Am 5:15 - Chuj San Sebastian Bible

¹⁵ Yajc 'el tas maysch'olnil, ax tas wach' a tze chamc'ojlej. Tzcham wal e maclni eyila', toto wach' xo tz'aj sb'oyaj junc mach 'a despacho. To 'ixta', toq'ue a Jehová Dios tztac' yuj smasnil, 'oj 'o'ch sc'ojl 'ayx ax yin̈tl ex to can José.

Chuj San Mateo Bible

¹⁵ Yajequel chucal. A vach'il tze xajanej. Scham eyilani tato vach'xo tz'aj sch'olb'itaj yaj anima d'a juzgado. Tecan icha chi' ol oc' sc'ol Jehová Yajal d'a Smasanil d'ayex mach ex yin̈tilal ex can vin̈aj José.

Am 5:15 Referans Kwoze

Ro 12:9

Caw yelc'ojlal tzlaj qui chamc'ojloquec qui b'a. Tzann̈j tas maysch'olnil, qui yajc can 'eli. Ax tastc wach', ca'c 'och qui nab'en 'a 'a.

3 Jn 1:11

Ach chamc'ojlb'il wu'uj, man̈ a b'eylb'oc sb'eyb'al eb' maysch'olnil. Cojn sb'eyb'al eb' wach' tza b'eylb'ej. Toto wach' tzcutj qui b'eyb'al, yic on̈ xo Dios. Palta a eb' maysch'olnil sb'eyb'al, toxn man̈ yojcoc eb' Dios.

Jl 2:14

Meltzjan̈c 'a 'a, toq'ue matz ya'ch yailal 'a quib'n̈ec, ax tz'aji, tzya'n cot yaxilal 'a quib'n̈ec, atn qui trigo, yet' yal qui uva. Yuj cha, 'ay tas tztac' ca'nec ofrendail 'a 'a.

Salmos 97:10

An̈ec tzqui chamc'ojlej Jehová, qui yajc can 'el maysch'olnil. A eb' yiclum tzyutj sb'a 'a 'a, 'oj tan̈wxoc eb' yu'uj, a 'oj colnc 'el eb' 'a yol sc'ab' eb' tu snab'en cha.

Ro 8:7

Palta ax eb' tzb'eylb'an 'icha tznib'j stu nab'enal, ton̈j tz'och eb' 'ajc'ojlal 'a Dios. Matz nib'j eb' tzyiclj sley Dios cha. Caw matz tac' yuj eb'.

Miqueas 5:3

Ax ticnec, 'oj yactc can Jehová schon̈ab', masnto 'oj 'aljoc yune jun 'ix 'ix wan stan̈wni yalj cha. Atta 'oj meltzjoc cot eb' israel 'ijxnac 'at 'icha presoal 'a chuc chon̈b'al, sec junxn̈ej 'oj 'aj eb' yet' eb' yit chon̈ab'.

Ex 32:30

Ax 'a junx c'u cha, 'ix yaln pax Moisés 'a eb' 'anma chi 'ixtic: —Ax tic, caw wal niwn e mul 'ix 'och 'a sat Jehová, tic tzin 'atx 'a sjolm lum witz chi jun 'ejm xo, 'a 'aj 'ayc' cha. Lemb'il 'oj wac' ganar ya'n niwnc'ojlal 'ayx yuj e mul tic, xchi Moisés cha.

Jonás 3:9

Toq'ue tzat tztac' sjeln Dios snab'en 'a q'uib'n̈ec, yic tz'och wan yowl sc'ojol, toto 'ixta', matz on̈ chamec, xchi win rey 'a jun ley cha.

Am 5:24

Palta a tas tzin nib'j 'ayex, to lajn cab' e tojlal yet' e wach'l 'icha junc a niwn a may tz'aj stupi.

Salmos 36:4

A yic teln 'ec' eb' 'a sat sch'at, cojn maysch'olnil tzna eb'; mitz'tz'i yec' snab'en eb' sb'on tas tu'. Matz yal sc'ojl eb' tzyij 'el sb'a 'a maysch'olnil.

