A Ch'an̈ Schab'il Libro Yic Yab'ixal Eb' Rey 19:23 - Chuj San Sebastian Bible

²³ 'Ix a'n yal eb' a checb' tu paxti'al 'ayn an Jehová in, 'ix cob' aln 'ixtic: Til wal sb'isl in caruaje yic owl wet'i, yic in q'ue'ch 'a sjolm eb' lum witz caw 'ay't 'a chan̈ 'a yol yic Líbano. 'Ix wa'n ch'acxoc te c'ute niwc ste'il yet' te taj wach' yilxi. 'Ixta to b'i'an, in q'ue'ch 'a lum jolmctac witz 'ay't 'a cha'an̈, xlaj wiln jun tzo'n̈ lum lum caw wach' yilx yet' sb'a'al.

Chuj San Mateo Bible

²³ Ix a chec yal b'uchval lolonel eb' vin̈ a checab' d'ayin Yajal in tic. Ix alan icha tic: Ix in q'ue d'a jolomtac vitz yed' jantac in carruaje, aton d'a jolomtac vitz chaan̈ d'a yol yic Líbano. Ix in ch'acanel te' c'ute' chaan̈ steel yed' te' taj man̈ jantacoc svach'il. Ix in q'uen̈ejc'och d'a jolomtac vitz chaan̈ b'aj te c'ayum te te' vach' yilji.

A Ch'an̈ Schab'il Libro Yic Yab'ixal Eb' Rey 19:23 Referans Kwoze

Salmos 20:7

'Ay jun tzo'n̈ eb', a scaruaje eb' yet' schej eb' yic owal a tzya'ch eb' yipc sc'ojol. A eb' cha, tz'el yip yoc eb', tztelw can 'ejm eb'. Palta an̈ec xo pax tic, a Jehová qui Diosalec, a tzca'c 'och yipc qui c'ojol, yuj cha, te'tec' cajec, lin̈n on̈c cha'an̈, xchi win rey cha.

A Ch'an̈ Schab'il Libro Yic Yab'ixal Eb' Rey 18:17

Xlajw xoj cha, 'ix schecn 'at sreyl Asiria schecb' 'a win Ezequías, atn 'oxwn̈ ewin syajlil eb' soldado, yet' jun b'uln̈ eb' soldado to caw wal jeln ya'n owal, caw 'ay yip, 'ix 'el eb' 'a Laquis, 'ix jaw eb' 'a Jerusalén. A yic 'ix jaw eb' ta', 'ix sb'on chan̈ eb' scamplamento 'a 'aj tz'eml yoctc jun tanque 'ay 'a yib'n̈ yol b'e tz'at 'a 'aj tzju'w eb' jalm nip.

Is 10:18

'Oj lajwc 'ejm swach'l yilx chon̈b' Asiria, 'icha tz'aj sch'acx 'ejm te niwc te', mto 'icha tz'aj sat 'ejm eb' te 'awb'ente'. Mto 'icha junc mach tz'el yip yuj yab'il, 'ixta xoj 'oj 'ajcni.

Is 10:14

'Icha n̈ej qui si'n sn̈olb' no ch'ic 'a so', 'ixtan̈ej xwutj wi'n 'ec' sricoal jun tzo'n̈ chon̈b' cha. Xwi'n can 'ec' slum eb', may xon junc eb' 'aj x'at yal sb'a. May xon tas xyal eb', ton̈j x'och q'ueln eb', xchi win rey cha.

2 Cr 32:17

An̈jtona', 'ix stz'ib'j to 'at rey Senaquerib chi scarta yic tzb'uchwj 'a Jehová sDiosal chon̈b' Israel, 'a 'aj tzyalb't 'ixtic: 'Icha jun tzo'n̈ sdiosal jun tzo'n̈ nacion̈, toxn ma'ix stac' scoln 'el eb' schon̈b' 'a yol in c'ab', an̈jtona', 'ixta pax sDiosal Ezequías, toxn ma'oj stac' scoln 'el schon̈b' 'a yol in c'ab', xchi 'a ch'an̈.

2 Cr 26:10

Sb'on pax jun tzo'n̈ cuartel chi 'a lum cusltac lu'um. Caw niwn jun tzo'n̈ c'ob'a sjoyo, yujto caw niwn scajb'en noc' 'ay 'a lum pan̈n 'a'lic, yet' pax 'a yich eb' lum witz. An̈jtona', caw 'ay eb' smunljum tzmunlj 'a 'awj uva, yet' 'a jun tzo'n̈ xo 'awb'ente 'ay 'a lum jolm witz. Caw wal pitz'n 'och 'a sc'ojl smunlji.

A Ch'an̈ Schab'il Libro Yic Yab'ixal Eb' Rey 18:23

Ax ticnec jun, tzwal 'ayex to tze b'o junc e trato yet' win wajlil, atn sreyl Asiria: Q'uinloc swac' chab'oc mil no chej 'ayex, ¿tom tz'ilchj eb' soldado tzq'ue 'a yib'n̈ e no eyu'uj?

Dn 8:11

An̈jtona 'ix ste'wtzan sb'a 'a yojltac jun Syajlil eb' 'ay 'a satchan̈ cha. Smacn 'och wan yajx jun tzo'n̈ xajmb'al tz'ajx 'a jun Yajl chi 'a junjn c'u, xyixtn pax 'el jun lugar yic 'emmquilal yaji.

A Ch'an̈ Schab'il Libro Yic Yab'ixal Eb' Rey 19:4

Comnoc wal 'ix yab' Jehová qui Diosalec jun tzo'n̈ paxti 'ix yal win syajlil eb' soldado yic win sreyl chon̈b' Asiria checb'il cot yuj win rey yic tzb'uchwj 'a qui Diosal pitzan. Comnoc tzya'ch Jehová yailal 'a yib'an̈. Yuj cha, leslwan̈ cuj on̈, yuj jaywn̈ on̈ to tzon̈ cani, xchi Ezequías, xchi eb'.

Is 10:13

Xcob' yal win 'ixtic: Yuj wal sjelnal in nab'en 'ix 'el'ch jun tzo'n̈ xin b'o tic. Caw 'ay in nab'en, yuj cha, xnachj 'el in b'on jun tzo'n̈ tic. Xtechj in jeln smon̈jonal jun tzo'n̈ xo nacion̈. Xlaj wi'n can 'ec' smasnil tas 'ay 'a eb', xtechj pax in te'n can 'ejm eb' rey chi yet' in jelnal.