1 Ti 6:12 - Chuj San Sebastian Bible

¹² 'Icha junc soldado, caw te'n tzyutj sb'a, 'ixta tzotj a'n 'och a c'ojl 'a Cajlil. 'Ixta tzotj a chan a q'uinl 'a jun 'ejmn̈ej. Yuj wal a q'uinal, ach yawtn 'och Dios yico'oc. Caw wach' xotj aln 'a sat nan̈l eb' x'ab'n alni, chajtlto a Jesucristo Cajlil.

Chuj San Mateo Bible

¹² Icha junoc mach syac' yip, tec'tec' syutej sb'a, icha chi' tzutej ac'an ip och tzac'an yuj Cajal Jesús, yic tza cha a q'uinal d'a juneln̈ej, yujto yuj a chaan a q'uinal chi' ix ach yavtejoch Dios yicoc ayic te vach' ix utej alan d'a yichan̈ juntzan̈ eb' ix ab'an alani to a Jesucristo Cajal toni.

1 Ti 6:12 Referans Kwoze

A Sb'ab'el Carta San Pedro 5:10

A 'a yic 'oj lajwc cab'nec syal jab'oc tiempoal, ax Dios 'oj on̈ swach' tz'acb'tzoquec, 'oj swach' 'a'c qui te'nalec, yet' quipec. Caw 'oj on̈ smolc ta'. Yujto a Dios, man̈ jantcoc swach'c'ojlal tzyac' 'ayn̈ec. A on̈ 'awtnec 'och yico'oc, sec wach' a jun caw swach'il, a 'oj yac' 'ayn̈ec 'a jun 'ejmn̈ej, yujto junxn̈ej cajc yet' Jesucristo.

1 Ti 1:18

Ach Timoteo, chamc'ojlb'ilch wuj 'icha junc wunnal. Tzwalb't jun tzo'n̈ checnb'il tic 'ayach, sec 'oj a munlj 'icha yaj yaln can jun tzo'n̈ eb' o'oj, yic yajx yal eb' yuj Dios. Yuj cha, 'icha junc soldado caw wach' tzyutj sb'a 'a yopiso, 'ixta wal tzotj a'n 'ip a munlj 'a yic Dios. Caw te'n tzotj a b'a a'n 'och a c'ojl 'a 'a. Caw tza tan̈wj a b'a yet' a nab'en 'a smasnil tiempo.

2 Ti 4:7

'Icha junc mach caw tzyac' 'ip 'a junc tajnel, 'ixta xwutj in b'a in munlj 'a yic Dios. A ticnec xwac' ganar slajw wopiso 'a swach'il. Smasnil tiempo, caw xin ya'ilj jun tzo'n̈ cuynb'il 'aj 'aych qui c'ojol.

Apoc 3:3

Yuj cha, nac cot jun tzo'n̈ cuynb'il 'aj eya'jnac 'och e c'ojl 'a yic yalan̈. Nac e b'a, 'a'c pax 'och e nab'en jun 'ejm xo 'a 'a. Toto matz e b'o e b'eyb'al, 'oj in c'och 'ayex. 'Icha sc'och junc 'elc'um, may mach 'ojtnac, janc' tzc'ochi, 'ixta 'oj in c'och 'ayex.

1 Ti 6:13

Yuj Dios, pitzn on̈ qui masnil 'a yolyib'n̈q'uinl tic, yet' te te', yet' no noc'. A Jesucristo, caw wach' xyutj ya'n testigoal sb'a 'a Poncio Pilato. A 'a sat Dios yet' 'a sat Jesucristo, tzcham wal waln 'at 'ayach.

1 Jn 2:25

Atn Jesucristo ya'jnac can sti 'ayn̈ec, to tzyac' qui q'uinlec 'a jun 'ejmn̈ej.

A Ch'an̈ Carta D'a Eb' Hebreo 6:18

Caw ya'jnac Dios sti', slocjnac sb'i, yuj cha, a tas yaljnac, may b'a'n̈ 'oj jelxoc, yujto a Dios, matz tac' ya'n 'es. A tas yaljnac cha, caw tzyac' sniwnal qui c'ojlec, yujto ca'jnaquec qui b'a 'a 'a, tzon̈ scolni. Wan qui tan̈wniec tas 'oj yac' 'ayn̈ec, yujto a tzca'c 'och yipc qui c'ojol.

