1 Corintios 4:17 - Emberá Chamí

¹⁷ Maud̶eeba Timoteo machimaa bʉiruu. Dachi Mechiud̶eeba mʉ warr kʉ̃riabarii kĩra nii, maud̶e jipa nibabarii. Ichiba machimaa kĩrababiai mʉ Jesucristo ome saka jipa nii. Mʉ maka nibai chi ẽbẽrarã Jesucristod̶erã duanabariicha jaradea b̶uu.

1 Corintios 4:17 Referans Kwoze

1 Timoteo 1:2

Timoteo, mʉʉba nau karta bichi baita b̶ʉʉruu. Mʉʉd̶eeba Cristod̶e ijãasiid̶eeba bichi biawãra mʉ warr kĩra b̶uu. Mʉʉba kʉ̃ria b̶uu Dachi Bajãad̶ebena Akõreba maud̶e Dachi Mechiu Jesucristoba kĩra chuburia panad̶amera, ãchi sõbiad̶eeba aid̶a panad̶amera, maud̶e jirukaraayuwãe panabid̶amera.

1 Corintios 16:10

Ãba Timoteo machimaa neeruubʉrã, ichi machi tãed̶e biꞌia irsibísturu wapearãamera. Dachi Mechiuba kʉ̃ria b̶uu ichiba biꞌia wau b̶uu mʉʉba wau b̶uu kĩra.

1 Corintios 7:17

Dachi Akõreba dachi iusiid̶e ara dachi panad̶a kĩra nuread̶ai panuu. Mukĩra kakua tõo b̶uasiibʉrã ara maka b̶uai b̶uu. Mukĩra kakua tõowẽa b̶uasiibʉrã ara maka b̶uai b̶uu. Dachicha nuread̶ai panuu Dachi Mechiuba b̶ud̶a kĩra. Mʉʉba ẽbẽrarã Dachi Akõred̶erã araa ãbua imibadaucha maka jaradea b̶uu.

2 Timoteo 1:2

Timoteo, nau karta bichi baita b̶ʉʉruu. Mʉʉba bichi ãrea kʉ̃ria b̶uu mʉ warr kĩra. Kʉ̃ria b̶uu Dachi Bajãad̶ebena Akõreba maud̶e Dachi Mechiu Jesucristo bid̶a bichi kĩra chuburia panad̶ai, ãchi sõbiad̶eeba aid̶a panad̶ai maud̶e jirukaraayuwãe panabid̶amera.

1 Corintios 16:1

Mau awara machiba ãbarã Jerusalend̶ebena baita chi nejarra peeduu ʉ̃rʉbena mʉʉba jaraaruu. Mʉʉba ãbarã Galacia druad̶ebenarãmaa jarad̶a kĩra wáusturu.

1 Corintios 14:33

Dachi Akõreba ororoa nub̶eebikau, maumaarã jirukaraayuwãe b̶uabiabarii. Ẽbẽrarã Dachi Akõred̶erã araa ãbua imiiduucha

Apocalipsis 2:10

Chi machi kãꞌãabariwãed̶e biꞌiwãe panad̶ai ewari wapearã́sturu. ¡Ũrísturu! Chi jʉbawãe niiba machid̶ebena chi nuree jʉ̃a bʉikai ijãa panuu kuitaayua. Ewari 10 ãrea biꞌiwãe panad̶ai. Maamina biuduud̶aa ijãa panásturu. Maud̶e mʉʉba machimaa boro jũra dearuud̶e ewaricha chokae nibabiai.

1 Corintios 11:2

Ãbarã, ewaricha mʉ kĩraba panuud̶eeba maud̶e mʉʉba jaradead̶a ũri panabadaud̶eeba machimaa biꞌia jaraaruu.

1 Corintios 7:25

Mau awara chi wabid̶a miakãid̶awẽa nuree ʉ̃rʉbena mʉʉba jaraaruu. Dachi Mechiu Jesucristoba mʉʉmaa mau ʉ̃rʉbena jaradeabiibasiid̶eeba mʉʉba kʉ̃risia b̶uu jaraaruu. Machiba kuitaa panuu Dachi Mechiuba mʉ kĩra chuburiasiid̶eeba mʉʉba biawãra jarabarii.

Apocalipsis 2:13

»Machiba wau panuu mʉʉba kuitaa b̶uu. Maud̶e kuitaa b̶uu machi panabadaumare Satanás chi rey ãkaud̶e akʉ b̶uu. Maamina machi wabid̶a mʉ baara nibabadau. Chi Satanasd̶erãba chi ãba Antipas beasid̶aud̶e mʉ kakua biawãra berreasiid̶eeba, machi mʉʉd̶e ijãad̶ai ida b̶ud̶aabasii.

2 Timoteo 3:10

Maamina bichiba nau biꞌia kuitaa b̶uu: mʉʉba jaradea b̶uu, mʉ nibabarii, mʉʉba wau kʉ̃ria b̶uu, mʉʉba Cristod̶e ijãa b̶uu, mʉ jomad̶e jãadua b̶uu, mʉʉba waabenarã kʉ̃ria b̶uu, mʉ jomad̶e dauchia jãadua b̶uu

2 Timoteo 2:2

Mʉʉba ẽbẽrarã ãrea daad̶e jaradea b̶uad̶a bichiba ũrisii. Ara mau jaradea b̶uad̶a bichia bid̶a waabenarã ãbarãmaa jarabʉise waabenarãmaa mau jaradead̶amera. Waabenarãba ãchi ijãad̶ai panuu maud̶e poyaa bia jaradead̶ai panuu.

