Gênesis 22:12 - Kaxinawá Bíblia (BR)

¹² nai tsumã yuikĩ: —Mĩ bake haska wakĩ tenãyamawe. Deuski mesekĩ mĩ bake bestitxai mĩ haki hawa yaushiama ẽ unaiĩ— akaya

Gênesis 22:12 Referans Kwoze

Santiago 2:18

Haskai tsuãra ikũwã kayabi wariamabe hãtxai eskai mã unãtinãtirubuki. Matu yuinũ nĩkakãwẽ. Tsuabubera hãtxakĩ yuikĩ: “Mianã, Cristo mĩ ikũwãyã eãnã, yura betsabu ẽ merabewakubainaii, ikĩ ẽ yuiaiwẽ taeshũ haska yura betsa betsapa merabewai ẽ pe hiwemis mia uĩmakĩ haska Cristo ẽ ikũwaĩ ẽ mia uĩmatiruki. Ẽ akaya hakia miã tsuara merabewama haskara Cristo mĩ ikũwaĩ shabakabi mĩ ea uĩmatirumaki. Hãtxawẽs besti ikũwãkĩ mĩ hawara mĩ ea uĩmatirumaki”, akĩ mã hatu dakematiruki.

1 Samuel 15:22

hanushũ Samuelĩ yuikĩ: “Senhor Deusũ betxipai benimamisrã, nũ ha nĩkakĩ nũ ashuaĩ besti betxipaimiski. Hamẽ ha inabu sheni menukĩ keyushũmisbu inũ hawẽ kẽwãti nami pitxãshũ pimisburã, hawẽ Senhor Deus benimai beshmasmiski. Habũ Senhor Deus nĩkakĩ ashũkubaĩmisburã, habuwẽ benimahairamiski, txashuwã sheni inũ hawẽ nami menukĩ keyushũmisbu binuarã.

Romanos 8:32

Haska inũ, hawẽ bake hawa yauxitaskama yunua tashnitã mawakĩ nukubu nukũ txakabu nuku buashuniwẽ taeshũ nũ habu Jesus Cristoki dasiabu hawẽ taeshũ nuku duawakĩ hamapai tibi hawẽ bakewẽ nuku ashunishũ Deusũ nuku ashũkubainikiki.

1 Coríntios 10:13

Tsuabũra hawara txakabu ma huni mã meriama inũ txakabuhairatũ matu atxima ana matu atximakatsis ikai nukũ yura babũ nũ tenetirumarã, xinãkãwẽ. Haskawẽ taeshunã, mĩ yura babubiakẽ Deus putama haki txiti ikubaĩkãwẽ, nuku babu watã hau nuku bika tenemakĩ haska tsuã tenetiruma nũ haskatã binutirumaki. Matu haska tenemabiaya hawẽ baxikuama Deusũ hawẽri hawẽ kuxipa matu unãmakĩ matu hawẽ tashnimakĩ matu binumashanikiki, txakabu tenekĩ mã binuaiwẽ taeshunã.

Mateus 19:29

Haska inũ, tsuabũra ea txibãkĩ Deusũ hãtxa kakape yusĩtanũ ishũ dasibi hatũ hiwe henekĩ hatũ betsabu inũ hatũ puibu shunũbaĩkĩ hatũ ibubu shunũkĩ hatũ bakebu baxikĩ hatũ bai henekĩ keyubaĩ yusĩkubaĩmisbuwẽ taeshũ na habiatiã Deusũ ana hatu manakukĩ duawamisshũ haska uatiã hiwexinawẽma Deusũ pepawẽ hatu manakuhairakĩ haska tanatirubuma hatu itxawamakubaĩxĩshũ hanu ma bari keyuaitiã hiwea kayabi hatu inãshanikiki.

Gênesis 22:2

yuikĩ: —Mĩ huni bakerã, ha mĩ betxipaihairairã, mĩ aĩ kayabĩ bake bestitxai Isaquerã, Moriá mai pakea anu iyuwe. Hanu ha mati ẽ mia uĩmai anushũ mĩ bake Isaque ea inãshãwẽ, ea daewakĩ ea menu keyushũkinã— aka

João 3:16

Jesusũ ana Nicodemos xinãmakĩ yuikĩ: —Yura betsa betsapa dasibi hiwebaunabuwẽ nuihairakĩ Deusũ eska xinãtã ea hawẽ bake bestitxai yunukĩ tashnimaniwẽ taeshũ tsuabũra ea ikũwãkĩ hawẽ hiwea kayabi benutima bitã mawa kayabiama Deusbe hiwekuĩshãkanikiki, ikibi ikirã.

Romanos 5:8

Haska keska binumakĩ Deus dasibibuwẽ nuikĩ nuku abuai nuku unãmanirã, dasibibu nũ txakabu husia hiwebiakẽ ha xinãma Deusũ Cristo yunua tashnitã nukũ kupiti nuku bishuĩ ha besti nuku mawashuniki.

2 Coríntios 8:12

Hanushũ tsuabũra txanima kayabi yura betsa merabewakatsis ikaibu Deusũ hatũ xinã nuima unãkĩ hatuwẽ Deus benimamiski. Hawara haya inũ hawara hayama xinãma hakia haska hawara pepa nũ haya nũ inãtirubu Deusũ nukukiri xinãmiski.

Hechos 9:31

Ha haskaibutiã ikũwaĩbu Judéia mai pakea anuabu inũ, Galiléia mai pakea anuabu inũ, Samaria mai pakea anuabu itxakawakĩ ana tsuã hatu meabuma unãnuma hawama hiwei hanua ikũwaĩbu kuxipai Deus kuxipaki meseaibũ hawẽ Yushĩ Pepatũ hatu merabewaya ana itxapabũ ikũwaĩ mirimabu hatuki dasikubaini hiwenibukiaki.

