1 Corintios 15:2 - Emberá Chamí

² Mʉʉba jaradead̶a biawãra ijãa panuubʉrã, Dachi Akõreba karibai. Makawãebʉrã, machiba bari ijãasid̶au.

1 Corintios 15:2 Referans Kwoze

Hebreos 3:6

Maamina Dachi Akõre warr Cristo baerã, mau ẽbẽrarã mechiubʉ. Ãchi ome joma arakʉd̶e wau b̶uu. Dachiba Cristod̶e ijãa panuubʉrã maud̶e ichid̶eeba adaud̶ai kĩrajʉʉ esed̶au panuubʉrã, ẽbẽrarã Dachi Akõred̶erãbʉ.

Hebreos 2:1

Maud̶eeba chi biawãra bed̶ea ũriped̶aad̶ad̶e kauwa ãrea nibad̶ai panuu ãyaa wãrãad̶amera.

Hebreos 3:14

Dachiba ab̶aed̶eed̶e ijãaped̶aad̶ad̶eed̶ebena ab̶a biuduud̶aa Cristod̶e ijãa panuubʉrã, ichi ome dauchia jãadua panad̶ai.

2 Timoteo 1:9

Dachi Akõreba dachi karibasii maud̶e iusii ichi baita biꞌia nuread̶amera. Dachiba biꞌia wau panuud̶eeba makaabasii, maumaarã ichi sõbiad̶eeba waui kʉ̃risia b̶uasiid̶eeba maka wausii. Biawãra nau iujãa b̶uai naed̶e Dachi Akõreba ichi sõbiad̶eeba kʉ̃risiasii Jesucristod̶eeba dachi karibai.

Colosenses 1:23

Maud̶eeba Cristod̶e ãrea ijãa panuud̶eeba dauchia jãadua nuread̶ai panuu. Chi bed̶ea bia Cristo ʉ̃rʉbena machiba ũriped̶aad̶a ida b̶ud̶aabai panuu, maumaarã Dachi Akõreba deai jarad̶a esed̶aud̶ai panuu. Mau bed̶ea bia joma nau iujãad̶e jaradea panuu. Ara mau bed̶ea mʉa bid̶a jaradea b̶uu.

Efesios 2:8

Jesusd̶e ijãasid̶aud̶eeba Dachi Akõreba ichi sõbiad̶eeba machi karibasii. Ara machi du ab̶a karibad̶aabasii, maumaarã Dachi Akõréburu bari karibasii.

1 Corintios 1:18

Chi tʉbʉchia kiikaud̶aa wãd̶ai ẽbẽrarãmaarã, Cristo cruzd̶e biud̶a ʉ̃rʉbena bed̶ea kĩranema berrea b̶uu. Maamina dachi, chi Dachi Akõreba karibabadaurã, dachiba kuitaa panuu mau bed̶eaba Dachi Akõre poyaabarii kuitaabia b̶uu.

Santiago 2:26

Biud̶a jauri wãꞌãe nii. Ara mau kĩra Dachi Akõred̶e ijãa b̶uu a b̶uuba biꞌia wauwẽebʉrã, biawãra ijãawẽa b̶uu. Ichiba ijãa b̶uu a b̶uu ẽbẽra biud̶a kĩra nii.

Santiago 2:14

Ãbarã, ab̶auba Jesucristod̶e biawãra ijãa b̶uu aaruubʉrã, maamina biꞌia wauwẽa b̶uubʉrã, ¿mau aid̶ai b̶uka? ¿Mau biawãra karibai b̶uka?

Hebreos 10:23

Dachi Akõreba ichiba jarad̶a kĩra waubariid̶eeba dachiba kʉ̃risiabadau maud̶e jomaurãmaa jarabadau mau ab̶a bid̶a ida b̶ud̶aabai panuu.

Lucas 8:13

Netaa mo ʉ̃rʉ ioro bia wãꞌãed̶e b̶aed̶a nau jara b̶uu: waabenarã ẽbẽrarãba Dachi Akõre bed̶ea ãrea kĩrajʉʉ ũribadau, maamina ãrea karr jidaud̶akaud̶eeba sõd̶eeba ijãad̶akau. Maud̶eeba kãꞌãabariwãed̶e ãrea kachirua wauduud̶e ida b̶ubadau.

