San Lucas 14:32 - Manityanati Tupax

³² Axtɨ astaiti chiñataipɨ aɨbuche aɨrotitɨ kɨmenuti, axtɨ anatiki iche maniki kiatax yɨriabux, bakɨpuruti axɨbama uiche uraboimia tari uxia tato uimia ɨmomantoe.

Manitanati Tuparrü

³² Arrtü onquisioti que chüpuerurrtipü, tiene que acüputi manitacarrü ümoti maniqui quiatarrü yüriaburrü, nauqui airrimiacati tato aübuti, tapü ane bahiquirri aübuti.

San Lucas 14:32 Referans Kwoze

Hechos 12:20

Tɨborikoti Herodes ɨmo axɨmanuma po'osoma auki Tiro ichepe Sidón. Tapɨ axɨma chepe ñakionkoxɨma nauki aɨromatɨ esati aparimia aɨbuti, ui nipukɨruxti Blasto tyakuma, tyonenti naki asaratitɨ tyaku nenaxixhti Herodes, axti manityanati tyakuma nauki uxia tato uiti ɨmoma, ityopiki axɨmanuma auki Tiro ichepe Sidón axɨna utuburiboma kuatɨ uimia auki nikɨxti Herodes.

San Lucas 12:58

Axtɨ anati naki masamunuti chɨrɨri aemo aɨkatɨ ichepeti esati yɨriabux, apache nikiubukɨ kausane aixhimiakati aemo axɨmanu chɨrɨri, tapɨ aɨkatɨ uiti esati naki uiche asaraiti aemo axɨmanu chɨrɨri. Ityopiki axti maniki yɨriabux, tyonenti kaɨma, ityoximianatiyɨ meku masortaboka, uimia kaɨma iñamanamakɨpo.

San Mateo 5:25

“Axtɨ anati naki ityomonɨ esati yɨriabux, aiña chepe nakionko aɨbuti apachesio kausane apixhimiaka tato aumeampatoe, tapɨ aɨkatɨ uiti esati naki bakuxtarabo aume. Tyopiki axti maniki yɨriabux tyonenti kaɨma ityoximianatiyɨ meku masortaboka uimia kaɨma aiñamanamakɨpo.

San Mateo 5:42

Axtɨ anati naki mankioti nenaxi apɨnanakikɨ, aityoximia ɨmoti. Tapɨ aisunkuta nachaku ɨmoti naki xhanxti aityoximiati tato aemo ityobo axɨna mankioti apɨnanakikɨ.

San Lucas 14:31

Saneityo axtɨ tamanti yɨriabux sɨrotitɨ ɨmo baikixh kutakikiboti kiatax yɨriabux, ¿ensapɨ chɨkusɨrɨbopɨ atɨmoti apakɨmunkuti axtɨ aɨbu axɨbama diez mil masortaboka iñatai aɨbuche aɨrotitɨ kɨmenu axɨbama veinte mil nububikixhimia?

San Lucas 14:33

Sanenti naki, chixhanxtipɨ aiñokoti nanaiña nenaxixhti, chɨmotipɨ aɨrotitɨ isiuñɨ.

San Lucas 19:14

Tapɨ axɨmanuma po'oso auki nikɨxti champɨti uxia uiti ɨmoti, bakɨpuruma isiuti axɨbama uiche namatɨ sane: ‘Chɨsuixhankapɨ nauki yɨriabuxti naki ñoñɨnx suiñemo.’