1 Jn 5:4 - Chuj San Sebastian Bible

⁴ A jun tzo'n̈ tas maysch'olnil 'a yolyib'n̈q'uinl tic, cannc xo 'a yaln̈ cuj an̈ yunnaln̈ec xo Dios tic. Yujto tzca'c 'och qui c'ojl 'a Dios. Yujn̈ej cha, tztac' ca'nec ganar scan jun tzo'n̈ chi 'a yaln̈ cujec.

Chuj San Mateo Bible

⁴ A juntzan̈ chucal ay d'a yolyib'an̈q'uinal tic, cannacxo d'a yalan̈ cuj a on̈ yuninal on̈xo Dios tic. Yujto scac'och Dios d'a co c'ool, yuj chi' scan juntzan̈ chi' d'a yalan̈ cuuj.

1 Jn 5:4 Referans Kwoze

1 Co 15:57

Palta caw ca'c yuj diosal 'a Dios, yujto a tz'a'n ca'c ganar yuj Cajlil Jesucristo.

1 Jn 4:4

Ex chamc'ojlb'il wu'uj, yic on̈c xo Dios ticnec. Tox 'ix can eb' 'a'm 'es chi 'a yaln̈ cujec. Yujto a jun 'aych 'ayn̈ec, 'ec'b'al xo spoder 'a yib'n̈ jun 'aych 'a eb' yic yolyib'n̈q'uinl tic.

Jn 16:33

'Ix wal smasnil jun tzo'n̈ tic 'ayex, sec wach' junc'ojlal xoj 'oj 'aj e pixn wu'uj. A 'a yolyib'n̈q'uinl tic, 'oj eyab' ton syail. Palta te'n tzeyutj e b'a, yujto a jun yolyib'n̈q'uinl tic, 'ix can 'a yaln̈ wu'uj, xchi 'a eb'.

1 Jn 3:9

Toto yel yunnaln̈ec xo Dios, man̈x 'oj qui b'eylb'oc maysch'olnil, yujto jelb'ilx qui nab'enec yuj Dios, lajn x'aj 'icha yico'. A ticnec, man̈xtzac stac' qui b'eylb'anec maysch'olnil cha, yujto yunnaln̈ec xo.

1 Jn 5:5

Cojn eb' tzya'ch 'a sc'ojol, to Yunnal Dios Jesús, cojn eb' tztac' scan jun tzo'n̈ maysch'olnil chi 'a yaln̈ yu'uj.

Apoc 3:21

A eb' 'oj 'a'nc ganar ya'n techjoc, 'oj wac' 'em wocn eb' 'a 'aj 'ay in despacho, 'icha wutjnac wa'n ganar wa'n techjoc, wem wocn yet' in Mam 'a 'aj 'ay sdespacho.

Apoc 12:11

A eb' cha, xyac' ganar eb' ya'n techjoc, yujto chamnc jun tzcuch Calnelu yuj eb', 'elnc can schiq'uil. 'Ix yac' ganar eb', yujto te'n xyutj eb' ya'n testigoal sb'a yu'uj. Ma'ix xiw eb' schami, caw xyaln̈j sc'ojl eb' ya'n cham sb'a yu'uj.

Apoc 3:5

A eb' 'oj 'a'nc ganar ya'n techjoc, 'oj 'ajxc 'och junjn spichl eb' caw sac. Ma'oj in suc sat sb'i eb' 'a ch'an̈ libro yic q'uinl 'a jun 'ejmn̈ej. 'Oj wal yuj eb' 'a sat in Mam, yet' 'a sat eb' yángel, chajtlto wic eb'.

Apoc 2:11

Jantcn̈ej eb' tz'ab'ni, ya' cab' 'och eb' schicn 'a tas tzyal Espíritu 'a junjn iglesia. A eb' 'oj 'a'nc ganar ya'n techjoc, caw man̈x 'oj yab' eb' syal junx schab'l chamel, xchi.

