Efésios 2:15 - Kaxinawá Bíblia (BR)

¹⁵ Deusũ Moisés yunua hawẽ hãtxa kenekĩ hawẽ yunuti inũ hawẽ nemati haska txibaĩ nũ danãnanãrabei hiweshũ xinaĩ nũ ibiakubaĩmisbũ ana nuku haska hiwemakatsi ikama natiã yura shuku dabe wama hawenabu bestitxai keska nuku waniki, yura bena nuku wakinã, nũ judeubu inũ mã judeubumarã. Haska wakĩ nuku unãnuma hiwetiwaniki.

Kashinawa : Diosun Jesúswen taexun yuba bena yiniki

¹⁵ Diosun Moisés yunua jawen jancha kenekin jawen yunuti inun jawen nemati jaska chibain nun danananandabei jiwexun shinain nun ibiakubainmisbun ana nuku jaska jiwemakatsi ikama natian yuda xuku dabe wama jawenabu bestichai keska nuku waniki, yuda bena nuku wakinan, nun judiobu inun man judiobumadan. Jaska wakin nuku unanuma jiwetiwaniki.

Efésios 2:15 Referans Kwoze

Colosenses 2:14

Haska wakĩ hawẽ yunua inũ hawẽ nema Deusũ nukubukiri mese wanishũ hawẽ nukũ txakabu tibi Deusũ tanakĩ netãkubainishũ hawẽ taeshũ Deusũ nuku kupitirubiakẽ ha binumai Cristo cruzkia nuku mawashũkĩ nukũ txakabu mastakĩ nuku bepu keyushuniki.

Gálatas 3:10

Hanushũ Deusũ hãtxakiri hawenabu Moisés yuikĩ: “Hawẽ yunuti inũ hawẽ nemati ẽ matu keneshunai tsuabũra dasibi txibãhairabumakẽ Deusũ hatu yupukĩ pe hiwemama ishanikiki”, haska watã hatu keneshuniwẽ taea txibãmabia hatũmebi pepapaikĩ hawẽ yunuti inũ hawẽ nemati txibãpaikĩ pewabumakẽ Deus hatuki sinatamakĩ yupushanikiki.

Hebreus 8:13

Hanua hawẽ yubati hãtxa benakiri Deusũ Jeremias hãtxa watã xinaĩ: “Ha dukũ ẽ yubati hãtxa sheni ẽ anirã, ana ikama ishanikiki”, ikĩ ana atimawakĩ xinãkĩ: “Bena ẽ yunuaya ha dukũ ẽ yununi shenikũkaini yamai kaikiki”, iwanã, Deusũ xinãniki.

Colosenses 3:10

Tari bena sawea keska wakĩ matũ hiwea mã ma benawaki. Matũ hiwea ma benawairã, haska Deusũ abumis keska hiweshũbaĩkãwẽ, hatũ matu damiwani keskairã. Haskakĩ itxapa mã hakiri unãshanaii.

Colosenses 2:20

Tsuabũra Cristo mã ma ikũwaĩburã, mã ma Cristobe mawani keskabuki. Haskawẽ taeshũ na mai anushũ shanẽ ibukĩ hatũ kuxipawẽ beya betsa betsapa yunuaibũ ana habũ matu tsumatirubumaki. Haskabia haskai ikũwãbumabe hiweshũ habũ matu yunuai nĩkakĩ mã txibãkĩ heneriabumamẽ, habu keskakinã?

Gálatas 3:28

Haskai mã yura bestitxai keskaki. Judeubu kasmai judeubuma inũ, tsumayabu kasmai tsumabuuma inũ, hunibu kasmai aĩbuaibu xinãma hakia mã Jesus Cristo ikũwaĩbu besti dasibi mã yura bestitxai keska mã haki dasia xinãkubaĩkãwẽ.

Efésios 4:16

Hanua Cristo nukũ Shanẽ Ibuwẽ taea dasibi ikũwaĩbu nuku dasiwa nuinamekĩ, ikũwaĩbu tibitũ daya betsa Deus ashuaĩbu inũ ikũwaĩbu dasibi merabewakĩ Cristowẽ taeshũ nukunabu dasibi mã hatu kuxipa wakubainaii, nukũ pabu tibi ewai nũ kuxipamis keskakinã.