A Ch'an̈ B'ab'el Libro Yic Yab'ixal Eb' Rey 20:31

Yuj cha, ax eb' 'aych yajlil yet'oc, 'ix yaln eb' 'a 'ixtic: —'Ix cab'i to a eb' sreyl Israel, to wach' snab'en eb'. Comnoc tzchaj a c'ojol, tzca'ch qui pichl n̈achtac sat tzqui sut'n 'och lasu 'a qui jaj on̈, tzlajw cha, tz'at qui ch'oxnc qui b'a 'a yojltac win sreyl Israel chi 'on̈. Lemb'il tzyac' win niwnc'ojlal 'ayn̈ec, xchi eb' 'a Ben-adad.

Ro 7:22

A 'in pixan, caw tzalj yet' sley Dios.

Miqueas 2:12

'Icha tzyutj junc 'ilm calnelu smolb'tzan no calnelu 'a yol scolal, 'ixta 'oj ex wutc ex in molb'tzan cot e masnil ex yin̈tl Jacob, atn ex israel to 'oj to e cani. 'Icha junc lum 'a'lic b'ut'jnac 'el yuj no calnelu, 'ixta wal 'oj 'aj sb'ut'j pax 'el e lum eyu'uj.

Am 6:12

¿Tom tztac' sb'ey q'ue no chej 'a sat tenam? ¿Tom tztac' yoch munljel 'a yib'n̈ a mar yet' q'uen arado? Palta ax xo tic, xe jelmtej 'och tojlal 'a 'ixtj 'anma'il, caw tu tzyab' eb' 'anma yuj tas tzeyutj e b'on yaj eb'.

Am 5:10

'Oltacx wal ax tic ex yajal, tzex chichn 'och 'a eb' tojl tzyutj sb'eyc'ojlwi. Caw tu tzeyutj e nab'en 'a eb' tzyac' testigoal sb'a 'a tas yel.

Am 5:6

Ex wit israelal, meltzjan̈c 'a Jehová, sec ma'oj e chami. Toto ma'ay, 'oj ya' cot c'ac' 'a yib'n̈ smasnil qui macb'enec. May junc dios 'a Bet-el 'oj stac' ya'n tupoc.

Jeremías 31:7

Tzyaln pax Jehová 'ixtic: B'itnan̈c 'a tzaljc'ojlal yuj jun chon̈b'al eb' yin̈tl Jacob, atn jun chon̈b' 'ec'b'al yel'ch 'a yib'n̈ smasnil nacion̈. 'Ab'x cab' e b'itni, tzeyaln 'ixtic: Mamin Jehová, coln̈ an̈ a chon̈b' on̈ tic, atn jantc on̈ 'ayn̈to cani, xe chi.

Salmos 119:104

A 'a spatq'uil jun tzo'n̈ a checnb'il tic, ata xwij 'elt in nab'en; yuj cha, caw matz in nib'j jun tzo'n̈ b'eyb'al yic 'a'j 'es.

Salmos 37:27

Qui'c 'el qui b'a 'a scal maysch'olnil. A tas wach' a tzqui b'o'ec, sec 'oj najtxb'oc qui q'uinlec.

Salmos 34:14

'Ijec 'el e b'a 'a scal tu'al, ax tas wach' a tze b'o'o; a cab' junc'ojlal tze sayq'ui, tze b'eylb'ani.

A Ch'an̈ Schab'il Libro Yic Yab'ixal Eb' Rey 19:4

Comnoc wal 'ix yab' Jehová qui Diosalec jun tzo'n̈ paxti 'ix yal win syajlil eb' soldado yic win sreyl chon̈b' Asiria checb'il cot yuj win rey yic tzb'uchwj 'a qui Diosal pitzan. Comnoc tzya'ch Jehová yailal 'a yib'an̈. Yuj cha, leslwan̈ cuj on̈, yuj jaywn̈ on̈ to tzon̈ cani, xchi Ezequías, xchi eb'.

A Ch'an̈ Schab'il Libro Yic Yab'ixal Eb' Rey 15:29

A 'a yol stiempoal Peka win sreyl Israel, ata 'ix jaw win Tiglat-pileser sreyl Asiria yet' eb' soldado, xyac' eb' owl yet' eb' Israel. 'Ix yac' ganar eb' 'aj Asiria jun tzo'n̈ chon̈b' tic: Atn Ijón, Abel-bet-maacá, Janoa, Cedes, Hazor, Galaad, Galilea, yet' smasnil smacb'en Neftalí; 'ix 'ijx 'at eb' 'anma 'aj jun tzo'n̈ chon̈b' tic 'a chon̈b' Asiria.

