Hebreus 12:3 - Kashinawa : Diosun Jesúswen taexun yuba bena yiniki

³ Ja inun, yudabu jatu medabewakin jatu uinmabia jabun ikunwankatsi ikama juni chakabubun Jesús ichakawabu yumanbiakin jawen Epan yunuti jancha Jesúsun jeneama ini jaska keska shinankubainkanwen, Jesús ikunwain punu nukai Diosun baiwen kabiai man bextekeyamakubainxanunbunan.

Kaxinawá Bíblia (BR)

³ Ha inũ, yurabu hatu merabewakĩ hatu uĩmabia habũ ikũwãkatsi ikama huni txakabubũ Jesus itxakawabu yumãbiakĩ hawẽ Epã yunuti hãtxa Jesusũ heneama ini haska keska xinãkubaĩkãwẽ, Jesus ikũwaĩ punu nukai Deusũ baiwẽ kabiai mã beshtekeyamakubaĩshanũbunã.

Hebreus 12:3 Referans Kwoze

Gálatas 6:9

Jaskaken pepakunkainkin jeneyamanankanwen. Jatiada Diosun janu kupiaitian medabenankin pepawakubainkin nun jeneamaken Diosun duawakin pepawendi nuku kupixanikiki.

2 Coríntios 4:16

Jawada bika xabakabi mekin nun teneai jawaida keyuxanaiwen nuiama jaska Diosun mekekin niti akama nuku jabe jiwemaxanai uindiamabia shinankin nun uinkatsis ikaii, ikibi ika junea keskadan. Ja inun, natian na jiweawen nun jiweaidan, bikaishta nun teneai jawama keskaki, jawaida jayabiatan keyumisdan. Jakia jaska jawen taea nun bika teneaidan, Diosun pewen kupikin nuku benimawa chakayamaxanai akunjaida bikatsi nun manaii. Jaskaken nukun yuda ewanai babui mawabiaya badi tibi Diosun nukun jiwea tibi uke medanua benawakubainaya punu nukai nun chintuntidubumaki.

Apocalipse 2:3

en jancha jeneama ea duawanun ika ewen taea nuitapabiai punu nukai chintuanma man chibankubainai en matu unaiin.

1 Coríntios 15:58

Jaskaken en betsabu inun en puibuun, jawada nukun Xanen Ibun matu yunua jeneama akin man jamen dayama man unainwen taea Jesús chibain chintuanma shinan betsa wama nukun Xanen Ibuki xukua pejaida dayakin apakekanwen.

Hebreus 12:2

Cristo nuku ixuni jakidi dukun unankin shinankubainankanwen. Jabun nun ikunwainbu nun jaki chiti ikabu jatunan ma nuku pewaxunkubainikiki. Jaskawen taea Jesús cruzkia nuitapaidan, ja ichakawakin nuitapawaibu jawen dake shinanma nuku mawaxuniki. Jaskaidan, nuitapawabiabu mawakin binutan benima paepayabi jawen Epan xanen ibu tsauti yusiudi jabe xanen ibui tsauxanai unain iniki.

Hebreus 3:1

Nuku jaska wakubainaiwen taea en betsabu inun en puibuun, nun ikunwanxanunbun Diosun nuku kenakin katuniwen taea nun jawenabuki. Jaskaken Diosun jawen bake jawen kushipaya yununika wakin ja Diosbe nuku janchaxunika Xanen Ibu Jesucristo dasibi betsabu jatu binunidan, ja besti shinankubainkanwen.

2 Coríntios 4:1

Jaskaken Dios nukuwen dabanan ikin jawen yuba benakidi nun yusinun ixun nuku yununiwen taea jawen babui punu nukai nun bextekeisbumaki.

João 5:16

juindukuntitian Jesúsun xuxawawen taea jaki sinatakin judio xanen ibubun Jesús danankin yuainbun

Hebreus 12:5

Ja inun, nun jawen bakebu Diosun nuku yusini man jakimaii. Matun xenipabu xanen ibu unanepa Salomónen eska jawen bakebu yuikin: “En bakebuun, jaska Dios matuwen nuikin matu pewamis matu yuinun ninkakanwen. Diosun tsuabuda bechipaikin jawada bika tenemakin jatu kupimiski. Ja inun, tsuabuda Diosun jawenabu wakin jatun chakabu jatu unanmamiski, nun ana ayamaxanunbunan. Jaskawen taexun jawada bikawen Diosun matu unanmai dananyamakanwen. Ja dikabi, matu kunyan akaya punu nukadiayamakanwen”, jatu jaska wapauni na jancha jakimayamakanwen, Diosun jabias matu ana yuiai keska shinankinan.

Lucas 14:1

Ana juindukunti betsatian fariseo xanen ibun jiwe anuxun Jesúsun jabetan piaya fariseo betsabun uiainbun

2 Tesalonicenses 3:13

En betsabu inun en puibuun, jawada daya pepa aki man jawen jiwemis akidan, punu nukai jin ikin jeneyamakanwen.

