2 Cr 34:3 - Chuj San Sebastian Bible

³ A 'a yic swajxquil ab'il yoch reyal, yic quelm 'unn wali, 'ix schan 'el yich yaln sb'a 'a sDiosal David, atn smam yicham. Ax 'a slajchwil ab'il yoch reyal, syamn 'och satn 'el jun tzo'n̈ tas man̈ wach'c 'a Judá yet' 'a yol chon̈b' Jerusalén. 'Ix ya'n satxoc 'el jun tzo'n̈ macsej 'a jolmctac witz, jun tzo'n̈ sch'oxnb'il comn dios tzcuch Aserá, jun tzo'n̈ yechl to tzeyb'il b'o'oc, yet' pax jun tzo'n̈ yechl to tenb'il b'o'oc.

Chuj San Mateo Bible

³ Ayic 16 ab'ilxo sq'uinal vin̈aj Josías chi', ayic quelem unin val vin̈, ix yac'an val och vin̈ d'a sc'ool sc'anab'ajan Jehová sDiosal vin̈aj David smam yicham vin̈. Axo yic 20 ab'il vin̈, ix syamanoch vin̈ yic'anel tas man̈ vach'oc d'a Judá yed' d'a Jerusalén chi'. Ix schecan vin̈ satjiel masanil juntzan̈ b'aj tz'och ejmelal b'ajtac chaan̈, yechel comon dios Asera yed' juntzan̈xo yechel comon dios tzeyb'il yed' masanil yechel b'ob'il d'a q'uen q'ueen.

2 Cr 34:3 Referans Kwoze

2 Cr 33:22

Caw maysch'olnil x'el sb'on 'a sat Jehová, 'icha sb'ojnac Manasés atn smam. Yujto xyac' xajmb'al, 'ix ya'n 'emmquilal 'a smasnil jun tzo'n̈ yechl sb'ojnac smam cha.

2 Cr 15:2

'Ix 'elt wul scha win Asa, 'ix yaln 'a 'ixtic: 'Ab' tas 'oj wal 'aych mamin Asa, yet' e masnil ex wit chon̈b' 'aj Judá, yet' ex yin̈tl Benjamín. A Jehová 'aych ton wal quet'ec, toto a wal yet' 'ayn̈ec 'ochi. Toto tzcalc qui b'a 'a 'a, 'oj yab' tas tzcalec. Palta toto 'oj cactquec cani, 'oj on̈ yactc can paxi.

Pr 8:17

A eb' tznib'j cuync jelnal, tz'ilchj yuj eb', ax eb' tznib'n jelnal cha, tz'ijx chan̈ eb' yu'uj.

2 Cr 33:17

Palta b'i'an, a eb' chon̈b' cha, an̈ja ya'n eb' xajmb'al 'a jun tzo'n̈ macsej 'a jolmctac witz, wach'xam a 'a Jehová sDiosal eb' tzyac' yalni.

2 Ti 3:15

Yictax a cot'ch 'a yune'al, cuywnacch 'a Ch'an̈ Un̈ yic Dios. A Ch'an̈ tz'a'n jelnb'oc qui nab'en, sec tzon̈ colchji, yic tzca'n 'och qui c'ojl 'a Cristo Jesús.

Mt 6:33

Yuj cha, 'a'c eyip e wach' 'a'n 'och e b'a 'a yol sc'ab' Dios. Tojln̈ej tzeyutj e b'eyb'al 'icha tznib'ej. Toto 'ixta', 'oj yac' jun tzo'n̈ chi 'ayx smasnil.

Ec 12:1

Ya' sb'a 'unn ext 'anma', nann̈ej cab' eyu'uj mach b'ojnac ex, ya' sb'a mantzac e yab' syal yuj 'ichm 'anma'il, nac cot Dios. Yujto 'ay jun tiempoal 'oj eyal 'ixtic: Man̈x 'a qui tzaljc'ojlal, nab'a xoj cob' pitzn on̈, 'oj e chioc.

Salmos 119:9

¿Tas wal smoj sb'on win quelem, sec tojl tzyutj win sb'eyb'al? Cojn to tzyiclj a paxti'.