Apoc 3:12

A eb' 'oj 'a'nc ganar ya'n techjoc, 'icha jun tzo'n̈ yoyl yatut in Diosal 'a yojol, 'ixta 'oj 'aj eb' wu'uj, yujto man̈x 'a b'a'n̈ 'oj 'eltc eb' ta'. 'Oj in tz'ib'c 'och sb'i in Diosal 'a eb', yet' sb'i schon̈ab', atn jun 'ac' Jerusalén 'oj 'emtc 'a satcha'an̈, 'a 'aj 'ayc' in Diosal cha. An̈jtona', 'oj in tz'ib'c pax 'och jun b'i 'a't 'a eb'.

Apoc 2:26

A eb' 'oj 'a'nc ganar ya'n techjoc, eb' an̈ja tzb'on 'icha tzin nib'ej masnto chamel, atn eb' 'oj wa'ch yopiso yajlilal 'a jun tzo'n̈ nacion̈.

1 Jn 5:1

An̈ec tzca'c 'och 'a qui c'ojol, to a Jesús atn Cristo, an̈ec ton yunnaln̈ec xo Dios. Q'uinloc 'ay junc mamb'il tzqui chamc'ojlej, to 'ixta', wan qui chamc'ojlan pax eb' yunnal.

Apoc 15:2

'Ix wiln pax jun 'icha mar, lajn yilx 'icha nen caln yaj yet' c'ac'. Ax 'a stz'ey jun cha, 'ay jun tzo'n̈ eb' lin̈n 'eq'ui. Atn eb' x'a'n ganar 'a yib'n̈ jun noc' sb'i, yet' 'a jun yechel. 'Ix ya'n pax ganar eb' 'a yib'n̈ jun número yic sb'i jun noc' cha. Wan syucn eb' junjn yarpa xyac' Dios 'a 'a.

Apoc 2:7

Jantcn̈ej eb' tz'ab'ni, ya' cab' 'och eb' schicn 'a tas tzyal Espíritu 'a junjn iglesia. A eb' 'oj 'a'nc ganar ya'n techjoc, 'oj wac' slo eb' sat jun te te yic q'uinl 'a jun 'ejmn̈ej. A jun te cha, 'ayc' 'a jun paraíso yic Dios, xchi 'ayin.

Apoc 2:17

Jantcn̈ej eb' tz'ab'ni, ya' cab' 'och eb' schicn 'a tas tzyal Espíritu 'a junjn iglesia. A eb' 'oj 'a'nc ganar ya'n techjoc, 'oj wac' swa eb' jun maná c'ub'b'il 'eli. 'Oj wac' pax junjn q'uen caw sac 'a eb'. Ax 'a junjn q'uen cha, tz'ib'b'il 'och jun 'ac' b'i may mach 'ojtnac. Cojn eb' 'oj chanc yico', a eb' 'oj 'ojcanc 'el jun cha, xchi.

Jn 1:13

A yic tz'och eb' yunnalc Dios, 'icha to tzat 'alj eb'. Palta man̈ lajnoc 'icha tz'aj yalj junc 'anma'. Man̈ yujoc tas tznib'j junc 'anma', tz'alj eb'. Man̈ yujoc tas tznib'j junc winac, palta a Dios tz'i'n 'och eb' yunnaloc.

Jn 3:3

'Ix yaln Jesús 'a win 'ixtic: —Wal yel tzwal 'ayach, a mach matz 'alj pax 'a scha'ejmal, ma'oj stac' yoch 'a yol sc'ab' Dios, xchi.

1 Jn 2:29

Cojquec xoni to a Jesucristo, caw tojl snab'en. Yuj cha, tznachj pax 'el cujec, toto tojl tzcutjec pax qui nab'en yet'oc, to 'ixta', yunnaln̈ec xo Dios.

1 Jn 5:18

Cojquec, toto yel yunnaln̈ec xo Dios, man̈x 'oj qui b'eylb'oquec maysch'olnil, yujto a Yunnal tzon̈ tan̈wniec. Yuj cha, man̈xtzac stac' on̈ yixtnec win diablo.