Apoc 16:10 - Chuj San Sebastian Bible

¹⁰ Xlajw cha, ax jun yol ángel, 'ix secn 'ejm sb'al svaso 'a yib'n̈ sdespacho jun noc' sb'i. Yuj cha, caw q'uic'q'uinl x'aj jantcn̈ej 'aj tzyac' yajlil. Ax eb' 'anma cha, caw xchi eb' yac' yuj yab'n syail.

Chuj San Mateo Bible

¹⁰ Ix lajvi chi', axo jun yoil ángel ix secanem tas ayem d'a yol yuc'ab' d'a yib'an̈ sdespacho jun Noc' sb'i chi', yuj chi' ix te q'uic'b'iq'uinal d'a masanil yol smacb'en. Axo eb' anima chi', ix ste cach'ej yac' eb' yab'an syail.

Apoc 16:10 Referans Kwoze

Apoc 9:2

Yajn̈j cha, 'ix sjacn jun xab' oln cha. Ata xq'uel wal jun tab', 'icha yel-l tab' 'a junc jorna caw niwquil. Yuj jun tab' cha, x'och q'uic'q'uinl 'a c'u. Caw xq'uic'b' 'el yu'uj.

Mt 8:12

Ax eb' quit israelal smoj xon sc'och ta', 'ay eb' 'oj julx can 'at 'a q'uic'q'uinal. Ata 'oj 'och 'oq'uel. 'Oj juch'ch'oc ye eb' yab'n syail, xchi 'a eb'.

Apoc 18:23

Man̈x 'a junc cantil 'oj yac' sacq'uinl ta', man̈x 'a b'a'n̈ 'oj 'ab'xoc yel 'aw yuj junc q'uin̈ nupnel. 'Ixta 'oj 'aj jun chon̈b' cha, yujto a eb' chon̈wjum 'ayc' ta', yel xo niwn yel'ch eb' 'a yib'n̈ smasnil eb' 'anma 'a yolyib'n̈q'uinal. An̈jtona', c'uxn xlaj 'ixtx paxti eb' 'anma 'a junjn nacion̈ yuj yajchumal, yet' ya'm 'esal jun chon̈b' cha, xchi jun ángel cha.

Apoc 17:17

Yujto a Dios 'oj 'a'nc sb'o eb' 'icha tznib'ej. Yuj cha, junn̈j 'oj yutc eb' sb'on jun cha. Ax ya'n pax eb' yopiso 'a jun noc' sb'i cha. 'Ixta 'oj yutc eb', sec tz'el'ch tas yaljnac can Dios.

Mt 22:13

Yuj cha, xyaln win rey chi 'a jun tzo'n̈ eb' smoso 'ayc' yet' ta': Jalc yoc jun winc tic yet' sc'ab', tzeyi'n ati', tze juln can 'at 'a 'aj 'ay q'uic'q'uinal. Ata 'oj 'oc'oc, ax sjuch'ch'i ye yab'n syal ta', xchi winac.

Apoc 18:21

Xlajw cha, 'ay jun ángel caw niwn spoder. 'Ix yi'n chan̈ jun niwquil q'ue'en, 'icha junc sam q'uen yic mulino. 'Ix sjuln 'ejm 'a yojl a mar, 'ix yaln 'ixtic: 'Ixc wal 'oj 'aj sjulx pax 'ejm jun niwquil chon̈b' Babilonia. Man̈x 'a b'a'n̈ 'oj 'ilxc jun 'ejm xo.

Lc 13:28

At wal ta 'oj eyoq'ui, caw 'oj juch'ch'oc eye eyab'n syail. Yujto 'oj eyila', ata 'ayc' Abraham, Isaac, Jacob, yet' smasnil eb' schecb' Dios, 'ayc' xo eb' 'a yol sc'ab'. Ax xo tic, 'oj e can 'a sti'.

Mt 24:51

ax ya'n 'och win patron̈ chi jun niwn yailal 'a yib'n̈ eb', ax ya'n can 'at win eb' yet' eb' yit chab'satil cha. Ata 'oj 'oc' eb', caw 'oj juch'ch'oc ye eb' yab'n syail.

Salmos 78:49

'Ix ya' cot Dios yowl sc'ojol yet' sc'a'lc'ojlal 'a yib'n̈ eb' 'aj Egipto cha, yuj cha, 'ix schecn cot yailal, somc'ojlal yet' chamel.

Apoc 17:9

Ax jun tzo'n̈ xo tic, a eb' 'ay sjelnal, 'oj nachjc 'el yuj eb'. A uque sjolm jun noc' sb'i cha, tzyal 'el'chi, a uque witz 'aj wocn 'ejm 'ix 'ajmul 'ix cha.

Mt 13:50

Ax sjulx can 'at eb' 'a yol jun 'icha jorna 'aj 'aych c'ac'. Caw 'oj 'oc' eb' ta', 'oj juch'ch'oc ye eb' yoq'ui, xchi Jesucristo.

Mt 13:42

Ax sjulx can 'at eb' 'a yol jun 'icha jorna 'aj 'aych c'ac'. Caw 'oj 'oc' eb' ta', 'oj juch'ch'oc ye eb' yoq'ui.

Apoc 18:2

Caw 'ip yaln 'ixtic: —¡Caw 'ix lan̈chj 'ejm chon̈b' Babilonia! Wach'xam niwn yel'chi, palta caw xlan̈chji. 'Ix 'och scajnub'oc junjn c'aj demonio. 'Ix 'och pax soc jun tzo'n̈ no ch'ic caw yajb'entac.

Apoc 11:10

C'uxn 'oj laj tzaljc eb' 'anma 'a yolyib'n̈q'uinal, yujto 'ix cham eb'. 'Oj laj ya'lac eb' siylab' 'a scal. Caw 'oj tzaljc eb', yujto caw tzyab' eb' syal yuj chawn̈ eb' schecb' Dios cha.

Apoc 11:8

Ax sniwnal eb' schawn̈il, ton̈j 'oj can t'ocn 'a yol scayeal jun niwquil chon̈ab', atn 'ajtil 'ac'b'il q'ue Cajlilc 'a spenc te culus. A jun chon̈b' cha, tzcuch Sodoma, tzcuchn pax Egipto, a sch'oxni tas yaji.

Apoc 11:2

Ax yamq'uil sti', man̈ echtoc. Yujto a jun cha, 'ac'b'ilx 'a eb' man̈ israeloc. A eb' cha, 42 'ujl 'oj stec' 'ejm eb' jun chon̈b' yic Dios cha.

A Sb'ab'el Carta San Pedro 2:17

'Ay cab' yel'ch junjn mach 'a qui satec. Tzqui chamc'ojlanc pax eb' quit creyenteal. Xiw coyc 'a Dios. Niwn cab' yel'ch pax win rey 'a qui satec.

Apoc 8:12

'Ix yutz'n jun schan̈l ángel strompeta. Yajn̈j wal cha, jab'xoj man̈ spacloc x'aj sjuw c'u, yet' 'uj, yet' pax c'anal. Jab'xoj man̈ spacloc x'aj sq'uic'b' eb'. Yuj cha, junjn c'u man̈x 'a wal sacq'uinal, ax 'a junjn 'ac'wal, man̈x 'a wal yoc 'uj yet' c'anal.