Nm 7:12 - Chuj San Mateo Bible

^12-83 A d'a b'ab'el c'u, ix yic'ancot yofrenda vin̈aj Naasón yuninal vin̈aj Aminadab, yajal d'a yin̈tilal Judá. D'a schab'il c'ual, ix yic'ancot yic vin̈aj Natanael yuninal vin̈aj Zuar, yajal d'a yin̈tilal Isacar. D'a yoxil c'ual, ix yic'ancot yic vin̈aj Eliab yuninal vin̈aj Helón, yajal d'a yin̈tilal Zabulón. D'a schan̈il c'ual, ix yic'ancot yic vin̈aj Elisur yuninal vin̈aj Sedeur, yajal d'a yin̈tilal Rubén. D'a yoil c'ual, ix yic'ancot yic vin̈aj Selumiel yuninal vin̈aj Zurisadai, yajal d'a yin̈tilal Simeón. D'a svaquil c'ual, ix yic'ancot yic vin̈aj Eliasaf yuninal vin̈aj Deuel, yajal d'a yin̈tilal Gad. D'a yuquil c'ual, ix yic'ancot yic vin̈aj Elisama yuninal vin̈aj Amiud, yajal d'a yin̈tilal Efraín. D'a svajxaquil c'ual, ix yic'ancot yic vin̈aj Gamaliel yuninal vin̈aj Pedasur, yajal d'a yin̈tilal Manasés. D'a sb'alun̈il c'ual, ix yic'ancot yic vin̈aj Abidán yuninal vin̈aj Gedeoni, yajal d'a yin̈tilal Benjamín. D'a slajun̈il c'ual, ix yic'ancot yic vin̈aj Ahiezer yuninal vin̈aj Amisadai, yajal d'a yin̈tilal Dan. D'a yuxluchil c'ual, ix yic'ancot yic vin̈aj Pagiel yuninal vin̈aj Ocrán, yajal d'a yin̈tilal Aser. Axo d'a slajchavil c'ual, ix yic'ancot yic vin̈aj Ahira yuninal vin̈aj Enán, yajal d'a yin̈tilal Neftalí. Lajann̈ej yofrenda junjun eb' vin̈ ix yic'coti. Aton junjun plato nab'a plata, 130 siclo yalil junjun yed' pax junjun q'uen nivac uc'ab' nab'a plata, 70 siclo yalil junjun, icha echlab' sc'anchaj d'a scajnub' Jehová. A juntzan̈ yed'tal chi' te b'ud'an yuj ixim harina te vach' calab'il yed' aceite, aton syac' eb' d'a ofrendail. Ix yac'anpax junjun q'uen nivac cuchara nab'a oro eb', 10 siclo yalil junjun, b'ud'an yed' incienso. Ix yac'anpax junjun noc' quelem vacax eb', junjun noc' ch'ac calnel, junjun noc' quelem calnel jun ab'il sq'uinal yic sn̈usjitz'a d'a silab'il. Ix yac'anpax junjun noc' mam chiva eb' yic tz'och silab'il yuj mul. Stzac'anilxo ix yac' silab' yic junc'olal eb', chavan̈ noc' toro, ovan̈ noc' ch'ac calnel, ovan̈ noc' mam chiva yed' pax ovan̈ noc' quelemtac calnel jun ab'il sq'uinal ix yac' junjun eb'.

Chuj San Sebastian Bible

^12-83 'A yic b'ab'l c'u, 'ix yij cot Naasón win yunnal Aminadab yofrenda, win yajl yaj 'a eb' yin̈tl Judá. 'A schab'l c'ual, 'ix yij cot Natanael win yunnal Zuar yofrenda, win yajl yaj 'a eb' yin̈tl Isacar. 'A yoxl c'ual, 'ix yij cot Eliab win yunnal Helón yofrenda, win yajl yaj 'a eb' yin̈tl Zabulón. 'A schan̈l c'ual, 'ix yij cot Elisur win yunnal Sedeur yofrenda, win yajl yaj 'a eb' yin̈tl Rubén. 'A yol c'ual, 'ix yij cot Selumiel win yunnal Zurisadai yofrenda, win yajl yaj 'a eb' yin̈tl Simeón. 'A swacl c'ual, 'ix yij cot Eliasaf win yunnal Deuel yofrenda, win yajl yaj 'a eb' yin̈tl Gad. 'A yucl c'ual, 'ix yij cot Elisama win yunnal Amiud yofrenda, win yajl yaj 'a eb' yin̈tl Efraín. 'A swajxquil c'ual, 'ix yij cot Gamaliel win yunnal Pedasur yofrenda, win yajl yaj 'a eb' yin̈tl Manasés. 'A sb'aln̈il c'ual, 'ix yij cot Abidán win yunnal Gedeoni yofrenda, win yajl yaj 'a eb' yin̈tl Benjamín. 'A slajn̈il c'ual, 'ix yij cot Ahiezer win yunnal Amisadai yofrenda, win yajl yaj 'a eb' yin̈tl Dan. 'A yuxlchil c'ual, 'ix yij cot Pagiel win yunnal Ocrán yofrenda, win yajl yaj 'a eb' yin̈tl Aser. Ax 'a slajchwil c'ual, 'ix yij cot Ahira win yunnal Enán yofrenda, win yajl yaj 'a eb' yin̈tl Neftalí. Lajnn̈ej yofrenda junjn eb' 'ix yac'a, atn jun tzo'n̈ tic: Q'uen plato b'ob'il yet' plata, 1,430 gramos yal-l junjn eb' q'ue'en, xalu b'ob'il yet' plata, 770 gramos yal-l jun jun, (a tzyal 'echtab' tzc'anlb'ax 'a scajnub' Dios). A jun tzo'n̈ cha, b'ut'n yet' 'ixm harina caw wach', calb'il yet' aceite, a chi xyac' eb' yofrendaoc. 'Ix ya'n pax eb' junjn niwquil cuchara nab'a oro, 'ay 110 gramos yal-l jun jun, b'ut'n yet' incienso, yet' pax junjn no quelm wacax, junjn no mam calnelu, junjn no quelm calnelu jun ab'il sq'uinl tz'ajx tz'a xajmb'alil, yet' junjn no mam chiwo yic tz'ajx no xajmb'al-l yuj mul. Ax 'a slajub', xya'n pax eb' no xajmb'al yic junc'ojlal: Chatcwan̈ no mam wacax, otcwan̈ no mam calnelu, otcwan̈ no mam chiwo, yet' pax otcwan̈ no quelm calnelu junjn ab'il sq'uinal. Lajnn̈ej sb'isl no xyac' junjn eb'.