2 Cr 30:14

Xlajw cha, syamn 'och eb' yi'n 'el smasnil jun tzo'n̈ macsej 'ay 'a Jerusalén, yet' jun tzo'n̈ yet'l 'aj tz'a incienso, 'ix sjuln can 'at eb' 'a sch'olnil sti a Cedrón.

1 Cr 29:1

Xlajw cha, 'ix yaln rey David 'ixtc 'a smasnil eb' 'anma yamn cha: Cojn jun wunnal Salomón tic 'ix si'x can 'el yuj Dios, caw quelm 'unn to, ax jun munljel tic, caw niwquil, yujto a jun n̈a cha, man̈ jantcoc swach'l yilx 'oj 'ajoc, man̈ sdespachooc junc winac, palta to yatut Jehová Dios.

1 Cr 28:9

Ach xo tic ach wunnal Salomón, 'ojquej 'el wal qui Diosal, 'ac' servil 'a smasnil a pixan, mun cab' wal tz'el 'a a c'ojol, yujto a Jehová yojc smasnil tas 'ay 'a qui pixan, tznachj 'el pax yu'uj tas 'ay 'a qui nab'en. Toto 'oj al a b'a 'a 'a, 'oj ta'wc 'ayach, palta toto 'oj e'cn 'el a b'a 'a 'a, 'oj ach spatquilc can 'el 'a jun 'ejmn̈ej.

1 Cr 22:5

Yujto 'ix sna 'ixtic: A ni wunnal Salomón tic caw 'unn to na, ax pax jun yatut Jehová 'oj b'o cha, caw niwquil 'oj 'ajoc. Yel xo 'oj b'inax yuj swach'l yilx 'a smasnil yolyib'n̈q'uinal; ax ticnec yowlal 'oj in yamb'tzoc can smasnil syamc'ab'il 'oj 'och 'a 'a, xchi. A yic pitzn to David cha, caw niwn tas 'ix syamb'tzej cani.

A Ch'an̈ Schab'il Libro Yic Yab'ixal Eb' Rey 23:14

An̈jtona', 'ix ya'n win ma'xoc poj jun tzo'n̈ q'uen q'uen to niwn yel'chi, yet' jun sch'oxnb'il Asera cha. Xlajw cha, 'ix ya'n win julxoc can 'at sb'acl eb' chamnc 'anma 'a 'aj 'ayc' eb' cha.

A Ch'an̈ Schab'il Libro Yic Yab'ixal Eb' Rey 23:4

Xlajw cha, 'ix yaln win rey 'a win Hilcías sat ya'mal 'och sti eb' 'anma cha, yet' 'a jun tzo'n̈ xo eb', yet' pax 'a eb' tztan̈wni puerta, to tzyij 'elt eb' smasnil tastc 'ay 'a yol yatut Jehová, atn jun tzo'n̈ yamc'ab' sc'an eb' 'anma', yic tz'och eb' 'emmquilal 'a Baal, 'a Asera, yet' 'a jun tzo'n̈ c'anal. Xyij 'elt eb' jun tzon̈ cha sn̈usntz'a eb' 'a sti 'el chon̈b' Jerusalén 'a sti a Cedrón. Xlajw cha, 'ix 'ijx 'at stan̈il 'a Bet-el.

A Ch'an̈ Schab'il Libro Yic Yab'ixal Eb' Rey 18:4

Atn tic 'ix sb'o'o: 'Ix yij 'el smasnil jun tzo'n̈ macsej 'ay 'a jolmctac witz, choc' 'ix yutj sma'n poj jun tzo'n̈ q'uen q'uen to niwn yel'ch yuj eb' 'anma', stzu'n 'at jun sch'oxnb'il comn dios tzcuch Asera. 'Ix sma'n pax poj jun yechl chan to nab'a bronce b'ob'il yuj Moisés, atn 'a jun chi 'aj 'ix yac' eb' israel tz'a incienso, Nehustán xyac' sb'ioc.