Provérbios 1:7

Senhor Deus duawakĩ haki datekĩ hawẽ hãtxa nĩka pewakĩ unanepakĩ tapĩ taewabaĩtirubuki. Hakia tsuara unaĩsmapabũ unanepati inũ yusĩti hãtxa pepa danãmisbuki.

Êxodo 20:20

hatu daewakĩ Moisĩ yuikĩ: —Dateyamakãwẽ, mã mawamakirã. Deus bututã mã haki datei mesepakeshanũbũ matu unãti waikiki. Pe bestikũkaini hiwei mã ana txakabuyamashanunã— hatu wa

Mateus 16:24

hanua Jesusũ nũ hawẽ tsumabu nuku yuikĩ: —Tsuara eki txiti ikatsis ikirã, haska hamebi xinãmis hakimatã: “Ẽ habe mawatiruki”, ikĩ hau ea txibãkubainũbũwẽ.

Gênesis 20:11

hanushũ Abraão yuikĩ: —Eã shinãkĩ: “Nenua mã Deuski meseabumaki”, ika “Ea tenãtã ẽ aĩ bitirubuki”, ishũ haskawẽ taeshũ matu yuikĩ: “Ẽ puiki”, akĩ ẽ matu yuitushimaki.

Hebreus 12:28

Hanu Deus shanẽ ibui hiwemis hawẽ shanẽ nuku hanu hiwemashanairã, hawa maeama ishanikiki. Haskakẽ Deus pehaira wakĩ kẽwãkĩ xinã txãkãwãkĩ haki mesekĩ hawara haska abuai keska benimawakĩ ashũkubainãkãwẽ.

Mateus 5:16

Bĩ txashamis keskai hawa huneama merabenaĩ hiwekubaĩshãkãwẽ, matũ hãtxa nĩkakĩ mã pepaibu xinãkĩ habũri hau Epa Deus kẽwãshanũbunã— iwanã,

Malaquias 4:2

Hakia matubu ewẽ datekĩ mã ea duawakubaĩmisbu bari pesheai keska ẽ pepa matu txashashũshanikiki, ana hawa matu isĩ tenemama ẽ kupiti matu nemashunirã. Haskaiwẽ taea benimai matubu mã ishtxu ishtxu ikũkaĩshanaii, kene meranua ina awa bake kaĩkainai keskairã.

Salmos 2:11

Senhor Deus duawai dayashunirã, haki mesei datekĩ benima besti wakubaĩkãwẽ.

Salmos 1:6

Hakia hawara Deusũ betxipaiai yurabu pepakĩ txibãmisbu Senhor Deusũ hatu mekekubainaya habũ Deus txibaĩsbuma hani pashati hayama benuhairashãkanikiki.

Jó 5:19

Hawẽ yusĩti hãtxa mĩ nĩkakĩ txibãkubainaya mia mese mese wakĩ mia bika tenemaibu Deusũ hatu mia nemashũshanikiki. Hawa txakabu hau miki nukuyamanũ haska wakĩ Deusũ mia ashũkubaĩshanikiki.

Hebreus 11:19

Haska Deusũ ashuã uĩkĩ hawẽ kuxipakiri Abraãonẽ tapĩniki, Deusũ mawabu bestẽwãtirukiri tapĩkinã. Haskawẽ taeshũ hawẽ bake inãkĩ Deus tenãshũbiai kashũ ana hawẽri hawẽ bake hiwea txĩtũwãbirãkĩ hawa wama ishu keska iwenikiaki. Haska wakĩ Deusũ kuxipa hawẽ xinãmati shabakabi hatu unãmaniki.

Gênesis 42:18

José ana hatu yuikĩ: —Deusũ kushipaki ẽ meseaii. Haska ẽ matu yuiai keska ikãwẽ, mã hiwenunã, txanima mã huni pepamẽkaĩ. Matu bestitxai bitxiti hiwe anu bashikukãwẽ. Hatiri shekiwãyã bukĩ hau matunabũ pinũbũ hatu bushũrikãwẽ. Ana hukinã, matũ betsa mashku ea uĩmakĩ iweshãkãwẽ, mã haska wabiranaya matũ hãtxa ẽ ikũwãshanaii. Hamẽ matũ betsa mashku mã iweamarã, ana piti biama mã mawashanaii— hatu wa habũ yuikĩ: —Mĩ nuku haska wairã, peki— ikaibũ

Apocalipse 19:5

ẽ nĩkaya ha Deus tsauwa namanua hui betsa tashniriakĩ yuikĩ: “Mã Deusũ tsumabuũ, mai hirabi anua betsabu mã shanẽ ibubu inũ betsabu mã shanẽ ibubumã Deusũ kuxipaki mesekĩ duawai pepakĩ kẽwãkubaĩkãwẽ”, ikaibu uĩkĩ nĩkatã ẽ matu keneshunaii.

Gênesis 22:13

hanushũ hawẽ petxiuri Abraão hawaira uĩkĩ txashuwã bene hawẽ mashũki tsukuski bitxa hawaira atxitã neatã beshũ hawẽ bake hana butetã pekatã hanushũ Deus kẽwãkĩ hawẽ shãtukũ txashuwã bene tesẽshũ kuashũkĩ menu keyunikiaki.

Jó 1:1

Mai pakea ewapa Uz anu huni betsa Jó hiwea huni pepa hawa Deuskiri txakabuismatũ Deuski mesekĩ dayashũkũkaĩkĩ hawa txakabu mekĩ tsua txakabuwakatsi ikama hiwepaunikiaki.