Dt 12:11 - Chuj San Sebastian Bible

¹¹ A 'a jun lugar 'oj si'l Jehová yico'oc cha, ata 'oj 'at eyac' smasnil jun tzo'n̈ xwal 'ayx tic: no noc' tzeyac' xajmb'alil, yet' no xajmb'al tze n̈ustz'a'oc, e diesmo, eyofrenda to tz'el 'a e c'ojl eya'ni, yet' e colwal to ta'wb'il eyu'uj.

Chuj San Mateo Bible

¹¹ Axo jun lugar ol sic'canel Jehová yic tz'och yicoc, ata' ol eyac' masanil tas ix val d'ayex to ol e c'ulej. Ata' ol eyac' noc' silab' stz'ai yed' juntzan̈ silab' yuj eyic'anchaan̈ Jehová chi', e diezmo, e colval yed' eyofrenda sic'b'ilel eyuj b'aj ix eyac' e ti' eyac'ani.

Dt 12:11 Referans Kwoze

Dt 15:20

'A junjn ab'il tze mol chin e no yet' eb' eyunnal 'a yojltac Jehová qui Diosalec, 'a jun lugar 'oj si'l yico'oc cha.

Dt 12:5

A 'a scal eb' eyin̈tl ax tic, ata 'oj si'l Jehová jun lugar 'aj 'oj b'inaxc sb'i, atn 'a jun lugar chi 'aj smoj 'at eya'nc 'ejm e b'a.

Dt 18:6

Toto 'ay junc win yin̈tl Leví 'ayc' 'a junc chon̈b' 'ay 'a yol smacb'en eb' quit israelal, tznalb'ej sc'och 'a jun lugar to sic'b'il 'el yuj Jehová,

Dt 17:8

Toto 'ay junc tas tz'ajx e b'eyc'ojloc, palta caw 'ajltac snachj 'el eyu'uj, 'icha owl yic chamel, yic lajwel, mto junc xo comn owl tzq'ue wan 'a yol e chon̈b' cha, tzex 'at mu'c 'a jun lugar sic'b'il 'el yuj Jehová qui Diosalec.

Jeremías 7:12

'Ixquec 'a chon̈b' Silo, 'a 'aj 'e'nc in cajnub', atn jun in si'jnac 'el 'a yic b'ab'el 'a 'aj 'e'nc in cajan. Ax eyilni tas wutjnac can yuj smul eb' e mam eyichm cha.

Salmos 78:68

palta a 'a eb' yin̈tl Judá 'ix sic' 'elta. Si'n pax 'el lum tzaln Sión caw chamc'ojlb'il yu'uj

A Ch'an̈ B'ab'el Libro Yic Yab'ixal Eb' Rey 8:29

Q'ueln achn̈ej cab' 'och 'a jun atut tic 'a junjn c'u yet' 'a junjn 'ac'wal, jun aljnac chajtlto a 'a yojl tic 'oj a b'inaxn̈ej. Yuj cha, maclj wal ab' in lesl an a checb' in tic.

A Ch'an̈ B'ab'el Libro Yic Yab'ixal Eb' Rey 8:13

Palta an tic, 'ix in b'o jun atut caw man̈x jantcoc swach'il, a 'aj tzach 'aji, jun et'l 'aj 'oj a can cajn 'a smasnil tiempo, xchi.

Josué 18:1

'A yic tox 'ix yijcan 'ec' eb' israel lum lum cha, syamn sb'a eb' smasnil 'a chon̈b' Silo, 'ix sb'on chan̈ eb' jun Mantiado 'aj tzqui chaj qui b'a yet' Dios.

Dt 31:11

A yic tzyamn sb'a smasnil eb' chon̈b' 'a yojltac Jehová Dios, 'a jun lugar to sic'b'il 'el yu'uj, ata tz'awtx jun ley tic yab' eb' smasnil.

Dt 26:2

ax sb'ab'l sat eyawb'en, tzeyac' 'ejm 'a yol junc xu'uc, tzeyi'n 'at 'a jun lugar sic'b'il 'el yuj Jehová qui Diosalec, 'a 'aj tzex 'och 'emmquilal 'a 'a.

Dt 23:16

Can cab' 'a e cal cha, libre cab' si'lni 'aja junc chon̈b' 'aj tznib'j tzcan cajan, may cab' mach tztac' stzuntzn 'a 'aj tzcan cha.

