Ex 15:16 - Chuj San Sebastian Bible

¹⁶ Mamin Jehová, xiw cab' chan̈ eb' yajl cha, sicb'oc cab' can 'el eb'. 'Icha cab' q'uen tz'ajcn eb' yuj a poder, masnto 'oj que'cn an̈ colb'iln̈ 'el 'oj tic.

Chuj San Mateo Bible

¹⁶ yujto ol te xivcanq'ue eb', ol sicb'occanel eb'. Mamin Jehová, icha q'uen q'ueen ol ajcan eb' yuj a poder, masanto ol on̈ ec'b'at a on̈ a chon̈ab' on̈ colb'ilel uj tic.

Ex 15:16 Referans Kwoze

Salmos 74:2

Nan̈ cot an̈ a chon̈b' on̈ tic on̈, to ach b'ojnacn̈ 'a yictax pecti'. On̈ a coln can 'eli, yic tzon̈ 'och yiclumal 'aych on̈. Na cot lum tzaln Sión, lum 'aj caj ach 'eq'ui.

Dt 2:25

Wal 'a jun c'u tic, tz'el yich wa'n xiwc'ojlal 'a smasnil eb' chon̈b' 'ay 'a sat lum lum tic. A yic 'oj laj yab'nc eb' yalx eyab'xil, caw wal 'oj xiw chan̈ eb'. 'Oj laj 'ib'xoc chan̈ eb' yuj xiwlal. Caw 'ayxn̈ej xiwc'ojlal eb', xchi Dios, xchi Moisés.

A Ch'an̈ B'ab'el Libro Samuel 25:37

Ax 'a sq'uin̈b'il 'a junx c'u cha, yic tox xb'ox sc'ojl Nabal yuj te 'an̈ cha, 'ixta to b'i'an 'ix yaln 'ix Abigail tas 'ix uji. Yuj cha, 'ix 'och jun yab'il tzcuch derrame 'a win Nabal, 'ix sic'b' can 'el sniwnal.

Josué 2:9

—Wojc an tic, to a Jehová a tz'a'n jun lum tic 'ayex. A pax tzon̈ 'a'n 'och 'a xiwc'ojlal qui masnil 'a jun tzo'n̈ lugar tic on̈. Man̈x on̈ 'anmac tzcab'i yic tzcab'n eyab'xil.

A Schab'il Carta San Pedro 2:1

A eb' wit israelal 'a pecti', 'ay eb' cob' yaljnac 'och sb'a schecb'oc Dios, palta yes eb'. An̈jtona 'ay eb' 'oj pitzwc chan̈ 'a qui calec, ax ya'n eb' cuyxoc jun tzo'n̈ 'es. 'Oj yi'ch eb' jun tzo'n̈ chuc cuynb'ilal 'a qui calec, sec 'ayn̈ec 'oj qui juwc 'el yuj eb'. Caw may jac yel'ch Cajlilec 'a sat eb', wach'xam a xcham stojloc smul eb'. Yuj cha, mun tzyij cot eb' 'a yib'an̈. Yajn̈ej, ax satcn 'el eb' 'a jun 'ejmn̈ej.

A Sb'ab'el Carta San Pedro 2:9

Palta an̈ec xo tic, junxn̈ej quin̈tl qui masnil 'a sat Dios, yujto sic'b'iln̈ec xo 'el yu'uj. 'Ayx copisoec ca'n 'och qui ti 'a Dios, tzca'nec servil qui Reyal. Caw junxn̈ej chon̈b'al cajc 'a sat Dios. Cojn wal 'a tzca'c servil. Yic on̈c xo qui masnil ticnec. 'Ixta tzon̈ 'ajec, sec wach' calnec 'eli, chajtlto man̈ jantcoc swach'l Dios. Yujto a on̈ 'awtnec 'elt 'a scal q'uic'q'uinal, yic on̈ 'ochc 'a jun sacq'uinl caw wach', atn jun yico'.

