Jueces 14:17 - Chuj San Mateo Bible

¹⁷ Ix och val ijan ix yoc' d'a vin̈ d'a uque' c'ual chi', yuj chi' axo d'a yuquil c'ual chi', ix yalan vin̈ d'a ix tas syalelc'ochi. Ixn̈ej lajvi yab'an ix, ix b'at yalan ix d'a eb' yetchon̈ab' chi'.

Chuj San Sebastian Bible

¹⁷ Ax 'ix, 'oc'ln̈ej sb'o 'ix 'a yojltac win 'a uque c'ul cha, yic 'aych cob' sq'uin̈ eb'. Palta 'aychn̈ej 'ix smontn win 'a junjn c'u, ax 'a yucl c'u chi b'i'an, 'ix yaln win 'a 'ix tas tzyal 'el'ch jun tzo'n̈ paxti cha. Cojn wal yic xyab'n 'ix tas yaji, 'ix 'at yalnc yab' eb' yit chon̈b' cha.

Jueces 14:17 Referans Kwoze

Jueces 16:16

Junjun c'u ayn̈ejoch ijan ix sc'anb'an d'a vin̈ b'ajtil scot yip vin̈ chi', yuj chi' ix tzactzajq'ue vin̈ yed' ix.

Lc 11:8

Sval d'ayex, man̈ yujoc to yamigo ex sq'ue vaan yac' d'ayex, palta yujto av tzeyac'och d'ay syab'i syac' d'ayex jantac tas tze c'an d'ay yic maxtzac e tzuntzej.

Pr 7:21

A tas te vach' ix yal ix chi', elan̈chamel ix montaj vin̈ quelem chi' yuuj.

Job 2:9

Palta axo ix yetb'eyum vin̈ ix alan d'ay icha tic: —¿Tom an̈eja' vach'n̈ej tzutej a pensar? Al chuc d'a Dios, tzach cham b'ian, xchi ix.

Jueces 16:13

Ix yalanxi ix d'a vin̈ icha tic: —Ichan̈ej tic in ixtani. Tzesejn̈ej d'ayin. Al val d'ayin tas val tz'aj ach co tzec'ani, xchi ix. Ix tac'vi vin̈ d'a ix: —Tato uque' tzutej a pach'uch'an xil in jolom jucan tic yed' an̈ ch'al, tzatz tzutejcanoch d'a te' jal-lab', tato icha chi', tz'elcan vip, icha val yip junoc comon anima tzin ajcani, xchi vin̈ d'a ix. Ix b'oji vay vin̈ yuj ix. Ayic toxo ix vay vin̈ chi', ix sjalancanoch xil sjolom vin̈ chi' ix yed' an̈ ch'al d'a te' jal-lab' chi'.

Jueces 16:6

Ix yalan ix d'a vin̈aj Sansón chi' icha tic: —Tzin tevi d'ayach, to tzal d'ayin b'ajtil scot jantac ip tic, ¿ay am val tas tz'aj a tzec'ji yic maxtzac yal-laj a colan a b'a? xchi ix d'a vin̈.

Gn 3:6

Axo ix yilanoch sat te' chi' ix, te vach' am sloji, te vach' yiljiochi, ix snib'anoch ix, yic vach' stz'acviel spensar ix snaani. Yuj chi' ix sb'ixanelta jun sat te' chi' ix, ix sloan ix. Ix lajvi chi' ix yac'anpax ix d'a vin̈ yetb'eyum chi', ix sloanpax te' vin̈ yed' ix.

Jueces 14:16

Ix lajvi chi', van yoc' ix, ix b'at yalan ix d'a vin̈aj Sansón chi': —Tzin a chac a ach tic. Max in a xajanejlaj. Ix al jun a lolonel yic snael eb' vin̈ vetchon̈ab', palta man̈ val jab'oc tzal d'ayin tas syalelc'ochi, xchi ix d'a vin̈. Ix tac'vi vin̈ d'a ix icha tic: —Max valtax d'a in mam in nun, atob' val d'ayach ol vala', xchi vin̈.

Jueces 14:18

Axo d'a q'uic'b'alil d'a yuquil c'ual chi', ix b'at yalan eb' vin̈ d'a vin̈aj Sansón chi' icha tic: Malaj junocxo tas te chi' d'a yichan̈ noc' yalchab'. Malaj pax junocxo te ay yip d'a yichan̈ noc' choj, xchi eb' vin̈. Ix tac'vi vin̈ icha tic: Yujn̈ej to ix e montej eyab' d'a ix vetb'eyum tic, yuj chi' ix nachaj eyalan tas syalelc'ochi, xchi vin̈.

Jeremías 9:3

Te jelan yesan eb'. Sq'ue val chaan̈ eb' yed' es chi', icha val junoc mach sq'uechaan̈ ste julanel sjul-lab'. Man̈xa jab'oc tas yel tz'alji. Yuj chi' syal Jehová icha tic: Masn̈ej ste chucb'iel eb'. Maxtzac yal sc'ol eb' tzin yaloch sDiosaloc.

Miqueas 7:5

Yuj chi' ex vetchon̈ab', mocab' eyac'och tas syal eb' ay d'a e lac'anil d'a e c'ool, man̈ eyac'och junoc eyamigo yipoc e c'ool. Scham e naan tas tzeyal yed' ix eyetb'eyum.