Dt 14:23

A sdiesmoal e trigo, eyal uva, eyaceite yet' no sb'ab'l 'une e wacax, mto sb'ab'l 'une e calnelu mto chiwo. Ata tze c'ux jun tzo'n̈ chi 'a yojltac Jehová qui Diosalec, 'a jun lugar 'oj si'l yico'oc cha, sec 'ixta tzeyutj eyi'n 'ejm e b'a 'a Dios 'a smasnil tiempo.

Dt 12:26

Palta ax jantcn̈ej tas tzeyac' ofrendail 'a 'a, yet' tas ta'wb'il eyu'uj, tzeyij 'at 'a jun lugar chi 'oj si'l Jehová yico'oc cha.

Dt 12:21

Toto najt cajn ex 'a stz'ey jun lugar 'oj si'l Jehová yico'oc cha, jun 'aj tzex 'och 'emmquilal cha, tztac' e miln e chi no e wacx cha, mto e calnelu chi tzyac' Jehová 'ayex. Tztac' e chin no 'aj 'ayx 'ec' cha, a tzyal jantc no tze nib'j e chi', 'icha wal yaj waln 'ayex.

Dt 12:18

Tzeyij 'at jun tzo'n̈ chi 'a jun lugar 'oj si'l Jehová yico'oc, ax 'a yojltac, ata tze mol c'uxj jun tzo'n̈ chi yet' eb' eyunnal, eb' eyisil, ewin e checab', eb' 'ix eya'mal servil, yet' eb' levita cajn 'a e cal. Ata 'oj eyac' tzaljoc e c'ojl 'a yojltac Jehová qui Diosalec yuj tas tzeyij 'a e munljel cha.

Dt 12:14

Cojn 'a jun lugar tzsi'l Jehová 'a yol e nacion̈, ata tzeyij 'at jun tzo'n̈ cha. A jun tzo'n̈ tzwalcn 'ayx tic, yowlal tzeyiclj e b'on 'a jun lugar cha.

Ex 25:8

Tze b'on junc in cajnub', sec wach' tzin can cajn 'a e cal.

Ex 29:45

An tic, 'oj in can cajn 'a e cal yujto e Diosal in.

Dt 12:13

Tzeyil wal e b'a, man̈ e comn n̈usc no noc' xajmb'al-l 'a Jehová, 'a junc lugar 'aj tze nib'ej.

Josué 22:23

Toto yuj qui'n 'el qui b'a 'a stz'ey Jehová on̈, yuj cha, xqui b'on jun yet'l xajmb'al tic, mto yuj ca'n tz'a no noc' xajmb'al-l 'a yib'an̈, mto yuj ca'n cofrenda yuj qui trigo 'a 'a, mto yuj pax ca'n q'ue xajmb'al yic junc'ojlal 'a yib'an̈, toto 'ixta', a wal cab' Jehová a 'oj 'a'nc yowlal 'ayn̈ on̈.

Josué 22:27

Toto 'ixta 'oj cutc on̈, tzyal 'el'chi to wan qui patquiln can 'el Jehová on̈. May cab' b'a'n̈ 'oj qui b'o 'ixta'. 'Ix qui b'o jun yet'l xajmb'al tic on̈, sec a tzcan ch'oxnb'ilal 'a qui cal eyet' on̈, yet' 'a eb' quin̈tlec b'aq'uin̈, an̈ tic on̈, an̈j 'a Jehová tzcal qui b'a eyet' on̈. An̈ tic on̈, 'oj 'at ca'n̈j qui xajmb'al 'a jun yet'l xajmb'al yic Jehová 'ay 'a scajnub', xchi eb'.

A Ch'an̈ B'ab'el Libro Samuel 1:21

'Ix c'och sc'ul s'atx win Elcana chi yet' eb' yunnal yet' eb' yistzil 'a chon̈b' Silo, 'icha xon tzyac' 'a junjn ab'il yic tz'at ya'nc xajmb'al ta'wb'il yuj 'a Jehová, 'icha yaj sleyal.

A Ch'an̈ B'ab'el Libro Yic Yab'ixal Eb' Rey 8:16

Yictax wi'n 'elt eb' e mam eyichm ax israel tic 'a Egipto, mant 'a 'aj in si'jnac 'el junc chon̈b' 'a e cal, yic ata tzb'o junc watut 'aj tzin 'aj cajan. Cojn ach in si'jnac 'elta yic tza'n reyl 'a in chon̈b' Israel tic, xchi.

