1 Cr 22:19 - Chuj San Sebastian Bible

¹⁹ Yuj cha, a ticnec 'a'c 'och wal 'a e c'ojol, yet' 'a e nab'en e sayn 'ec' Jehová qui Diosalec. Yamc 'och e b'on chan̈ jun scajnub' Jehová qui Diosalec, sec wach' 'oj 'och te scaxail strato 'a yojol, yet' jun tzo'n̈ syamc'ab'il yatut Dios to yic yaji, xchi rey David.

Chuj San Mateo Bible

¹⁹ Yuj chi' aq'uec val och d'a e c'ool eyac'anoch e b'a d'a yol sc'ab' Jehová co Diosal. Tzeyac' val och d'a e c'ool e b'oanq'ue templo b'aj tz'ic'jichaan̈ Jehová chi', yic vach' ol ac'jococh te' scaxail strato chi' d'a yool yed' pax masanil syamc'ab'il jun templo chi', xchi vin̈ d'a eb' vin̈.

1 Cr 22:19 Referans Kwoze

1 Cr 28:9

Ach xo tic ach wunnal Salomón, 'ojquej 'el wal qui Diosal, 'ac' servil 'a smasnil a pixan, mun cab' wal tz'el 'a a c'ojol, yujto a Jehová yojc smasnil tas 'ay 'a qui pixan, tznachj 'el pax yu'uj tas 'ay 'a qui nab'en. Toto 'oj al a b'a 'a 'a, 'oj ta'wc 'ayach, palta toto 'oj e'cn 'el a b'a 'a 'a, 'oj ach spatquilc can 'el 'a jun 'ejmn̈ej.

Dt 4:29

Palta toto a yic 'ayx 'ec' ta', ax snan sb'a e c'ojol, ax e c'ann scolwal Jehová qui Diosalec yet' smasnil e c'ojol mto yet' smasnil e nab'en, 'oj colwjoc ton 'ayex.

1 Cr 16:11

Ca'c 'och Jehová yipc qui c'ojol; c'och coyc 'a yojltac 'a smasnil tiempo.

Salmos 27:4

Cojn jun tas xin c'an 'a Jehová, atn jun chi tzin nib'j tzin bo'o': tzin nib'j 'aynn̈ej 'ec' 'a yatut 'a smasnil tiempo ya' sb'a pitzn in. Tzwa'n 'emmquilal 'a yatut, sec 'oj in tzalj wiln 'ochi.

1 Cr 22:7

'Ix yaln 'ixtc 'a 'a: Ach wunnal, caw 'ayc' 'a in nab'en in b'on chan̈ junc yatut Jehová qui Diosal.

2 Cr 5:7

Xlajw cha, 'ix 'at ya'nc 'och eb' ya'mal 'och sti eb' 'anma te caxa chi 'a yet'ul, 'a jun Lugar to cojn Dios 'ay yico', 'a yaln̈ sc'axl jun tzo'n̈ yechl querubín 'a yol yatut Dios cha.

A Ch'an̈ B'ab'el Libro Yic Yab'ixal Eb' Rey 8:6

Xlajw cha, xyi'n 'och eb' ya'mal 'och sti eb' 'anma 'a Dios te scaxail strato Jehová chi 'a yol yatut Dios, masnto x'o'chch 'a jun Lugar to cojn Dios 'ay yico', 'a snan̈l yechl jun tzo'n̈ eb' querubín.

A Ch'an̈ B'ab'el Libro Yic Yab'ixal Eb' Rey 8:21

A pax 'a yojol, ata xwa'cn b'o jun lugar 'aj tzcan te caxa 'aj 'ay 'ejm strato Jehová ya'jnac can yet' eb' qui mam quichmec, yic yi'n 'elt eb' 'a lum Egipto, xchi Salomón.

A Tas Sc'ulejnac Eb' Schecab' Jesús Hechos 22:16

A ticnec, ¿tas tza tan̈wej? Q'uen̈ wa'an, 'ac' 'ajxc bautisar a b'a. Al a b'a 'a Jesucristo, sec 'oj 'ajxc can lajwc a mul, xchi win Ananías chi 'ayin.

2 Cr 6:11

An̈jtona', tox 'ix wa'ch te caxa 'aj 'ay 'ejm strato Jehová sb'ojnac quet'ec, xchi Salomón.

2 Cr 20:3

Xlajw cha, 'ix yecn xiw sb'a Josafat, caw 'emmquil 'ix yutj yaln sb'a 'a Jehová. 'Ix ya'n alxc 'a smasnil eb' 'anma 'a yol yic Judá to tz'och eb' 'a c'ajb'c'ojlal.

A Ch'an̈ B'ab'el Libro Yic Yab'ixal Eb' Rey 5:3

Ach tic caw ojtac to a 'in mam, ma'ix stac' sb'on chan̈ junc yatut Jehová qui sDiosal on̈, yujto niwn tiempo cojn owl 'ix yila, masnto 'ix ya'ch Jehová eb' 'ajc'ojl a yol sc'ab'.

A Tas Sc'ulejnac Eb' Schecab' Jesús Hechos 11:23

Ax yic xc'och Bernabé, 'ix yilni, to til wal swach'c'ojlal Dios 'ix ch'ox 'a eb'. Yuj cha, caw 'ix tzalj yuj eb', 'ix ya'n snab'enoc eb' smasnil. 'Ix yaln 'a eb' chajtlto caw te'n tzyutj sb'a eb', caw tzya'ch eb' snab'en 'a Cajlilec 'a smasnil tiempo.

Hageo 1:5

An tzwal 'ayex, tzam e yil cot e b'a tas wan eyaji.

Dn 9:3

Yuj cha, in leslwi, in tew 'a Jehová Dios. In 'och 'a c'ajb'c'ojlal, xwa'n 'och te pichl n̈achtac sat. In 'em wocn pax 'a scal q'uen stan̈il c'ac'.

Is 60:1

A Jehová a 'ix aln can 'ixtic: Ex 'aj Jerusalén, a ticnec q'uen̈ec pax wa'an, caw wach' eyico' yujto tzcheclj pax chan̈ in sacq'uinlal yet' in tzictznil 'a e cal.

Salmos 14:2

A 'a satcha'an̈, ata q'ueln 'emt Jehová 'a 'ayn̈ec an̈ 'anman̈ec tic, yic tzyilni toto 'ay junc on̈ 'aych qui nab'en 'a 'a, toto nan to cujec.

Jeremías 29:13

An Jehová in, an tzwala to a yic 'oj e jaw 'ayin, 'oj in ch'ox in b'a 'ayex, yujto yet' wal smasnil e c'ojol, ax eya'n 'och e b'a 'a yol in c'ab'.

Ex 25:8

Tze b'on junc in cajnub', sec wach' tzin can cajn 'a e cal.

1 Cr 16:10

Tzalj coyc yuj tas yaji, tzalj coyc yuj Jehová, yujto tzca'c 'och qui c'ojl 'a 'a.

Salmos 119:2

Wach' yic eb' tzyiclni tas tzala, yujto 'a smasnil sc'ojl eb', tzchan eb' yab'i',

Hageo 1:8

'Ixquec 'a lum calcte', tzeyi'n cot te te ta', yic tze b'on pax chan̈ watut jun 'ejm xo. 'Ixta to b'i'an, ax in can cajn ta 'a tzaljc'ojlal, ax eyi'n chan̈ in b'i ta'.