Josué 21:34 - Chuj San Mateo Bible

^34-40 Ayto eb' levita ixto cani, aton eb' yin̈tilal Merari. Ix ac'ji smacb'en eb' d'a yol yic eb' yin̈tilal Zabulón, chan̈e' chon̈ab' ix ac'ji d'a eb': Aton Jocneam, Carta, Dimna yed' Nahalal. Axo d'a yol yic eb' yin̈tilal Rubén, chan̈e' pax chon̈ab' ix ac'ji d'a eb': Aton Beser, Jahaza, Cademot yed' Mefaat. Axo d'a yol yic eb' yin̈tilal Gad, an̈eja' chan̈e' chon̈ab' ix ac'ji d'a eb': Aton Ramot d'a yol yic Galaad, Mahanaim, Hesbón yed' Jazer. A d'a Ramot chi' syal scolan sb'a eb' smac'ancham junoc anima. 12 chon̈ab' ix yic' eb' yin̈tilal Merari, yuninal Leví, icha jay macan̈ yaj eb'.

Chuj San Sebastian Bible

^34-40 Ax 'a jun tzo'n̈ xo eb' yin̈tl Leví, atn eb' yic Merari, ata x'ajx lajchwe' chon̈ab' yet' swalab' no cajb'en noc' 'a junjn chon̈b' cha. 'A yol smacb'en yin̈tl Zabulón, ata x'elt chan̈e chon̈ab': Atn chon̈b' Jocneam, Carta, Dimna yet' Naalal. 'A yol smacb'en eb' yin̈tl Rubén, ata x'elt chan̈e chon̈ab': Atn chon̈b' Beser, Jahaza, Cademot yet' Mefaat. 'A yol smacb'en eb' yin̈tl Gad, ata x'elt chan̈e xo chon̈ab': atn chon̈b Ramot 'ay 'a yol yic Galaad, 'a 'aj tz'at scol sb'a eb' tzmiln junc 'anma', yet' Mahanaim, Hesbón yet' Jazer.

Josué 21:34 Referans Kwoze

1 Cr 6:77

Axo d'a juntzan̈xo eb' vin̈ yin̈tilal vin̈aj Merari, ix ac'chaj juntzan̈ chon̈ab' d'a eb' d'a yol yic eb' yin̈tilal Zabulón: Rimón yed' Tabor. A d'a juntzan̈ chon̈ab' chi', ayn̈ej b'aj sva noc' smolb'etzal noc' eb'.

Josué 21:7

Ix ac'jipax 12 chon̈ab' d'a eb' levita yin̈tilal Merari, d'a yol yic eb' yin̈tilal Rubén, d'a yol yic eb' yin̈tilal Gad yed' d'a yol yic eb' yin̈tilal Zabulón.

Josué 19:15

A d'a jun lum chi' ay 12 chon̈ab' yed' yaldeail junjun, a d'a scal juntzan̈ chi', ata' ay Catat, Nahalal, Simrón, Idala yed' Belén.

Josué 19:11

sb'atn̈ej d'a stojolal b'aj tz'em c'u masanto d'a Marala, sc'och d'a Dabeset, slajvicanc'och d'a a' taquin̈ melem d'a yichan̈ Jocneam.

1 Cr 6:63

An̈eja' pax d'a eb' vin̈ yin̈tilal vin̈aj Merari, ix ac'chaj 12 chon̈ab' icha jay macan̈ yaj eb'. A juntzan̈ chon̈ab' chi', a d'a yol smacb'en eb' yin̈tilal Rubén ay, eb' yic Gad yed' eb' yic Zabulón.

1 Cr 6:48

Axo juntzan̈ eb' vin̈ sc'ab'yoc eb' vin̈, an̈eja' yin̈tilal Leví eb' vin̈, ix can eb' vin̈ munlajel d'a stemplo Jehová.