Tito 2:14

A xyac' cham sb'a cu'uj, sec tzon̈ scol 'a yol sc'ab' maysch'olnil. A 'ix 'i'n 'el smasnil qui mul, sec wach' an̈j 'ayn̈ yico', sec an̈j jun tzo'n̈ tas wach' tzqui b'o'.

Jeremías 31:11

Yujto an Jehová in tic, 'oj in colcn 'el eb' yin̈tl Jacob, 'oj in col 'elt eb' 'a yol sc'ab' jun nacion̈ caw 'ay yip.

Dt 11:25

May xon junc mach 'oj ste'wtzoc sb'a 'a eyojltac. A Jehová qui Diosalec, a 'oj 'a'noc 'och eb' 'anma chi 'a xiwc'ojlal, ax stac chan̈ sc'ojl eb' 'aj 'oj eyec' cha, 'icha wal 'ix yutj yaln cani.

Ex 11:7

'Ixta to b'ia'n, ax eyojcan 'eli to an Jehová in, to chuc yel eb' israel tic 'a in sat 'a eyib'n̈ ax 'aj Egipto ex tic, to caw xajn eb' israel tic wu'uj, man̈x 'a tas 'oj 'i'nc eb', yet' pax scajb'en noc' eb', xchi Dios.

A Tas Sc'ulejnac Eb' Schecab' Jesús Hechos 20:28

Yuj cha, caw tzeyac' cuenta e b'a. Tzeya'n pax cuenta eb' creyente smasnil, yujto 'ac'b'il eyopiso yuj Yespíritu Dios eyiln eb' yiglesia Cajlil, atn eb' manb'ilx yico'oc yuj schiq'uil yic scham cujec.

Is 51:10

'Ix a'n tup a mar yet' eb' a niwc a caw xab' yich, ax xab'l yich a mar cha, 'ix a'ch b'eal, sec a eb' colb'il 'el o'oj, wach' 'ix 'ec' eb' 'a yojl a'.

A Ch'an̈ Schab'l Libro Samuel 7:23

A pax a chon̈b' Israel tic, may junc xo chon̈b' lajn yet'oc, caw cojn jun nacion̈ tic a coljnac 'el 'a sat lum tic 'a yol sc'ab' eb' 'ajc'ojol, yuj yochcn a chon̈b'oc. Caw satjub'tac tas xa b'o yuj eb' a chon̈ab', yic 'ix e'n 'elt 'a Egipto; 'ix e'n 'el pax jun tzo'n̈ nacion̈ yet' sdiosal 'a yojltac eb'. Yuj cha, caw wal tzb'inax 'a b'i yuj eb' 'anma',

A Ch'an̈ B'ab'el Libro Samuel 2:9

Ach tza tan̈wj eb' eco', palta ax eb' maysch'olnil, ata tzcham eb' 'a scal q'uic'q'uinal. Matz tac' qui q'ue'ch yet' qui jelnal 'a mun yol quic on̈.

Dt 32:9

Yujto an̈ec yin̈tl on̈ Jacob, an̈ec on̈ si'cn 'och Jehová yico'oc.

Dt 32:6

¿Tom 'ixtc wal tzeyutj eya'n spac 'a Jehová? Ax chon̈b' ex tic, caw may jac e nab'en. ¿Tom man̈oc Jehová e Mam yaji? ¿tom man̈oc ex b'oni? A 'ex b'oni, xya'n e q'uinal.

Ex 23:27

'Oj in xib'tc eb' 'anma tzchichn 'och 'ayex, ax wa'n somchjoc 'el eb' tzeyac' owl yet'oc. Smasnil eb' 'ajc'ojl yajch 'ayx 'a junjn chon̈b' 'aj 'oj eyeq'ui, an 'oj wac' 'at eb' 'elc 'ayex.

Gn 35:5

A yic x'elt eb' 'a jun lugar cha, a Dios x'a'n xiwc'ojlal 'a yib'n̈ smasnil eb' chon̈b' 'ayc' 'a stz'ey eb' cha, yuj cha, may eb' 'anma xpechn eb'.

