1 Cr 15:16 - Chuj San Sebastian Bible

¹⁶ An̈jtona', 'ix yaln pax David 'a eb' 'aych yajlilc 'a yib'n̈ eb' levita, to a 'a scal eb' yin̈tl eb' cha, ata tzsic' 'elt eb' nan̈loc eb' tzb'itn 'a tzaljc'ojlal yet' jun tzo'n̈ yamc'ab', atn salterio, arpa, yet' platillo.

Chuj San Mateo Bible

¹⁶ Ix yalanpax vin̈aj rey David chi' d'a eb' vin̈ yajalil eb' levita to a d'a scal yin̈tilal eb' vin̈ chi', sic'chajelta eb' vin̈ sb'itan d'a tzalajc'olal yed' juntzan̈ yamc'ab', aton salterio, arpa yed' platillo.

1 Cr 15:16 Referans Kwoze

1 Cr 13:8

Ax David yet' smasnil eb' yit israelal, caw wal tzalj eb' 'a yojltac Dios. Yet' wal smasnil yip eb', tzb'atj chan̈ eb' sb'eyi, tzb'itn eb' yet' arpa, salterio, pandero, platillo yet' trompeta.

Nehemías 12:36

An̈jtona', ajun pax jun tzo'n̈ yican eb' yet'oc, atn eb' 'et'jnac jun tzo'n̈ yamc'ab' yic tz'och b'it 'a Dios, atn Semaías, Azarel, Milalai, Gilalai, Maai, Natanael, Judá yet' Hanani; atn eb' tic 'et'jnac jun tzo'n̈ yamc'ab' cha, 'icha yaj yaln can rey David, win schecb' Dios 'a pecti'. Palta a Esdras win cuywjum, a b'ab'l s'at yuj eb'.

2 Cr 5:13

Xlajw cha, junn̈j xyutj eb' yutz'n strompeta cha, junn̈j xyutj eb' sjaj sb'itni, junn̈j xyutj pax eb' yaln wach' paxti', yuj yaln eb' yuj diosal 'a Jehová. 'Ix 'utz'x trompeta, 'ix yucx platillo, yet' jun tzo'n̈ xo yamc'ab', yic tz'och b'it 'a Dios. Ya' sb'a wan sb'itn eb', 'ix yaln eb' 'ixtic: Calc wach' paxti 'a Jehová, yujto yel xo wach' snab'en, yujto 'ay schamc'ojlal 'a jun 'ejmn̈ej, xchi eb' 'a sb'it. A 'a yic jun rato cha, 'ix macchj 'el yol yatut Jehová chi yuj jun 'asun.

1 Cr 23:5

Chan̈e mil eb' tz'och stan̈malc puerta, ax chan̈e xo mil eb' tz'och 'a alj wach' paxti 'a yojltac Jehová, yet' jun tzo'n̈ yamc'ab' ya'jnac David b'o'oc, yic tz'och yopiso ta'.

1 Cr 16:42

A eb' tic, 'ix yutz'j eb' trompeta, syucn eb' platillo yet' jun tzo'n̈ xo yamc'ab', yic tzb'itn eb' 'a Dios, ax pax eb' yunnal Jedutún tan̈m puerta yaj eb'.

Tito 1:5

Cannc ach wuj 'a lugar Creta cha, sec tza wach' b'oj jun tzo'n̈ tas 'ayt sb'o'i. Tza si'n pax 'elt eb' tz'och ancianoal 'a eb' creyente 'a junjn chon̈ab'. Tza sic' 'elt eb' 'icha yaj waln can 'ayach.

2 Ti 2:2

'Ay jun tzo'n̈ cuynb'il ab'jnac waln 'el 'a scal nan̈l eb' creyente. A jun tzo'n̈ cuynb'il cha, tzac' scuy eb' yiclum, eb' tztac' scuywj 'a eb' yit creyenteal.

