San Lucas 9:26 - Manityanati Tupax

²⁶ Axtɨ anati naki kɨsoboti ichopikiñɨ ityopikityo axɨba nisura, axtityo Aɨtoxti ñoñɨnx kɨsoboti ñana ñɨnanati axtɨ kuatati aɨbu nɨriakaxti aɨbuityo nɨriakaxti Yaɨtoti ichepe axɨbama ángeles.

Manitanati Tuparrü

²⁶ Arrti naqui cüsobo saübuñü y aübu nisura, arrüñü ito chirrancapü yaca aübuti au manu nanenese auche iseca tato aübu tarucu nanentacarrü y aübu tarucu nisüriaca uiti Iyaü, y aübu bama angelerrü samamecana ümoti, ta arrüñü Ñemanauncurratoe Ñoñünrrü.

San Lucas 9:26 Referans Kwoze

2 Timoteo 2:12

Axtɨ utakisɨrɨka aɨbu narukux oemo, iyebo ñana osoi kauta nakaxti. Axtɨ chuxiankapɨ basuriuruti, axtityo chiyasuriurutipɨ oñɨ ñana.

Romanos 1:16

Chisɨsokapɨ aɨbu nuraxti Tupax, tyopiki tyone noñemaxti, uixh namanaiña axɨbama ikokotama ane maximiakatax ɨmoma, kusɨrɨboma axɨbama judíos takanaintyo axɨbama chɨtɨpɨ judíos.

San Marcos 8:38

Axtɨ anati naki kɨsobotiatai ñɨnanañɨ yotopiki nisura isukarɨ axɨbama chuxiampɨ nisɨborikixhimia, champɨ ikokotama, sanentityo ñana Aɨtoxti noñɨnx kɨsoboti ñɨnanati axtɨ kuatati tato aɨbu nɨriakaxti Iyaɨ ichepe axɨbama ángeles.

Apocalipsis 21:8

Tapɨ axɨbama taruku nixhukuxɨma, axɨbama chɨmakokonaumpɨma, axɨbama chuxiampɨ uimia ɨmo makiataka, axɨbama mayatabayoka, axɨbama xhanxɨma ɨmomantoe, mapichareruka, axɨbama manaunuma ɨmo matupaka nisamuku mañoñɨnka namanaiñaintyo mañapanka, tyonema ñana axɨbama sɨrobomatɨ au axɨmanu narubaityu pes, tyone axɨmanu kiatax konkox.”

San Mateo 16:27

Tyopiki axɨñɨ Aɨtoxti ñoñɨnx isekatɨ ñana aɨbu niriakaxti Tupax ichepe axɨbamaintyo ángeles, auki kaɨma toxio uiti taikiana ɨmoti taman nikuax axɨna isamutenti.

San Mateo 25:31

“Axtɨ kuatati tato Aɨtoxti ñoñɨnx, anentax tyupekuti abomaintyo tyupekuti axɨbama ángeles, tɨmonsoti au yarusɨrɨx nityɨmoxti.

San Juan 12:43

Uxia ɨmoma nuraxɨma makiataka kɨtɨpɨma tapɨ nisɨborikixhimia au nastaxti Tupax champɨ nɨmoche uimia.

Apocalipsis 20:11

Auki yastai taman yarusɨrɨx nityɨmoxti Yɨriabux purusubi, axtityo maniki tɨmonsoti iku. Sukarɨti kaɨma omensoro kɨx chepe napes, chanantopɨ anati astaiti tato.

SAN JUDAS 1:14

Axtityo Henoc, axti naki séptimo pɨrɨkɨti Adán, manityanati au noñemaxti Tupax naukiche nanti sane kɨtɨpɨma axɨmanuma sane nisɨborikixhimia: “Yasakatɨ kɨmenuti Yɨriabux, kuatati aɨbuma sɨrɨmanamampae axɨbama ángeles

2 Timoteo 1:12

sane naukiche taruku nichakisɨrɨkɨ oboi axɨba sane. Ta axɨñɨ chisɨsokapɨ oboi, tyopiki axɨñɨ tusiu iñemo ñakuti ɨmoche ñonkatɨ. Tusiuityo iñemo chepe axɨmanu nanenes ñana asaratitɨ tyaku axɨmanu toxio uiti iñemo.

