2 Cr 5:13 - Chuj San Sebastian Bible

¹³ Xlajw cha, junn̈j xyutj eb' yutz'n strompeta cha, junn̈j xyutj eb' sjaj sb'itni, junn̈j xyutj pax eb' yaln wach' paxti', yuj yaln eb' yuj diosal 'a Jehová. 'Ix 'utz'x trompeta, 'ix yucx platillo, yet' jun tzo'n̈ xo yamc'ab', yic tz'och b'it 'a Dios. Ya' sb'a wan sb'itn eb', 'ix yaln eb' 'ixtic: Calc wach' paxti 'a Jehová, yujto yel xo wach' snab'en, yujto 'ay schamc'ojlal 'a jun 'ejmn̈ej, xchi eb' 'a sb'it. A 'a yic jun rato cha, 'ix macchj 'el yol yatut Jehová chi yuj jun 'asun.

Chuj San Mateo Bible

¹³ Junn̈ej ix aj spu'an q'uen trompeta chi' eb' vin̈ smasanil. Junn̈ej ix aj sjaj eb' vin̈ sb'itani, yic syalan vach' lolonel eb' vin̈ yuj yac'an yuj diosal eb' vin̈ d'a Jehová. Yacb'an van sb'itan eb' vin̈ chi', ix puchaj q'uen trompeta, ix tzin̈ji platillo yed' juntzan̈xo yamc'ab' yic b'it chi'. Sb'itan eb' vin̈ icha tic: Calec vach' lolonel d'a Jehová, yujto te vach'n̈ej, tzon̈ xajanej d'a masanil tiempo, xchi eb'. A d'a jun rato chi' ix b'ud'jiel yol templo chi' yuj jun asun.

2 Cr 5:13 Referans Kwoze

Esdras 3:11

'Ay mach tzb'itni yuj yaln wach' paxti', 'ay pax mach tzaln 'ixtic: Calc yuj diosal 'a Jehová, yujto caw wach' snab'en, yujto a schamc'ojlal 'ayn̈ec an̈ israel on̈c tic, may b'a'n̈ 'ay slajub', xchi eb'. Ax smasnil eb' chon̈ab', caw wal tzalj eb' yaln wach' paxti 'a Jehová, yujto 'ix 'el yich jun munljel cha.

Jeremías 33:11

Palta ax 'oj 'ajoc, a 'a tic 'oj 'ab'xoc pax yoch b'it yic q'uin̈ yet' yic tzaljc'ojlal jun 'ejm xo, yet' b'it yic eb' quelem yet' eb' 'ix cob'es yic tznupn eb'. 'Oj 'ijxoc cot ofrenda yic alj yuj diosal 'a watut, ax laj yalnc eb' 'ixtic: Alc yuj diosal 'a Jehová tztac' yuj smasnil, yujto caw wach' snab'en, 'ay schamc'ojlal 'a smasnil tiempo, 'oj schic eb'. An Jehová in, an tzwala: Caw 'oj wi'xq'ue'ch jun chon̈b' tic 'icha xon yaj 'a yic yaln̈taxi.

2 Cr 7:3

A wal yic 'ix yiln smasnil eb' israel yeml jun c'ac' yet' stzictznil Jehová 'a yib'n̈ jun n̈a cha, 'ix 'em cumn eb', squiln 'ejm eb' snan̈l sat 'a sat lum yaln sb'a, yuj yaln eb' yuj diosal 'a Jehová, tzyaln eb' 'ixtic: Caw wach' snab'en, a schamc'ojlal may b'a'n̈ 'ay slajub', xchi eb'.

Is 52:8

'Ab'ec, a eb' stan̈mal chon̈ab', caw wal checl yel yaw eb'. Junlajn yel yaw eb' smasnil yuj tzaljc'ojlal, yujto caw wal tzyil eb' tas tz'aj smeltzj paxt Jehová 'a lum tzaln Sión.

Salmos 100:5

Yujto a Jehová caw wach' snab'en; a schamc'ojlal may xon slajub'. Tzyac' 'el'chocn̈ej sti ya'jnac can 'ayn̈ec.

2 Cr 20:21

A yic 'ix lajw spaxtin yet' eb' chon̈b' cha, 'ix si'n 'el jun tzo'n̈ eb' to tzb'itni. 'Ix ya'n 'och eb' spichl yic yopiso cha, 'ix b'ab'lj eb' yuj eb' soldado cha. Tzyaln eb' wach' paxti yet' sb'it 'ixtic: Ca'c yuj diosal 'a Jehová, yujto a schamc'ojlal, 'ayc' 'a jun 'ejmn̈ej, xchi eb'.

Ro 15:6

Sec wach' junxn̈ej 'oj 'aj e nab'en, junxn̈ej 'oj eyutc eyaln wach' paxti 'a Dios, atn 'a Smam Cajlil Jesucristo.

