Rt 4:11 - Chuj San Mateo Bible

¹¹ Ix tac'vi eb' vin̈ yichamtac vinaquil chon̈ab' yed' masanil eb' ayec' chi' icha tic: —Testigo tzon̈ ajcani. A ix ix tz'ochcan d'a yol a pat chi', aocab' Jehová ol ac'an elc'och ix icha ix Raquel yed' ix Lea b'aj cotnac quin̈tilal a on̈ israel on̈ tic. An̈ejtona' a ach pax tic, nivanocab' tz'aj a b'inajcan d'a yol yic Efrata, aton chon̈ab' Belén tic.

Chuj San Sebastian Bible

¹¹ 'Ix ta'w eb' yichm wincal chon̈b' cha, yet' smasnil eb' 'ayc' cha, 'ix yaln eb' 'ixtic: —Tic tzquila, testigo tzon̈ 'ajcni. Ya' cab' Jehová syaxilal 'a yib'n 'ix 'ix tz'ochcn 'a yol atut cha. Lajn cab' 'oj 'el'chc 'ix 'icha 'ix Raquel yet' 'ix Lea, 'a 'aj cotnn̈c quin̈tl an̈ israel on̈c tic. An̈jtona pax ach tic, niwn cab' tz'aj a b'inax 'a yol yic Efrata yet' 'a Belén.

Rt 4:11 Referans Kwoze

Gn 29:32

Axo ix Lea chi', ix och ix yab'ixal, ix alji jun yune' ix, Rubén ix yac' ix sb'iej, ix yalan ix: A Jehová ix yila' to paticab'il in el yuj vin̈ vetb'eyum, axo ticnaic xajan ol in yil vin̈, xchi ix.

Mt 2:6

A jun chon̈ab' Belén, d'a yol yic Judea, yunen̈ej d'a yichan̈ juntzan̈xo chon̈ab' ay d'a yol yic Judá chi'. Palta ec'al yopisio d'a yichan̈ juntzan̈xo chon̈ab' chi'. Yujto ata' ol aljoc jun vin̈ yajal, A ol ilan in chon̈ab' Israel, xchi d'a Slolonel Dios Tz'ib'ab'ilcani, xchi eb' vin̈.

Miqueas 5:2

A Jehová tz'alan icha tic: A chon̈ab' Belén ay d'a Efrata, vach'chom yunen̈ej d'a scal chon̈ab' d'a yol yic Judá, palta ata' ol cot jun ol vac'och yajalil d'a yib'an̈ in chon̈ab' Israel. Ol cot d'a jun in̈tilal aytaxon d'a peca', a jun ol ac'an yajalil chi', aytaxon yictax yichb'anil, xchi Jehová.

Salmos 132:6

A d'a Efrata ix cab' yab'ixal te' scaxail strato Dios, axo d'a yol lum smacb'en vin̈aj Jaar ix ilchaj te' cuuj.

Rt 1:2

A jun vin̈ chi', Elimelec sb'i vin̈, axo ix yetb'eyum vin̈, Noemí sb'i ix. Axo eb' vin̈ yuninal vin̈ chi', aton vin̈aj Mahlón yed' vin̈aj Quelión. Aj Efrata eb', Belén pax sb'i. Ix b'atcan cajan eb' d'a yol yic Moab chi'. Lajun̈e' ab'il ix ec' eb' ta'. Yacb'an ayec' eb' chi' ta', ix cham vin̈aj Elimelec yetb'eyum ix Noemí chi', ix can ix yed' chavan̈ eb' vin̈ yune' chi'. Ix lajvi chi', ix och yetb'eyum eb' vin̈ schavan̈il. Ix yic'laj sb'a eb' vin̈ yed' chavan̈ eb' ix aj Moab chi', jun ix scuch Orfa, axo junxo ix scuch Rut.

Dt 25:9

sc'och ix d'a stz'ey vin̈ d'a yichan̈ eb' vin̈ yichamtac vinaquil chon̈ab' chi', syic'anel junoc xan̈ab' vin̈ ix, stzub'anpax och ix d'a sat vin̈, syalan ix: Icha tic tz'utaj eb' vin̈ malaj sgana syac'can b'inaj yuc'tac, xcham ix.

Gn 24:60

Ix yalan vach' lolonel eb' d'a ix Rebeca icha tic: Yac'ocab' svach'c'olal Jehová Dios d'a ib'an̈, ol ach och snunoc jantac smillonal anima. A jantac eb' ol och ajc'olal d'a eb' une' ol aljoc, ol can eb' d'a yalan̈ yuj eb' une' chi', xchi eb'.

Pr 14:1

A eb' ix ix ay spensar, vach'n̈ej yaj yol spat eb' ix. Axo pax eb' ix malaj spensar jun, juvinaquel yol spat eb' ix yuuj.

Gn 23:10

Ayec' vin̈aj Efrón hitita chi' d'a scal eb'. Ix tac'vi vin̈. Te chaan̈ ix yal vin̈ yic vach' syab' masanil eb' yetchon̈ab' molanec' chi' yed' eb' tz'och d'a yol chon̈ab' chi'. Ix yalan vin̈:

Gn 29:25

Ayic ix sacb'i, ix yilanelta vin̈aj Jacob chi' to a ix Lea ix vay yed' vin̈, ix b'at yalan vin̈ d'a vin̈aj Labán chi' icha tic: —¿Tas yuj icha tic ix in utej? A ix Raquel ix in caj d'ayach, ¿tas yuj tzin ixtej? xchi vin̈.

Pr 31:23

A vin̈ yetb'eyum ix chi', ojtacab'il vin̈ d'a scal eb' vin̈ nivac vinac d'a yol schon̈ab', ayoch vin̈ stz'acub'oc eb' nivac vinac yaj d'a yol schon̈ab' chi'.

Gn 29:16

Ay chavan̈ yisil vin̈aj Labán chi': A ix b'ab'el, Lea sb'i ix, axo ix schab'il Raquel.

Gn 35:23

A eb' vin̈ yuninal vin̈ yed' ix Lea: Aton vin̈aj Rubén, vin̈ b'ab'el unin, vin̈aj Simeón, vin̈aj Leví, vin̈aj Judá, vin̈aj Isacar yed' vin̈aj Zabulón.

Gn 35:24

Axo eb' vin̈ yuninal vin̈ yed' ix Raquel: Aton vin̈aj José yed' vin̈aj Benjamín.

Dt 25:7

Palta tato malaj sgana vin̈ syic' ix smu' chi' jun, syal sb'at ix d'a yichan̈ eb' juez yed' d'a yichan̈ eb' yichamtac vinaquil chon̈ab', syalan ix icha tic: A vin̈ in mu' malaj sgana vin̈ sb'inajcan vin̈ yuc'tac d'a scal co chon̈ab'. Max stac'laj vin̈ vic'an in b'a yed'oc icha d'a sleyal, tato xchi ix.

A Ch'an̈ B'ab'el Libro Yic Yab'ixal Eb' Rey 21:8

Ix lajvi chi' ix sb'oan jun ch'an̈ carta ix d'a sb'i vin̈aj Acab chi', axo sello vin̈ ix yac'och ix d'a ch'an̈. Ix yac'anb'at ch'an̈ ix d'a eb' yichamtac vinaquil chon̈ab' b'aj cajan vin̈aj Nabot chi'.

1 Cr 2:51

vin̈aj Salma, smam yicham eb' aj Belén yed' vin̈aj Haref smam yicham eb' aj Bet-gader.

Jeremías 32:10

Ix in tz'ib'ancan jun trato chi', ix in macancan yed' in sello d'a yichan̈ eb' testigo.