1 Cr 5:1 - Chuj San Sebastian Bible

^1-3 A Rubén, atn win sb'ab'l 'unnal Israel, ax eb' yunnal: atn Hanoc, Falú, Hezrón yet' Carmi. Palta a Rubén ma'ix yij smacl yic sb'ab'l 'unnab'ilal, yujn̈ej to syam cot win yistzil smam. A jun smacl yic sb'ab'l 'unnab'ilal cha, ata x'ajx can 'a eb' yunnal José, atn junx win yunnal pax Israel cha. A yic xb'ey tiempo, a Judá caw niwn yel'ch 'ix 'aj 'a yib'n̈ eb' yu'tac, yujto a 'a x'elt jun yajal, palta ax jun macl yic b'ab'l 'unnab'ilal cha, a 'a José, ata 'aycni.

Chuj San Mateo Bible

¹ A vin̈aj Rubén, vin̈ sb'ab'el unin vin̈aj Jacob, palta maj scha chab' macan̈ smacb'en vin̈ yic sb'ab'el uninal chi', yujto ix vay vin̈ yed' ix schab'il yetb'eyum smam. Yuj chi' a junxo macan̈ smacb'en vin̈ chi', ix ac'chajcan d'a eb' vin̈ yuninal vin̈aj José, aton junxo yuninal vin̈aj Jacob chi'.

1 Cr 5:1 Referans Kwoze

Gn 35:22

A yic cajn 'ec' eb' 'a jun lugar cha, ax win Rubén win yunnal Israel cha, xway win yet' 'ix Bilha, 'ix schab'l 'istzil smam cha, palta xyab' sb'a win mamb'il chi yuj tas sb'o winac. Lajchwan̈ ewin yunnal win Jacob.

Gn 29:32

Scuchn chan̈ 'ix Lea yune', ax yic x'alj jun swinc 'unn 'ix, xya'n eb' sb'ic Rubén, yujto xyal 'ix 'ixtic: A Jehová, a x'ilni to patcab'iln 'el yuj wichmil, ax ticnec 'oj in chamc'ojlax yu'uj, xchi 'ix.

1 Cr 26:10

A eb' yunnal Hosa atn yin̈tl Merari: a Simri, a yajl yaji, wach'xam man̈oc b'ab'l 'unnab'il yaji, palta a smam a 'ix 'a'n 'och yajlil.

Ex 6:14

Atn stzol-l eb' yajl yaj 'a junjn macn̈il eb' israel tic: Rubén, win sb'ab'l 'unnal Israel, eb' yunnal winac, atn eb' tic: Hanoc, Falú, Hezrón yet' Carmi; a eb' tic yajl yaj 'a scal eb' yin̈tl Rubén cha.

1 Co 5:1

'Ix wab'i, to 'ay jun winc 'a e cal caw 'ajmul. Tolab' 'ix smontj 'el win schab'l nun yic'. A jun cha, caw maysch'olnil. 'Intax 'a scal eb' mant 'ojtnacoc Dios, may 'aj tzb'o eb' jun chi 'ixta'.

1 Cr 2:1

A eb' yunnal Israel: atn Rubén, Simeón, Leví, Judá, Isacar, Zabulón, Dan, José, Benjamín, Neftalí, Gad yet' Aser.

Josué 14:6

A eb' yin̈tl Judá, 'ix jaw eb' 'a lum Gilgal, yic xpaxtin eb' yet' Josué, ax Caleb win cenezeo yunnal Jefone, 'ix yaln win 'ixtc 'a Josué cha: Na cot tas 'ix yalcn Jehová 'a win Moisés atn win schecab', yic xyaln oj ach tic yet' pax wuj an tic, yic 'ayn̈ 'ec' 'a lum Cades-barnea.

Dt 27:20

Catb'tzaxc cab' eb' tzmuln yet' yistl smam, yujto 'a yet' jun 'ix chi tzyij 'el sq'uixwel smam, xchi eb' levita. 'Ixta cab' tz'aji, 'oj xchic eb' chon̈ab'.

Dt 21:17

Yuj cha, yowlal tzchaj win mamb'il chi jun yunnal chi sb'ab'l 'unnaloc, cha'ejm tzyutj win ya'n smacl jun yunnal chi 'a tas 'ay 'a 'a, yujto caw sb'ab'l 'unnal yaji; 'ay yaln win yic schan smasnil smacl yic sb'ab'l 'unnab'ilal cha.

Nm 26:5

Eb' yunnal Rubén, win sb'ab'l 'unnal win Israel, atn eb' tic tzb'inax can 'a yin̈til: Enoc, Falú, Hezrón yet' Carmi.

