Dt 14:29 - Chuj San Sebastian Bible

²⁹ Sec a yic 'oj c'och eb' levita 'ayex, eb' may xon slum 'oj scha eyet'oc, mto eb' chuc chon̈b'al cajn 'a e cal, mto eb' meb'a 'unn chamnc smam, yet' eb' 'ix 'ix chamnc yichmil, atn jun tzo'n̈ e diesmo chi 'oj sc'ux eb', sec b'ut'n sc'ojl eb' eyet'oc. 'Ixta 'oj yutc Jehová qui Diosalec ya'n yaxilal 'a eyib'n̈ yet' tas tze b'o cha, xchi Moisés.

Chuj San Mateo Bible

²⁹ A eb' levita to maj schalaj sluum smacb'enoc eyed'oc, ma eb' ch'oc chon̈ab'il ayec' cajan d'a e cal, ma eb' meb'a' man̈xa smam yed' eb' ix ix chamnac yetb'eyum, syal svaan eb' tastac tze mol d'a e diezmo chi', tz'acan slaj yic' yic eb'. Tato icha chi' tze c'ulej, ol yac' svach'c'olal Jehová co Diosal d'a yib'an̈ masanil tastac tze c'ulej.

Dt 14:29 Referans Kwoze

Dt 15:10

Yowlal tzex colwj 'a junc meb'a', man̈ teb'iloc tzeyac' tas tznib'ej. Toto 'ixta tzeyutej, ax Jehová qui Diosalec, 'oj yac' yaxilal 'a yib'n̈ smasnil tas tze b'o'o.

Dt 14:27

Man̈ e patquilc can 'el eb' levita cajn eyet' 'a yol e chon̈b' cha, yujto may xon slum eb' 'oj scha 'icha lum eyic cha.

Pr 19:17

A mach 'ela 'a eb' meb'a', 'icha to a 'a Jehová wan ya'n junc chi majnil, ax Jehová, a 'oj 'a'noc spac jun swach' nab'enal cha.

Dt 16:11

Tze nan jun q'uin̈ chi 'a yojltac Jehová Dios, 'a jun lugar 'oj si'l yico'oc cha. Tze mol naj jun q'uin̈ chi yet' eb' eyunnal, eb' eyisil, ewin e moso, eb' 'ix eya'mal servil, eb' levita, eb' chuc chon̈b'al, eb' meb'a 'unn chamnc xo smam, yet' eb' 'ix 'ix chamnc yichmil cajn 'a yol e chon̈b' cha.

Pr 11:24

'Ay wal eb' 'anma caw wal 'ela', b'ecn sc'ojl spojn 'ec' tas 'ay 'a 'a. A eb' cha, yel xo wal niwn tzyutj eb' schan spac. 'Ay pax eb' 'anma caw b'as, tzjaw meb'a'il 'a yib'n̈ eb'.

Salmos 41:1

Wach' yic eb' tznan eb' meb'a', yujto a Jehová a 'oj colnc 'el eb' 'a yic stiempoal 'ay yailal.

Dt 16:14

A 'a jun q'uin̈ cha, ata tzeyac' tzaljoc e c'ojl yet' eb' eyunnal, eb' eyisil, ewin e moso, eb' 'ix eya'mal servil, eb' levita, eb' chuc chon̈b'al, eb' meb'a 'unn chamnc xo smam, yet' eb' 'ix 'ix chamnc yichmil cajn 'a yol e chon̈b' cha.

Dt 12:12

Tzlajw cha, tze nan sq'uin̈l jun tzo'n̈ chi 'a yojltac Jehová qui Diosalec, yet' eb' eyunnal, eb' eyisil, ewin e checab', eb' 'ix e checab', yet' pax eb' levita cajn 'a e cal, yujto a eb' levita cha, may smacl lum eb' 'oj scha eyet' 'a lum lum cha.

Lv 19:34

'Ay cab' yel'ch eb' 'ayex, tze chamc'ojlej eb', 'icha tzeyutj e chamc'ojlan e b'a. Yujto ax tic, 'e'nc ex cajn 'a scal eb' chuc chon̈b'al 'a Egipto.

