Jueces 14:12 - Chuj San Mateo Bible

¹² Ix yalan vin̈aj Sansón d'a eb' vin̈ quelemtac chi' icha tic: —Ay jun lolonel ol val d'ayex, a exxo ol e na'a tas syalelc'ochi: Tato a d'a uque' c'ual q'uin̈ tic ol eyal tas syalelc'ochi, ol vac' junjunoc e pichul nab'a lino yed' junjunoc e pichul yic q'uin̈.

Chuj San Sebastian Bible

¹² Ax Sansón 'ix yal 'a eb' 'ixtic: —A ticnec 'ay jun tzo'n̈ tas 'oj wac' e nali. Toto a 'a scal uque c'u q'uin̈ tic, ata tojl 'oj eyutc eya'n spac 'ayin, toto 'ixta', 'oj wac' junjnoc e pichl 'a te lino wach' yaj sb'o'i, ax wa'n pax junjnoc e pichl tzeya'ch 'a yic 'ay junc q'uin̈.

Jueces 14:12 Referans Kwoze

Ez 17:2

Ach anima, al jun ab'ix tic d'a eb' etisraelal d'a ch'oxnab'ilal.

A Ch'an̈ B'ab'el Libro Yic Yab'ixal Eb' Rey 10:1

A ix sreinail chon̈ab' Sabá, ix yab' specal ix to te b'inajnac vin̈aj rey Salomón yuj sjelanil syac' Jehová. Yuj chi' ix javi ix d'a Jerusalén, yic syilan ix tato syal spacan juntzan̈ tas ajaltac sc'anb'ej ix d'a vin̈. Tzijtum eb' schecab' ix yed'nac, yed'nacpax noc' camello ix. Al yaj noc' d'a perfume, d'a q'uen oro yed' d'a juntzan̈ q'uen q'ueen te vach' yilji. Ayic ix javi ix d'a yichan̈ vin̈aj rey Salomón chi', ix sc'anb'an ix tas snib'ej sc'anb'ej chi' d'a vin̈.

Gn 45:22

Ix ac'jipax pichul ac'to d'a eb' vin̈ yic tz'och sq'uex c'apacoc eb' vin̈. Axo d'a vin̈aj Benjamín, 300 siclo plata ix ac'ji, ix ac'jipax oye' mojan̈ spichul vin̈.

A Ch'an̈ Schab'il Libro Yic Yab'ixal Eb' Rey 5:22

Ix tac'vi vin̈aj Giezi chi' icha tic: Maay, malaj tasi, palta a vin̈ vajalil ix in checancot val d'ayach to ato val sc'och chavan̈ eb' quelemtac schecab' Dios spetoj d'a tzalquixtac yic Efraín. Yuj chi' sc'an vin̈ d'ayach to tzac' oxeoc arroba q'uen plata yed' cha mojan̈oc c'apac pichul yuj eb' vin̈, xchi vin̈.

A Ch'an̈ Schab'il Libro Yic Yab'ixal Eb' Rey 5:5

Ix yalan vin̈ rey chi' d'a vin̈: —Vach' tzach b'ati, svac'b'at junoc carta d'a vin̈ sreyal Israel chi', xchi vin̈. Icha chi' ix aj sb'at vin̈aj Naamán chi', ix yic'anb'at nan̈al svajxaquil quintal q'uen plata vin̈ yed' nan̈al schab'il quintal q'uen oro yed' lajun̈ moj pichul.

Pr 1:6

A juntzan̈ lolonel tic scolvaj qued'oc yic snachajel cuuj tas syalelc'och juntzan̈ lolonel satub'tac yed' ajaltac, aton tas syal eb' jelan.

Santiago 5:2

A e b'eyumal chi' c'aeltacxo, axo e pichul, toxon̈ej b'ulaneq'ui, olchimtacxo yuj noc' noc'.

1 Co 13:12

yujto a ticnaic, maxto nachajel val yic Dios cuuj. Ichato van quilan juntzan̈ tas d'a junoc nen tzaxo moymon quilani. Palta a d'a jun tiempoal ayic ol tz'acvoc masanil tas chi', sic'lab'il ol quil masanil. A ticnaic, manto tz'acvilaj cojtacanel yic Dios, palta a d'a jun tiempoal chi', ol cojtaquejeli. Icha ix aj on̈ yojtacanel Dios ticnaic, icha chi' ol aj cojtacanel smasanil ta'.

Jn 16:29

Axo eb' sc'ayb'um chi' ix alan d'ay: —A ticnaic te tojolxo tzutej alan d'ayon̈. Man̈xo q'uexan̈oc tzutej alan icha d'a junel.

Lc 14:7

Ix yilan Jesús tas ix yutej sb'a eb' avtab'il d'a jun vael. Snib'ej eb' tz'em c'ojjab' b'aj tz'em c'ojan eb' nivac vinac. Yuj chi' ix yalan jun tic d'a eb':

Mt 27:28

Ix squichan el spichul Jesús eb' vin̈. Ix yac'anoch junxo pichul chacchac eb' vin̈ d'ay.

Mt 13:34

Ayic ix yalanel Jesús d'a scal eb' anima chi', an̈ej juntzan̈ ab'ix ajaltac snachajeli, a ix yal d'a eb'. An̈ej juntzan̈ ab'ix chi' ix yac'lab'ej ayic ix yalanel d'a eb'.

Mt 13:13

Yuj chi', an̈ej juntzan̈ ab'ix sch'oxanel c'ayb'ub'al sval d'a eb'. Yujto vach'chom syil junoc tas eb', scanxi eb' d'a ichn̈ej ta'. Ichato malaj tas syil eb'. An̈ejtona', vach'chom syab' eb', palta max nachajel-laj yuj eb'.

Mt 6:19

Man̈ e mol e b'eyumal d'a yolyib'an̈q'uinal tic. A juntzan̈ chi', tz'och ijaxoc, sc'ab'ati, tz'och eb' elc'um d'ay.

Ez 20:49

Ix lajvi chi' ix in tac'vi icha tic: Ay Mamin Jehová, a eb' anima syal eb' to an̈ej d'a q'uexan̈ lolonelal tzin loloni, xin chi d'a Jehová chi'.

Salmos 49:4

Ol in maclej val vab' slolonel eb' jelan. Ol in b'itej tas ix in c'ayb'ej chi' yed' sonal te' arpa.

2 Cr 7:8

A d'a jun tiempoal chi', a vin̈aj Salomón yed' eb' yetisraelal ix yac'och q'uin̈ chinama eb' d'a uque' c'ual. Te nivan sb'isul eb', ix cotn̈ej eb' b'aj tz'ochc'och b'e d'a Hamat d'a norte, masanto d'a a' eluma' yic Egipto d'a sur.

Jueces 14:11

Ayic ix yilan vin̈aj Sansón eb' vin̈ filisteo chi', ix yavtancot 30 eb' vin̈ quelemtac eb' vin̈ yic syil q'uin̈ nupnajel chi' eb' vin̈.

Jueces 14:13

Tato man̈ ol nachajel eyuj jun, a ex ol eyac' junjunoc c'apac nab'a lino chi' d'ayin yed' junjunoc mojan̈ in pichul yic q'uin̈, xchi vin̈. Ix tac'vi eb' vin̈ d'a vin̈ icha tic: —Al naic cab' an, ol cab'i tas jun lolonel chi', xchi eb' vin̈.

Pr 31:24

Sb'o pichul ix, sb'o pax tzec'ul ix, schon̈an ix d'a eb' chon̈um c'apac.