A Tas Sc'ulejnac Eb' Schecab' Jesús Hechos 4:32

Ax eb' creyente smasnil, jun lajnn̈ej xyutj eb' snab'en. Junc'ojlaln̈ej x'aj eb'. May junc mach 'ix aln yico'oc junc tas sch'ocoj. Yujto jantcn̈ej tas 'ay 'a eb', junn̈j yaj yuj eb' smasnil.

Jeremías 32:39

Junxn̈ej 'oj 'aj snab'en eb' wu'uj, jun lajnxoj 'oj yutc eb' in ya'n servil 'a smasnil tiempo, yic tz'och swach'loc eb', yet' swach'loc yin̈tl eb'.

Apoc 15:8

Ax jun Lugar cha, caw q'uic' x'aj 'ejm tab' 'a yojl yuj stzictznil Dios yet' spoder. May junc mach 'ix stac' scomn 'och ta', masnto xlajw uque yailal xyij 'at eb' ángel chi yucwn̈il.

Salmos 106:1

¡Alx cab' wach' paxti 'a Jehová! Calc yuj diosal 'a 'a, yujto wach' snab'en, may b'a'n̈ tzlajw schamc'ojlal.

Salmos 107:1

Calc wach' paxti 'a Jehová, yujto caw wach' snab'en, a schamc'ojlal may b'a'n̈ 'ay slajub'.

Salmos 118:1

Calc yuj diosal 'a Jehová yujto wach' snab'en, a schamc'ojlal 'ayn̈ec may slajub'.

Ex 29:43

Atn wal ta 'oj in cha in b'a yet' eb' israel, ax jun lugar cha. 'Oj in sacb'tzoc yet' in poder, ax yochcn wico'oc.

1 Cr 16:4

'Ix ya'n can 'och David yopiso eb' levita, atn eb' tz'a'w servil 'a yojltac te caxa cha, sec wach' to a eb' tz'a'n yuj diosal yet' yaln eb' wach' paxti 'a Jehová sDiosal chon̈b' Israel.

2 Cr 7:1

A yic 'ix lajw sleslwi Salomón, 'ix cot c'ac' 'a satcha'an̈, 'ix tz'a xajmb'al to tz'a smasnil yet' jun tzo'n̈ xo xajmb'al. Caw 'ix macchj 'el yol yatut Jehová chi yuj stzictznial,

2 Cr 7:2

yuj cha, a eb' ya'mal 'och sti eb' 'anma 'a Dios, man̈x 'ic stac' yoch eb' 'a yojol.

2 Cr 7:6

Lin̈n 'ec' smasnil eb' chon̈ab' yic x'och jun 'emmquilal cha. A eb' ya'mal 'och sti eb', 'ayc' eb' 'a yet'l 'aj 'ayq'ui, tzyutz'n eb' q'uen trompeta. Ax 'a yojltac eb', ata 'ayc' eb' levita wan syucn jun tzo'n̈ yamc'ab' b'ob'il can yuj rey David yic tz'och 'emmquilal 'a Jehová. Ya' sb'a cha, wan yaln eb' wach' paxti 'a Jehová 'ixtic: A schamc'ojlal may b'a'n̈ 'ay slajub', xchi eb'.

2 Cr 20:22

Ax yic schan 'el eb' yich sb'itnan b'it, yic alj wach' paxti', 'ix ya'n 'elt Jehová jun tzo'n̈ winc 'a sat eb' amonita, eb' moabita yet' eb' xcot 'a lum jolm witz 'a Seir, eb' to tzcob' yac' owl yet' Judá yalni. 'Ix syamn 'och eb' smiln cham sb'a.

Nehemías 12:27

A yic 'ix c'och sc'ul yajx can 'och smuroal Jerusalén 'a yol sc'ab' Dios, 'ix 'awtx cot eb' levita 'a smasnil lugar 'a 'ajtil cajn eb'. 'Ix jaw eb' 'a Jerusalén yuj jun q'uin̈ cha, yet' yuj yalx wach' paxti', tzb'itnax b'it 'a tzaljc'ojlal yet' platillo, arpa yet' lira.

Salmos 22:4

A eb' qui mam quichm on̈, ya'jnacch 'och eb' yipc sc'ojol, yuj cha, a coln can 'el eb'.

Salmos 81:2

B'itn coyc yet' qui pandero, yet' qui arpa mto qui salterio.

Salmos 150:3

B'itn coyc yet' trompeta, b'itn coyc yet' arpa, mto yet' salterio.

Salmos 150:5

B'itn coyc yet' q'uen platillo tzsil-li sjaj. B'itn coyc yet' q'uen platillo c'uyyi s'at sjaj 'a najat.