Colosenses 4:9

Tíquico baara ãba Onésimo bʉiruu. Ichiba ne jomad̶e jipa wau b̶uu maud̶e daiba mau kʉ̃ria panuu. Tiquicoba maud̶e Onesimoba machimaa nebʉrʉd̶ai joma nama saka nub̶uu.

Colosenses 1:7

Mau bed̶ea dachi ãba Epafrasba machimaa kuitaabiasii. Ichi daiba biawãra kʉ̃ria panuu. Dai ome arab̶aud̶e wau b̶uu. Ichi Cristo baita bari trajabariibʉ. Machi aid̶ai baita ne jomad̶e jipa waubarii.

Filipenses 2:19

Dachi Mechiu Jesusba kʉ̃riaruubʉrã mʉʉba Timoteo isa machimaa wãbii. Maka ichi waya mʉʉmaa neeruud̶e mʉ sid̶a kĩrajʉʉ b̶uai machi saka panuu kuitaai b̶uud̶eeba.

Efesios 6:21

Dachiba kʉ̃ria panuu ãba Tiquicoba mʉ ʉ̃rʉbena machimaa joma nebʉrʉi kuitaad̶amera mʉ saka b̶uu maud̶e kãare wau b̶uu. Ichi Dachi Mechiu baita ichi kʉ̃ria trajabarii jipa nii, maud̶e ne jomad̶e biꞌia waubarii.

1 Corintios 11:16

Ab̶auba mau kakua oa kachirua berrea b̶eeruubʉrã, mʉʉba nau ichimaa jaraaruu: daiba maud̶e ẽbẽrarã Dachi Akõred̶erã awara waud̶akau.

1 Corintios 4:15

Machiba Cristo ʉ̃rʉbena jaradeabadaurã ãrea uru panad̶a basirã wabid̶a akõre ab̶a uru panad̶ai basii. Mʉʉd̶eeba machiba chi bed̶ea bia Jesús ʉ̃rʉbena ijãaped̶aad̶ad̶eeba ichid̶eeba mʉ machi akõrebʉ.

Mateo 25:23

Chi chibariba jarasii: “Biꞌia b̶uu, trajabarii bia nii, bichiba jipa waubarii. Mʉʉba b̶aꞌãra dead̶aba bichiba biꞌia wausiid̶eeba mʉʉba bichimaa maucha ãrea dearuu. Ed̶a neese mʉ ome kĩrajʉʉ b̶uai baita”.

Mateo 25:21

Chi chibariba jarasii: “Biꞌia b̶uu, trajabarii bia nii, bichiba jipa waubarii. Mʉʉba b̶aꞌãra dead̶aba bichiba biꞌia wausiid̶eeba mʉʉba maucha aude deai. Ed̶a neese mʉ ome kĩrajʉʉ b̶uai baita”.

Mateo 24:45

»Chibari baita bari trajabarii kʉ̃risia kuitaa b̶uuba jipa waubarii kĩra duanásturu. Ichi chibariba chi waabenarã bari trajabadaurã ichi juad̶e b̶usii chi kod̶ai baaruud̶e kobia b̶uamera.

1 Corintios 4:2

Biawãra chi chibari baita bari trajabariiba ichi jaradea ua b̶uabariiba waubi b̶uu joma jipa wau b̶uai b̶uu chi jaradea ua b̶uabariiba biꞌia unumera.

Hechos 16:1

Maud̶e Pablo Derbe puurud̶e neeped̶a Listra puurud̶aa wãsii. Aria Jesusd̶e ijãa nii Timoteo abadau b̶uasii. Timoteo nawe judio basii; Jesusd̶e ijãa nibasii. Ichi akõre griego basii.

1 Corintios 4:14

Mʉʉba mau b̶ʉ kub̶uwẽe machi kĩrakayabiai baita. Maumaarã mʉ warrarã kĩra machi kʉ̃ria b̶uud̶eeba maka b̶ʉ kub̶uu jipa kʉ̃risiabiai baita.

1 Corintios 11:34

Ab̶a jarrbisia b̶uubʉrã ichi ded̶e koi b̶uu. Maka araa ãbua imiiduud̶e Dachi Akõreba machi kastikaabai kachirua wau panuud̶eeba. Mʉʉba wabid̶a jaradeai b̶uu machimaa wãaruud̶e joma jaradeai.

2 Corintios 8:18

Ichi ome daiba ãba ab̶a bʉiduu. Mau ãbaba chi bed̶ea bia Cristo ʉ̃rʉbena aid̶a jaradea nibabariid̶eeba ãbarã puuruchad̶ebenaba ichi ʉ̃rʉbena biꞌia jarabadau.

Filipenses 2:22

Maamina machiba kuitaa panuu Timoteoba biꞌia waubarii. Warrba ichi akõre aid̶abarii kĩra ichiba bed̶ea bia Cristo ʉ̃rʉbena aid̶a jaradea b̶uu.

1 Timoteo 1:18

Mʉ warr Timoteo, mʉʉba Dachi Akõreba naa jarabʉid̶a bichi ʉ̃rʉbena kʉ̃risiaruud̶e, bichiba waui b̶uu jarabʉiruu. Maka Cristod̶e ijãa b̶uud̶eeba, kʉ̃risia jipa b̶uud̶eeba chi biawãra bed̶ea uru b̶uase waabenarã tãed̶e kokoroa chĩobarii kĩra. Waabenarãba mau kʉ̃risia bia uru panad̶a ida b̶ud̶aped̶a ãchiba Cristod̶e ijãa panuu ida b̶usid̶au.

Tito 1:5

Mʉʉba bichi Creta islad̶e b̶ʉisii dachiba waud̶ai b̶uu joma waumera. Mʉʉba jarad̶a kĩra ijãabadaurã nubadaurã puurucha b̶ukuase.