Nm 7:12 Referans Kwoze

Lc 3:32

vin̈aj David, vin̈aj Isaí, vin̈aj Obed, vin̈aj Booz, vin̈aj Salmón, vin̈aj Naasón,

Mt 1:4

A vin̈aj Aram chi' smam vin̈aj Aminadab, a vin̈aj Aminadab chi' smam vin̈aj Naasón, a vin̈aj Naasón chi' smam vin̈aj Salmón.

Nm 10:14

B'ab'el eb' soldado ed'jinac sbandera yin̈tilal Judá. A vin̈aj Naasón yuninal vin̈aj Aminadab ayoch yajaliloc eb'.

Nm 2:3

A d'a stojolal b'aj sjavi c'u, ata' tz'aj scampamento oxe' in̈tilal ed'jinac sbandera yin̈tilal Judá. A eb' soldado yic yin̈tilal Judá chi', a vin̈aj Naasón yuninal vin̈aj Aminadab ayoch yajaliloc eb'.

Gn 49:10

Malaj mach syal yic'anec' snivanil elc'ochi. Malaj mach syal yic'anec' a c'ococh d'a yol a c'ab', masanto ol ja jun Mach ay yico', jun mach to masanil nación ol c'anab'ajanoc.

Gn 49:8

Ach vuninal Judá, ol alchaj val vach' lolonel d'ayach yuj eb' uc'tac tic. Ol ach och b'inb'in d'a sjaj eb' ayoch ajc'olal d'ayach. Ol em n̈ojjab' eb' uc'tac tic d'ayach.

Nm 7:11

Ix yalan Jehová d'a vin̈aj Moisés chi': A d'a junjun c'u ch'occh'oc eb' yajal d'a junjun in̈tilal ol yic'cot yofrenda yuj yochcan yopisio altar, xchi.

Gn 35:22

Yacb'an cajan ec' eb' d'a jun lugar chi', axo vin̈aj Rubén, yuninal vin̈aj Israel chi' ix vay vin̈ yed' ix Bilha, schab'il yetb'eyum vin̈ smam chi'. Ix yab' vin̈aj Israel chi' tas ix sc'ulej vin̈ yunin chi'. Lajchavan̈ eb' vin̈ yuninal vin̈aj Jacob chi':

Gn 35:23

A eb' vin̈ yuninal vin̈ yed' ix Lea: Aton vin̈aj Rubén, vin̈ b'ab'el unin, vin̈aj Simeón, vin̈aj Leví, vin̈aj Judá, vin̈aj Isacar yed' vin̈aj Zabulón.

Nm 1:5

Aton sb'i juntzan̈ eb' yajal yovalil scolvaj ed'oc tic: A d'a yin̈tilalcan vin̈aj Rubén, aton vin̈aj Elisur yuninal vin̈aj Sedeur. A d'a yin̈tilalcan vin̈aj Simeón, aton vin̈aj Selumiel yuninal vin̈aj Zurisadai. A d'a yin̈tilalcan vin̈aj Judá, aton vin̈aj Naasón yuninal vin̈aj Aminadab. A d'a yin̈tilalcan vin̈aj Isacar, aton vin̈aj Natanael yuninal vin̈aj Zuar. A d'a yin̈tilalcan vin̈aj Zabulón, aton vin̈aj Eliab yuninal vin̈aj Helón. A d'a eb' yin̈tilalcan vin̈aj José, a d'a eb' yic vin̈aj Efraín, aton vin̈aj Elisama yuninal vin̈aj Amiud, a d'a eb' yic vin̈aj Manasés, aton vin̈aj Gamaliel yuninal vin̈aj Pedasur. A d'a yin̈tilalcan vin̈aj Benjamín, aton vin̈aj Abidán yuninal vin̈aj Gedeoni. A d'a yin̈tilalcan vin̈aj Dan, aton vin̈aj Ahiezer yuninal vin̈aj Amisadai. A d'a yin̈tilalcan vin̈aj Aser, aton vin̈aj Pagiel yuninal vin̈aj Ocrán. A d'a yin̈tilalcan vin̈aj Gad, aton vin̈aj Eliasaf yuninal vin̈aj Deuel. A d'a yin̈tilalcan vin̈aj Neftalí, aton vin̈aj Ahira yuninal vin̈aj Enán, xchi Dios.