Romanos 12:6 - Emberá Chamí

⁶ Dachi Akõreba ichi sõbiad̶eeba dachicha ne waud̶amera aꞌawaraa deasii. Ichiba chi nureerãmaa deasii ichi baita berread̶amera. Maka dead̶akasiibʉrã, ãchiba biawãra ijãa panuud̶eeba maka berread̶ai panuu.

Romanos 12:6 Referans Kwoze

1 Corintios 7:7

Mʉʉmaarã, biꞌia b̶uai jomaurã mʉ kĩra du nuread̶ai. Maamina Dachi Akõreba dachicha saka nuread̶ai deasii. Dachi Akõreba chi nureemaa du nuread̶ai dea b̶uu. Maud̶e chi nureemaa kima adaud̶ai dea b̶uu.

Romanos 12:3

Dachi Akõreba ichi sõbiad̶eeba mʉ b̶usii ichi baita ne wau b̶uamera. Maud̶eeba mʉʉba machimaa nau jaraaruu: ab̶au bid̶a kʉ̃risiabai b̶uu ara ichi chi mechiu nii. Machiba Cristod̶e ijãaped̶aad̶ad̶eeba Dachi Akõreba machicha aꞌawaraa deasii ne waud̶amera. Maud̶eeba ichiba dead̶a kĩra machiba wau panuu biꞌia kʉ̃risiásturu.

Romanos 1:11

Biawãra mʉʉba machi ichia kʉ̃ria b̶uu Dachi Akõre Jaurid̶eeba aid̶ai baita. Maka machi karr chaarea nuread̶ai.

1 Corintios 13:2

Mʉ Dachi Akõre baita berrearuubʉrã, Dachi Akõreba kʉ̃risia kuitaabiwẽa b̶uad̶a joma kuitaa b̶uubʉrã, Dachi Akõre kʉ̃risia kuitaa joma kuitaa b̶uubʉrã, maud̶e sõd̶eeba biawãra ijãa b̶uud̶eeba ea poyaa ãyaa b̶uuruubʉrã, maud̶e waabenarã kʉ̃riawẽa b̶uubʉrã, mʉ baleswãe nii kĩra nii.

Efesios 4:11

Ara ichiba chi nuree b̶usii ichiba bʉid̶arã nuread̶amera, waabenarã b̶usii Dachi Akõre baita berreabadaurã nuread̶amera, waabenarã b̶usii chi bed̶ea bia Cristo ʉ̃rʉbena jarad̶e nibad̶amera, maud̶e waabenarã b̶usii chi ijãabadaurã nubadaurã maud̶e jaradeabadaurã nuread̶amera.

1 Corintios 14:1

Waabenarã biꞌia kʉ̃ria panásturu. Maud̶e Dachi Akõre Jauriba waubi b̶uu joma wau kʉ̃riásturu. Dachi Akõre baita berread̶ai aude kʉ̃riásturu.

2 Corintios 8:12

Biawãra ab̶auba poyaa dearuu kĩra sõbiad̶eeba dearuubʉrã, mau dead̶a Dachi Akõreba biꞌia unui. Ab̶auba deai baita uru b̶uuwãebʉrã, Dachi Akõreba deábad̶e akau.

1 Tesalonicenses 5:20

Dachi Akõre baita berreabariiba jara b̶uu ida b̶urã́sturu.

1 Corintios 14:29

Ara mau kĩra Dachi Akõre baita berreabadau ome maebʉrã õbea berread̶ai panuu. Maud̶e jomaurãba ãchiba berrea panuu kauwa ũrid̶ai panuu biawãra kuitaad̶ai baita.

Hechos 15:32

Judas maud̶e Silas Dachi Akõre baita berreabadaurã basii. Maud̶eeba ne ãrea jarasid̶au ãbarãba biꞌia ijãad̶amera maud̶e chaarea panad̶amera.