A Tas Sc'ulejnac Eb' Schecab' Jesús Hechos 14:23

A yic x'ec' Pablo yet' Bernabé 'a junjn iglesia, 'ix ya'n can 'och yopiso eb' tz'och ancianoal. 'Ix leslwi eb' 'a Dios, 'ix 'och pax eb' 'a c'ajb'c'ojlal. Xlajw cha, x'ajx can 'ab'enal eb' creyente 'a yol sc'ab' Cajlil yuj eb', atn 'a 'ajtil 'aych sc'ojl eb'.

Jeremías 33:11

Palta ax 'oj 'ajoc, a 'a tic 'oj 'ab'xoc pax yoch b'it yic q'uin̈ yet' yic tzaljc'ojlal jun 'ejm xo, yet' b'it yic eb' quelem yet' eb' 'ix cob'es yic tznupn eb'. 'Oj 'ijxoc cot ofrenda yic alj yuj diosal 'a watut, ax laj yalnc eb' 'ixtic: Alc yuj diosal 'a Jehová tztac' yuj smasnil, yujto caw wach' snab'en, 'ay schamc'ojlal 'a smasnil tiempo, 'oj schic eb'. An Jehová in, an tzwala: Caw 'oj wi'xq'ue'ch jun chon̈b' tic 'icha xon yaj 'a yic yaln̈taxi.

Is 49:23

A ewin rey, a ewin 'oj c'uytzanc eb' one cha, ax eb' 'ix reina a eb' 'ix 'oj cuchnb'eyc'oc eb'. A eb' rey cha, 'oj yic' 'ejm sb'a eb' 'ayach. Ata 'oj nachjoc 'el o'oj, chajtlto an ton Jehová in. A eb' tzin 'a'n 'och 'a sc'ojol, ma'oj can eb' 'a q'uixwc'ojlal, xchi Dios.

Salmos 149:3

Tzon̈ laj q'uec b'atnjoc calnec qui wach' paxti 'a 'a, qui b'itquec yet' qui arpa yet' pax qui pandero.

Salmos 100:1

Qui masnil an̈ cajn on̈c 'a sat lum lum tic, b'itn coyc yet' qui tzaljc'ojlal 'a Dios.

Salmos 95:1

Cotn̈ec, b'itn coyc yet' qui tzaljc'ojlal 'a Jehová. B'itn coyc 'a qui Colmalec.

Salmos 87:7

Ax eb' tzb'itni yet' eb' tzsonni, 'oj yal eb' 'ixtic: A smasnil tas wach' 'ay 'ayn̈ec, ata tzcot 'a Sión, 'oj schic eb'.

Salmos 81:1

B'itn coyc yet' qui tzaljc'ojlal 'a Dios, yujto a quipc yaji. Caw 'ip qui b'itnanec Dios, atn qui Diosalec an̈ yin̈tl on̈ec Jacob tic.

Nehemías 12:46

Yujto a 'a yol stiempoal David yet' Asaf, a eb' tzb'itni 'ay syajlil eb', atn eb' tzb'itnan wach' paxti yet' alj yuj diosal 'a Dios.

Nehemías 12:43

A wal yic jun c'ul cha, man̈x jantcoc xajmb'al x'ajxi. Ax eb' 'anma cha, caw 'ix tzalj chan̈ eb', yujto a Dios x'a'n jun niwquil tzaljc'ojlal chi 'a eb'. An̈jtona', caw 'ix tzalj pax eb' 'ix 'ix yet' eb' 'unin. A jun tzaljc'ojlal 'ix uj 'a Jerusalén cha, caw 'ix 'ab'x 'a najat.

2 Cr 30:12

A eb' 'anma 'aj Judá, a Dios 'ix 'a'n sna eb' to tojl tzyutj eb' snab'en, sec tzyiclj eb' checnb'il xyal win rey yet' eb' yajl yaj yet'oc, a tzyal tas 'ix yutj Jehová yalni.

