Dn 2:23 - Chuj San Sebastian Bible

²³ Ach qui Diosal on̈, sDiosal ach pax eb' qui mam quichm on̈, caw tzwac' yuj diosal 'ayach. Tzwaln pax wach' paxti 'ayach, yujto 'ix ac' in jelnal, yet' pax wip. A ticnec 'ix ac' wojcoc 'el tas 'ix qui c'an 'aych on̈; xac' wojcoc 'el tas yaj swaych win rey, xchi Daniel 'a Dios.

Chuj San Mateo Bible

²³ Ach co Diosal, sDiosal ach pax eb' co mam quicham, scac' yuj diosal d'ayach. Scalanpax vach' lolonel, yujto ix ac' in jelanil yed' in tec'anil. A ticnaic, ix ac' vojtaquejeli tas ix co c'an d'ayach. Ix ac' cojtaquejeli tas yaj svayich vin̈ rey, xchi vin̈ d'a Dios.

Dn 2:23 Referans Kwoze

Dn 2:18

'Ix yaln 'a eb' to tzc'an eb' scolwal Dios 'aj satcha'an̈, yuj jun paxti to caw c'ultac yaj cha, sec matz milx cham eb' yet' eb' tzcob' yal jelnal sb'a 'a yol yic Babilonia cha.

Ex 3:15

'Ix yaln pax Jehová 'ixtc 'a Moisés: —Al 'ixtc 'a eb' et chon̈b' cha: A Jehová qui Diosalec yet' eb' qui mam quichmec, atn Abraham, Isaac yet' Jacob, a in checn cot colwjoc 'ayex, xa chi 'a eb'. A 'in b'i tic, 'ayc' 'a jun 'ejmn̈ej; 'oj b'inaxc 'a smasnil tiempo yuj eb' eyin̈tl b'aq'uin̈.

Lc 10:21

A 'a yic jun rato cha, caw tzalj Jesús yuj Yespíritu Dios. 'Ix yaln 'ixtic: Mamin, yajl ach 'a satcha'an̈, yet' 'a yolyib'n̈q'uinl tic. Tzwal wach' paxti 'ayach, yujto xa c'ub'j 'el jun tzo'n̈ tic 'a eb' jelan, yet' 'a eb' caw 'ay snab'en 'a sat eb' yit 'anma'il. Ax eb' 'icha 'unin, a eb' 'ix ac' 'ojcanc 'eli. 'Ixta x'aj Mamin, yujto 'ixta tza nib'ej, xchi 'a Dios.

Mt 11:25

Ax 'a jun tiempoal cha, 'ix leslwi Jesús 'ix yaln 'ixtic: —Mamin, Yajl ach 'a satcha'an̈ yet' 'a yolyib'n̈q'uinl tic. Tzwal wach' paxti 'ayach, yujto xa c'ub'j 'el jun tzo'n̈ tic 'a eb' jelan, eb' caw 'ay snab'en 'a sat eb' yit 'anma'il, ax 'a eb' 'icha 'unin, a eb' xac' 'ojcanc 'eli.

Am 3:7

An̈jtona', toto 'ay tas tzb'o Jehová Dios, yowlal tzyalcn 'a eb' schecb' b'ab'el.

Dn 1:17

A ewin quelm tic schan̈wn̈il, a Dios 'ix 'a'n snab'en ewinac, xya'n sjelnal ewin scuyn smasnil jun tzo'n̈ ch'an̈ u'un̈. Ax Daniel 'ix 'ajx sjelnal snan 'el jun tzo'n̈ wayich, yet' jun tzo'n̈ 'ilwal.

Is 12:1

A 'a jun tiempoal cha, ata 'oj eyal 'ixtic: Mamin Jehová, tzcal yuj diosal 'aych on̈; wach'xam xcot wal yowl 'a c'ojl 'a quib'n̈ on̈, ax ticnec tox x'ec' jun cha, to wan a'n pax sniwnal qui c'ojl on̈.

Salmos 50:14

A 'e xajmb'al tzin nib'ej, atn alj wach' paxti 'ayin. 'A'c 'el'choc e ti tzeyac' 'ayn an Dios in tic, to caw niwn wel'chi.

Salmos 25:14

A eb' a wach'c'ojl a b'a yet'oc, atn eb' 'ay xiwc'ojlal 'ayach, tzac' pax 'el'choc a trato 'a eb'.

Apoc 5:5

Palta 'ay jun 'a eb' 'ichm winc chi 'ix aln 'ayn 'ixtic: Man̈ ach 'oc'oc. A jun tzcuch León 'a scal eb' yin̈tl Judá, atn jun yin̈tl can win rey David, a 'a'jnac ganar. A 'oj stac' sn̈i'chtan uque seyo tic, ax sjacn ch'an̈ un̈ cha, xchi 'ayin.

Apoc 1:1

A jun libro tic, a tzaln cot yuj jun tzo'n̈ tas 'ac'b'il 'a Jesucristo, yic tzya'n cojcoc 'el an̈ ya'maln̈ec servil. A jun tzo'n̈ tzyal tic, yowlal tox 'oj ujoc. An ton tic Juan in, ya'mal in servil Jesucristo. Schec cot jun yángel, yic xya'n wojcoc 'el jun tzo'n̈ tic.

