João 12:34 - Kashinawa : Diosun Jesúswen taexun yuba bena yiniki

³⁴ januxun mapubaunabu betsan yuikin: —Diosun jancha kenenibu anua uinkin nun manakamisdan, “Mesías Cristo jua matube jiwepakexanikiki”, akin kenenibukenan jaskakin: “Nukun Juchi Kayabi Iyua Mesías binikin sanankin nichinxankanikiki”, ikin ¿min jaska nuku yuixumen? ¿Jaskakenan, tsuamen, nukun Juchi Kayabi Iyuadan?— aka

Kaxinawá Bíblia (BR)

³⁴ hanushũ mapubaunabu betsã yuikĩ: —Deusũ hãtxa kenenibu anua uĩkĩ nũ manakamisrã, “Messias Cristo hua matube hiwepakeshanikiki”, akĩ kenenibukenã haskakĩ: “Nukũ Hutxi Kayabi Iuwa Messias binikĩ sanãkĩ nitxĩshãkanikiki”, ikĩ mĩ haska nuku yuishumẽ? Haskakenã, tsuamẽ, nukũ Hutxi Kayabi Iuwarã?— aka

João 12:34 Referans Kwoze

Romanos 5:18

Jaskaken juni bestichai Adánen chakabuwanidan, jawen taea jatun kupitiwen jau mawakubainxanunbun yuda dasibibu Diosun jatu yupuniki. Jabiaskadi wakin juni bestichai jawa kaneismatun nukun kupiti nuku bixundiai mawaniwen taexun yuda dasibibun nun ja ikunwainbu Diosun nuku pepawatan jabe niti akama nuku jiwekuinmaxanikiki.

Romanos 3:19

Jaskaken Moisés inun Diosun jancha yuixunikabun yusini unanjaidabianibu: “Man pepaki”, akin Diosun jatu jaskakidi shinankin yuiamaki. Jakia jaska yuda dasibi mai jidabi anuabun chakabuwakin nun kanemis nuku unanti waxanai dasibibu Dios bebunua nun jawa janchatidumaki.

João 15:25

Jaskaken Diosun jancha yuixunikan yuikin: ‘Jawamawen taexun ichakawakin ea dananibuki’, iwanan, keneni keska menekin ea danankanikiki.

João 12:32

Mai anuxun ea binikin sanankin nichinmabun jaskawen taexun dasibibu ninia keska wakin ea anu en jatu iwexanaii, jau ichapabun ea ikunwanunbunan— iwanan,

João 10:34

ana jatu yuikin: —Manakanwen. En Dios ichamaki. Diosun jancha yuixunikatun kenekin: “Ja idabeaibu pewanika jatu wakin Diosun jawen jancha jatu yunukin yuikin: ‘Man jatu medabewakubainaidan, man diosbuki’, ikin Diosun jatu yuiniki”, akin jatu kenexuniki, na kenedan, nun unankanaii.

Mateus 21:10

janu Jerusalén anu Jesús jikiaya jaskakubainaibu ninkatan uinun ika bei: —Nadan, ¿tsuamen?— ibidan ibidanaibun

Mateus 16:13

Janua Jesús nun jawen tsumabube kai ja mae pakea Cesarea Filipo anu jikitan nuku yukakin: —Yudabunan, en matun Juchi Kayabi Iyuadan, ¿en tsua ea yuimisbumen?— nuku wa

Mateus 8:20

jawen shinan unanun, iwanan, Jesúsun yuikin: —Kaman inu jawen kini jayaki. Peiyabu jawen na jayabuki. Jakia matun Juchi Kayabi Iyua ean en jatu yusinkubaunai janu uxati jiwe en jayamaki. ¿En ikai keskai min idiatidumen?— akaya

João 8:28

jaskawen taexun Jesúsun ana jatu yuikin: —Matunan, matun Juchi Kayabi Iyua ea binikin benimaxun janu man ea unanxanaii. Natianan, jaska en shinainwen en akamaki. Jakia jaska en Epan ea yusini besti en yuimiski.

Hebreus 7:24

Jakia Jesús ana mawatidumawen taea ja besti Diosbe nuku janchaxunkunkainaya betsan jaska waxun jawen daya mebintidumaki.