 'aj Jerusalén, to an Jehová in, an tzwal 'a eb' 'ixtic: Tzin na cot wal eyiclumal 'ayin, yic ex wi'n 'och wico'oc, caw tzin e chamc'ojlej, 'icha junc cob's 'ix tot xnupni, caw 'ay schamc'ojlal 'a yichmil, 'ixta ex. 'Ochnc ex tza'n wuj 'a lum cusltac lu'um, atn lum lum may xon 'aj tz'awxi.

Is 64:5

Tzann̈j mach tzalji tzb'on tas 'icha tza nib'ej, nann̈ej yu'uj tzb'on a nib'b'en cha, caw wal chab'il o'oj. An̈ xo tic on̈, 'ix 'och wal qui mul 'ayach, ach owx 'och 'ayn̈ on̈, caw wal niwn xo tiempo xc'ojl yoch qui mul on̈, palta ¿tzam stac' to qui colchj on̈?

Ex 30:36

Tza tenn chojc jab'oc jun tzo'n̈ cha, tza'n 'och 'a yol Mantiado cha, 'a yojltac 'elt scaxail in trato. A jun incienso tic, niwn cab' yel'ch 'a e sat.

Gn 14:13

Palta 'ay jun win 'ix yac' ganar yel 'a scal owal, 'ix 'at yalnc 'a Abram win hebreo, chajtlto tox 'ix 'ijx 'at Lot 'icha presoal. Ata cajn win 'a lum 'aj 'ay te ma'ach', 'a yol yic win Mamre amorreo. A win Mamre cha, yu'tac sb'a win yet' Escol, yet' pax Aner. A ewin cha, a yet' Abram 'aych ewinac.

Ex 4:1

'Ix ta'w Moisés 'ixtc 'a Jehová: Ma'oj scha eb' yab' 'ayin, ¿tom 'oj syiclc eb' tas 'oj wala'? Tecn 'oj yal eb' 'ayn 'ixtic: Totn am wal yel 'ix sch'ox sb'a Dios 'ayach, mto ma'ay, 'oj schic am eb', xchi Moisés.

Ex 5:1

'Ix 'e'cn jun tzo'n̈ cha, 'ix 'at Moisés yet' Aarón paxtinc yet' win rey, 'ix yaln ewin 'ixtc 'a winac: —'Ixtc wal yaln Jehová qui Diosal an̈ israel on̈ tic on̈: To tza chaj 'at eb' in chon̈b' tic 'a lum cusltac lu'um, yic tzyi'n chan̈ eb' in b'i yet' junc q'uin̈, xchi Dios, xchi eb' 'a winac.

Ex 5:3

'Ix yaln pax eb' 'ixtc 'a winac: —A qui Diosal an̈ israel on̈ tic on̈, 'ix sch'ox sb'a 'ayn̈ on̈, yuj cha, to tzon̈ a chaj 'at 'a lum cusltac lum chi 'on̈, yic tz'at ca'nc qui xajmb'al 'a Jehová qui Diosal on̈, 'oxe c'u ste'nb'il jun lugar cha. Toto matz on̈ 'at on̈, axta laj x'aji, on̈ chamt yuj junc yab'il on̈, mto 'oj qui xicx cham yet' q'uen espada on̈, xchi eb' 'a win rey cha.

Ex 8:1

'ix yaln pax Jehová chi 'a Moisés 'ixtic: —'At 'ilt win rey cha, tzaln 'ixtc 'a winac: A Jehová a tzaln 'aych 'ixtic: Chaj 'at eb' in chon̈b' tic, yic tz'at ya'nc eb' 'emmquilal 'ayin.

Ex 8:20

'Ix yaln pax Jehová 'a Moisés 'ixtic: —A yic q'uic'an 'a caw sq'uin̈b'il to, 'oj 'at win rey 'a sti a niwn a'. Yuj cha, tzach caw seb' q'ue wa'an, tz'at alnc 'a winac to an Jehová in, an tzwal 'ixtic: Chaj 'at eb' in chon̈b' tic yic tz'at ya'nc eb' 'emmquilal 'ayin.

Ex 17:5

'Ix ta'w Jehová 'ixtc 'a Moisés: —A ticnec, b'ab'ljan̈ yuj eb' 'anma tic, tze'n 'at jaywn̈oc eb' yichm wincal chon̈b' Israel tic et'oc. Tze'n 'at pax te a c'occh 'ix a mac' 'ejm 'a yib'n̈ a a'.

Ex 4:23

Tox 'ix wal 'ayach, to tza chaj 'at eb' wunnal tic, yic tz'at yac' eb' 'emmquilal 'ayin, palta yujto matz yal a c'ojl tza chaj 'at eb', yuj cha, 'oj in mil cham win a b'ab'l 'unnal, xchi Jehová, xa chi 'a 'a, xchi Dios.

Ex 8:23

A eb' in chon̈b' tic, chuc yel eb' 'a yib'n̈ eb' a chon̈ab', man̈ lajnoc yilx eb' 'a in sat. Q'uic'an tz'ec' can no tzac' cha, xchi Jehová, xa chi 'a win rey cha, xchi Dios.