16 Jesusba ãchimaa id̶isii: —¿Sakãe kĩru berrea panuma?
Mau ewarid̶e fariseorã need̶aped̶a Jesús ome kĩru berrea panasid̶au. Ichi bajãad̶ebena nee b̶uu kuitaad̶ai baita ichimaa id̶isid̶au ẽbẽrarãba ne poyaa waud̶akau waumera.
Jesús unusid̶aud̶e jomaurãba ãrea kuitaa kʉ̃risiad̶aabasii. Ara makʉd̶e ichimaa pira wãd̶aped̶a biꞌia irsibisid̶au.
Mau pĩchuka nee nub̶uud̶ebena ab̶aba panausii: —Jaradeabarii, mʉ warr adoesii bichiba aribiabimera. Mau jai kachiruaba uru b̶uu. Mau jai kachiruaba bosara babi uru b̶uu.