Santiago 2:17

Ara mau kĩra chi Jesucristod̶e ijãa b̶uu a b̶uuba biꞌia wauwẽebʉrã, biawãra ijãawẽa b̶uu. Mauba ijãa b̶uu a b̶uu, ẽbẽra biud̶a kĩra nii.

Hebreos 4:14

Dachi Akõre Warr Jesús, dachi Paare Mechiu bajãad̶aa wãsii. Ichid̶e ijãa panuu a panuud̶eeba biawãra ijãa panad̶ai panuu.

2 Tesalonicenses 2:15

Maud̶eeba ãbarã, dauchia jãadua panásturu. Daiba jaradeaped̶aad̶a maud̶e kartad̶e b̶ʉped̶aad̶a kĩrabarã́sturu.

Gálatas 3:4

Machi biꞌiwãe panad̶a Cristo kakua ¿bari makaska? ¡Mʉʉmaarã, machi bari ãrea biꞌiwãe panad̶aabasii!

2 Corintios 6:1

Daiba Dachi Akõre ome ichi traju wau panuud̶eeba, machimaa chi chuburia id̶iiduu Dachi Akõreba ichi sõbiad̶eeba kariba b̶uu ʉ̃rʉbena ida b̶urãad̶amera.

Romanos 1:16

Mʉ kĩra nejasiakau chi bed̶ea bia Jesús ʉ̃rʉbena jaradeai baita, chi mau bed̶ea ijãaduu Dachi Akõreba ichi poyaad̶eeba joma karibabariid̶eeba; naa judiorã karibai maud̶e judiowãerã sid̶a.

1 Corintios 15:14

Cristo chokae jiraduubasiibʉrã, makarã daiba bari jaradea panuu maud̶e machiba ichid̶e bari ijãa panuu.

1 Corintios 1:21

Dachi Akõreba ichi kʉ̃risia kuitaad̶eeba waud̶aba, ara ichi unubia b̶uu. Maamina nau iujãad̶ebenarãba ara ãchi kʉ̃risia kuitaad̶eeba ichi unud̶akau. Chi daiba jaradea panuu kĩra kawawẽa b̶uu kĩra b̶umina Dachi Akõremaarã bibuara b̶uu maud̶eeba joma chi ichid̶e ijãaduu karibai.

Romanos 11:22

Ãrea kʉ̃risiásturu saka Dachi Akõreba ichi sõbiad̶eeba karibabarii maud̶e saka kastikabarii. Judiorãba ijãad̶aabasiid̶eeba Dachi Akõreba kastikaped̶a ãchi ida b̶usii. Maud̶e machi judiowãerã ichi sõbiad̶eeba kariba b̶uu maud̶e kariba b̶uai. Maamina maud̶eeba panad̶ai panuu. Machiba ijãa panad̶awẽebʉrã, Dachi Akõreba machi sid̶a kastikaped̶a ida b̶ui bakuru jua b̶ʉatuuruu kĩra.

Hechos 8:13

Simón bid̶a ijãasii. Maabae boro eaped̶a Felipe baara nibad̶e wãsii. Felipeba ẽbẽrarãba ne poyaa waud̶akau mechiu wau b̶uu Simonba unusiid̶e kuitaa kʉ̃risiaswãe b̶eesii.

Hechos 2:47

Ãchiba Dachi Akõremaa biꞌia berreabachid̶au. Maud̶e waabenarãba ãchi biꞌia unubachid̶au. Maud̶e Dachi Mechiuba ewaricha ẽbẽrarã karibabachii. Maka Dachi Akõreba ãchi ãrea bawaabiasii.

1 Corintios 11:2

Ãbarã, ewaricha mʉ kĩraba panuud̶eeba maud̶e mʉʉba jaradead̶a ũri panabadaud̶eeba machimaa biꞌia jaraaruu.