2 Ti 1:9

A Dios ya'jnac qui colnb'il. A 'awtjnac on̈ sec on̈ 'och yico'oc. Man̈ yujoc jun tzo'n̈ tas wach' tzqui b'o'o, on̈ colchji, palta yujto 'ixta tznib'j Dios tzon̈ 'aji, yujto junxn̈ej caj yet' Cristo. Yictax mantzac sb'o yolyib'n̈q'uinl tic, toxn 'ayx swach'c'ojlal 'ayon̈.

A Scarta San Pablo D'a Eb' Aj Colosas 3:15

A Dios a 'awtjnacn̈ec 'och yico'oc, sec junc'ojlal tzon̈ 'ajc qui masnil, yujto junxn̈ej cajc 'a yol sc'ab' Cristo. Yuj cha, caw wach' tzlaj cutquec qui b'a 'a qui cal, sec tzyac' Cristo sjunc'ojlal 'a qui pixnec. An̈jtona', tzca'nec yuj diosal 'a 'a.

1 Ti 6:19

Toto tzb'eylb'ej eb' 'icha tzwal tic, to 'ixta', wan smolb'tzan eb' jun sricoal 'oj scha 'a yic b'aq'uin̈. Ax schan pax eb' sq'uinl 'a jun 'ejmn̈ej.

Zacarías 10:5

'Oj ste'cn 'ejm eb' smasnil eb' 'ajc'ojl yajch 'a 'a, 'icha tzyutj eb' soldado ste'n chan̈ b'i'ch 'a yol caye. 'Oj yac' ganar eb' owal, yujto 'ayn 'och yet' eb'. A eb' soldado 'ay q'ue 'a yib'n̈ chej, 'oj can eb' 'a yaln̈ yuj eb'.

A Ch'an̈ Carta D'a Eb' Hebreo 3:14

Yujto yictax b'ab'el, ca'jnaquec 'och yipc qui c'ojol. Toto an̈ja te'n tzcutjec qui b'a ca'n 'och yipc qui c'ojol, masnto 'a slajub', to 'ixta', 'ay calnec quic yet' Cristo.

1 Ts 2:12

Caln pax 'ayx on̈, to caw wach' tzeyutj e b'eyb'al, 'icha tznib'j Dios. A on̈ 'awtnec 'och 'a yol sc'ab', sec 'oj tz'acwc qui wach'lec 'icha swach'il.

Pr 3:18

Toto tzqui b'eylb'ej jelnal, caw wal 'ay qui q'uinl yu'uj, caw tzaljc'ojlal quico', toto tzqui molcn jun jelnal chi 'a qui nab'en.

A Sb'ab'el Carta San Pedro 3:9

Toto 'ay eb' tu tzyutj sb'a 'ayex, man̈ tuc tzeyutj e b'a 'a eb' jun xo. Toto 'ay eb' tzex b'uchni, man̈ ex b'uchwjoc pax 'a eb'. Ton̈j tze c'an swach'c'ojlal Dios 'a yib'n̈ eb'. Yujto a Dios on̈ 'awtnec 'och yico'oc, yic tzya'n swach'c'ojlal 'ayn̈ec.

2 Ts 2:14

Yuj jun wach' 'ab'x yic colnb'il 'ec' caljnac 'ayx on̈, a Dios ex 'awtn 'och yico'oc, sec wach' 'oj tz'acwc e wach'l 'icha swach'l Cajlil Jesucristo.

Salmos 63:8

Caw wal junn̈j waj et'oc, quetzb'iln oj yet' a wach' c'ab'.

Dt 26:3

Ata tzex c'och 'a yojltac eb' 'aych ya'malc 'och sti eb' 'anma 'a Dios 'a jun tiempoal cha. Tzeyaln 'a eb' 'ixtic: An̈ tic, tzcal 'a yojltac Jehová qui Diosalec, chajtlto on̈ jaw cajn 'a sat lum lum 'ix yac' Jehová sti ya'n 'ayn̈ 'a eb' qui mam quichmec, xe chi.

