Esdras 4:2 - Chuj San Sebastian Bible

² Yuj cha, 'ix 'at eb' 'a Zorobabel yet' 'a eb' yajl yaj 'a eb' yican, 'ix yaln eb' 'a eb' 'ixtic: —Comnoc tzchaj e c'ojl qui b'on jun munljel tic eyet'oc, yujto an̈ tic on̈ tzon̈ 'och pax 'emmquilal 'a Dios 'icha ex tic, atxo yic on̈ 'ijx cot yuj Esar-hadón sreyl Asiria, atxo ta 'on̈ c'ojl ca'n qui xajmb'al 'a e Diosal cha, xchi eb'.

Chuj San Mateo Bible

² ix c'och eb' d'a vin̈aj Zorobabel yed' d'a eb' yajal yaj d'a scal junjun macan̈ eb'. Ix yalan eb' icha tic: —Comonoc scha e c'ool sco b'o jun munlajel tic eyed'oc, yujto tzon̈ ochpax ejmelal d'a e Diosal chi' icha ex tic. Atax yic on̈ ic'chajcot d'a tic yuj vin̈aj Esar-hadón sreyal Asiria, atax ta' on̈ och ijan cac'an co silab' d'a e Diosal chi', xchi eb'.

Esdras 4:2 Referans Kwoze

A Ch'an̈ Schab'il Libro Yic Yab'ixal Eb' Rey 19:37

'Ay jun c'ual 'ix 'at leslwoc 'a yatut jun sdiosal tzcuch Nisroc, axn 'ayc' chi ta', 'ix c'och chawn̈ eb' yunnal 'a 'a, atn Adramelec yet' Sarezer, 'ix smiln can eb'. 'Ix 'atcn eb' 'elc 'a yol yic Ararat. Ax junx yunnal scuch Esarhadón, a 'ix 'ochcn reyl sjeloc.

A Ch'an̈ Schab'il Libro Yic Yab'ixal Eb' Rey 17:24

A sreyl chon̈b' Asiria 'ix 'i'n cot eb' 'anma 'ayc' 'a Babilonia, 'a Cuta, 'a Ava, 'a Hamat, yet' 'a Sefarvaim, 'ix jaw cajn eb' 'a jun tzo'n̈ chon̈b' 'ay 'a yol yic Samaria sjelc eb' israel.

2 Ti 3:8

'Icha win Janes yet' win Jambres, chichnnac 'och eb' 'a Moisés, 'ixta schichn 'och eb' 'anma chi 'a jun cuynb'il caw yel. Toxn juwnac 'el snab'en eb'. Toxn man̈xtzac ya'ch eb' sc'ojl 'a Dios.

Gl 2:4

Yel toni, 'ay jun tzo'n̈ eb' yaljnac 'och sb'a creyenteal. Snib'jnac eb', to 'ajxnac circuncidar Tito cha. Palta a eb' cha, ton̈j c'ultac 'ochnc eb' 'a qui calec, sec tzyil eb', chajtl on̈ 'ajc qui colchj 'el 'a yol sc'ab' ley yic Moisés yuj Cristo Jesús. Yujto tznib'j eb' to tzon̈ 'ochc pax 'a yol sc'ab' jun ley chi jun 'ejm xo.

Os 14:3

A chon̈b' Asiria matz tac' on̈ scoln on̈, an̈jtona matz tac' pax qui colx yuj no chej on̈. A tas tzlaj qui b'o yet' qui c'ab' on̈, man̈x 'oj calch qui diosalc on̈, yujto cojxn ach Mamin Jehová, ach tzac' tas 'ay tz'och yuj eb' meb'a 'unn chamnc smam, xe chi 'a Dios.

Is 37:37

Xlajw cha, 'ix yi'n 'el Senaquerib sreyl Asiria scamplamento ta', axta xc'och 'a chon̈b' Nínive, 'ix can ta'.

Salmos 73:8

Yuj sb'an̈quintacl eb', tzb'uchwj eb', tzyixtn eb' yit 'anma'il, matz q'uixw eb' xib'tn eb'.

Esdras 3:12

Til wal eb' ya'mal 'och sti eb' 'anma 'a Dios, yet' jun tzo'n̈ xo eb' levita yet' eb' yajl yaj 'a scal eb' yican, atn eb' 'ichmtacx 'anma', caw wal 'ip yel yaw eb' yoq'ui yujto yiljnac eb' jun yatut Dios 'a b'ab'el. Ya' sb'a cha, til to wal mach tz'el yaw yuj tzaljc'ojlal.

Esdras 3:2

Xlajw cha, ax Jesúa yunnal Josadac, yet' jun tzo'n̈ xo eb' ya'mal 'och sti eb' 'anma 'a Dios, yet' Zorobabel yunnal Salatiel, yet' eb' yican, 'ix sb'on chan̈ eb' jun yet'l xajmb'al yic sDiosal chon̈b' Israel yic tzya'n tz'a eb' xajmb'al 'a yib'an̈, 'icha yaj stzib'x can 'a ch'an̈ ley yic Moisés, atn win schecb' Dios.

Esdras 1:5

Xlajw cha, 'ix ya'n lista sb'a eb' yajl yaj 'a scal eb' yin̈tl Judá muc'uc, yet' 'a scal eb' yin̈tl Benjamín, smasnil eb' ya'mal 'och sti eb' 'anma 'a Dios yet' jun tzo'n̈ xo eb' levita, atn smasnil eb' 'aj 'ix yal Dios 'a snab'en, to tz'at eb' 'a Jerusalén yic tz'at sb'onc pax chan̈ eb' yatut Jehová.

Gn 10:11

Xlajw cha 'ix 'at 'a Asiria; ata 'ix sb'o chan̈e xo niwc chon̈ab': atn chon̈b' Nínive, Rehobot-ir, Cala,

Nehemías 9:32

A ticnec ach qui Diosal on̈, caw niwn el'chi, caw 'ay ep, 'ay smay a b'inaxi, matz 'at satc'ojlal a trato o'oj. Yuj a niwquil chamc'ojlal, 'ay cab' yel'ch syailal eb' qui reyl 'a a sat, eb' 'aych qui yajlil on̈, eb' ya'mal 'och qui ti 'aych on̈, eb' a checab', eb' qui mam quichm on̈, yet' smasnil eb' quit chon̈b' on̈, to 'ix yab' eb' syail yictax 'a yol stiempoal eb' sreyl Asiria masnto 'a jun tiempoal tic.

Is 37:38

'Ay jun c'ual 'ix 'at leslwoc 'a yatut jun sdiosal tzcuch Nisroc, axn 'ayc' chi ta', 'ix c'och chawn̈ eb' yunnal 'a 'a, atn Adramelec yet' Sarezer, 'ix smiln can eb'. 'Ix 'atcn eb' 'elc 'a yol yic Ararat. Ax junx yunnal scuch Esarhadón, a 'ix 'ochcn reyl sjeloc.