1 Cr 15:12

'Ix yaln 'a eb' 'ixtic: Ax tic, ax yajl eyaj 'a yib'n̈ eb' eyican, sacb'tzejc e b'a yet' smasnil eb' eyican cha, sec 'oj stac' eyi'n cot te scaxail strato Jehová qui Diosal an̈ israel on̈ec tic, 'a jun lugar tox 'ix wac' b'o'oc.

Ex 15:20

A 'ix María schecb' Dios yanb' Aarón, xyij chan̈ spandereta, sjucb'tzan eb' yit 'ixl cha yic tzyucn eb' spandereta, xlaj b'atj chan̈ eb' yuj stzaljc'ojlal.

2 Cr 5:12

Ax smasnil eb' levita 'aych 'a yib'n̈ to tzb'itni, 'icha Asaf, Hemán yet' Jedutún, eb' yunnal eb', yet' pax eb' yican eb', lin̈n 'och eb' 'a stz'ey yet'l xajmb'al 'a stojlal 'aj tzq'uel c'u. A te lino 'aych spichloc eb'. Yamb'il címbalo, salterio, yet' pax arpa yuj eb'. 'Ay pax 120 eb' ya'mal 'och sti eb' 'anma tz'utz'n trompeta yet' eb'.

2 Cr 7:6

Lin̈n 'ec' smasnil eb' chon̈ab' yic x'och jun 'emmquilal cha. A eb' ya'mal 'och sti eb', 'ayc' eb' 'a yet'l 'aj 'ayq'ui, tzyutz'n eb' q'uen trompeta. Ax 'a yojltac eb', ata 'ayc' eb' levita wan syucn jun tzo'n̈ yamc'ab' b'ob'il can yuj rey David yic tz'och 'emmquilal 'a Jehová. Ya' sb'a cha, wan yaln eb' wach' paxti 'a Jehová 'ixtic: A schamc'ojlal may b'a'n̈ 'ay slajub', xchi eb'.

Nehemías 12:27

A yic 'ix c'och sc'ul yajx can 'och smuroal Jerusalén 'a yol sc'ab' Dios, 'ix 'awtx cot eb' levita 'a smasnil lugar 'a 'ajtil cajn eb'. 'Ix jaw eb' 'a Jerusalén yuj jun q'uin̈ cha, yet' yuj yalx wach' paxti', tzb'itnax b'it 'a tzaljc'ojlal yet' platillo, arpa yet' lira.

Salmos 150:5

B'itn coyc yet' q'uen platillo tzsil-li sjaj. B'itn coyc yet' q'uen platillo c'uyyi s'at sjaj 'a najat.

Am 6:5

Ton̈j tz'ec' e tiempo e b'itn yet' arpa, tze cuyn chan̈ sjajl jun tzo'n̈ b'it 'icha ya'jnac rey David.

1 Cr 6:16

A eb' yunnal Leví: atn Gersón, Coat yet' Merari.

1 Cr 16:5

A Asaf a yajl yaj 'a eb' tzb'itn cha, ax win schab'il atn Zacarías. Tza'n sjaw Jeiel, Semiramot, Jehiel, Matatías, Eliab, Benanías, Obed-edom yet' Jeiel. Atn eb' chi 'ay syamc'ab', atn salterio yet' arpa, palta ax Asaf, a tzyucn q'uen platillo.

2 Cr 20:19

Ax jaywn̈ eb' levita, eb' to yin̈tl Coat, yet' eb' yin̈tl Coré, yajn̈ej 'ix q'ue lin̈n eb' yaln wach' paxti 'a Jehová sDiosal chon̈b' Israel. Caw 'ip 'ix yutj eb' yalni.

Salmos 81:3

A yic tzpac' 'uj tzcutz'nec qui trompeta, tzcutz'nec pax 'a yic tzc'ojn sb'a 'uj, yujto niwquil q'uin̈ jun chi 'ayn̈ec.