Jn 11:41

'Ixta to b'i'an, 'ix yi'n 'el eb' q'uen smac chi 'aj 'aycn 'och winac. Ax Jesús, 'ix q'ue q'ueln 'a satcha'an̈, 'ix yaln 'ixtic: —Mamin, yuj wal dios 'ayach, 'ix ab' tas 'ix wala.

Ec 9:18

Yel xo niwn yel'ch jelnal, 'a yib'n̈ yamc'ab' yic owal, yujto yel xo niwn tas tzjuw 'el cujec toto man̈ wach'c tzcutjec qui nani yic tzqui b'on junc tas.

Ec 7:19

A junc mach jelan, tz'ajx ste'nal yuj sjelnal cha, 'ec'b'al yip 'a yib'n̈ lajn̈wan̈oc eb' soldado jeln 'a junc chon̈ab'.

Pr 24:5

Yel xo wach' yic junc jeln snab'en 'a yib'n̈ junc mach 'ay yip; yel xo pax wach' eyico' toto 'ay tas eyojtac, 'a yib'n̈ to 'ay cob' eyip.

Pr 21:22

A junc 'ay snab'en, tztac' yoch yac' owl yet' junc chon̈b' caw tan̈b'il si'mb'il, tzma'n lan̈chjoc can 'ejm smuroal jun chon̈b' chi 'aych yipc sc'ojl eb'.

Pr 8:14

Toto 'ay qui jelnalec, tztac' qui nanec junc tas 'a swach'il, tz'el'chn̈ej tas tzqui b'o'ec.

2 Cr 20:6

'Ix yaln 'ixtic: Ach Jehová, qui Diosal ach on̈ yet' eb' qui mam quichm on̈, ach tic Dios ach 'a satcha'an̈, Yajl ach 'a yib'n̈ smasnil nacion̈. Yol a c'ab' 'ayc' ep yet' a poder. May junc mach 'oj stac' ach stenn 'och wa'an.

1 Cr 29:13

Yuj cha, a ticnec, ach qui Diosal on̈, tzcal yuj diosal 'ayach, tzcaln pax qui wach' paxti 'a a b'i to wach' yochi.

1 Cr 29:10

Yuj cha, 'ix yaln rey David wach' paxti 'a Jehová 'a sat smasnil eb' chon̈b' cha, 'ix yaln 'ixtic: Mamin Jehová, qui Diosal ach yet' qui mam 'ichm Israel on̈, alx cab' wach' paxti 'aych 'a smasnil tiempo.

A Ch'an̈ B'ab'el Libro Yic Yab'ixal Eb' Rey 18:36

Ax yic xc'och yorail 'icha xon yajx tz'a no xajmb'al, 'ix snitzn 'ochch sb'a Elías 'a stz'ey jun xajmb'al cha, xyaln 'ixtic: Mamin Jehová, sDiosal ach Abraham, Isaac yet' Israel: A ticnec, 'ojcaxc cab' 'eli to ach tic, qui Diosal ach an̈ israel on̈ tic on̈, an xo tic, a checb' waji, ach 'ix 'ac' in b'o jun tzo'n̈ tic.

A Ch'an̈ B'ab'el Libro Yic Yab'ixal Eb' Rey 8:57

A ticnec, 'ayc'n̈ej cab' Jehová qui Diosalec quet'oc, 'icha ya'jnac yet' eb' qui mam quichmec. May cab' b'a'n̈ tzon̈ yactjec can qui ch'ocoj.

Gn 18:17

Yuj cha, snan Jehová 'ixtic: Smoj waln yab' Abraham tic tas jab'xoj in b'oni,

Jn 15:15

A ticnec, tzwal 'ayex, man̈xtoc ton̈j 'a'm ex servil 'ayin. Yujto a junc tz'a'w servil, man̈ yojcoc tas tzb'o spatron̈. Palta ax ticnec, caw in wach'c'ojl ex, yujto jantcn̈ej tas yaljnac can in Mam 'ayin, c'uxn xwalx 'ayex.

Ec 9:16

Yuj cha, wach'xam a sjelnal junc win meb'a cha, to may yel'ch 'a sat 'anma', may mach tznib'n 'ab'nc tas tzyala, palta an tic tzwala to yel xo 'ay yel'ch jelnal 'a yib'n̈ yip eb' tzte'wtzej sb'a.

Gn 31:42

Toc wal man̈toc 'aych sDiosal Abraham wet'oc, atn pax Dios 'aj tzleslwi in mam Isaac, wal yel, may jac tas 'ay 'a yol in c'ab' tzin meltzji. Palta a Dios x'iln in cusc'ojlal yet' tas x'aj yel'ch in munljel, yuj cha, ach stenn 'och wan 'a 'ac'wl q'uiq'ui, xchi Jacob cha.

Salmos 21:2

'Ix ac' 'el'choc tas tznib'ej, ma'ix a tenc' tas 'ix sc'ana.

Salmos 21:4

'Ix sc'an najtxb'oc sq'uinl 'ayach, 'ix a'n jun q'uinl 'ay 'a jun 'ejmn̈ej 'a 'a.

Jeremías 33:3

C'anb'j 'ayin, 'oj wal jun tzo'n̈ tas caw niwn yel'ch 'ayach, to satjub'tac yalxi, atn jun tzo'n̈ to mant ojcoc.