2 Cr 6:20

Q'ueln achn̈ej cab' 'och 'a jun atut tic 'a sc'ual, yac'wlil, jun aljnac chajtlto a 'a yojl tic 'oj a b'inaxn̈ej. Yuj cha, maclj wal ab' in lesl an a checb' in tic.

Esdras 6:12

A Dios 'ix si'n 'el 'aj tz'och 'emmquilal 'a sb'i 'a Jerusalén, a cab' tzsatn 'el smasnil eb' rey yet' eb' chon̈b' tzya'ch sc'ab' sjeln 'el jun ley tic, mto tzmac' 'ejm lan̈chjoc yatut Dios cha. An Darío in tic, an tzwac' jun checnb'il tic. Smasnil tastc tz'ib'x can tic, yowlal tzyiclx muc'uc, xchi win rey cha.

Salmos 100:2

Ca'c servil Jehová 'a tzaljc'ojlal, tzon̈ jawc 'a yojltac yet' qui b'it yic tzaljc'ojlal.

Lv 17:4

toto man̈oc ta tzmil 'a yamq'uil Mantiado 'aj tzin chaj in b'a eyet'oc, a jun 'anma cha, yowlal tz'ijx 'el 'a e cal. A jun chi tzcochcn smuloc, yujto ton̈j tz'elcn schic'l no noc' chi yuj ta'.

Dt 15:19

Smasnil sb'ab'l 'une e wacax, e calnelu, toto smam no 'unn cha, yic Jehová tz'aj no', yowlal tze si'cn 'el no yico'oc. Man̈ eyac' munljoc no sb'ab'l 'une e wacax, man̈ e joxl pax xil no sb'ab'l 'une e calnelu cha.

Josué 9:27

Xya'cn 'och eb' tzu'j c'atzitz yet' cuchj cot a 'a scal eb' israel cha, yet' pax yic yet'l xajmb'al yic Jehová, atn jun lugar sic'b'il 'el yu'uj. 'Ixta 'ix 'ajcn eb' yoch 'a jun smunljel cha.

Josué 22:11

'Ix c'och yab'xil jun tic 'a jun tzo'n̈ xo eb' israel.

Josué 22:16

—An̈ tic on̈, tzwul cal smasnil tas 'ix yal eb' schon̈b' Jehová eyu'uj: ¿Tas jun man̈ wach'c xe b'o 'a qui Diosalec? ¿Tas yuj xe patquilj 'el can Jehová, xe b'on jun yet'l xajmb'al yic tzex meltzj 'och 'ajc'ojlal 'a 'a?

A Ch'an̈ B'ab'el Libro Yic Yab'ixal Eb' Rey 12:27

Toto a eb' 'anma tic 'oj 'at eb' yac' xajmb'al 'a yatut Jehová 'a Jerusalén, tecn 'oj ya'x 'och eb' snab'en 'a win Roboam sreyl Judá. Ax am in smiln cham eb' b'i'an, ax s'atx can eb' yet' winac, xchi.

A Ch'an̈ Schab'il Libro Yic Yab'ixal Eb' Rey 18:22

Toto tzeyal 'ixtc 'ayin: An̈ tic on̈ a Jehová qui Diosal on̈, a tzca'ch yipc qui c'ojol, toto xe chi. 'In tox 'ix yac' win Ezequías chi satl jun tzo'n̈ macsej 'ay 'a jolmctac witz yet' smasnil yet'l xajmb'al yic e Diosal cha. Tox 'ix yal 'ayx 'ex 'aj Judá yet' ex 'aj Jerusalén, to an̈j 'a jun yet'l xajmb'al 'ay 'a Jerusalén, ata tzeyal e b'a.

1 Cr 22:1

Yuj cha, 'ix yaln David 'ixtic: A 'a tic 'oj b'o chan̈ yatut Jehová Dios, yet' jun yet'l xajmb'al 'aj 'oj ca'c tz'a qui xajmb'al an̈ israel on̈c tic, xchi.

Salmos 66:13

'Oj in c'och 'a atut, ax wa'n tz'a in xajmb'al 'a ojltac; 'ixta 'oj wutc wa'n 'el'choc tas 'aj 'ix wac' in ti 'ayach,

Salmos 116:17

'Oj wac' in xajmb'al 'a Jehová yic alj yuj diosal, yic tzwaln in b'a 'a 'a.