Dt 3:24 - Chuj San Sebastian Bible

²⁴ Mamin Jehová, a ticnec xa chaj 'el yich a ch'oxni to niwn el'chi yet' a jelnal 'a 'ayn a checb' in tic. May junc xo Dios 'a satcha'an̈ mto 'a sat lum tic 'ay sjelnal sb'on junc tas satjub'tac yilx 'icha tas tza b'o tic.

Chuj San Mateo Bible

²⁴ Mamin Jehová, a ach ix a chael yich a ch'oxani to te nivan elc'ochi, ix a ch'oxan a poder d'ayin a checab' in tic. Malaj junocxo Dios d'a satchaan̈, ma d'a sat luum tic syal sc'ulan tastac satub'tac icha tza c'ulej tic.

Dt 3:24 Referans Kwoze

Ex 15:11

Mamin Jehová, may junc xo dios tztac' slajb'tzan sb'a et'oc, may junc xo mach caw wach' 'icha ach tic, may junc xo mach tztac' sch'oxn milagro 'icha tas satjub'tac tza b'o'o.

Salmos 71:19

A wal a tojlal ach in Diosal, caw tzq'ue'ch 'a satcha'an̈, caw niwn yel'ch jun tzo'n̈ tas a b'ojnac. May junc xo mach 'icha 'ach.

Dt 11:2

A ticnec, xcojquejec 'eli tas 'ix sb'o Jehová cujec, yujto man̈oc yet' eb' cunnalec paxtinnac, palta an̈ec wal xquila, xquilc wal sniwquil poder Jehová Dios.

Salmos 86:8

Toc wal 'ay junc xo dios lajn 'icha ach tic. Toc wal 'ay junc xo tas tzlajb'tzej sb'a yet' tas tza b'o'o.

A Ch'an̈ Schab'l Libro Samuel 7:22

Mamin man̈x jantcoc a jelnal, yujto may junc 'anma tztac' slajb'tzan sb'a et'oc. Caw may junc xo Dios lajn et'oc, cojxn ach ton Dios ach, a tzyal 'ixta tzcutj cab'ni.

Dn 3:29

A ticnec, an tzwala, to a smasnil mach tzaln tu paxti'al 'a sDiosal jun tzo'n̈ quelm tic, caw wal choc' 'oj 'aj smilx chamoc. Ax yatut, 'oj ma'xoc can 'ejm lan̈chjoc, wach'xam chuc chon̈b'al, chuc nacion̈al, mto chuc til tzyala. Yujto may wal junc xo dios tztac' scolwj 'icha sDiosal ewin tic, xchi winac.

Jeremías 10:6

Mamin Jehová, may xon wal junc mach lajn et'oc; yujto ach tic, cojxn ach niwn el'chi, caw b'inab'il a b'i, tzta'n̈j oj smasnil.

Is 40:25

A Dios Cojxn toni, a tzc'anb'n 'ixtic: ¿Mach junc 'oj in e lajb'tzoc yet'oc? ¿Toc 'ay mach lajn xon wet'oc? xchi.

Salmos 145:6

'Oj yal eb' 'anma yuj tas b'ob'il o'oj, yujto caw tztac' o'oj, 'oj wal-li to caw niwn el'chi.

Salmos 106:2

¿Mach wal junc tz'acw yaln 'el tas satjub'tac tzb'o Jehová? ¡Toc 'ay mach tztac' sb'itnan 'icha wal smoj sb'itnaxi!

Salmos 89:8

Mamin Jehová tztac' 'oj smasnil, ec yaj smasnil poder, may 'aj tza jel tas tzala; may junc xo lajn 'icha ach tic.

Salmos 89:6

May junc xo dios, mto junc tas 'ay 'a satchan̈ tztac' slajb'tzan sb'a et'oc.

Salmos 35:10

Yet' wal smasnil in c'ojol 'oj wal 'ixtic: Caw may mach lajn et' Mamin Jehová. A eb' meb'a' yet' eb' may xon jac tas 'ay 'a 'a, tza colcn 'el eb' 'a yol sc'ab' eb' caw te'n yaji, yet' 'a eb' tz'i'n 'ec' jac tas 'ay 'a eb', 'oj in chioc.

Nehemías 9:32

A ticnec ach qui Diosal on̈, caw niwn el'chi, caw 'ay ep, 'ay smay a b'inaxi, matz 'at satc'ojlal a trato o'oj. Yuj a niwquil chamc'ojlal, 'ay cab' yel'ch syailal eb' qui reyl 'a a sat, eb' 'aych qui yajlil on̈, eb' ya'mal 'och qui ti 'aych on̈, eb' a checab', eb' qui mam quichm on̈, yet' smasnil eb' quit chon̈b' on̈, to 'ix yab' eb' syail yictax 'a yol stiempoal eb' sreyl Asiria masnto 'a jun tiempoal tic.

Is 40:18

¿Tom 'ay junc mach tztac' e lajb'tzan yet' Dios cha? ¿Tom 'ay junc yechl tztac' slajb'tzax yet'oc?

Salmos 145:3

Mamin Jehová, caw wal niwn yel'ch a b'i, yuj cha, smoj wal a b'itnaxi; a 'a b'inab'ilal, man̈ alchjb'enoc.

Ex 8:10

—¡Q'uic'an! xchi win rey cha. Xlajw cha, 'ix yaln Moisés: —B'o cab' 'icha tzotj aln cha, sec 'oj ojcoc 'eli, to may junc xo mach lajn spoder 'icha Jehová qui Diosal on̈.

Ex 9:14

A 'a yic jun tiempoal tic, 'oj wa' cot jun tzo'n̈ yailal 'a eb'an̈, 'a yib'n̈ eb' 'aych yajlil et'oc, yet' 'a yib'n̈ smasnil 'anma'. A yuj jun yailal cha, ax ojcan 'eli, to may junc xo mach tztac' slajb'tzan sb'a wet' 'a yolyib'n̈q'uinal.

Dt 3:23

A 'a jun tiempoal cha, ata in tew 'och 'a Jehová, xwaln 'a 'ixtic:

Dt 32:3

'Oj walcn 'eli, to niwn yel'ch Jehová; 'ijec chan̈ sb'i qui Diosalec.

2 Cr 6:14

'ix yaln 'ixtic: —Mamin Jehová, ach qui Diosal an̈ Israel on̈ tic on̈, may junc xo Dios lajn et' 'a satcha'an̈ yet' 'a sat lum tic, yujto tzac' 'el'choc a trato, tza ch'oxn pax a wach'c'ojlal 'a eb' tzyiclni yet' smasnil sc'ojl 'a tas tzala.

Salmos 150:2

B'itn coyc yuj satjub'tacl yilx tas b'ob'il yu'uj. B'itn coyc 'a 'a, yujto may b'a'n̈ tzlajw sb'inaxi.

Nm 23:23

A 'a eb' yin̈tl Jacob, may yel'ch eb' tzyal jelnal sb'a, may yel'ch eb' b'alm 'a sat eb'. A ticnec b'i'an, yowlal tzalx 'ixtc 'a yib'n̈ eb' israel: Til wal satjub'tacl 'ix sb'o Dios yet'oc, xchi cab' eb' 'anma yuj eb'.