Nm 16:1

'Ay jun win levita yin̈tl can Coat, tzcuch Coré, yunnal jun win tzcuch Izhar, yet' pax 'oxwn̈ xo eb' yin̈tl Rubén, atn Datán yet' Abiram yunnal Eliab eb', yet' pax On win yunnal Pelet.

Nm 1:5

Atn sb'i jun tzo'n̈ eb' yajl tic 'oj colwjoc eyet'oc: 'A yin̈tl Rubén, atn Elisur yunnal Sedeur; 'a yin̈tl Simeón, atn Selumiel yunnal Zurisadai; 'a yin̈tl Judá, atn Naasón yunnal Aminadab; 'a yin̈tl Isacar, atn Natanael yunnal Zuar; 'a yin̈tl Zabulón, atn Eliab yunnal Helón; 'a eb' yin̈tl José, 'a eb' yic Efraín, atn Elisama yunnal Amiud; ax 'a eb' yic Manasés, atn Gamaliel yunnal Pedasur; 'a yin̈tl Benjamín, atn Abidán yunnal Gedeoni; 'a yin̈tl Dan, atn Ahiezer yunnal Amisadai; 'a yin̈tl Aser, atn Pagiel yunnal Ocrán; 'a yin̈tl Gad, atn Eliasaf yunnal Deuel; ax 'a yin̈tl Neftalí, atn Ahira yunnal Enán, xchi Dios.

Lv 20:11

Tzann̈j mach tzb'on 'ajmulal yet' yistzil smam, tzyi'n 'el sq'uixwel smam cha. A jun cha, yowlal tzchami, tzcham pax 'ix 'ix cha, mun a eb' tzyij cot chaml 'a yib'an̈.

Lv 18:8

May cab' mach tzyij 'el sq'uixwel smam yic tzb'on 'ajmulal yet' yistzil smam cha.

Gn 46:8

Eb' yune 'ix Lea yet' Jacob 'aljnac 'a lum Padan-aram, atn eb' tic: Rubén, Simeón, Leví, Judá, Isacar, Zabulón yet' 'ix Dina. 33 sb'isl eb' 'a smasnil, eb' winac yet' eb' 'ix 'ix. Eb' yunnal win Rubén: atn Hanoc, Falú, Hezrón, yet' win Carmi. Eb' yunnal Simeón: atn Jemuel, Jamín, Ohad, Jaquín, Zohar, yet' win Saúl, win yune 'ix 'aj Canaán. Eb' yunnal Leví: atn Gersón, Coat yet' win Merari. Eb' yunnal Judá: atn Er, Onán, Sela, Fares yet' win Zara. (Palta a win Er yet' win Onán chamnc xo ewinac yic x'elt eb' tic 'a Canaán.) Eb' yunnal win Fares cha: atn Hezrón yet' win Hamul. Eb' yunnal win Isacar: atn Tola, Fúa, Job yet' win Simrón. Eb' yunnal win Zabulón: atn Sered, Elón yet' win Jahleel.

Gn 25:23

'Ix ta'w 'ixtc 'a 'ix: Chab' chon̈b'al 'aych yin̈tl 'a yol a c'ojol. A chab' chon̈b'al cha, 'oj 'och eb' 'ajc'ojlal 'a jun jun. Jun caw 'ay yip 'a yib'n̈ junx cha. A win b'ab'el 'oj can win 'a yaln̈ schecnb'il win tza'n 'unin, xchi Dios.

A Scarta San Pablo D'a Eb' Aj Colosas 1:15

Wach'xam matz tac' quilnec qui Mam Dios, palta a Yunnal chi xch'oxn 'ayn̈ec tas yaji, yujto caw lajn yet'oc. A Yunnal, b'ab'l yaj 'a smasnil tas, yel xo wal niwn yel'ch 'a yib'n̈ smasnil.

Gn 25:31

Palta xyaln Jacob 'ixtic: Toto tza ta'wj can a macl yic b'ab'l 'unnab'ilal 'ayin, toto 'ixta', tzwac' tas tza c'uxu, xchi Jacob cha.

Gn 48:5

Yuj cha, a wal chawn̈ onnal tic x'alj 'a Egipto yic mantzac in jaw 'a tic, wic xon yaj ewinac, 'icha to wunnal tz'ajcn eb', 'icha wal yaj win Rubén yet' win Simeón.

Dt 33:17

Caw wach' yilx eb' yin̈tl José, 'icha junc sb'ab'l 'unnal junc no quelm wacax, caw jelan. 'Ay yip 'icha junc no simrón wacx caw niwc sch'a'ac. 'Oj stec smasnil chon̈ab', masnto 'aj tzlajw c'och yolyib'n̈q'uinl tic. A sch'ac chi tzch'oxn 'eli to caw 'ay yip, atn smil-l sb'isl eb' yin̈tl Efraín, yet' smil-l sb'isl eb' yin̈tl Manasés, xchi.