A Ch'an̈ Schab'il Libro Yic Yab'ixal Eb' Rey 13:7

A Joacaz cha, man̈x niwnoc sb'isl eb' soldado win 'ix cani. Cojxn̈ej 50 soldado tz'och 'a yib'n̈ chej, lajn̈e caruaje yic owal, lajn̈e pax mil soldado tzb'ey 'a yoc, yujto a sreyl chon̈b' Siria, a 'ix satn 'el eb'.

A Ch'an̈ Schab'l Libro Samuel 16:12

Lemb'il 'oj in yil cot Jehová yet' in cusc'ojlal tic, ax 'oj 'ajoc, to 'oj yac' swach'c'ojlal 'a wib'n̈ yuj tas tzalx 'ayn tic, xchi.

Salmos 80:1

Ach quilmal an̈ israel on̈ tic, ach 'aych 'och yilmalc eb' yin̈tl José, eb' 'icha a calnelu yaji, 'aych 'ec' 'a a despacho 'a snan̈l eb' querubín, 'ab' wal tas tzwala.

Dn 2:49

'Ix sc'ann Daniel yopiso jun tzo'n̈ eb' yitb'eym chi 'a win rey. Yuj cha, xya'n 'och win rey chi yopiso win Sadrac, win Mesac yet' win Abed-nego 'a yol smacb'en Babilonia cha. Ax Daniel ata 'aych yopiso 'a sdespacho win rey cha.

Am 7:3

Yuj cha, snan Jehová yuj jun tic, 'ix yaln 'ixtic: —A jun tic, ma'oj ujoc, xchi.

Jonás 1:6

Ax win capitan̈ yic te barco cha, 'ix 'ejm win 'a 'aj 'ayc' Jonás, xyaln win 'ixtc 'a 'a: —¿Tas tza b'o 'a tic ach waynoc'? ¡Q'uen̈ wa'an, leslwan̈ 'a a Diosal! Toq'ue tzat 'o'ch sc'ojl 'ayn̈ec, ax qui colchjec, xchi winac.

Sofonías 2:3

'A'c 'och e b'a 'a yol sc'ab' Jehová e masnil, ax 'emmquilal tzeyutj e b'a eyiclni tojlal 'a yolyib'n̈q'uinl tic. B'oc stojlal, yet' pax 'emmquilal, sec toq'ue 'oj e colchj 'a yic 'oj jawc jun c'u yic 'oj ya'nc Jehová yowl sc'ojol.

Malaquías 3:18

Atta 'oj nachjoc 'el eyuj ax tic, chajtlto chuc spac yic eb' wach' sb'eyb'al tzin 'a'n servil, chuc pax spac yic eb' maysch'olnil sb'eyb'al matz in 'a'n servil, xchi Dios.

Jeremías 18:8

palta toto a junc nacion̈ cha, tzyij 'el sb'a 'a scal maysch'olnil, to 'ixta', man̈xtzac wa' cot jun yailal chi nab'ilx wuj 'a yib'an̈.

Jeremías 22:3

A tojlal, yet' wach'il, a tze b'eylb'ej. Man̈ eyixtc eb' eyit 'anma'il, man̈ eyixtc eb' chuc chon̈b'al, yet' eb' meb'a 'unn chamnc smam, yet' eb' 'ix 'ix chamnc yichmil. An̈jtona', man̈ e mil cham eb' 'anma may smul.

Ez 45:9

An Jehová in, an tzwala: Ex yajl chon̈b' Israel, colb'l xo wal eyixtn eb' 'anma cha. B'ocyaj eb' 'anma 'a swach'il, tojl cab'n̈ej tzeyutj e b'eyc'ojlan eb'. 'Actjec eyi'n 'ec' slum eb' in chon̈ab'.

Miqueas 3:2

Palta tu tzeyutej, to tzeyajcn 'el tas wach', ax tas tu a tze chamc'ojlej. 'Icha to tze jitl eb' quit chon̈ab', man̈x 'a tas tzeyactj can 'a eb'.