Hechos 2:17

“Dachi Akõreba naka jara b̶uu: Kaad̶ebena ewarid̶e mʉ Jauri joma ẽbẽrarãmaa deai. Maka machi warrarã maud̶e machi kaurã mʉʉba jarabi b̶uu kĩra berread̶ai. Mʉʉba kũudrãarã daumaa ne unubiai. Maud̶e chõrarã bid̶a kamokaraad̶e maka unubiai.

Filipenses 3:15

Joma dachi Cristo ãrea kuitaa nureerãba ara mau kĩra kʉ̃risiad̶ai panuu. Machiba ãyaa kʉ̃risia panuubʉrã, Dachi Akõreba saka kʉ̃risiad̶ai panuu arakʉd̶e kuitaabiai.

Efesios 3:5

Naed̶e Dachi Akõreba ẽbẽrarãmaa mau kuitaabiawẽa b̶uasii, maamina jãabae chi ichi baita berreabadaurãmaa maud̶e Jesucristoba bʉid̶arãmaa ichi Jaurid̶eeba kuitaabiasii.

Hechos 13:1

Ãbarã Antioquía puurud̶ebena tãed̶e Dachi Akõre baita berreabadaurã, maud̶e Cristo ʉ̃rʉbena jaradeabadaurã nureasii. Bernabé, Saulo, Lucio Cirened̶ebena maud̶e Simón b̶uasii. Simón trʉ̃ «Chi Parr» abachid̶au. Manaén sid̶a b̶uasii. Ichi Galilea druad̶ebena jaradea ua b̶uabarii Herodes ome ãbua warisii.

Lucas 11:49

Maud̶eeba Dachi Akõre ichi kʉ̃risia kuitaad̶eeba naka jarasii: “Mʉ baita berreabadaurã maud̶e mʉʉba bʉikad̶arã machi israeld̶ebenarãmaa wãbiai. Maud̶e waabenarã bead̶ai maud̶e waabenarã kachirua waud̶ai baita wãraad̶ai”.

Mateo 23:34

Mʉʉba Dachi Akõre baita berreabadaurã, kʉ̃risia kuitaa nuree maud̶e Moisesba b̶ʉd̶a jaradeabadaurã machimaa bʉikaaruu. Maamina machiba maarã bead̶ai maud̶e waabenarã cruzd̶e jirab̶ud̶ai. Waabenarã machi judiorã araa ãbua imibadau ded̶e soaba ped̶ai maud̶e puurucha wãraad̶ai biꞌiwãe paneebiad̶ai baita.

1 Corintios 14:24

Maamina jomaurã Dachi Akõre baita berreaduubʉrã, maud̶e Jesusd̶e ijãawẽa nii ab̶a maebʉrã Dachi Akõre bed̶ea ũri kʉ̃ria b̶uu ed̶a wãaruubʉrã, machiba jara panuu ũri b̶uud̶eeba ichiba kachirua waubarii kuitaad̶eeba Dachi Akõre daad̶e nebʉra barau nii kuitaai.

Hechos 21:9

Ichiba kaurã duurã kimare uru b̶uasii. Mau wẽrarã Dachi Akõre baita berreabadaurã basii.

1 Corintios 3:5

Maamina ¿Pablo kaima? ¿Apolos kaima? Dai Dachi Akõre baita bari trajabadaubʉ. Daid̶eeba machiba Dachi Mechiud̶e ijãasid̶au. Dachi Akõreba daicha waubiad̶a kĩra wausid̶au.

1 Corintios 12:18

Dachi Akõreba dachi kakuad̶e joma b̶usii ichiba kʉ̃ria b̶uad̶a kĩra.

2 Pedro 1:20

Nau ãrea kuitásturu: Dachi Akõre baita berreabadaurãba Ichi Bed̶ead̶e b̶ʉped̶aad̶a ara ãchi kʉ̃risiad̶eeba b̶istĩika bid̶a b̶ʉd̶aabasii.

Mateo 25:22

Maabae chi 2.000 adaud̶a neeped̶a jarasii: “Mʉ chibari, bichiba 2.000 dead̶ad̶ebena mʉʉba maucha 2.000 eneesii”.