Santiago 1:27

Palta 'oj wal junx tic. Toto 'ay eb' 'unn chamnc smam snun, yet' eb' 'ix chamnc yichmil 'ay scusc'ojlal, yowlal tz'at quilc eb', tzon̈ colwjec 'a eb'. An̈jtona', yowlal tzquijec 'el qui b'a 'a tzann̈j maysch'olnil 'ay 'a yolyib'n̈q'uinl tic. Toto 'ixta tzcutjec qui b'a, ax qui Mam Dios, tzyila to caw yel 'aych qui c'ojl 'a 'a.

A Ch'an̈ Carta D'a Eb' Hebreo 13:2

Qui nac coti, to yowlal wach' tzcutjec qui b'a 'a eb' tzlaj 'ec' 'ayon̈. 'Ay eb' 'ixta yutjnac sb'a, palta man̈ yojcoc eb', toto ángel eb' 'aj wach' yutjnac sb'a eb' cha.

Lc 11:41

Octom a yet' e nab'en tze ch'oxl e wach'il. Toto 'ixta', 'oj sacb'tzaxc e pixan yet' e nab'en. Tzyal 'el'chi, man̈x 'a maysch'olnil 'aych 'ayex.

Lc 6:35

Palta ax xo tic, chamc'ojlejc eb' 'ajc'ojl yajch 'ayex. Wach'n̈j cab' tzeyutj e b'a. A yic tzeya'n junc tas majnil, man̈ e na', toto 'oj e chaxi. Toto 'ixta tzeyutj e b'a, caw niwn spac 'oj e cha'. Ax scheclj 'eli, to yunnal ex xo Dios, atn jun yel xo niwn yel'chi. 'In tzch'ox swach'c'ojlal pax 'a eb' maysch'olnil.

Nm 18:20

Xyaln pax Jehová 'a Aarón 'ixtic: Ach tic may xon a locnal 'a slum eb' et israelal, may aln ec 'a lu'um, yujto 'icha to a macl tzin 'aj 'a scal eb' et chon̈b' tic.

Dt 6:11

A eb' te n̈a 'ay ta', b'ut'n yet' tas wach' 'ay 'a yojol, palta man̈oc ex b'ut'jnac. 'Ay a 'uc'b'il a joyb'il, palta man̈oc ex joyjnac. 'Ay te uva yet' te olivo 'awb'il ta', palta man̈oc ex 'awjnac. Toxn̈ej 'oj e c'ux tas 'ay 'a jun lugar cha, ax e b'ut'j wal si'mb'il.

Dt 10:9

Yuj cha, a eb' yin̈tl Leví, may smacl lum eb' schaj 'icha yic smasnil eb' quit chon̈b'ec, yujto a Jehová a tzyac' servil eb', a chi smacl eb' yaji, 'icha wal yaj yaln cani.)

Salmos 94:6

Tzlaj milx cham eb' 'ix chamnc yichmil yuj eb', eb' chuc chon̈b'al yet' eb' meb'a 'unn chamnc smam.

Is 1:17

Cuyc e b'a e b'on swach'il, a cab' stojlal tze sayq'ui, colwjan̈c 'a eb' 'anma tz'ixtxi, b'oc yaj eb' meb'a 'unin, colwjan̈c 'a eb' 'ix 'ix chamnc yichmil, xchi Dios.

Dt 23:21

A yic tzeya'n e ti eya'n junc tas 'a Jehová Dios, matz 'ec' cab' tiempo eya'ni. Toto ma'ay 'oj sc'anb'c 'ayex, ax yoch jun chi e muloc.

Dt 28:8

A Jehová 'oj ya' cot syaxilal 'a yib'n̈ e c'un̈a yet' 'a yib'n̈ smasnil tas tze b'o'o. 'Ixta wal 'oj yutc ya'n e tzaljc'ojlal 'a sat lum lum 'oj yac' 'ayx cha.

Salmos 41:2

A 'oj tan̈wnoc eb', 'oj yac' sq'uinl eb', ax ya'n pax stzaljc'ojlal eb' 'a sat lum lum tic. Caw wach' yic eb', ma'oj 'ajxoc eb' 'a yol sc'ab' eb' 'ajc'ojl yajch 'a eb'.