Marcos 3:5 - Emberá Chamí

⁵ Maud̶e Jesús jirukaraasii sõ chaarea nureed̶eeba. Nomaa kĩru kub̶uuba ãchi ichiaped̶a chi jua bʉʉ niimaa jarasii: —Jua jiwaase. Maka jiwaaruud̶e ichi jua biꞌia did̶isii.

Marcos 3:5 Referans Kwoze

Lucas 6:10

Maabae aria panuurãmaa ichiaped̶a chi mukĩramaa naka jarasii: —Jua jiwaase. Maka jiwaaruud̶e ichi jua biꞌia did̶isii.

Efesios 4:18

Ãchi kʉ̃risia pãriud̶e duanuud̶eeba Dachi Akõre ʉ̃rʉbena kuitaad̶akau. Ãchi sõ chaareaba Dachi Akõre adua nureed̶eeba, chi ichiba chokae duanubiai b̶uu wãꞌãe nuree.

Romanos 11:25

Ãbarã, mʉʉba kʉ̃ria b̶uu Dachi Akõreba ne naed̶e kuitaabiawẽa b̶uad̶a machiba kuitaad̶ai. Maka judiorã audeara biꞌia nuree kʉ̃risiad̶aabai. Dachi Akõreba naed̶e kuitaabiawẽa b̶uad̶a naubʉ: ãrea judiorã sõ chaarea paneesid̶au maud̶e maka paneed̶ai ab̶a joma chi Cristod̶e ijãad̶ai panuu judiowãerãba ijãaduud̶aa.

Mateo 12:13

Maabae chi jua bʉʉ niimaa jarasii: —Bichi jua jiwaase. Maabae ichi jua jiwaasii. Maud̶e chi jua biꞌia did̶isii chi ab̶abena jua kĩra.

Apocalipsis 6:16

Maarãba naka jarasid̶au: «¡Ea, mo, dai ʉ̃rʉ b̶áesturu. Dai mirubiásturu chi rey ãkaud̶e akʉ b̶uuba dai unurãamera maud̶e chi Oeja Kaebe Niiba kastikarãamera.

Hebreos 5:9

Ne jomad̶e biꞌia wausiid̶eeba, joma chi ũribaba ũriiduu poyaa karibai b̶uu ewaricha chokae nuread̶amera.

Hebreos 3:17

¿Dachi Akõre kairã ome 40 años kĩru b̶uasma? ¿Kachirua wauped̶aad̶arã ome kĩru b̶uaswãeka? ¿Maud̶eeba maarã drua sirua wãꞌãe b̶uud̶e kinisid̶auwãeka?

Efesios 4:30

Kachirua wauduuba Dachi Akõre Jauri kĩra nomaabirã́sturu. Dachi Akõreba mau machimaa deasii ichid̶irã kuitaa panad̶amera. Ichi Jauri machi baara b̶uai ab̶a Dachi Akõreba ichi ẽbẽrarã joma biꞌia b̶ui ewarid̶aa.

Efesios 4:26

Kĩruuduubʉrã kachirua waurã́sturu. Machi kĩru panuumisa, ewari araa b̶aebirã́sturu.

2 Corintios 3:14

Maamina ãchiba mau ʉ̃rʉbena kuitaad̶aabasii. Id̶ibae bid̶a judiorãba chi Moisesba b̶ʉd̶a ichiaduud̶e kuitaad̶akau. Ãchi kʉ̃risia wabid̶a paruba mera panuu kĩra nuree, ab̶a Cristod̶éburu mau ãyaa ewaid̶eeba.

Juan 9:7

Maabae Jesusba ichimaa jarasii: —Chi Kuibadau Siloé abadaumaa jeraad̶e wãse. (Mau trʉ̃ jara b̶uu “bʉid̶a”). Ara makʉd̶e chi dau pãriu nii wãped̶a ichi dau jeraasiid̶e unu b̶eesii. Maabae deed̶aa wãsii.

Lucas 17:14

Jesusba maarã unusiid̶e naka jarasii: —Paarerãmaa wã́sturu machi chi kakua aniped̶aad̶a ichiad̶amera. Ara makʉd̶e maarã wãsid̶au. Wãaduu nid̶aud̶e anikuasid̶au.

Lucas 13:15

Maud̶eeba Dachi Mechiuba jarasii: —¡Machi setaa ẽbẽra bia nuree abadau! ¿Bari panabadau ewarid̶e machi paka maebʉrã mura enad̶aped̶a bania dod̶e adoed̶akaka?

Hebreos 3:10

Maud̶eeba ãchi ome kĩruped̶a Dachi Akõreba naka jarasii: “Jãarãba sõd̶eeba biawãra mʉ baara nibad̶akau. Mʉ o unud̶ai kʉ̃riad̶akau”.

Marcos 3:4

Maabae Jesusba ãchimaa id̶isii: —¿Bari panabadau ewarid̶e kãare waud̶ai panuma? ¿Chi bia maebʉrã chi kachirua? ¿Waabenarã karibai maebʉrã ida biubiaika? Maamina ãchi chũpea paneesid̶au.