Is 44:5

A 'a scal eb' chuc chon̈b'al, ata 'ay eb' 'oj alnc 'ixtic: An tic yic in Jehová, 'oj xchioc, ax junc xo 'oj alnoc chajtlto yin̈tl can Jacob. 'Ay pax junc 'oj yac' tz'ib'xoc 'och 'a sc'ab' 'ixtic: Yic in n̈ej Jehová, 'oj xchioc, ax ya'n 'och sb'i Israel sjolmoc sb'i, xchi Dios.

2 Co 9:13

'Oj yal eb' wach' paxti 'a Dios, yujto a jun eyofrenda chi 'oj ch'oxnoc, to wan eyiclni tas tzyal wach' 'ab'x yic Cristo. An̈jtona', 'oj yal pax eb' wach' paxti 'a 'a, yuj jun niwn colwal chi 'oj eyac' 'a eb'. Yujto a jun cha, 'oj colwjoc 'a eb' quit creyenteal smasnil.

A Ch'an̈ Carta D'a Eb' Hebreo 13:23

Tic tzwalb't 'ayex, a cu'tac Timoteo, x'el 'a libre. Toto 'oj jawc 'a tic muc'uc, 'oj 'at wet'oc, ax 'at ex wilnoc.

2 Co 6:7

A jun cuynb'il caw yel, an̈j tzcal-l on̈. Caw 'aych Dios quet' on̈. 'Icha junc soldado tzcol sb'a yet' jun tzo'n̈ syamc'ab', tzya'n pax owl yet'oc, 'ixta tzcutj qui b'a on̈, yujto caw tojl tzcutj qui nab'en on̈.

Cantares 3:4

Jab'nant wal in cot 'a stz'ey ewinac, ax x'aji, xin chan in b'a yet' ni quelm cha. In 'och quetzn 'a sc'ab' na, man̈x 'ic wactj 'el na, 'ix wi'n 'at ni 'a yatut 'unx in nun, atn 'a jun scuarto 'unx 'aj 'aljnac in, xchi 'ix.

A Scarta San Pablo D'a Eb' Aj Filipos 1:30

Ax xo ta', junn̈j tzeyutj e te'wtzan e b'a eya'n eyip wet'oc. 'In eyiljnac, caw te'n wutjnac in b'a 'a e cal. Ax ticnec, wan eyab'n paxi, chajtlto an̈ja caw te'n tzwutj pax in b'a.

1 Ti 1:19

'Ay eb' man̈xtzac stan̈wj sb'a yet' snab'en. Yuj cha, xwach' juw 'el snab'en eb'. Man̈xtoc tzya'ch eb' 'a sc'ojl ticnec.

1 Ti 4:14

A yic ya'n 'at eb' anciano sc'ab' 'a a jolom, ata ya'jnac Dios opiso, sec tznachj 'el o'oj, tas tzotj a'n servil 'a 'a. A 'a'jnac nachjc 'el yuj eb', to 'ixta 'oj ach yutoc. Yuj cha, caw man̈ actc can jun opiso cha.

2 Ti 2:2

'Ay jun tzo'n̈ cuynb'il ab'jnac waln 'el 'a scal nan̈l eb' creyente. A jun tzo'n̈ cuynb'il cha, tzac' scuy eb' yiclum, eb' tztac' scuywj 'a eb' yit creyenteal.

San Judas 1:3

Ex chamc'ojlb'il wu'uj, caw xin nib'j xwa't junc in carta 'ayex, yic tzwaln 'at 'ayx yuj qui colnb'ilec. Palta ax ticnec, 'ay jun caw yowlal 'oj walb't 'ayex. Tzin tew 'at 'ayex, caw tzeyac' eyip, sec may tz'aj sjuw jun tzo'n̈ cuynb'il 'aj tzca'c 'och qui c'ojol. Yujto an̈ec yic on̈c xo Dios tic, a 'ayn̈ec ya'jnac can jun tzo'n̈ cuynb'il tic 'a jun 'ejmn̈ej.

Jueces 3:2

'Ix can eb', sec wach' a eb' yin̈tl Israel tzcuy sb'a eb' ya'n owal, atn eb' mant 'a xon 'aj tzyac' owal.