Apocalipsis 3:5

Axɨbama chɨtapenekopɨma sane ñana purusubi naibixhimia, chɨkaɨburupɨ sobi nɨrixhimia ikuki axɨmanu kichonimiakax ɨmo sɨborikixh, ta surapoi nɨrixhimia ñana sukarɨti Tupax sukarɨmaintyo axɨbama ángeles.

Apocalipsis 1:7

¡Axti Cristo kuatati omonɨ kɨsaɨboka! Namanaiña ñana asaramati axɨbamaintyo uiche aityabairomati tɨkañe. Namanaiña mañoñɨnka ikuki axɨna kɨx oxonene ɨmoma ñana tyakuti. Ñemanauntu, Amén.

Gálatas 6:14

Tapɨ axɨñɨ champɨ tyopikiche ipukɨnu ta ipukɨnunka ui nikurusɨxti Yɨriabux Jesucristo. Tyopiki ui nikurusɨxti Cristo, nanaiña axɨna kɨx koiño iñemo tapɨ axɨñɨ isonkaityo ɨmo kɨx.

San Mateo 26:64

Aiñumuti Jesús nuraxti: –Sane takana axɨna ukanɨ. Sukanañɨntyo aume amasakati ñana Aɨtoxti ñoñɨnx tɨmonsoti au nepanaunkuxti naki taruku ñapanaunkuxti, niyekixhtityo tato omonɨ kɨsaɨboka auki napes.

Hebreos 13:13

Saneityo axoñɨ kuri chepeti Jesús tyɨrɨpo axɨmanu nipo meankax sane basuriu chepeti axɨmanu nikɨsoxti uimia naukiche ityakubaxiromati kɨtɨpɨ kurusɨx.

Hebreos 11:26

Au ñakionkoxti chuxiampɨ ɨmoti taruku nipukɨnunkuxti oboi nenaxi Egipto, au ñakionkoxti uxia ɨmoti asuriuti nityakisɨrɨkɨxti takana nityakisɨrɨkɨxti ñana Mesías. Tyopiki tusiu ɨmoti ta axti Tupax ane ñana toxiobo uiti ɨmoti ityobo.

2 Corintios 12:10

Ipukɨnunkaityo ui axɨna champɨ narukux iñemo, axɨna unumañɨ, sɨrɨmanatai nixhantɨmo, axɨna abomantai isiuñɨ axɨbaityo chɨtamampatai chomixhampɨ tyopikiti Cristo, tyopiki axtɨ chisusɨukapɨ ñonkisio taruku nisusɨu.

San Juan 5:44

¿Kausane apikoko axaño, axtɨ uxiantai nuraxɨma makiataka aume champɨ nɨmoche aboi axtɨ chuxiampɨ nastaxti naki kunauntañati Tupax aume?

Hechos 10:22

Axɨma aiñumuma: –Axɨsomɨ sobekatɨ ui yakɨpukuxti yɨriabux Cornelio, axti maniki ñoñɨnx uxia nɨsɨborikixhti, manaunuti ɨmoti Tupax taruku nikuasɨrɨkɨxti ɨmo axɨbama judíos. Tamanti ángel uiti Tupax nanti ɨmoti nauki aityasurutiyɨ aɨrotɨ au nipoxti, nauki onsaperioti nanunekaka.

1 Timoteo 5:21

Tyone nixhakɨpuku aemo sukarɨti Tupax, sukarɨtityo Jesucristo, sukarɨmaintyo axɨbama ángeles samamekanama uiti Tupax tapɨ anati naki taruku nikuasɨrɨkɨxti aemo pɨnanaki makiataka.