A Ch'an̈ B'ab'el Libro Yic Yab'ixal Eb' Rey 13:2

A Jehová 'ix aln 'a 'a, yuj cha, caw ow xyutj yaln 'a jun yet'l xajmb'al chi 'ixtic: Ach yet'l xajmb'al, a Jehová 'ix aln 'ixtic: A 'a scal eb' yin̈tl David, ata 'oj 'aljoc jun winc 'unin, 'oj 'ajxoc sb'ic Josías. A 'a eb'an̈, ata 'oj yac' milxoc cham win jun tzo'n̈ eb' ya'mal 'och cob' sti eb' 'anma 'a scomn diosal, atn eb' tz'a'n jun tzo'n̈ incienso 'a eb'an̈, ax ya'n pax tz'a win sb'acl 'anma 'a eb'an̈, xchi Dios, xchi jun checb' cha.

Lv 26:30

'Oj laj in mac' poj jun tzo'n̈ yet'l e diosal 'aj tzeyal e b'a, ax in ma'n poj yet'l 'aj tz'a incienso. 'Oj in molb'tzoc 'och b'uln e niwnal chamnc chi 'a yib'n̈ jun tzo'n̈ e diosal may spixn cha. 'Ixta wal 'oj wutc in ch'oxn 'eli, to man̈xtzac ex in nib'j wila'.

Ex 34:13

A jun tze b'o'o, to 'oj e ma'cn poj yet'l xajmb'al eb', yet' jun tzo'n̈ q'uen 'aj tzlaj leslwi eb', yet' pax jun te sch'oxnb'il comn dios tzcuch Asherá.

2 Cr 34:33

'Ix ya'n Josías 'ijxc 'el smasnil yechl to yajb'entac 'a smasnil yol smacb'en eb' israel. Xyaln 'a smasnil mach 'ayc' 'a yol yic Israel to tzyac' servil eb' Jehová sDiosal. A 'a yic pitzn Josías, ma'ix yij 'el sb'a xon eb' 'a Jehová, atn sDiosal eb' yet' smam yicham.

Miqueas 1:5

'Oj ujc smasnil jun tzo'n̈ tic, yuj wal spitl eb' yin̈tl Jacob, yuj pax tas maysch'olnil 'ay 'a yol smacb'en Israel. Yujto 'a stenmtacl eb' yin̈tl Jacob cha, ata tzcheclj 'a chon̈b' Samaria. Ax 'a Jerusalén ata tzcheclj smul eb' 'aj Judá yic tz'och eb' 'emmquilal 'a jun tzo'n̈ comn dios.

A Ch'an̈ Schab'il Libro Yic Yab'ixal Eb' Rey 10:27

'Ix sma'n poj eb' yet'l xajmb'al yet' yatutal cha. Yet'l chuljub' xoj x'ajcni, masnto ticnec.

A Ch'an̈ Schab'il Libro Yic Yab'ixal Eb' Rey 20:5

Meltzjan̈, 'at al 'a Ezequías syajlil in chon̈ab', to an Jehová in, e Diosal in yet' e mam 'ichm David, an tzwal 'ixtic: Tox 'ix wab' a lesal, 'ix wil yelt yal a sat oq'ui, yuj cha, 'oj wac' b'oxc a c'ojol, ax chab'ej tzach 'at 'a watut an Jehová 'in tic.

2 Cr 14:6

'Ix ya'n b'o jun tzo'n̈ chon̈b' to 'aych smuroal 'a yol yic Judá, yujto 'ay junc'ojlal 'a jun tiempoal cha. Man̈x 'a 'aj 'ix 'at eb' 'a junc owal, yujto a Jehová 'ix 'a'n junc'ojlal 'a eb'.

2 Cr 33:15

Xyi'n pax 'el sdiosal eb' chuc chon̈b'al, yet' yechl xya'ch 'a yol yatut Jehová, yet' jun tzo'n̈ yet'l xajmb'al sb'ojnac chan̈ 'a jun tzaln yic yatut Jehová, yet' jun tzo'n̈ xo 'a yol chon̈b' Jerusalén. 'Ix sjuln 'el jun tzo'n̈ chi 'a sti 'el chon̈ab'.

Salmos 71:5

Mamin Jehová, yictax in cot'ch quelmal, toxn yipc'ojlal aj wu'uj.

Pr 20:11

Yuj sb'eyb'al junc mach tz'ojcax 'eli to wach' snab'en; wach'xam eb' 'unin, tzcheclj 'el 'a eb' toto wach' eb'.