Ex 15:5

'Icha wal q'uen q'ue'en, 'ixta x'aj eb' s'atcn 'a yich a'; 'ix mucchj can 'ejm eb' yuj a mar cha.

Ex 15:6

Mamin Jehová, caw wal 'ay a poder, 'ix a satl eb' 'ajc'ojl cha.

Ex 15:13

Yuj a niwn chamc'ojlal, tzon̈ e'n b'ey an̈ a chon̈b' on̈ tic, on̈ a coln 'elt yet' a poder, yic tzon̈ e'n 'at 'a lum lum to sic'b'il 'el o'oj yic tzach 'aj cajn ta'.

Ex 18:8

Xyaln Moisés 'a sn̈i cha tas x'aj win sreyl Egipto yet' smasnil eb' 'anma yuj Jehová, yic xcolchj 'elt eb' israel yu'uj. 'Ix yaln paxi, jantc wal syal 'ix laj yil eb' 'a yol b'e yet' tas xyutj colwjoc sb'a Jehová yet' eb'.

Ex 20:2

An ton Jehová e Diosal in, an ex wij 'elt 'a yol yic Egipto 'a 'ajtil 'ayx 'och mosoal, 'aj man̈ eyico'oc e b'a.

Ex 23:20

'Oj in checb't jun wángel eyet'oc yic tzex stan̈wni 'a yol b'e, ax ex yi'n 'at 'a jun lugar 'ajtil wach'x yaj wu'uj.

Dt 2:4

Al yab' eb' et chon̈b' jun checnb'il tic. To ata 'oj eyec' 'a yol slugar eb' yin̈tl can Esaú, atn eb' eyican to e b'a yet'oc, eb' cajn 'a yol smacb'en Seír. Caw wal 'ay xiwc'ojlal eb' 'ayex. Palta b'i'an, caw tze tan̈wj e b'a, man̈ e comn xib'tc eb'.

Josué 4:24

'Ixta tz'aj yojcan 'el smasnil 'anma 'a yolyib'n̈q'uinl tic, chajtlto a Jehová caw 'ay spoder, yuj cha, 'ay cab' yel'ch 'a e sat 'a smasnil tiempo, xe chi 'a eb', xchi Josué cha.

Salmos 105:38

Caw wal stzalj eb' 'aj Egipto cha, yic xyiln eb' yelt eb', yujto caw 'aych eb' 'a xiwc'ojlal yuj eb'.

Is 63:12

Atn Jehová 'aych yipc Moisés yic xb'ey 'a yol b'e, jun x'a'n spoj sb'a a mar 'a yojltac eb' schon̈ab', sec tzb'inax 'a smasnil tiempo yuj eb'.

Ex 6:7

'Oj ex wi'ch in chon̈b'oc, ax woch e Diosaloc. 'Ixta 'oj eyutc eyojcan 'eli to an ton Jehová in, e Diosal in. An tzex in col-l 'a yol sc'ab' eb' 'aj Egipto tic.

Ex 23:22

Palta toto 'oj eyiclc tas 'oj yala', ax eyiclni smasnil tas 'ix wal 'ayex, toto 'ixta', 'oj woch 'ajc'ojlal 'a mach 'ajc'ojl 'oj 'ajch 'ayex, 'oj woch lin̈n 'a yojltac mach 'oj cob' ste'wtzoc sb'a 'a eyojltac.

Salmos 89:14

A a despacho caw te'n yaj yuj tojlal yet' yuj wach'il. Ata tzcheclj 'el a chamc'ojlal to yel tz'el'ch tas tzala.

Ez 16:8

In 'ec' pax 'a stz'ey jun 'ejm xo, xwilni to stiempoal xo yoch 'a nupnel. Yuj cha, ax in potil, a xin potb't 'a yib'an̈, 'ixta x'aj yoch spichul, 'ix macchj 'el sq'uixwelal. 'Ix wa'n in trato yet'oc to tzwique'ej an Jehová in.