2 Coríntios 5:17

Hanushũ tsuabũra Cristo ikũwaĩ haki nukui dasiayarã, habũ xinã sheni Deusũ betsa waya hawara mekĩ txakabuwamis henetã hatũ Shanẽ Ibu Cristo txibãnũ ika yura bena keskabuki.

Hebreus 7:16

Haska hunibu hau nukunabu Deusbe hãtxashunika binua ikũkaĩshanũ Levĩ bababu anua katumisbu keska wakĩ ha hãtxa yununi txibãkĩ nukũ Shanẽ Ibu Deusũ katuama iniki. Hakia hiwea kuxipa haya tsuã yamawatirumawẽ taea niti ikama nuku hãtxashũpakeikiki.

Hebreus 9:23

Haskawẽ taeshũ txanima himiuma tsua meribi itirumawẽ taeshũ yuinaka mirima detekubaĩpaunibuki, hatũ txakabu ana Deusũ xinãtima wamakinã. Hakia haska wakinã, haska txipu Jesus Cristõ nukũ txakabu nuku buashũshanai ha binumakĩ ha kayabima mawakĩ ha keska wakĩ akubainibuki.

Isaías 9:6

Hamẽ betsarã, Deusũ hawẽ kushipawẽ dasibi betsa wakĩ bakeishta nuku inãshanikiki. Ha bake nuku anu yunua kaĩshanikiki. Hatũ kushipa bitã shanẽ ibuhairashanikiki. Hawẽ kena tibi inãkinã, eska washanikiki: Hawẽ yubakani nũ haskashanai unãmanika pehairaki. Deus kushipahaira tsuã binutirumaki. Epa hiweibi hiweaki. Hawẽ taea Deusbe unanuma hiwetiki.

Efésios 2:10

Deusũ haska nukukiri xinãkĩ hatũ nuku damiwakinã, hawẽ bake Jesus Cristoki dasitã hawenabũ hawẽ daya pepa inũ hawẽ bai pepa txibãkĩ ashuĩ nũ hiweyukubaĩshanũbũ Deusũ bebũkiri nuku katukĩ pewaniki.

Efésios 2:14

Cristorã, ha besti nukũ unãnuma hiwemanikaki. Ha Cristõnã, nũ judeubu inũ mã judeubuma habias hawenabu wakatsi ikĩ haskawẽ taea nũ danãnanaĩ pashka hiwemisbu ha kene Templo anua hawẽ kenekĩ kebẽnibu keska hawẽ yurawẽ ha kene kebẽnibu keska yamawakĩ ana xinãtima waniki, nũ ana sinatanameyamashanũbunã.

Efésios 2:16

Cristo hamebi haska nuku dasi wakatsi meneirã, nũ ha shuku dabe sinatai nũ danãnanãrabei hiwemis Cristo cruzkia mawakĩ Deus nukuki sinatai nuku ha dabe daewashuniki, nũ judeubu inũ mã judeubumarã. Nuku haska wakĩ nuku yura bestitxai keska waniki.

Colosenses 3:11

Mã ma haskarã, tsuabũra Cristo ikũwaĩbu hawenabukiri eska xinaĩ mã hãtxatirubumaki, Gregonawaburã, judeuburã, habũ judeubũ beya txibãkĩ habũ hina kubitxi meshtemisburã, habũ judeubũ beya txibaĩsbumarã, nawa shukuabu tibirã, pubẽburã, habũ habu dayashũmisburã, tsuã tsumamarã. Nũ haska betsa betsapabubia haska xinaĩ hatukiri hãtxayamakubainãkãwẽ. Cristorã, dasibikirã, dasibibũ shanẽ ibui keyuaki.

Colosenses 3:15

Hakia Cristõ unãnuma matu hiwemayarã, ha matũ huĩti uke merã shanẽ ibu wamakãwẽ. Matu haska wakatsi ikĩ Deusũ ma matu katunishũ habias yura matu wakatsis ikikiki. Dasibi ma hatũ matu ashuni xinãkĩ kẽwãkubaĩkãwẽ.