João 18:22

jadi Jesúsun kemaya Templo mekenika betsa Jesús dapi nixun meken pechiudi kepais akin yuikin: —Nukun xanen ibujaida jaska yuiyamawe— aka

João 8:52

janua jabu Jesúski sinatakin yuikin: —Chanima min yushin chakabu jayaki. Nukun xenipabu pepa Abraham inun Dios janchaxunika dasibibudi mawakubainibuki. Jakia: “Tsuanda en jancha ninkai mawama ixankanikiki”, ikin min yuiaidan, ¿xanen ibukin min jatu binunkin keyua iki ikai? ¿Miadan min tsua iki ikai, jaska shinain ibubis keinan?— akabu

João 8:59

detekatsi ikin mishki biake biaketan tsakapananbun mapubaunabu anu junei nashui itan Templo anua kainkaini

João 8:13

janua fariseobun jaskai ninkai jaki sinatakin yuikin: —Mimebi kein min pepaidan, jawa kushipa min jayamaki— akaibu

João 7:12

yudan kaian Jesúskidi janchai yuinamei betsa betsapabun jakidi yuikin: —Jadan, juni chakabuma pepaki— akaibun betsabundi yuikin: —Jaskamaki. Juni pemaki. Nukunabu padanmiskiaki— adiaibun

Lucas 16:14

fariseobu peiwen kemukin bechipaimisbun Jesúsun yusian ninkakin kaxe wakin usainbu

Lucas 15:2

uinkin Moisin keneni chibanjaidamis fariseobu inun Diosun jancha kenenibu yusinananmisbun Jesús yuain yuinamekin yuikin: —Ja juninan, yuda chakabun Moisin keneni chibainsbuma beya wakin jatubetan pikiki— ikaibu

Lucas 5:21

Moisin jancha jatu yusinmisbu inun fariseobun ninkatan Jesúski sinatai june yuinamei: “Ja juni chakabuki. Dasibi nuku padain Dios keskakatsi ikikiki. Diosun besti jawen chakabu buatiduki”, ikaibun

Lucas 2:34

januxun Simeónen jatu yuikin: —Diosun jau matu duawakubainxanunwen— iwanan, María besti yuikin: —Na bakedan, jawen yuda Israelbu unanti wakatsi Diosun katuniki. Jawen yusian ninkatan jatiditun shinan betsa watan chibainbun inun jatiditun shinan betsa wama danankubainxankanikiki. Min bake danankin nupe kenujaidawen min juinti chachia keska wakin mia yumanwankin mia nuitapawaxankanikiki— anikiaki.

Mateus 22:15

janua fariseobu Jesúsun jatu jaska yuia ninkatan bua: “Jawawen taexun jaska waxun Jesús padantan Romano xanen ibu anuxun nun chitetidumenkain”, ika yubakatan

Mateus 21:46

Jesús achikatsis ibiai yudan kaianen: “Jesús Diosun jancha yuixunikaki”, ikaibuki datekin jawa achiyuabumaken

Mateus 21:23

janua Templo jemaintin anu jikixun Jesúsun yuda ichapabu kakape yuikin jatu yusianyan Diosbe nukunabu janchaxunika xanen ibubu inun xanen ibu betsabun Jesús nemanun ika bexun yukakin: —Na min eska waidan, ¿tsuan jawen kushipa mia yunuimawen min aki ikai? ¿Tsuan jawen kushipa mia inainmamen, min jaska wanunan?— akabu

Mateus 15:2

—Nukun xenipabun beya chibankin pidiama nun mepanui taemiski. ¿Jaskakin min tsumabun nukun xenipabun beya chibanma mepanuama pikanimenkain?— akabu

Mateus 12:24

jakia fariseobun jatun jancha ninkakin yuikin: —Jaskamaki. Na junidan, yushin chakabu xanen ibu Beelzebún kushipa jayaki. Jaska bestiwen taexun yushin chakabu jatu kainmaikiki— jatu waibun

Mateus 11:19

Janua eadi matun Juchi Kayabi Iyua juxun misi pepa pikin vino paepa aki en matube nawabiakunkainaya ea yuankin: “Uinwen. Pikeki. Paenkin romano pei bixunika chakabubu inun yuda chakabu betsabu jaibu wamiski”, ikin man eadi yuanmiski. Jamen nuku dabe nun pepabiaken Diosunabu kayabibu besti unanepakin jabun nukun yusian ninkatan nuku chibankanikiki— iwanan,

João 9:40

fariseo betsabun jabetan ninkatan Jesús yukakin: —¿Nun uianma nun bekun keska min nuku shinain?— akabu

João 10:20

betsabun yuikin: —Yushin chakabu jaya patapaki. ¿Jaskakin nun ninkakubaini ikanai?— jatu waibun

1 Pedro 2:23

Januxun Cristo ichabiabu jatu bebis kemanamei janchama iniki. Isin tenemabiabu jawen jatu dateti jancha kushipa taxnimama iniki. Jamen jaskama Diosun jatu unanti wakin chanima kaneismatun jau mekekubainun jawen jiwea jawen Epa Dios inankubainiki.